උත්පත්ති 37-41

නැවත නැවතත්, වාසනාව යෝසෙප්ව අත්හරින බවක් පෙනෙන්නට තිබුණත්, ස්වාමින්වහන්සේ කිසි විටෙකත් එසේ කළේ නෑ. ඔබ යෝසෙප්ගේ කතාව කියවන විට, මෙවැනි ප්‍රශ්න ගැන මෙනෙහි කරන්න: ස්වාමින්වහන්සේට සමීපව සිටීමට යෝසෙප් කළේ මොනවාද? ස්වාමින්වහන්සේ “ඔහු සමඟ” සිටියේ කෙසේද? (බලන්න උත්පත්ති 39; 40:1–19; 41:9–45). ඔබගේ ජීවිතයේ ස්වාමින්වහන්සේගේ සහභාගීකම හඳුනාගැනීමට උපකාර වන, යෝසෙප්ගේ කතාවෙන් ඔබ ඉගෙනගන්නා දේවල් මොනවාද?

ඔබත් ඔබේ ජීවිතය ගැන එවැනි ප්‍රශ්න අසන්න පුළුවන්. අභියෝග වලදී ස්වාමින්වහන්සේ ඔබව අත්හැරියේ නැති බවට ඔබ දැක ඇති සාක්ෂි මොනවාද? ඔබේ අත්දැකීම් පවුලේ සාමාජිකයන් සහ අනාගත පරම්පරාවන් සමඟ බෙදා ගත හැකි ආකාරය ගැන සලකා බලන්න (බලන්න 1 නෙපී 5:14).

ඇත්ත වශයෙන්ම, අනාගතයේදී ඔබට තවත් අභියෝග පැමිණෙයි. මෙම අභියෝග ඔබව ස්වාමින්වහන්සේගෙන් ඈත් නොකරන බව වගබලාගැනීමට ඔබට දැන් කළ හැක්කේ මොනවාද? කුමක් වුවත් උන්වහන්සේට සමීපව සිටීමට අනාගතයේ සිටින ඔබව දිරිමත් කිරීම සඳහා ලිපියක් ලිවීම ගැන සලකා බලන්න. ඔබට යෝසෙප්ගේ ජීවිතයෙන් හෝ වැඩිහිටි ඩී. ටොඩ් ක්‍රිස්ටෝෆර්සන්ගේ “දෙවියන්වහන්සේ සමග අපගේ සම්බන්ධතාවය” (ලියහෝනා, මැයි 2022, 78–81) යන පණිවිඩයෙන් අදහස් ලබාගන්න පුළුවන්.

තවත් බලන්න යොහන් 14:18; රෝම 8:28; ඇල්මා 36:3; දහම සහ ගිවිසුම් 121:7–8.

යෝසෙප්ට සිහින තුළින් ස්වාමින්වහන්සේගෙන් පණිවිඩ තේරුම් ගැනීමේ දීමනාවක් තිබුණා. ස්වාමින්වහන්සේගෙන් එළිදරව් සහ අවබෝධය ලැබීම ගැන, උත්පත්ති 37:5–11; 40:5–8; 41:14–25, 37–38 තුළ ඔබට ඉගෙනගත හැකි දේවල් මොනවාද? උදාහරණයක් වශයෙන්, එළිදරව්ව තේරුම් ගැනීමට අපහසු බව පෙනෙන විට යෝසෙප්ගේ ආදර්ශයෙන් ඔබට ඉගෙනගත හැක්කේ කුමක්ද? (බලන්න උත්පත්ති 40:8; 41:16).

ස්වාමින්වහන්සේ උන්වහන්සේගේ කැමැත්ත ඔබට හෙළි කරන්නේ කෙසේදැයි මෙනෙහි කරන්න. උන්වහන්සේ ඔබට ලබා දී ඇති එළිදරව් මත ක්‍රියා කිරීමට ඔබ කරන්නේ මොනවාද? ඔබ උන්වහන්සේගෙන් අමතර මගපෙන්වීමක් සොයන්නේ කෙසේද?’

ලිංගික පාපයක් කිරීමේ පෙලඹීම වළක්වා ගන්නේ කෙසේද යන්න ගැන යෝසෙප් උපදෙස් දෙනවා නම්, ඔහු කුමක් කියයිද? ඔබ උත්පත්ති 39 තුළ ඔහුගේ අත්දැකීම කියවන විට මේ ගැන සිතන්න. උදාහරණයක් වශයෙන්, මෙවැනි ගැටලුවලට යෝසෙප් ප්‍රතිචාර දැක්විය හැකි ආකාරය ගැන සලකා බලන්න:

• මා කරන්නේ කුමක්දැයි කිසිවෙකු නොදන්නේ නම්, එහි ඇති බරපතල තත්වය කුමක්ද? (බලන්න 8–9 පද).

• මම විරුද්ධ වීමට උත්සාහ කරන නමුත් පෙළඹවීම නතර වන බවක් පෙනෙන්නට නැහැ (බලන්න 10 වෙනි පදය).

• පරීක්ෂාව ශක්තිමත් වන අවස්ථාවක මා කළ යුත්තේ කුමක්ද? (බලන්න 12 වෙනි පදය).

පවිත්‍රබව පිළිබඳ නීතියට කීකරු වීම වැදගත් වන්නේ මන්දැයි ඔබ පැහැදිලි කරන්නේ කෙසේද? (බලන්න යෞවනයේ ශක්තිය සඳහා: තේරීම් කිරීම සඳහා මාර්ගෝපදේශයක්, 23–28).

ඇත්තවශයෙන්ම, යෝසෙප්ගේ ආදර්ශය වෙනත් ආකාරයේ පරීක්ෂාවන්ටද අදාළ කරගන්න පුළුවන්. යෝසෙප්ගේ අද්දැකීම මනසේ තබාගෙන, පරීක්ෂාවන් වලින් වැළකී සිටීමට සහ ඊට එරෙහි වීමට සැලැස්මක් සකස් කිරීම ගැන සලකා බලන්න. උදාහරණයක් වශයෙන්, ඔබට පරීක්ෂාවක් ගැන සිතමින්, එය වළක්වා ගත යුතු අවස්ථා සහ එම පරීක්ෂාව ඇති වූ විට ඔබ “පලා යන්නේ” කෙසේද කියා ඔබට ලියන්න පුළුවන්.

මෙන්න ඔබේ සැලැස්මට උදව්වක් විය හැකි තවත් ශුද්ධලියවිලි පද කිහිපයක්. පරීක්ෂාවට එරෙහි වීමට ගැලවුම්කරුවාණන්ට ඔබට උපකාර කළ හැකි ආකාරය ගැන ඔබ මේ එක් එක් පද වලින් ඉගෙන ගන්නේ මොනවාද? මතෙව් 4:1–11; 1 කොරින්ති 10:13; 1 නෙපී 15:23–24; 3 නෙපී 18:17–18.

ඔබ ඔබේ සැලැස්ම සකස් කරන විට, ඔබ පරීක්ෂාවන් වලින් සාර්ථකව වැළකී සිටි හෝ ප්‍රතිරෝධය දැක්වූ අතීතයේ අවස්ථා ගැන සිතීමද ඒ සඳහා උදව්වක් වෙන්න පුළුවන්. ගැලවුම්කරුවාණන් ඔබට උපකාර කළේ කෙසේද? (බලන්න 2 නෙපී 4:18–33).

පාරාවෝගේ සිහිනය පිළිබඳ යෝසෙප්ගේ අර්ථ නිරූපණය, සාගතයකින් බේරීම සඳහා ඉතා ප්‍රඥාවන්ත සහ ප්‍රායෝගික උපදෙස් ලබා දීමට හේතු වුණා (බලන්න උත්පත්ති 41:15–57). මෙම වාර්තාවේ ස්වාමින්වහන්සේගෙන් ඔබට තිබිය හැකි අධ්‍යාත්මික පණිවිඩ මොනවාදැයි සලකා බලන්න. අනාගතයේදී ඔබ මුහුණදෙන දුෂ්කරතා සඳහා ඔබ සූදානම් වීම, උන්වහන්සේට අවශ්‍ය බව ඔබට හැඟෙන්නේ කෙසේද?

තවත් බලන්න ඩේවිඩ් ඒ. බෙඩ්නර්, “මේ ආකාරයෙන් අපි ඔවුන්ව පරීක්ෂා කර බලන්නෙමු ,” ලියහෝනා, නොවැම්බර් 2020, 8–11.

• යෝසෙප්ගේ පවුල තුළ ඇති දුෂ්කර හැඟීම් ගැන කියවීමෙන්, පවුලේ සාමාජිකයන්ට අප සැලකිය යුතු ආකාරය පිළිබඳ සාකච්ඡාවක් ඇතිවෙන්න පුළුවන්. උත්පත්ති 37 තුළින් යෝසෙප් සහ ඔහුගේ සහෝදරයන්ගේ කතාව පැවසීමට, ඔබට මෙම දළ සටහනේ ඇති පින්තූර භාවිතා කරන්න පුළුවන්. ඔබේ දරුවන්ට මෙම කතාව ගැන ඔවුන් දන්නා විස්තර බෙදා ගැනීමට ඉඩ දෙන්න. ඔවුන් යෝසෙප්ගේ පවුලේ අය යැයි සිතන ලෙස ඔබට ඔබේ දරුවන්ගෙන් ඉල්ලා සිටින්න පුළුවන්. පවුල තුළ සාමය ඇති කරන්නෙකු වීමට ඔවුන් කරන හෝ කියන දේවල් මොනවා වෙයිද? උදාහරණයක් වශයෙන්, අපේ පවුල තුළ “සාමකාමීව කතා කිරීම” යන්නෙන් අදහස් කරන්නේ කුමක්ද? (4 වෙනි පදය). යේසුස් ක්‍රිස්තුස්වහන්සේ දෙවියන්වහන්සේගේ පවුල තුළ සාමය ඇති කරන්නෙකු වන්නේ කෙසේද?

  

  2:17

• ඔබේ දරුවන් දුෂ්කර කාලවලට මුහුණ දෙන විට, ස්වාමින්වහන්සේ යෝසෙප් සමඟ සිටියාක් මෙන්, ඔවුන් සමඟත් සිටින බව ඔවුන් දැනගත යුතුයි. සමහරවිට ඔබට යෝසෙප්ට සිදු වූ දුෂ්කර දේවල් ගැන ලැයිස්තුවක් සෑදීමට ඔබේ දරුවන්ට උදව් කරන්න පුළුවන් (බලන්න උත්පත්ති 37:23–28; 39:20). ඔවුන් සොයා ගන්නා සෑම දුෂ්කරතාවයකටම පසුව, “ස්වාමින්වහන්සේ යෝසෙප් සමඟ සිටි සේක” (උත්පත්ති 39:2) යන වාක්‍ය නැවත නැවත කියන්නට ඔබේ දරුවන්ට ආරාධනා කරන්න.

  

  2:17

  

  2:50

• සමහරවිට ඔබේ දරුවන්ට උත්පත්ති 39:1–3, 20–23 තුළ “ස්වාමින්වහන්සේ යෝසෙප් සමඟ සිටි සේක” යන වාක්‍ය ඛණ්ඩය සහ ඒ හා සමාන වාක්‍ය ඛණ්ඩ සොයන්න පුළුවන්. මෙම වාක්‍ය ඛණ්ඩයේ තේරුම ගැන ඔවුන් සිතන දේ බෙදාගැනීමට ඔවුන්ට ඉඩ දෙන්න. ස්වාමින්වහන්සේ අප සමඟ සිටින බව අප දන්නේ කෙසේද? අභියෝගාත්මක කාලයකදී දෙවියන්වහන්සේ ඔබ සමඟ සිටි බව ඔබට හැඟුණු ආකාරය ගැන එකිනෙකාට කියන්න.

• පොතිපර්ගේ භාර්යාව වෙතින් පලා යාමේ යෝසෙප්ගේ ආදර්ශය අනුගමනය කිරීමට ඔබේ දරුවන්ට උපකාර කළ හැකි භාණ්ඩ යොදාගන්නා පාඩමක් මෙන්න: යේසුස් ක්‍රිස්තුස්වහන්සේව සහ සාතන්ව නියෝජනය කිරීමට චුම්බක දෙකක් භාවිතා කරන්න. අපව නියෝජනය කිරීමට කඩදාසි ක්ලිප් එකක් වැනි කුඩා ලෝහ වස්තුවක් භාවිතා කරන්න. ඉන්පසු එම වස්තුව සමීපයට ගෙන යන විට ලෝහ වස්තුවට චුම්බකයකයේ බලපෑම වඩාත් ප්‍රබල වන්නේ කෙසේදැයි බැලීමට ඔබේ දරුවන්ට ඉඩ දෙන්න. උත්පත්ති 39:7–12 තුළ යෝසෙප්ගේ අත්දැකීම මෙම සත්‍යය නිදර්ශනය කරන්නේ කෙසේද? පාපයෙන් ඈත් වී යේසුස්වහන්සේට සමීප වීමට අපට කළ හැක්කේ මොනවාද?

  

  2:58

  සංගීතය භාවිතා කරන්න. “ගීතිකා සහ අනෙකුත් පූජනීය ගීත වලට දරුවන්ට දෙවියන්වහන්සේගේ ආදරය දැනීමට, ආත්මයාණන්වහන්සේව දැනීමට, සහ ශුභාරංචි සත්‍යයන් ඉගෙනගැනීමට උපකාර කළ හැකිය. තනු, රිද්ම, සහ සරල තාල ඉදිරි වසර සඳහා ශුභාරංචි සත්‍යයන් මතකතබාගැනීමට දරුවන්ට උපකාර කරයි. ඔබ දරුවන් සමඟ ගායනා කරන විට, එම ගීත වල උගන්වන මූලධර්ම සොයාගැනීමට සහ තේරුම්ගැනීමට ඔවුන්ට උපකාර කරන්න” (ගැලවුම්කරුවාණන්ගේ ආකාරයට ඉගැන්වීම, 32).

• ඔබේ දරුවන්ට මුහුණදීමට සිදු විය හැකි පරීක්ෂාවන් ගැන සිතීමට ඔවුන්ට උපකාර කරන්න. මෙම පරීක්ෂාවන්ගෙන් “පලා යා හැකි” ආකාරය රඟ දැක්වීමට ඔවුන්ට ඉඩ දෙන්න.