Peneinei en Israel

Wasahkis nan wel me mih palimese en Kenan, Seikop ni saloh awiawih riei pelien umpwer, Esau, en kohdo tuhweng. Lahs en Seikop eh kilangedier Esau, mwein kereniong sounpar 20 mwowe, Esau mentenoh kemehla. Pwohngo pwon Seikop mihla nan poadoar ehu, ni ah raparapahki kapai ehu sang Koht. Pwehki en Seikop eh pwoson, ngoang, oh nantihong, Koht ketin sapengala ah kapakap kan. Pwohngo eden Seikopo wekideklahngehr Israel, ahd ehu me wehwehki, kapatahieng soahng kan me sohte sansal, “e poadidiong Koht” (Senesis 32:28, footnote b)

Met wia keiou en ansou me ahd Israel pwerida Nan Pwuhk Sarawi, oh e wia ahd ehu me doudoulahte nananti Nan pwuhko oh rein poadoapoad. Ahdo ahpw uhd dokehte laudsang ohl emente. Israel nainkidahr pwutak 12, oh kadaudokarail kan ehupene dehdehki ahr wia “peneinei en Israel,” “keinek en Israel kan,” “seri en Israel kan,” de “mehn Israel kan.”

Erein nan poadoapoad, seri kan en Israel inenen kesempwalki ahr wia kadaudok sang ehu keinek eisek riau en Israel. Lain en peneinei wet wia pali kesempwal ehu ong arail inou sarawi me kasalehda ihs irail. Wahnpoaron Pohl padahngkiher me e wia ”kisehn keinek en Pensamin” (Roman 11:1). Ehu kahrepen Lihai ah kadaralahng nah pwutak koa ong Serusalem pwehn alehdi pleit en pirahs koa iei pwe pleit koa kolokol “kadaudok en ah pahpa koa” (1 Nihpai 5:14). Lihai diaradahr me e wia kadaudok en Sosep, oh en nah seri kan wehwehki duwen ahr wia kisehn peneinei en Israel kasalehda ah kesempwal ong irail nan pahr akan mwuri.

Nan Mwomwohdiso rahnwet, komwi kak rong duwen Israel nan lokaia kan me duwe “kapokonpenehn Israel.” Kitail kin koulki duwen “Soundoar en Israel,” “hope of Israel,” oh “Ye Elders of Israel.” Nan soangen irair pwukat, kitail sohte koaskoasoia de kokouliki duwen wehin Israel en kawahupen de wehi en met me kahdaniki Israel. Palahsang, kitail dokedoke aramas me kohpenehr sang nan wehi kan en sampah ong nan Mwomwohdiso en Sises Krais. Kitail koasoakoasoaia aramas me poadidiong Koht, me kin raparapahki Sapwellime kapai kan ni ngoang, oh me, sang ni pepdais, wiadahr Sapwellime aramas en inou. Nan mahsen kan en Preseden Russell M. Nelson, en wia mehn Israel wehwehki “en mweidohng Koht en kaunda nan atail mour kan, … mweidohng Koht en wia manaman keiou kehlail Nan atail mour kan.”

Ahmw kapai en peitriark pahn kasalehda ahmw wia kisehn ehu keinek kan en peneinei en Isrehl. E laudsang ehu kiseh kesempwal en poadepen peneinei. E pil doke dahme wihwia nan ahmw mour met oh mour kohkohdoh. En wia kisehn peneinei en Israel wehwehki mie ahmw ehupenehn inou Ong Sahm Nanleng oh Sises Krais. E wehwehki me komwi, duwehte Epraim, udahn pahn wia “ehu kapai“ ong sapwellimen Koht seri kan (Senesis 12:2; Abraham 2:9-11). E wehwehki, ni en Piter koasoai, me “kumwail wia keinek pilipil ehu, pwihn samworo en Nanmwarkio, kumwail wia wehi sarawi ehu, sapwellimen Koht aramas kei; me pilipildahng kalohkiseli wiewia kapwuriamwei kan en nin limen Koht, me ketin malipikumwaildo sang nan rotorot ong nan Sapwellime marain lingaling” (1 Piter 2:9). E wehwehki me komwi “mweidohng Koht en kaunda“—me komwi emen me “kin poadidiong Koht“ ni ahmw pahn wauneki ahmw inou sarawi kan ong Ih.