Genesi 24–33

Fa o santse o bala Genesise 24, ipotse gore ke eng Aberahame a akantse ka go nyala ga morwa wa gagwe Isake go nna botlhokwa. Ke eng lenyalo le le botlhokwa mo Modimong?

Ke a fe maitsholo a o a bonang mo go Rebeka a a ka tlisang lenyalo le le maatla le lelwapa? (bona segolobogolo ditemana 15–28, 57–61).

Bona le gone Topics and Questions [Ditlhogo le Dipotso], “Marriage [Lenyalo],” Motlobo wa Efangele.

Mo ngwaong ya ga Isake le Rebeka, morwa yo o motona o amogela botsalwapele, jo bo rayang boswa jo bogolo, le maikarabelo a magolo a go tlhokomela lelwapa. Jaaka o bala Genesise 25:29–34, tlhatlhanya ka fa Esau a ka ne a eletsa go neela botsalwapele jwa gagwe ka go amogana dijo. Ke dife dithuto tse o di iponelang ka mo polelong e? E ka go thusa go dira mela e e mebedi: (1) ditshegofatso tsa bosakhutleng tse Modimo a batlang go di go neela le (2) dilo tsa selefatshe tse di ka go kgoreletsang. Ke gone o ka bala polelo, o emisetsa “botsalwapele” ka sengwe go tswa moleng wa ntlha le “sopho” ka sengwe go tswa wa bobedi. O ka tlhoma mogopolo jang mo go Mmoloki le ditshegofatso tsa bosakhutleng tsa efangele ya Gagwe?

Bona le gone Mathaio 6:19–33; M. Russell Ballard, “Remember What Matters Most [Se se Kgathalesegang Go Gaisa],” Liahona, Motsheganong 2023, 105–7.

Fa a santse a robetse mo mosamong wa matlapa, Jakobe o ne a nna letoro e e fetotseng botshelo. E ne e le maitemogelo a a boitshepo mo Jakobe a biditseng lefelo Bethele, kgotsa “ntlo ya Modimo,” a bolela, “E le ruri Morena o mo lefelong le” (Genesise 28:16).

Jaaka o bala Genesise 28, o ka ipotsa gore ke eng se se dirileng maitemogelo a boitshepo go Jakoba. O ne a raletse eng ka nako eo? O ka tswa a ne a ikutlwa jang? Le gone o ka batla mafoko le diele mo ditemana 10–22 tse di go gakololang ka ntlo ya Morena. O amogela ditlhotlheletso dife ka ga Modimo, ntlo ya Gagwe, le dikgolagano tsa Gagwe?

Kwa bokhutlong jwa thulaganyo e ke setshwantsho se se supang toro ya ga Jakobe, o ka e akaretsa jaaka o bala. Fa o ne o ka dira tshwantshiso ya gago ya toro ya gagwe, o ne o ka dira eng? O ne o ka leka go supa boammaaruri bofe mo polelong?

Sefela “Nearer, My God, to Thee” (Hymns, no. 100) se ikaegile ka maitemogelo a ga Jakobe. Ke dikamano dife tse o di bonang gareng ga pina e le Genesise 28:10–22? Tempele e go thusa jang go ikutlwa o atumalana gaufi le Modimo? Akanyetsa go batla dikarabo tsa potso e mo molaetseng wa ga Poresidente Russell M. Nelson wa “The Temple and Your Spiritual Foundation” (Liahona, Nov. 2021, 93–96). Le gone o ka batla go sekaseka dikgolagano le ditshegofatso tsa ntlo ya Morena mo General Handbook, 27.2 (Motlobo wa Efangele). Go tshegetsa dikgolagano tse go ka tlisa jang thata ya Modimo mo botshelong jwa gago?

Jaaka o bala Genesise 29:31–35 le 30:1–24, batla mafoko a a tlhalosang kutlwelobotlhoko ya Modimo go Ragele le Lea. Tlhatlhanya ka fa Modimo a “lebileng pogiso [ya gago] mme a go “gakologelwa” (Genesise 29:32; 30:22).

Jaaka Jakobe a boela kwa Kanana, o ne a “tshogile thata e bile a tshwenyegile” ka ga ka fa morwarraagwe, Esau, a tlaa mo amogelang ka teng (Genesise 32:7). Jaaka o bala Genesise 32–33, tlhatlhanya botsalano jwa lelwapa la gago—gongwe segolobogolo nngwe e e tlhokang pholo. Gongwe polelo e e ka go tlhotlheletsa go ya go mongwe. Dipotso jaaka tse di ka kaela go bala gwa gago:

• Jakobe o ne a ipaakanyetsa jang go kopana le Esau?

• Ke eng se se tlhaolesegileng mo go wena ka ga thapelo ya ga Jakobe e e bonwang mo go Genesise 32:9–12?

• O ithuta eng ka ga go itshwarela go tswa mo sekaing sa ga Esau?

• Mmoloki o ka re thusa jang go fodisa botsalano jwa lelwapa?

• Go supa thata sekai se se kgatlhang sa bopelontle jwa ga Rebeka, o ka supegetsa bana ba gago setshwantso se se fa tlase kgotsa tsebe ya tiragatso ya beke e jaaka o khutshwafatsa polelo mo Genesise 24:10–21. Bana ba gago ba ka itumelela go diragatsa polelo e. Se se ka gogela kwa puisanong ka ga ditiro tsa bopelontle tse wena le bana ba gago lo di boneng.

• Akanyetsa go opela pina ka bopelonomi mmogo, jaaka “Kindness Begins with Me” (Children’s Songbook, 145). Bana ba gago ba ka reetsa lefoko “bopelonomi” (kgotsa lefoko le le tshwanang) mme ba eme fa ba le utlwa. Re ka nna bopelonomi jang jaaka Rebeka?

• Akanyetsa go dirisa “Jacob and Esau” (mo Old Testament Stories, 38–41) go thusa bana ba gago go tlhaloganya polelo e e mo Genesise 25:21–34. Gongwe bana ba gago ba ka akanyetsa gore Esau o ba kopile kgakololo ka ga gore a o ka rekisa botsalwapele jwa gagwe ka sopho. Ba ka mo raya ba re eng?

  

  2:5

• Ke dilo dife tse di kgathalesegang bosakhutleng mo go wena le bana ba gago? Gongwe bana ba gago ba ka batla setshwantsho kgotsa selwana tse di kayang dilo tse. Re ka supegetsa Morena jang gore dilo tse di botlhokwa mo go rona?

• Jaaka lo bala Genesise 28:10–22 mmogo, lo ka nna lwa dirisa lere kgotsa ditepisi (kgotsa setshwantsho jaaka sengwe se kwa bokhutlong jwa thulaganyo e) go buwa ka ga ka fa dikgolagano tsa rona di tshwanang le lere. Gongwe bana ba gago ba ka itira jaaka ekete ba pagama lere, ebile ka kgato nngwe le nngwe, ba bua ka ga dinako tse ka tsone re solofeditseng go obamela Modimo, jaaka fa re ne re kolobediwa, re tsaya sakaramente, kgotsa re ya tempeleng. Dikgolagano tsa rona di re tlisa jang gaufi le Modimo?

• Go itsise ditemana tse, o ka tlhalosa gore morago ga dingwaga tse dintsi tsa maikutlo a a thata, Jakobe o ne a ya go kopana le Esau gape. Balang mmogo Genesis 32:6–11. Jakobe o ne a ikutlwa jang? O ne a dira jang go bona thuso? Balang mmogo Genesise 33:1–4 go itemogela ka fa Morena a arabileng thapelo ya ga Jakobe. Fa Jakobe le Esau ba ne ba ka bua le rona gompieno, ba ka re eng go re thusa fa go na le ngangisano mo lwapeng la rona?