ఆదికాండము 37–41

తరచుగా, అదృష్టము యోసేపును విడిచిపెట్టినట్లుగా కనబడింది, కానీ ప్రభువు ఎన్నడూ విడిచిపెట్టలేదు. మీరు యోసేపు కథ చదివినప్పుడు, ఇటువంటి ప్రశ్నలను ధ్యానించండి: ప్రభువుకు దగ్గరగా ఉండడానికి యోసేపు ఏమి చేసాడు? ప్రభువు ఎలా “అతనికి తోడై” ఉన్నారు? (ఆదికాండము 39; 40:1–19; 41:9–45 చూడండి). మీ జీవితంలో ప్రభువు ఉనికిని గుర్తించడంలో మీకు సహాయపడేలా యోసేపు కథ నుండి మీరు ఏమి నేర్చుకుంటారు?

మీ జీవితం గురించి మీరు కూడా అటువంటి ప్రశ్నలు అడగవచ్చు. మీ శ్రమ కాలములందు ప్రభువు మిమ్మల్ని విడిచిపెట్టలేదు అనడానికి మీరు చూసిన నిదర్శనమేమిటి? కుటుంబ సభ్యులు మరియు భవిష్యత్ తరములతో మీ అనుభవాలను మీరు ఎలా పంచుకోగలరో పరిగణించండి (1 నీఫై 5:14 చూడండి).

వాస్తవానికి, మీరు భవిష్యత్తులో వేరే శ్రమల‌ను కలిగి ఉంటారు. ఈ శ్రమలు మిమ్మల్ని ప్రభువు నుండి దూరం చేయకుండా ఉండేలా సహాయం చేయడానికి మీరు ఇప్పుడు ఏమి చేయవచ్చు? ఏది ఏమైనా ఆయనకు దగ్గరగా ఉండేలా మీ భవిష్యత్తును ప్రోత్సహించడానికి ఒక లేఖ రాయడాన్ని పరిగణించండి. మీరు యోసేపు జీవితం నుండి లేదా ఎల్డర్ డి. టాడ్ క్రిస్టాఫర్‌సన్ గారి సందేశం “దేవునితో మన సంబంధము” (లియహోనా, మే 2022, 78–81) నుండి అంతర్దృష్టులను చేర్చవచ్చు.

యోహాను 14:18; రోమా 8:28; ఆల్మా 36:3; సిద్ధాంతము మరియు నిబంధనలు 121:7–8 కూడా చూడండి.

యోసేపు కలల ద్వారా ప్రభువు నుండి సందేశాలను గ్రహించే బహుమానాన్ని కలిగియున్నాడు. ప్రభువు నుండి బయల్పాటును పొందుట మరియు గ్రహించుట గురించి ఆదికాండము 37:5–11; 40:5–8; 41:14–25, 37–38 నుండి మీరు ఏమి నేర్చుకోగలరు? ఉదాహరణకు, బయల్పాటు గ్రహించడానికి కష్టమైనదిగా కనబడినప్పుడు, యోసేపు మాదిరి నుండి మీరు ఏమి నేర్చుకోగలరు? (ఆదికాండము 40:8; 41:16 చూడండి).

ప్రభువు తన చిత్తమును మీకు ఎలా బయల్పరుస్తున్నారో ధ్యానించండి. ప్రభువు మీకిచ్చిన బయల్పాటుపై పని చేయడానికి మీరు ఏమి చేస్తున్నారు? మీరు ఆయన నుండి అదనపు నడిపింపును ఎలా వెదుకుతున్నారు?

లైంగిక పాపం చేయాలనే శోధనను ఎలా ఎదిరించాలనే దానిపై యోసేపు సలహా ఇవ్వవలసి వస్తే, అతను ఏమి చెబుతాడని మీరు అనుకుంటున్నారు? అతని అనుభవము గురించి ఆదికాండము 39లో మీరు చదివినప్పుడు, దీని గురించి ఆలోచించండి. ఉదాహరణకు, యోసేపు ఇలాంటి సమస్యలకు ఎలా స్పందించవచ్చో పరిశీలించండి:

• నేను ఏమి చేస్తున్నానో ఎవరికీ తెలియకపోతే, అదేమంత పెద్ద విషయం? (8–9 వచనాలు చూడండి).

• నేను నిరోధించడానికి ప్రయత్నిస్తున్నాను, కానీ శోధన ఆగేలా కనిపించడం లేదు (10వ వచనము చూడండి).

• శోధన బలంగా ఉన్న పరిస్థితిలో ఉన్నప్పుడు నేను ఏమి చేయాలి? (12వ వచనము చూడండి).

పవిత్రత యొక్క చట్టాన్ని పాటించడం ఎందుకు ముఖ్యమో మీరు ఎలా వివరిస్తారు? (యౌవనుల బలము కొరకు: ఎంపికలు చేయుటకు మార్గదర్శి, 23–28 చూడండి).

యోసేపు ఉదాహరణ, ఇతర రకాల శోధనలకు వర్తించగలదు. యోసేపు అనుభవాన్ని మనస్సులో ఉంచుకొని, శోధనను తప్పించుకొనుటకు మరియు ఎదిరించుటకు ఒక ప్రణాళికను తయారు చేయడాన్ని పరిగణించండి. ఉదాహరణకు, మీరు ఒక శోధన గురించి ఆలోచించవచ్చు మరియు దానిని నివారించే పరిస్థితులను మరియు శోధన తలెత్తినప్పుడు మీరు ఎలా “పారిపోతారో” వ్రాయవచ్చు.

మీ ప్రణాళికను తెలియజేయగల ఇతర లేఖనాలు కొన్ని ఇక్కడ ఉన్నాయి. శోధనను ఎదిరించడానికి రక్షకుడు మీకు ఎలా సహాయం చేయగలరనే దాని గురించి ప్రతీ ఒక్కదాని నుండి మీరు ఏమి నేర్చుకుంటారు? మత్తయి 4:1–11; 1 కొరింథీయులకు 10:13; 1 నీఫై 15:23–24; 3 నీఫై 18:17–18.

మీరు మీ ప్రణాళికను రూపొందిస్తున్నప్పుడు, గతంలో మీరు శోధన‌ను విజయవంతంగా నివారించిన లేదా ఎదిరించిన సమయాల గురించి ఆలోచించడం కూడా సహాయపడవచ్చు. రక్షకుడు మీకు ఎలా సహాయం చేసారు? (2 నీఫై 4:18–33 చూడండి).

ఫరో కలకు యోసేపు చెప్పిన భావము కరువు నుండి బయటపడడానికి చాలా తెలివైన మరియు ఆచరణాత్మకమైన సలహాలకు దారితీసింది (ఆదికాండము 41:15–57 చూడండి). ఈ వృత్తాంతములో ప్రభువు మీ కోసం ఎలాంటి ఆధ్యాత్మిక సందేశాలను కలిగి ఉండవచ్చో పరిగణించండి. మీ భవిష్యత్తులో కష్టాలను ఎదుర్కొనేందుకు మీరు సిద్ధపడాలని ఆయన కోరుకుంటున్నందుకు మీరు ఎలా భావిస్తున్నారు?

డేవిడ్ ఎ. బెడ్నార్, “మనము దీనితో వారిని నిరూపిద్దాం,” లియహోనా, నవ. 2020, 8–11 కూడా చూడండి.

• యోసేపు కుటుంబంలోని కష్టమైన భావాల గురించి చదవడం, కుటుంబ సభ్యులతో మనం ఎలా ప్రవర్తించాలి అనే దాని గురించి చర్చను పురికొల్పవచ్చు. ఆదికాండము 37 నుండి యోసేపు మరియు అతని సహోదరుల కథను చెప్పడానికి, మీరు ఈ నమూనాలోని చిత్రాలను లేదా “యోసేపు యొక్క ప్రేరేపిత కలలు” (పాత నిబంధన కథలు, 47–51లో) లోని చిత్రాలను ఉపయోగించవచ్చు. కథ గురించి వారికి తెలిసిన వివరాలను మీ పిల్లల్ని పంచుకోనివ్వండి. వారు యోసేపు కుటుంబంలో ఉన్నట్లు ఊహించుకోమని మీరు మీ పిల్లలను అడగవచ్చు. కుటుంబంలో సమాధానపరచువారిగా ఉండేందుకు వారు ఏమి చెప్పియుంటారు లేదా ఏమి చేసియుంటారు? ఉదాహరణకు, మన కుటుంబంలో “శాంతియుతంగా మాట్లాడడం” అంటే ఏమిటి? (4వ వచనము). దేవుని కుటుంబంలో యేసు క్రీస్తు ఎలా సమాధానపరచువారిగా ఉన్నారు?

  

  2:17

• మీ పిల్లలు కష్ట సమయాలను ఎదుర్కొన్నప్పుడు, ప్రభువు యోసేపుతో ఉన్నట్లుగా వారితో కూడా ఉంటారని వారు తెలుసుకోవాలి. యోసేపుకు జరిగిన కష్టమైన విషయాల జాబితాను తయారు చేయడానికి బహుశా మీరు మీ పిల్లలకు సహాయం చేయవచ్చు(ఆదికాండము 37:23–28; 39:20; లేదా పాత నిబంధన కథలు, 47–51, 52–56లో “యోసేపు యొక్క ప్రేరేపిత కలలు” మరియు “ఐగుప్తులో యోసేపు,” చూడండి). వారు ప్రతీ కష్టమును కనుగొన్న తర్వాత, “యెహోవా యోసేపునకు తోడైయుండెను” (ఆదికాండము 39:2) అని మళ్ళీ మళ్ళీ చెప్పమని మీ పిల్లలను ఆహ్వానించండి.

  

  2:17

  

  2:50

• బహుశా మీ పిల్లలు ఆదికాండము 39:1–3, 20–23లో “యెహోవా యోసేపునకు తోడైయుండెను” అనే వాక్యభాగానికి సంబంధించిన ప్రతి ఉదాహరణను మరియు అలాంటి వాక్యభాగాలను వెదకవచ్చు. ఈ వాక్యభాగానికి అర్థం ఏమిటని వారు భావిస్తున్నారో వారిని పంచుకోనివ్వండి. ప్రభువు మనకు తోడైయున్నారని మనకెలా తెలుస్తుంది? ఒక సవాలు సమయంలో దేవుడు మీకు తోడైయున్నారని మీరు ఎలా భావించారో ఒకరికొకరు చెప్పుకోండి.

• పోతీఫరు భార్య నుండి పారిపోతున్న యోసేపు ఉదాహరణను అనుసరించడంలో మీ పిల్లలకు సహాయపడగల వస్తుపాఠం ఇక్కడ ఉంది: యేసు క్రీస్తును మరియు సాతానును సూచించడానికి రెండు అయస్కాంతాలను ఉపయోగించండి. మనకు ప్రాతినిధ్యం వహించడానికి కాగితం క్లిప్ వంటి చిన్న లోహవస్తువును ఉపయోగించండి. తర్వాత మీ పిల్లలు ఆ వస్తువును అయస్కాంతానికి దగ్గరగా తరలించినప్పుడు లోహపు వస్తువుపై దాని ప్రభావం ఎలా బలంగా ఉంటుందో చూడనివ్వండి. ఆదికాండము 39:7–12లోనున్న యోసేపు అనుభవం ఈ సత్యాన్ని ఎలా వివరిస్తుంది? పాపం నుండి దూరంగా మరియు యేసుకు దగ్గరగా ఉండడానికి మనం ఏమి చేయవచ్చు?

  

  2:58

  సంగీతాన్ని ఉపయోగించండి. “కీర్తనలు మరియు ఇతర పవిత్రమైన పాటలు దేవుని ప్రేమను అనుభూతి చెందడానికి, ఆత్మను అనుభూతి చెందడానికి మరియు సువార్త సత్యాలను నేర్చుకోవడానికి పిల్లలకు సహాయపడగలవు. రాగాలు, లయలు మరియు సాధారణ కీర్తనలు రాబోయే సంవత్సరాల్లో సువార్త సత్యాలను గుర్తుంచుకోవడానికి పిల్లలకు సహాయపడగలవు. మీరు పిల్లలతో కలిసి పాడేటప్పుడు, పాటలలో బోధించిన సూత్రాలను కనుగొనడంలో మరియు అర్థం చేసుకోవడంలో వారికి సహాయపడండి” (రక్షకుని విధానములో బోధించుట, 32).

• వారు ఎదుర్కోగల శోధనల గురించి ఆలోచించడానికి మీ పిల్లలకు సహాయపడండి. ఈ శోధనల నుండి వారు ఎలా “పారిపోగలరో” నటించి చూపనివ్వండి.