Tsev Neeg Ixayees

Nyob hauv lub roob moj sab qhua sab hnub tuaj ntawm teb chaws Kana-as, Yakhauj tos ntsib nws tus ntxaib, Exaus, thiab nws ntshai tsawv. Zaum tas los Yakhauj ntsib Exaus, kwv yees li 20 tawm xyoo ua ntej ntawd, Exaus xav muab nws tua tuag. Yakhauj siv ib hmo nrog ntuj sib ntsuas zog, thov kom tau ib txoj koob hmoov los ntawm Vajtswv los. Vim yog Yakhauj txoj kev ntseeg, kev rau rau siab, thiab qhov uas nws tsis kam tso tseg, Vajtswv teb nws cov lus thov. Hmo ntawd Vajtswv muab Yakhauj lub npe hloov ua Ixayees, ib lub npe uas txhais tau hais tias, suav lwm yam thiab, “Vajtswv ua rau koj yeej lawm” (Chiv Keeb 32:28, lus cim nram qab b).

Nov yog thawj zaug uas lub npe Ixayees tshwm sim hauv phau Vaj Lug Kub Npaivnpaum, thiab yog ib lub npe uas yeej meem muaj thoob plaws phau ntawv ntawd thiab thoob plaws liv xwm ntiaj teb. Tsis ntev lub npe hais txog ntau tshaj ib tug neeg xwb. Tus neeg Ixayees muaj 12 tug tub, thiab lawv cov xeeb leej xeeb ntxwv puav leej yog “tsev neeg Ixayees,” “xeem neeg Ixayees,” cov “me nyuam Ixayees,” los sis cov “Ixayees.”

Thoob plaws tej liv xwm ntiaj teb, Ixayees cov me nyuam saib qhov uas lawv muaj keeb kwm los ntawm ib lub xeem ntawm kaum ob xeem ntawm Ixayees rau nqi heev. Lawv keeb kwm tseem ceeb rau lawv tej kev khi lus nrog Vajtswv. Tus Thwj Tim Pov Lauj tshaj tawm hais tias nws yog “los ntawm lub xeem Npeyamis los” (Loos 11:1). Twb yog vim cov phiaj toog muaj “ib zaj keeb kwm qhia txog nws tej poj koob yawm txwv” Lihais xa nws cov tub mus tim Yeluxalees coj cov phiaj toog tawm los (1 Nifais 5:14). Lihais nrhiav pom tias nws txheeb Yauxej, thiab nws cov xeeb leej xeeb ntxwv txoj kev to taub hais tias lawv koom tsev neeg Ixayees yeej tseem ceeb rau lawv ib tiam dhau ib tiam txij thaum ntawd los mus.

Hauv lub Koom Txoos niaj hnub nim no, tej zaum nej yuav hnov txog Ixayees thaum hais tias “txoj kev sau Ixayees los ua ke.” Peb hu nkauj txog “Ixayees tus Txhiv Dim,” “Ixayees txoj Kev Cia Siab,” thiab “Cov Txwj Laug ntawm Ixayees.” Tej piv txwv no, peb tsis hais txog los sis hu nkauj txog lub nceeg vaj Ixayees yav thaum ub los sis lub teb chaws Ixayees niaj hnub nim no. Tsis yog li ntawd, peb hais txog cov neeg uas sau los ntawm tej teb chaws ntiaj teb los koom Yexus Khetos lub Koom Txoos. Peb hais txog cov neeg uas cia Vajtswv yeej hauv lawv lub neej, uas rau siab nrhiav kom tau Nws tej koob hmoov, thiab uas, dhau ntawm txoj kev cai raus dej, tau rais los mus ua Nws cov neeg uas tau nrog Nws sib khi lus. Ua Thawj Tswj Hwm Russell M. Nelson cov lus, qhov uas koom Ixayees txhais tau hais tias “kom cia Vajtswv yeej hauv peb lub neej, … kom cia Vajtswv muaj hwj huam hauv peb lub neej.”

Koj txoj koob hmoov yawg suab qhia saib koj koom lub xeem twg ntawm tsev neeg Ixayees. Qhov ntawd ntxim paub txog ntau tshaj ib yam hauv yus tsev neeg keeb kwm. Qhov ntawd kuj hais txog lub sij hawm tam sim no thiab lub sij hawm tom hauv ntej rau nej. Ua ib tug koom tsev neeg Ixayees txhais tau tias koj tau nrog Leej Txiv Saum Ntuj Ceeb Tsheej thiab Yexus Khetos sib khi lus. Qhov no txhais tau tias koj, ib yam li Anplaham, yuav yog “ib txoj koob hmoov” rau Vajtswv cov me nyuam (Chiv Keeb 12:2; Anplaham 2:9–11). Nws txhais tau tias, ua Petus cov lus, “tiam sis nej yog haiv neeg uas Vajtswv twb xaiv cia lawm, nej yog cov pov thawj uas ua Vajtswv txoj hauj lwm, nej yog haiv neeg uas dawb huv. Thiab nej yog Vajtswv haiv neeg uas Vajtswv yuav txib mus qhia tej hauj lwm tseem ceeb uas Vajtswv tau ua los lawm rau sawv daws paub. Vajtswv yog tus uas hu nej tawm hauv qhov tsaus ntuj los nyob hauv qhov pom kev” (1 Peter 2:9). Nws txhais tau tias koj “cia Vajtswv yeej”—hais tias koj yog ib tug uas “nrog Vajtswv kov yeej” thaum koj saib koj cov kev khi lus nrog Nws rau nqi.