Genesis 24–33

Berɛ a worekenkan Gyenesis 24, bisa wo ho deɛ enti a Abraham buu ne ba Isak awareɛ sɛ ɛho hia saa. Adɛn nti na awareɛ ho hia Onyankopɔn?

Su ahoroɔ bɛn na wohunu wɔ Rebeka ho a ɛbɛma awareɛ ne abusua a ɛmu yɛ den? (hwɛ titire nkyekyɛmu 15–28, 57–61).

San hwɛ Tinsɛm ne Nsɛmmisa, “Awareɛ,” Asɛmpa Akoraeɛ.

Wɔ Isak ne Rebeka amammerɛ mu no, ɔba panin no na na ɔdi adeɛ, a na ɛkyerɛ sɛ ɔnya agyapadeɛ kɛseɛ, ne asɛdeɛ kɛseɛ wɔ abusua no hwɛ mu. Berɛ a wokenkan Gyenesis 25:29–34, dwene deɛ enti a Esau bɛtumi anya ɔpɛ sɛ ɔbɛgyae ne mpaninyɛ no de agye aduane no ho. Adesua bɛn na wohunu ma w’ankasa wo ho wɔ twerɛtohɔ yi mu? Ɛbɛtumi aboa sɛ wobɛyɛ mmoano mmienu: (1) daapem nhyira a Onyankopɔn pɛ sɛ ɔde ma wo ne (2) wiase nneɛma a ɛbɛtumi atwe w’adwene. Afei wobɛtumi akenkan ayɛsɛm no, de biribi a ɛfiri mmoano a ɛdi kan no mu asi “abakan” ananmu na wode biribi a ɛfiri deɛ ɛtɔ so mmienu no mu asi “aduane” ananmu. Sɛn na wode w’adwene bɛsi Agyenkwa no ne N’asɛmpa no nhyira a ɛwɔ hɔ daa no so?

San hwɛ Mateo 6:19–33; M. Russell Ballard, “Remember What Matters Most,” Liahona, Kɔtɔnima 2023, 105–7.

Berɛ a na Yakob da ɛboɔ a ɔde ayɛ sumiiɛ so no, ɔsoo daeɛ bi a ɛsakraa n’abrabɔ. Na ɛyɛ suahunu kronkron ara maa Yakob frɛɛ bea no Betel, anaa “Onyankopɔn fie,” na ɔpaee mu kaa sɛ, “Ampa ara Awurade wɔ saa bea yi” (Gyenesis 28:16).

Berɛ a wokenkan Gyenesis 28, wobɛtumi abisa wo ho deɛ ɛmaa saa suahunu yi yɛɛ kronkron maa Yakob saa. Deɛn na na ɔrefa mu saa berɛ no? Sɛn na ebia na ɔte nka? Wobɛtumi nso ahwehwɛ nsɛm ne kasasin ahoroɔ wɔ nkyekyɛmu 10–22 a ɛkae wo Awurade fie. Atenka bɛn na wonya fa Onyankopɔn, Ne fie, ne N’apam ahoroɔ ho?

Mfonin bi a ɛkyerɛ Yakob daeɛ no wɔ nhyehyɛeɛ yi awieeɛ; wobɛtumi ahwɛ berɛ a wokenkan no. Sɛ anka w’ankasa woreyɛ ne daeɛso no ho adwinnie mfonin a, deɛn na anka wobɛyɛ? Nokorɛ ahoroɔ bɛn na anka wobɛbɔ mmɔden ada no adi afiri abasɛm no mu?

Dwom “Nearer, My God, to Thee” (Nnwom, nɔma 100) gyina Yakob suahunu so. Nkutahodie bɛn na wohunu wɔ dwom yi ne Gyenesis 28:10–22? Sɛn na tɛmpol boa ma wote nka sɛ wobɛn Onyankopɔn? Dwene ho sɛ wobɛhwehwɛ asɛmmisa yi ho mmuaeɛ wɔ Titenani Russell M. Nelson nkrasɛm “The Temple and Your Spiritual Foundation” (Liahona, Obubuo 2021, 93–96 mu). Ebia wobɛpɛ nso sɛ wosan hwɛ Awurade fie apam ne nhyira ahoroɔ wɔ Amansan Akwankyerɛ nwoma, 27.2 (Asɛmpa Akoraeɛ). Sɛn na apam ahoroɔ yi a wodi so no de Onyankopɔn tumi ba w’abrabɔ mu?

Berɛ a wokenkan Gyenesis 29:31–35 ne 30:1–24, hwehwɛ nsɛm a ɛkyerɛ Onyankopɔn mmɔborɔhunu ma Rahel ne Lea. Dwene sɛdeɛ Onyankopɔn “ahwɛ [wo] amanehunu” na”wakae’ wo no ho (Gyenesis 29:32; 30:22).

Berɛ a Yakob san kɔɔ Kanaan no, na ɔwɔ “suro ne ahoyera kɛseɛ” mu fa sɛdeɛ ne nua Esau bɛgye no ho (Gyenesis 32:7). Berɛ a wokenkan Gyenesis 32–33, dwene w’ankasa w’abusua mu nkutahodie ho—ne titire bɛtumi ayɛ deɛ ɛhia ayaresa. Ebia saa abasɛm yi bɛtumi akanyan wo ma woaboa obi. Nsɛmmisa te sɛ yeinom bɛtumi aboa w’akenkan:

• Sɛn na Yakob siesiee ne ho sɛ ɔbɛhyia Esau?

• Deɛn na ɛda nso ma wo wɔ Yakob mpaebɔ a ɛwɔ Gyenesis 32:9–12?

• Deɛn na wosua fa bɔnefakyɛ ho firi Esau nhwɛsoɔ no mu?

• Sɛn na Agyenkwa no bɛtumi aboa ma yɛasa abusua mu nkutahodie yareɛ?

• Sɛdeɛ wobɛtwe adwene asi Rebeka ayamyɛ nhwɛsoɔ a ɛyɛ anika no so no, wobɛtumi de mfonin a ɛwɔ aseɛ anaa nnawɔtwe yi dwumadie kratafa no akyerɛ wo nkwadaa berɛ a wobɔ abasɛm no mua wɔ Gyenesis 24:10–21. Wo nkwadaa ani bɛtumi agye ho sɛ wɔbɛyɛ abasɛm no ho yɛkyerɛ. Yei bɛtumi de nkɔmmɔbɔ a ɛfa ayamyɛ nneyɛɛ ahoroɔ a wo ne wo nkwadaa ahunu ho aba.

• Dwene ho sɛ mobɛbom ato dwom bi a ɛfa ayamyɛ ho, te sɛ “Kindness Begins with Me” (Nkwadaa Nnwomnwoma, 145). Wo nkwadaa bɛtumi atie asɛmfua “ayamyɛ” (anaa asɛmfua a ɛte saa) na wɔagyina hɔ berɛ a wɔte no. Sɛn na yɛbɛtumi ada ayamyɛ adi te sɛ Rebeka?

• Dwene ho sɛ wobɛfa “Yakob ne Esau” (wɔ Apam Dada mu Abasɛm, 38–41) de aboa wo nkwadaa ma wɔate abasɛm no ase wɔ Gyenesis 25:21–34. Ebia wo nkwadaa bɛtumi asusu sɛ Esau bisaa wɔn afotuo fa sɛ ɛwɔ sɛ ɔde ne panin sesa aduane no anaa ho. Deɛn na anka wɔbɛka akyerɛ no?

  

  2:5

• Nneɛma bɛn na ɛho hia wo ne wo nkwadaa ma daapem? Ebia wo nkwadaa bɛtumi anya mfonin anaa nneɛma a ɛgyina hɔ ma saa nneɛma yi. Sɛn na yɛbɛkyerɛ Awurade sɛ saa nneɛma yi ho hia yɛn?

• Berɛ a mobom kenkan Gyenesis 28:10–22 no, mobɛtumi de atwedeɛ (anaa mfonin te sɛ deɛ ɛwɔ nhyehyɛeɛ yi awieeɛ) akasa afa sɛdeɛ yɛn apam te sɛ atwedeɛ ho. Ebia wo nkwadaa bɛtumi ayɛ wɔn ho sɛ deɛ wɔreforo atwedeɛ, na wɔ anammɔn biara mu, wɔaka mmerɛ a yɛhyɛ bɔ sɛ yɛbɛtie Onyankopɔn, te sɛ berɛ a yɛbɔ asu, yɛfa sakramɛnte, anaa yɛkɔ tɛmpol. Sɛn na yɛn apam ahoroɔ ma yɛbɛn Onyankopɔn?

• Sɛdeɛ wobɛda nkyekyɛmu ahoroɔ yi adi no, wobɛtumi akyerɛkyerɛ mu sɛ wɔ abufuo mu mfeɛ pii akyi no, na Yakob rekɔhyia Esau bio. Mommom nkenkan Gyenesis 32:6–11. Atenka bɛn na Yakob nyaeɛ? Deɛn na ɔyɛeɛ sɛdeɛ ɔbɛnya mmoa? Mommom nkenkan Gyenesis 33:1–4 nhunu sɛdeɛ Awurade buaa Yakob mpaebɔ no. Sɛ anka Yakob ne Esau bɛtumi ne yɛn akasa nnɛ a, deɛn na anka wɔbɛtumi aka de aboa yɛn berɛ a akasakasa aba yɛn abusua mu?