ఆదికాండము 24–33

ఆదికాండము 24 చదువుతున్నప్పుడు, అబ్రాహాము తన కుమారుడైన ఇస్సాకు వివాహాన్ని ఎందుకంత ముఖ్యమైనదిగా భావించాడని మిమ్మల్ని మీరు ప్రశ్నించుకోండి. వివాహం దేవునికి ఎందుకు ముఖ్యమైనది?

దృఢమైన వివాహానికి మరియు కుటుంబానికి దోహదపడే ఏ లక్షణాలను మీరు రిబ్కాలో కనుగొన్నారు? (ప్రత్యేకించి 15–28, 57–61 వచనాలు చూడండి).

ఇస్సాకు మరియు రిబ్కాల సంస్కృతిలో, పెద్ద కొడుకు జన్మహక్కును పొందడం అంటే అర్థం, కుటుంబ సంరక్షణ కోసం ఎక్కువ బాధ్యతలతో పాటు గొప్ప వారసత్వాన్ని పొందడం. మీరు ఆదికాండము 25:29–34 చదువుతున్నప్పుడు, ఒక భోజనమునకు బదులుగా ఏశావు తన జ్యేష్టత్వమును వదులుకోవడానికి ఎందుకు సిద్ధపడియుండవచ్చో ఆలోచించండి. ఈ వృత్తాంతంలో మీ కోసం మీరు ఏ పాఠాలు కనుగొన్నారు? రెండు జాబితాలను రూపొందించడం సహాయపడవచ్చు: (1) దేవుడు మీకు ఇవ్వాలనుకుంటున్న నిత్య దీవెనలు మరియు (2) మీ దృష్టిని మరల్చగల లోక విషయాలు. తర్వాత మీరు “జన్మ హక్కును” మొదటి జాబితా నుండి మరియు “చిక్కుడుగింజల వంటకాన్ని” రెండవదాని నుండి వేరే పదాలతో భర్తీ చేసి, ఆ గద్యభాగాన్ని చదవవచ్చు. మీరు రక్షకునిపై మరియు ఆయన సువార్త యొక్క నిత్య దీవెనలపై ఎలా దృష్టి పెడతారు?

మత్తయి 6:19–33; ఎమ్. రస్సెల్ బాల్లర్డ్, “అతి ముఖ్యమైన దానిని జ్ఞాపకముంచుకోండి,” లియహోనా, మే 2023, 105–7 కూడా చూడండి.

రాతి దిండుపై నిద్రిస్తున్నప్పుడు, యాకోబు జీవితాన్ని మార్చే ఒక కలగన్నాడు. యాకోబు ఆ ప్రదేశానికి బేతేలు లేదా “దేవుని ఇల్లు” అని పేరు పెట్టడం, “నిశ్చయంగా ప్రభువు ఈ స్థలంలో ఉన్నాడు” (ఆదికాండము 28:16) అని ప్రకటించడం చాలా పవిత్రమైన అనుభవం.

మీరు ఆదికాండము 28 చదువుతున్నప్పుడు, ఏది ఈ అనుభవాన్ని యాకోబు‌కు అంత పవిత్రమైనదిగా చేసిందని మిమ్మల్ని మీరు ప్రశ్నించుకోవచ్చు. ఆ సమయంలో అతను ఏమి అనుభవిస్తున్నాడు? అతను ఎలా భావించి ఉండవచ్చు? ప్రభువు యొక్క మందిరాన్ని మీకు గుర్తు చేసే పదాలు మరియు వాక్యభాగాల కొరకు మీరు 10–22 వచనాలలో చూడవచ్చు. దేవుడు, ఆయన మందిరము మరియు ఆయన నిబంధనల గురించి మీరు పొందే మనోభావాలేవి?

ఈ నమూనా చివరలో యాకోబు కలని వర్ణించే వర్ణచిత్రం ఉంది; మీరు చదివేటప్పుడు దానిని చూడవచ్చు. మీరు అతని కల గురించి మీ స్వంత కళాత్మక వర్ణనను చేయవలసినట్లయితే, మీరు ఏమి చేస్తారు? మీరు కథ నుండి ఏ సత్యాలను చిత్రీకరించడానికి ప్రయత్నిస్తారు?

దేవునికి దగ్గరగా భావించడానికి దేవాలయము మీకేవిధంగా సహాయపడుతుంది? అధ్యక్షులు రస్సెల్ ఎమ్. నెల్సన్ గారి సందేశము “దేవాలయము మరియు మీ ఆత్మీయ పునాది” (లియహోనా, నవ. 2021, 93–96) లో ఈ ప్రశ్నకు జవాబుల కొరకు చూడడాన్ని పరిగణించండి. ప్రధాన చేతిపుస్తకము, 27.2 (సువార్త గ్రంథాలయము)లో ప్రభువు మందిరము యొక్క నిబంధనలు మరియు దీవెనలను పునర్వీక్షించాలని కూడా మీరు కోరుకోవచ్చు. ఈ నిబంధనలను పాటించడం దేవుని శక్తిని మీ జీవితంలోకి ఎలా తెస్తుంది?

మీరు ఆదికాండము 29:31–35 మరియు 30:1–24 చదువుతున్నప్పుడు, రాహేలు మరియు లేయాపట్ల దేవుని యొక్క కనికరమును వర్ణించే పదాల కొరకు చూడండి. దేవుడు ఎలా “[మీ] శ్రమను చూచియున్నాడు” మరియు మిమ్మల్ని “జ్ఞాపకము చేసుకున్నాడో” (ఆదికాండము 29:32; 30:22) ధ్యానించండి.

యాకోబు కనానుకు తిరిగి వెళ్లినప్పుడు, అతని సహోదరుడైన ఏశావు అతడిని ఎలా స్వీకరిస్తాడోనని అతడు “మిక్కిలి భయపడి, తొందరపడెను” (ఆదికాండము 32:7). మీరు ఆదికాండము 32–33 చదువుతున్నప్పుడు, మీ స్వంత కుటుంబ సంబంధాల గురించి—బహుశా, ప్రత్యేకించి స్వస్థత అవసరమైన దాని గురించి ఆలోచించండి. ఈ కథ ఎవరో ఒకరిని సమీపించడానికి మిమ్మల్ని ప్రేరేపించవచ్చు. ఇటువంటి ప్రశ్నలు మీ పఠనమును నడిపించడానికి సహాయపడవచ్చు:

• ఏశావును కలుసుకోవడానికి యాకోబు ఎలా సిద్ధపడ్డాడు?

• ఆదికాండము 32:9–12లో యాకోబు యొక్క ప్రార్థన గురించి మీరు ప్రత్యేకంగా గుర్తించినదేమిటి?

• ఏశావు యొక్క మాదిరి నుండి క్షమాపణ గురించి మీరేమి నేర్చుకుంటారు?

• కుటుంబ అనుబంధాలను బాగు చేయడానికి రక్షకుడు మనకు ఎలా సహాయపడగలరు?

• రిబ్కా దయ యొక్క అద్భుతమైన ఉదాహరణను ఎత్తిచూపడానికి ఆదికాండము 24:10–21 లోని కథను మీరు సంక్షిప్తం చేస్తున్నప్పుడు, మీ పిల్లలకు దిగువ చిత్రాన్ని లేదా ఈ వారపు ప్రోత్సాహకార్యక్రమ పేజీని చూపవచ్చు. కథను అభినయించడాన్ని మీ పిల్లలు ఆనందించవచ్చు. ఇది మీరు మరియు మీ పిల్లలు చూసిన దయతో కూడిన చర్యల గురించి సంభాషణకు దారితీయవచ్చు.

• రిబ్కా వలె మనం ఎలా దయ చూపగలం?

• మీ పిల్లలు ఆదికాండము 25:21–34లోని కథను అర్థం చేసుకోవడానికి (పాత నిబంధన కథలు, 38–41లో) “యాకోబు మరియు ఏశావు”ను ఉపయోగించడాన్ని పరిగణించండి. ఏశావు తన జన్మహక్కును చిక్కుడుగింజల వంటకం కోసం ఇచ్చివేయాలా వద్దా అని వారి సలహా కోరినట్లు మీ పిల్లలు ఊహించుకోవచ్చు. వారు అతనికి ఏమి చెబుతారు?

  

  2:5

• మీకు మరియు మీ పిల్లలకు ఏ విషయాలు శాశ్వతంగా ముఖ్యమైనవి? బహుశా మీ పిల్లలు ఈ విషయాలను సూచించే చిత్రాలు లేదా వస్తువులను కనుగొనవచ్చు. ఈ విషయాలు మనకు ముఖ్యమైనవని మనం ప్రభువుకు ఎలా చూపించగలము?

• మీరు ఆదికాండము 28:10–22 కలిసి చదువుతున్నప్పుడు, మన నిబంధనలు నిచ్చెనలా ఎలా ఉన్నాయో చెప్పడానికి మీరు ఒక నిచ్చెన లేదా మెట్లు (లేదా ఈ నమూనా చివరలో ఉన్న చిత్రం వంటిది) ఉపయోగించవచ్చు. బహుశా మీ పిల్లలు నిచ్చెన ఎక్కినట్లు నటించి, ఒక్కో అడుగు వేసేటప్పుడు, మనం దేవునికి లోబడతామని వాగ్దానం చేసే సమయాల గురించి మాట్లాడవచ్చు, అంటే మనం బాప్తిస్మం తీసుకున్నప్పుడు, సంస్కారమును తీసుకున్నప్పుడు లేదా దేవాలయానికి వెళ్ళినప్పుడు వంటివి. మన నిబంధనలు మనల్ని దేవునికి ఎలా దగ్గర చేస్తాయి?

• ఈ వచనాలను పరిచయం చేయడానికి, అనేక సంవత్సరాలు కఠినభావాలు కలిగియున్న తర్వాత, యాకోబు మళ్ళీ ఏశావును కలవబోతున్నాడని మీరు వివరించవచ్చు. ఆదికాండము 32:6–11 కలిసి చదవండి. యాకోబు ఎలా భావించాడు? సహాయం పొందడానికి అతడు ఏమి చేసాడు? యాకోబు ప్రార్థనకు ప్రభువు ఎలా జవాబిచ్చారో కనుగొనడానికి ఆదికాండము 33:1–4 కలిసి చదవండి. యాకోబు మరియు ఏశావు ఈ రోజు మనతో మాట్లాడగలిగినట్లయితే, మన కుటుంబములో వివాదము ఉన్నప్పుడు, మనకు సహాయపడేందుకు వాళ్ళు ఏమి చెప్పవచ్చు?