Senesis 24–33

Ni ahmw wadewadek Senesis 24, pein idek rehmw dahme Eipraam medewehki me en nah pwutak Aisek ah pwopwoud inenen kesempwal. Dahme pwopwoud kesempwalki ong Koht?

Soangen kwalidi dah ke kilangada rehn Repeka me pahn mwahuong ehu pwopwoud kehlail oh peneinei? (kilang mehlel ire tikitik kan 15–28, 57–61).

Pil kilang padahk oh kalelapak kan, “Pwopwoud,” Laipreri en Rongamwahu.

Nan en Aisek ih Repeka tiahk, mesenih pwutak me kin alehdi pwungen sohso, me wehwehki me sohso laud ehu, iangahki pwukoah laud kan ong epwelpen peneinei. Ni ahmw wadek Senesis 25:29–34, medewe mwahu dahme Esau kakete men kihla ah sohsohu weliankihdi ehu mwenge. Soangen mehn kasukuhl da me ke diar ong pein kowe nan dahme wiawio? E kak sawas en wiahda lisd riau: (1)–kapai poatoapoat kan Koht men ketkihong uhk oh (2)–dipwisoun sampah me kak kasalonge iukala. Mwuhr ke kak wadek iren pwuhk sarawi wet, weliankihdi “sohso” mehkot sang nan keioun lisdo oh “suhpw” mehkot me sang me keriauo. Ia mwomwen ahmw pahn kilenglahngete Sounkomouro oh kapai poatoapoat kan en Sapwellime rongamwahuo?

Pil kilang Madiu 6:19–33; M. Russell Ballard, “Tamataman Dahme Keiou Kesempwal,” Liahona, Mei 2023, 105–7.

Ni ah memeir pohn uluhl en takai kan, Seikop ahnikidahr ehu ouraman me wekidala ah mour. E wia ekspihriens sarawi ehu me kahrehiong Seikop ah kahdankihla wasahu Pedel, de “tehnpesen Koht,” me ketihtihki, “Mehlel me Kauno ketiket wasa kiset” (Senesis 28:16).

Ni ahmw wadek Senesis 28, ke kak pein idek rehmw dahme kahrehiong ekspihriens wet ah nohn sarawi ong Seikop. Dahme e mihmi loale ansouo? Ia mwomwen ah pepehm? Ke pil kak kilangada lepin lokaia kan oh kahs akan nan ire tikitik kan 10–22 me kataman ong uhk tehnpas en Kauno. Soangen pepehm dahkan ke alehdi duwen Koht, Sapwellime tehnpas, oh Sapwellime inou sarawi kan?

Ni imwin audlain wet mie kilel ehu me kasalehda en Seikop ouramano; ke kak kin kilang ni ahmw wadawad. Ma ke pahn wiahda pein noumw mahlen me kasalehda ah ouramano, dahme ke pahn wia? Mehnia mehlel kan sang nan soaio me ke pahn songen kasalehda?

Koulen sarawi “Nearer, My God, to Thee” (Koul en Sarawi kan, nempe 100) doke en Seikop ekspihrienso. Soangen ehupene da ke kilang nanpwungen koulen oh Senesis 28:10–22? Ia mwomwen tehnpas sarawio eh kak sewesei iuk en ahniki pepehm en karanihala Koht? Song kilang pasapeng kan nan en Preseden Russell M. Nelson padahk “The Temple and Your Spiritual Foundation” (Liahona, Nohpempe 2021, 93–96). Ke pil kak men pwurehng kilang inou sarawi kan oh kapai kan en tehnpas en Kauno nan Pwuken Kaweid Doadoahk, 27.2 (Gospel Laipreri). Ia mwomwen kolokol inou sarawi pwukat kak wahdo sapwellimen Koht manaman ong nan ahi mour?

Ni ahmw wadek Senesis 29:31–35 oh 30:1–24, kilangada lepin lokaia kan me kasalehda sapwellimen Koht mahk ong Resel ih Lia. Medewe mwahu mwomwen Koht ah “ketin kupwurehla [ei] apwal” oh “kupwkupwurehte” komwi (Senesis 29:32, 20:22).

Ni Seikop eh pwuralahng Kenan, e “masepwehkada kowahlap” duwen mwomwen riehu, Esau, pahn kasamwoh Ih (Senesis 32:7). Ni ahmw wadek Senesis 32–33, medewe mwahu ehupenehn pein ahmw peneinei—mwein mehlel emen me anahne kamwahula. Mwein Soai wet kak kamarainihiuk en sewesehda emen. Soangen kalelapak pwukat kak kaweid ahmw wadawad.

• Ia mwomwen Seikop eh onopehng tuhweng Esau?

• Dahme ke kilangada duwen en Seikop ah kapakap me mih nan Senesis 32:9–12?

• Dahme ke esehla duwen mahk sang en Esau karasaraso?

• Ia mwomwen Sounkomouro ah kak sewese kitail kamwahuihala ehupene kan en peneinei?

• Pwehn kasalehda en Repeka ah karasaras kopwuriamwei en kadek, ke kak kasalehiong noumw seri kan kilel mih pahn de tehn kemwekid en wihket ni ahmw oaralapih soaio nan Senesis 24:10–21. Noumw seri kan kakete pereniki sipaihda soaiet. Met kak elehda ehupenehn koasoai duwen mwekid en kadek kan kowe oh noumw seri kan kilangehr.

• Medewe koulkipene ehu koul duwen kadek, me duwehte “Kindness Begins with Me” Children’s Songbook, 145). Noumw seri kan kak song rongada lepin lokaia “kadek” (de ehu me duwehte) oh kesihkerda ansou irail rongada. Ia mwomwen atail kak kadek duwehte Repeka?

• Medewe doadoahngki “Seikop Ih Esau” (nan Soai kan en Kadehde Mering, 38–41) pwehn sewese noumw seri kan wehwehki soaio nan Senesis 25:21–34. Mwein noumw seri kan kak song medewe me Esau peki arail kaweid duwen ma en welialihki ah pwungen sohso ong mwengehu. Dahme irail pahn indahiong Ih?

  

  2:5

• Soahng dahkan me kesempwal poatoapoat ong uhk oh noumw seri kan? Noumw seri kan kak rapahkihda kilel kan de dipwisou kan me wia weliepen Mepwukat. Ia mwomwen atail kak kasalehiong Kauno me Mepwukat kesempwal ong kitail?

• Ni ahmw wadek Senesis 28:10–22 pene, kumwail kak doadoahngki ehu kehndake (de ehu kilel me duwehte me mih ni imwin audlain wet) pwehn koasoaia duwen mwomwen atail inou kan ahr duwehte kehndake ieu. Noumw seri kan kak mwomwehda daur ehu kehndake, oh ni ehu ehu kahk, koasoaia ansou kan kitail inouki en peikiong Koht, soangen ansou kitail pepdaisla, ale kamadipw sarawi, de kohla ni tehnpas sarawi. Ia mwomwen atail inou sarawi kan ah kin waikitaildo karanihala Koht?

• Pwehn kapehse ire tikitik pwukat, ke kak kawehwehda me mwurin sounpar tohto en pepehm en kailok, Seikop pahn pwurehngehr tuhweng Esau. Wadek pene Senesis 32:6–11. Ia mwomwen en Seikop pepehm? Dahme e wia pwehn ale sawas? Wadek pene Senesis 33:1–4 pwehn diar ia mwomwen Kauno ah sapeng en Seikop kapakapo. Ma Seikop Ih Isau kak lokaiahng kitail rahnwet, dahme ira kak inda me pahn sawas ansou mie uhpene nan atail peneinei?