Genesis 37–41

Wulaj wulaj, anchal kikanab’aak xjunes laj Jose xb’aan li ruchich’och’, a’b’an maajun wa kikanab’aak xb’aan li Qaawa’. Naq yooqat chirilb’al li seraq’ chirix laj Jose, k’oxlaheb’ li patz’om jo’eb’ a’in: K’a’ru kixb’aanu laj Jose re taakanaaq chi nach’ rik’in li Qaawa’? Chan ru naq li Qaawa’ “kiwan rik’in”? (chi’ilmanq Genesis 39; 40:1–19; 41:9–45). K’a’ru nakatzol sa’ xseraq’ laj Jose li naru tatxtenq’a chixk’eeb’al reetal lix wanjik li Qaawa’ sa’ laa yu’am?

Maare nakapatz’ ajwi’ a’an sa’ laa yu’am. Ma nakawil reetalil naq li Qaawa’ ink’a’ nakatxkanab’ aajunes sa’ laa ch’a’ajkilal? K’oxla chan ru taaye resil laa yu’am reheb’ laa komon ut reheb’ aawalal aak’ajol (chi’ilmanq 1 Nefi 5:14).

Ch’olch’o naq taachalq xkomon chik laa ch’a’ajkilal. K’a’ru naru nakab’aanu anajwan re naq li ch’a’ajkilal a’an ink’a tatxnajtob’resi rik’in li Qaawa’? Maare naru nakatz’iib’a jun hu re xwaklesinkil laa ch’ool chalel chi kanaak rik’in li Qaawa’, maak’a’ naxye k’a’ru taak’ul. Naru nakataw laa na’leb’ rik’in xyu’am laj Jose malaj sa’ li raatin li Elder D. Todd Christofferson, “Li qawanjik rik’in li Dios” (Jolomil ch’utub’aj-ib’ re abril 2022).

Chi’ilmanq ajwi’ Jwan 14:18; Romanos 8:28; Alma 36:3; Tzol’leb’ ut Sumwank 121:7–8; “Chatwanq wikʼin, ak yoo chi ewuuk,” Eb’ li B’ich, 98.

Laj Jose k’eeb’il chaq xmaatan chixtz’ilb’al rix li raatin li Qaawa’ sa’eb’ li matk’. K’a’ru nakatzol sa’ Genesis 37:5–11; 40:5–8; 41:14–25, 37–38 chirix xk’ulb’al ut xtawb’al ru li na’leb’ k’utb’esinb’il xb’aan li Qaawa’? K’a’ru naru taatzol rik’in laj Jose naq anchal ch’a’aj xtawb’al ru li na’leb’ li nakak’ul? (chi’ilmanq Genesis 40:8; 41:16).

K’oxla chan ru naq li Qaawa’ naxk’utb’esi li rajom chawu. K’a’ru yookat chixb’aanunkil re xyu’aminkil li na’leb’ naxk’utb’esi chawu? Chan ru yookat chixsik’b’al xkomon chik lix b’eresihom?

Wi ta laj Jose tixye raj qe chan ru taqatz’eqtaana li aaleek re tz’ejwalejil maak, k’a’ raj ru tixye? K’oxla a’in naq yooqat chirilb’al li kixnumsi a’an sa’ Genesis 39. Qayehaq, k’oxla k’a’ raj ru tixye laj Jose re xsumenkileb’ li na’leb’ a’in:

• Wi maa’ani chik nanawok re k’a’ru yookin, k’a’ru xch’a’ajkilal a’an? (che’ilmanq li raqal 8–9).

• Ninyal xtz’eqtaanankil, a’b’an li aaleek ink’a’ na’el (chi’ilmanq li raqal 10).

• K’a’ raj ru tinb’aanu naq jwal nim li aaleek sa’ li wankin wi’? (chi’ilmanq li raqal 12).

Chan ru naq taach’olob’ k’a’ut naq aajel ru xpaab’ankil li chaq’rab’ re saq ru ch’oolej? (chi’ilmanq Choq’ re Xkawilaleb’ li Saaj: Jun tenq’ re xsik’b’al ru laa b’e, 23–28).

Li kixnumsi laj Jose naru nokoxtenq’a rik’ineb’ li jaar paay chi aaleek naqak’ul. Rik’in li kixnumsi laj Jose sa’ aak’a’uxl, naru taakuub’ chan ru taatz’eqtaana li aaleek. Maare naru nakak’oxla jun aaleek ut taatz’iib’a b’ar ink’a’ tat-ok xb’aan naq aran nawakli li aaleek a’an, ut chan ru naq “tat-eeleliq” wi nachal li aaleek a’an.

A’ineb’ junjunq chi raqal sa’ li loq’laj hu naru nakate’xtenq’a. K’a’ru nakatzol sa’ li junjunq chirix li tenq’ naxk’e li Qaawa’ aawe re xtz’eqtaanankil li aaleek? Mateo 4:1–11; 1 Korintios 10:13; 1 Nefi 15:23–24; 3 Nefi 18:17–18.

Naq yooqat chixk’uub’ankil aana’leb’, us ajwi’ k’oxlak chirix li hoonal naq katru chi elk chiru malaj chixtz’eqtaanankil li aaleek. Chan ru naq li Qaawa’ katxtenq’a? (chi’ilmanq 2 Nefi 4:18–33).

Lix k’utb’al xyaalalil lix matk’ laj Farahon xb’aan laj Jose kixk’am li chaab’il na’leb’ chirix xnumsinkil jun we’ej (chi’ilmanq Genesis 41:15–57). K’oxlaheb’ li musiq’ejil na’leb’ naraj xk’utb’al li Qaawa’ chawu sa’ li seraq’ a’in. K’a’ru naraj a’an naq taab’aanu re xkawresinkil aawib’ chiru li ch’a’ajkilal taachalq chalel?

Chi’ilmanq ajwi’ David A. Bednar “Ut taqayaleb’ rix rik’in a’in,” Jolomil ch’utub’aj-ib’ re octubre 2020.

• Rilb’al resil li wech’ok-ib’ sa’ xjunkab’al laj Jose naru nekexxtenq’a chixtz’ilb’al rix chan ru tento toowanq rik’ineb’ li komon sa’ li qajunkab’al. Seraq’i li kixk’ul laj Jose ut eb’ li ras sa’ Genesis 37, malaj naru nakawoksiheb’ li jalam-uuch wankeb’ sa’ li tusleb’ aatin a’in malaj sa’ “Lix musiq’anb’il matk’ laj Jose” (sa’ Eb’ li Esilal sa’ li Najter Chaq’rab’, 47–51). Kanab’eb’ laa kok’al chixwotzb’al k’a’ru neke’xnaw chirix li seraq’. Naru nakapatz’ reheb’ laa kok’al naq te’xk’oxla naq wankeb’ sa’ lix junkab’al laj Jose. K’a’ raj ru ke’xye malaj ke’xb’aanu re xk’ojob’ankil li tuqtuukilal sa’ xjunkab’al? K’a’ru naraj naxye aatinak sa’ tuqtuukilal sa’ li qajunkab’al? (chi’ilmanq raqal 4). Chan ru naq li Jesukristo naxk’ojob’ li tuqtuukilal sa’ lix junkab’al li Dios?

  

  2:17

• Naq laa kok’al te’xk’ul li ch’a’ajkilal, tento te’xnaw naq li Qaawa’ taawanq rik’ineb’, jo’ naq kiwan rik’in laj Jose. Naru nakatenq’aheb’ laa kok’al chixtz’iib’ankileb’ li ch’a’ajkilal kixnumsi laj Jose (chi’ilmanq Genesis 37:23–28; 39:20; malaj “Lix musiq’anb’il matk’ laj Jose” ut “Laj Jose sa’ Egipto,” sa’ Eb’ li Esilal sa’ li Najter Chaq’rab’, 47–51, 52–56). Chirix xtawb’al li junjunq chi ch’a’ajkilal, patz’ reheb’ laa kok’al naq te’xye, “Li Qaawa’ kiwan rik’in laj Jose” (Genesis 39:2).

  

  2:17

  

  2:50

• Laa kok’al naru neke’ril Genesis 39:1–3, 20–23 re xtawb’al jarub’ sut nayeeman “li Qaawa’ wan rik’in laj Jose” ut xkomoneb’ chik li ch’ol aatin chanchan a’an. Kanab’eb’ chixyeeb’al k’a’ru naraj naxye li ch’ol aatin a’an. Chan ru naqanaw naq li Qaawa’ wan qik’in? Yehomaq eerib’ cherib’il eerib’ chan ru naq xereek’a naq li Dios kiwan eerik’in sa’ jun ch’a’ajkilal.

• A’in jun ch’ina k’anjel naru tixtenq’aheb’ laa kok’al chixtaaqenkil xb’aanuhom laj Jose naq ki’eelelik chiru li rixaqil laj Potifar: Taawoksiheb’ wiib’ li iman li te’reetali li Jesukristo ut laj Satanas. Oksi jun ch’ina k’anjeleb’aal ch’iich’ okenaq, jo’ jun clip, li tooreetali. Kanab’abeb’ laa kok’al chixk’eeb’al reetal naq lix wankil li iman sa’ xb’een li k’anjeleb’aal naniman naq neke’nach’o. Chan ru naq li kixnumsi laj Jose sa’ Genesis 39:7–12 naxk’ut xyaalal li na’leb’ a’in? K’a’ru naru taqab’aanu re xnajotb’resinkil qib’ rik’in li maak ut xnacho’b’resinkil qib’ rik’in li Jesus? Li video “La tentación se desvanece al buscar a Cristo en todo pensamiento” (Biblioteca del Evangelio) ut jun li b’ich jo’ “Rajlal nawaj aawu” (Eb’ li B’ich, 53) naru natenq’an sa’ li aatinak.

  

  2:58

  Oksiheb’ li b’ich. “Eb’ li b’ich naru te’xtenq’aheb’ li kok’al chireek’ankil lix rahom li Dios, chireek’ankil li Musiq’ej, ut chixtzolb’al li yaal chirix li evangelio. Lix yaab’ li b’ichank, li son, ut li kok’ rima naru te’xtenq’aheb’ li kok’al chixjultikankil lix na’leb’ li evangelio sa’ li chalel. Naq nakatb’ichan rik’ineb’ li kok’al, tenq’aheb’ chixk’eeb’aleb’ reetal ut chixtawb’aleb’ ru li na’leb’ k’utb’il sa’eb’ li b’ich” (Li K’utuk jo’ li Kolonel, 32).

• Tenq’aheb’ laa kok’al chixk’oxlankileb’ li aaleek naru te’xk’ul. Kanab’eb’ chixk’utb’esinkil chan raj ru “te’eeleliq” chiruheb’ li aaleek a’an.