Genesis 24–33

Naq yooqat chirilb’al Genesis 24, patz’ aawib’ k’a’ut naq laj Abraham jwal naxik xk’a’uxl chirix lix sumlajik laj Isaak, li ralal. K’a’ut naq aajel ru li sumlaak choq’ re li Dios?

K’a’ruheb’ lix chaab’ilal xRebeka nakawil li te’xk’e chi usaak li sumlaak ut li junkab’al? (che’ilmanq li raqal 15–28, 57–61).

Chi’ilmanq ajwi’ Temas y preguntas, “Matrimonio,” Biblioteca del Evangelio.

Sa’ xkutankil laj Isaak ut xRebeka, li alalb’ej xb’een yo’lajenaq kixk’ul li xb’eenil awa’b’ejil, li naraj naxye naq nim wi’chik li reechanihom naxk’ul, a’ut nim wi’chik ajwi’ xteneb’ankil chirilb’al lix junkab’al. Naq yooqat chirilb’al Genesis 25:29–34, k’oxla k’a’ut naq laj Esau kiwan xch’ool chixk’ayinkil lix xb’eenil alalb’ejil re naq tixk’ul li tzakemq. Ma wan li na’leb’ nakataw choq’ aawe sa’ li seraq’ a’an? Naru nakataw aana’leb’ rik’in xtz’iib’ankil sa’ wiib’ chi tustuukil raqal: (1) eb’ li junelikil osob’tesihom naraj li Dios xk’eeb’al aawe ut (2) li k’a’aq re ru sa’ ruchich’och’ li maare nakatxjalb’ehi. Chirix a’an naru nakawil li raqal, ut jo’ ruuchil “lin b’eenil alalb’ejil” taaye jun na’leb’ xatz’iib’a sa’ li xb’een ut jo’ ruuchil “juyb’il tzekemq” taaye jun reheb’ li xatz’iib’a sa’ li xkab’. Chan ru naq taajayali aawib’ rik’in li Kolonel ut eb’ li junelikil osob’tesihom re lix evangelio?

Chi’ilmanq ajwi’ Mateo 6:19–33; M. Russell Ballard, “Chinaq sa’ aach’ool li jwal aajel ru,” Jolomil ch’utub’aj-ib’ re abril 2023.

Naq yoo chi wark sa’ xb’eeneb’ li pek, laj Jakob’ kixk’ul jun xmatk’ li kixjal xyu’am. Maak’a’jo’ xloq’alil li kixnumsi aran, jo’kan naq laj Jakob’ kixk’e Betel choq’ xk’ab’a’ li na’ajej a’an, malaj “li rochoch li Dios,” ut kixye ajwi’, “Relik chi yaal naq wan li Qaawa’ sa’ li na’ajej a’in

Naq yooqat chirilb’al Genesis 28, maare taapatz’ aawib’ k’a’ut naq q’axal loq’ choq’ re laj Jakob li k’a’ru kixnumsi. K’a’ru naxnumsi chaq sa’ xyu’am sa’ li kutan a’an? K’a’ ta wi’ ru nareek’a chaq sa’ xch’ool? Naru ajwi’ nakasik’eb’ li aatin ut ch’ol aatin sa’eb’ li raqal 10–22 li nakate’xk’e chixjultikankil li rochoch li Qaawa’. K’a’ru li na’leb’ nakak’ul chirix li Dios, li rochoch, ut eb’ lix sumwank?

Sa’ xraqik li tusleb’ aatin a’in wan jun xjalam-uuch lix matk’ laj Jakob; naru nakawil naq yooqat chirilb’al li seraq’. Wi ta taayiib’ raj xjalam-uuch lix matk’ a’an, k’a’ raj ru taab’aanu? B’ar wankeb’ li na’leb’ re li seraq’ li taawaj raj xk’utb’esinkil?

Li b’ich “Nach’ aawik’in, Qaawa’” (Eb’ li B’ich, 54) na’aatinak chirix li kixnumsi laj Jakob. K’a’ru nakawil sa’ li b’ich a’in li naxk’am rib’ rik’in Genesis 28:10–22? Chan ru naq li santil ochoch nakatxtenq’a chireek’ankil naq nach’ wankat rik’in li Dios? Naru nakasik’ xsumenkil li patz’om a’in sa’ li raatin li Awa’b’ej Russell M. Nelson, “Li santil ochoch ut laa musiq’ejil k’ojleb’aal” (Jolomil ch’utub’aj-ib’ re octubre 2021). Naru ajwi’ nakatz’ileb’ rix li sumwank ut li osob’tesihom re li rochoch li Qaawa’ sa’ Jolomil K’anjenel Hu, 27.2 (Biblioteca del Evangelio). Chan ru naq xpaab’ankileb’ li sumwank a’in naxk’am lix wankil li Dios sa’ laa yu’am?

Naq yooqat chirilb’al Genesis 29:31–35 ut 30:1–24, k’e reetal li aatin li naxk’ut li ruxtaan li Dios choq’ re li xRakel ut li xLea. K’oxla chan ru naq li Dios “naril xrahil aach’ool” ut “naxtoq’ob’a aawu” (Genesis 29:32; 30:22).

Naq kisutq’i laj Jakob aran Kanahan, “k’a’jo’ naq kixuwak ut ki’ok xk’a’uxl” chirix chan ru taak’ule’q xb’aan li ras, a’ laj Esau (Genesis 32:7). Naq yooqat chirilb’al Genesis 32–33, k’oxlan chirix laa wanjik rik’ineb’ laa junkab’al—maare wan k’a’ru k’irtesiik naraj. Li seraq’ a’in maare tatreek’asi chixye’b’al aawuq’ re li ani naraj ru. Eb’ li patz’om jo’eb’ a’in naru tate’xb’eresi sa’ laa tzolb’al:

• Chan ru kixkawresi rib’ laj Jakob re xk’ulb’al laj Esau?

• K’a’ru nakataw sa’ lix tij laj Jakob’ sa’ Genesis 32:9–12?

• K’a’ru naqatzol sa’ lix b’aanuhom laj Esau chirix li kuyuk maak?

• Chan ru nokoxtenq’a li Kolonel chixtuqub’ankil ru li qajunkab’al?

• Re xk’utb’al lix chaab’ilal xch’ool li xRebeka, naru nakak’ut chiruheb’ laa kok’al li jalam-uuch wan rub’el a’in malaj li perel re kok’ k’anjel re li xamaan a’in naq yooqat chixk’osb’al ru li seraq’ wan sa’ Genesis 24:10–21. Maare taawulaq chiruheb’ laa kok’al xk’utb’esinkil li seraq’. A’in naru texxtenq’a chi aatinak chirix xchaab’ilal xch’ooleb’ li kristiaan eerilom sa’ lee yu’am.

• Naru nekeb’icha jun li b’ich chirix li chaab’ilal, jo’ “Wik’in laa’in natikla li chaab’ilal” (B’ichleb’aal choq’ reheb’ li Kok’al, 83). Eb’ laa kok’al naru te’royb’eni rab’inkil li aatin “chaab’ilal” (malaj chanchan a’an) ut te’xaqliiq naq te’rab’i. Chan ru naru naqak’ut xchaab’ilal qach’ool jo’ xRebeka?

• Maare naru nakawoski “Laj Jakob ut laj Esau” (sa’ Eb’ li Esilal sa’ li Najter Chaq’rab’, 38–41) re xtenq’ankileb’ laa kok’al chixtawb’al ru li seraq’ wan sa’ Genesis 25:21–34. Laa kok’al naru te’xk’oxla naq laj Esau yoo raj chixpatz’b’al reheb’ ma us naq tixk’ayi lix b’eenil alalb’ejil choq’ re li juyb’il tzakemq. K’a’ raj ru te’xye re?

  

  2:5

• B’ar wan li k’a’ru q’axal nim xloq’al chi junelik choq’ aawe laa’at ut eb’ laa kok’al? Laa kok’al naru te’xtaweb’ li jalam-uuch malaj k’a’aq re ru neke’reetaliheb’ a’an. Chan ru naru naqak’ut chiru li Qaawa’ naq aajeleb’ ru li k’a’aq re ru a’an?

• Naq yooqex chirilb’al Genesis 28:10–22, naru nakawoksi jun li eeb’ malaj taqleb’aal (malaj jun jalam-uuch jo’ li wan sa’ xraqik li tusleb’ aatin a’in) re xjuntaq’eetankileb’ li qasumwank rik’in li eeb’. Laa kok’al naru neke’xk’utb’esi naq yookeb’ chi taqe’k sa’ jun li eeb’, ut rajlal sut naq neke’taqe’, aatinan chirixeb’ li hoonal naq naqayeechi’i naq too’ab’inq chiru li Dios, maare naq nakub’e qaha’, naq naqatzeka li loq’laj wa’ak, malaj naq nokoxik sa’ li santil ochoch. Chan ru naq eb’ li qasumwank nokohe’xjilosi rik’in li Dios?

• Re aatinak chirixeb’ li raqal a’in, naru taaye naq chirix k’iila chihab’ re raaxiik’, laj Jakob taaril wi’chik laj Esau. Ilomaq Genesis 32:6–11 sa’ komonil. K’a’ru kireek’a laj Jakob? K’a’ru kixb’aanu re xtawb’al xtenq’ankil? Ilomaq Genesis 33:1–4 re xk’eeb’al reetal chan ru naq li Qaawa’ kixsume lix tij laj Jakob. Wi ta te’ruuq chi aatinak qik’in anajwan, k’a’ raj ru te’xye laj Jakob ut laj Esau re qatenq’ankil naq wan li wech’ok-ib’ sa’ li qajunkab’al?