Genesis 24–33

Nupwen ka anneani Genesis 24, eisinuk pwata Abraham a ekieki ewe pupunu an noun ewe Isaac pwe mi auchea. Pwata apupunu mi auchea ngeni Kot?

Met echipwerun nikinik ka kuna non Rebekah minne epwe aninis ngeni eu pochokunen apupunu me famini? (nengeni akkaewin uwokisin 15–28, 57–61).

Nengeni pwan Itenap me Kapaseis, “Apupunu,” Gospel Library.

Non an Isaac me Rebekah oreni, ewe mwannichi a angei ewe feiochun mwanichi, minne wewen eu watten feioch emon epwe angei, fiti eu watten wis ne tumunu ewe famini. Nupwen ka anneani Genesis 25:29–34, ekipwichi epwe pwata a mecheres an Esau fangeta an we feiochun mwanichi ren ekkesiwinin eu mwongo. Met nesen ka kuna fan itom pwisin non ei uruo? Menin epwe aninisoch ne fori ru etetten: (1) feioch esemuch Kot a mochen ngonuk me (2) mettochun fonufan epwe aosukosukok. Mwirin ka tongeni anneani ewe porous, siwini “feiochun mwanichi” ren och mettoch seni ewe aewin tetten me “sup” ren och mettoch seni ewe oruwan. Ifa usun ka tongeni anonga ewe Chon Amanau me ekkewe feioch esemuch seni An kapas allim?

Nengeni pwan Matthew 6:19–33; M. Russell Ballard, “Chechemeni Met a Kon Namot,” Liahona, May 2023, 105–7.

Nupwen an mour won eu pinnu seni foun fau, Jacob a tana eu tan mi siwini manau. A fokkun eu mettoch mi pin an Jacob eita ngeni ewe neni Bethel, ika “imwen Kot,” a affatano, “Ennetin ewe Samon mi nom non ei neni” (Genesis 28:16).

Nupwen ka anneani Genesis 28, ka tongeni eisinuk pwisin met a fori ei mettoch epwe kon pin ngeni Jacob. Met a fis ngeni non ena fansoun? Ita epwe ifa usun an mefi? Ka tongeni pwan kutta kapas me porous non uwokisin 10–22 mi achema ngonuk usun ewe imwen ewe Samon. Met memmef ka angei usun Kot, Imwan we, me An pwon mi pin?

Nesoponon ei kokkot mi makketiw echo sasing mi pwarano usun an Jacob tan; ka tongeni niwiniti nupwen ka annea. Ika pwe kopwe fori om pwisin angangoch ne fori och napanapen an we tan, met kopwe fori? Met ennet seni ewe porous kopwe sotuni ne anapanapa?

Ewe kon mi fen “Nearer, My God, to Thee” (Kon mi fen, no. 100) a anongonong won met a fis ngeni Jacob. Met nonno pok ka kuna nefinen ei kon me Genesis 28:10–22? Ifa usun ewe tempel a anisuk ne mefi om kopwe arap ngeni Kot? Ekieki ne kutta ponuwen ei kapas eis non an President Russell M. Nelson porous “Ewe Tempel me Om Nongonong non Pekin Ngun” (Liahona, Nov. 2021, 93–96). Ka pwan tongeni mochen nengeni sefani ekkewe pwon mi pin me feiochun ewe imwen ewe Samon non Pukenapen Emwen, 27.2 (Gospel Library). Ifa usun apwonuetan ekkei pwon mi pin a wato an Kot manaman non manauom?

Nupwen ka anneani Genesis 29:31–35 me 30:1–24, kutta kapas mi awewei an Kot chen ngeni Rachel me Leah. Ekipwichi ifa usun Kot a “kuna [om] weires” me “chechemenuk” (Genesis 29:32; 30:22).

Nupwen Jacob a niwin ngeni Canaan, i a “nuokus o noninen” ren ifa usun an pwin we, Esau, epwe etiwa (Genesis 32:7). Nupwen ka anneani Genesis 32–33, ekipwichi pusin nefinen om famini—meni akkaewin emon mi namot ngeni epwe chikar. Meni ei porous a tongeni pesek om kopwe achouano aninis ngeni emon. Kapaseis usun ekkei ra tongeni emweni om annea:

• Ifa ussun Jacob a monneta ne churi Esau?

• Met a pwaochuno ngonuk usun an Jacob we iotek mi pwa non Genesis 32:9–12?

• Met ka kaeo usun omusomus seni an Esau minen appiru?

• Ifa usun ewe Chon Amanau a tongeni anisi kich ne echikara nefinen ach famini?

• Ne affataochueno amwararen an Rebekah minen appirun kirekiroch, ka tongeni pwari ngeni noum kewe semirit ewe sasaing fan ika peichen mwokutukutun ei wik nupwen ka mennapei ewe porous non Genesis 24:10–21. Noum kewe semirit repwe pwapwaiti ne pwonenau ewe porous. Ei a tongeni poputani eu aporous usun ekkewe fofforun kirekiroch en me noum kewe semirit oua fen kuna.

• Ekieki ne konu echo kon usun kirekiroch, usun ren “Kindness Begins with Me” (Noun Semirit Puken Kon, 145). Noum kewe semirit ra tongeni ausening ngeni ewe kapas “kindness” (ika eu kapas mi nonno ngeni) me uta nupwen ra rong. Ifa usun sia tongeni kirekiroch usun Rebekah?

• Ekieki ne aea “Jacob and Esau” (non Porousen Testamen Noom, 38–41) ne anisi noum kewe semirt repwe weweiti ewe porous non Genesis 25: 21–34. Meni noum kewe semirit ra tongeni anchangei pwe Esau a eisinir ar ourour usun ika i epwe siwini an feiochun mwanichi ngeni eu sepien sup. Met repwe apasa ngeni I?

  

  2:5

• Met mettoch a namot non fansoun esemuch ngonuk me noum kewe semirit? Meni noum kewe semirit ra tongeni kutta ekkoch sasing ika mettoch mi tupuni ekkei mettoch. Ifa usun sia tongeni pwar ngeni ewe Samon pwe ekkei mettoch ir mi auchea ngeni kich?

• Nupwen ka anneani Genesis 28:10–22 fengen, ka tongeni aea efoch nato eu sassar (ika echo sasing usun ewe eu nesoponon ei kinikin) ne kapas ren ifa usun ach pwon mi pin a usun eu nato. Meni noum kewe semirit ra tongeni tipitipin tota won efoch nato, me ren eu me eu eipweipw, kapas usun ekkewe fansoun nupwen sia pwon ne aneasochisi Kot, usun nupwen sia papatais, angei ewe sakrament, ika feino ngeni ewe tempel. Ifa usun ach kewe pwon mi pin ra arapakana kich ngeni Kot?

• Om oporousa ekkei uwokisin, ka tongeni awewei pwe mwirin chommong ierin netip weires, Jacob epwene churi sefani Esau. Annea fengeni Genesis 32:6–11. Ifa usun Jacob a mefi? Met a fori ne angei aninis? Annea fengeni Genesis 33:1–4 ne kutta ifa usun ewe Samon a ponuweni an Jacob iotek. Ika Jacob me Esau repwe tongeni fos ngeni kich ikenai, ita met repwe apasa ne anisi kich nupwen mi wor anini fengen non ach famini?