Ewe Imwen Israel

Ekis non ewe fonu pon otiwen Canaan, Jacob ner ne awitiwiti an epwe churi nippwen we, Esau. Saingonon an kuna Esau, a arap 20 ier me mwan, Esau a mochen nieno i. Jacob a neneno unusen ewe pwinin non eu aunap, an kukutta eu feioch seni Kot. Ren pungun an Jacob nuku, nikitu, me achocho, Kot a ponuweni an iotek. Non ena pwinin iten Jacob a siwin ngeni Israel, eu it a wewen, me nein pwan ekkoch mettoch, “i a nikitu ngeni Kot” (Genesis 32:28, footnote b).

Iei ewe aewin fansoun ewe it Israel a pwa me non ewe Bible, me a eu it mi nikitu non unusen ewe puk me non unusen uruo. Ewe it a mwirtir ne wewe ngeni mettoch mi nap seni chok emon mwan. A wor 12 noun Israel at, me mwirimwirir meinisin a fateno pwe ir ewe “imwen Israel,” ekkewe “einangen Israel,” ekkewe “semiriten Israel,” ika ekkewe “chon Israel.”

Non unusen uruo, ekkewe semiriten Israel ra apachata watten auchea ngeni mwirimwirir we seni eu me nein ekkewe engon me ru einangen Israel. Mwirimwirir a eu auchean kinikinin nonnomun ar pwon mi pin. Ewe Aposel Paul a affata pwe i “seni ewe einangen Benjamin” (Rome 11:1). Eu popun Liai a tinano noun kewe anuon ngeni Jerusalem ar repwe angei ekkewe seleichen brass pwe ekkewe seleich mi masoweni “eu uruon an kewe neuo” (1 Nifai 5:14). Liai a kuna pwe i mwirimwirin Joseph, me an mwirimwirin kewe weweiti usun ar fofo ngeni ewe Imwen Israel a pwarano pwe mi auchea ngenir non ekkewe ier repwe feito.

Non ewe Mwichefen ikenai, meni oupwe rongorong usun Israel non ekkoch kapas usun “ionfengeni Israel.” Sia konu usun ewe “Chon Amanauen Israel,” ewe “Epinukunukun Israel,” me “Ami Elters seni Israel.” Non ekkei napanap, sise kapas usun ika konu usun ewe muun Israel nom ika ewe muu a iteni Israel ikenai. Nge, sia kapas usun aramas ekkewe ra fen ioifengen seni ekkewe muun ewe fonufan non ewe Mwichefenin Jises Kraist. Sia kapas usun aramas kewe ra nikitu ngeni Kot, ekkewe ra achocho ne kutta An kewe feioch, me ekkewe, seni papatais, ra fen winiti Noun aramas pwon. Non ekkewe kapas an Preseten Russell M. Nelson, ach sipwe seni Israel wewen “sipwe mut ngeni Kot epwe nemenem non manauach, … sipwe mut ngeni Kot an epwe ewe pochokun mi kon unusen manaman non manauach.”

Om efeiochun petriark a affata om fofo ngeni eu me nein ekkewe einangen ewe Imwen Israel. Ena a nap seni chok eu amwararen kinkinin uruon om famini. A pawn wewe ngeni om fansoun iei me fansoun mwom. Om ka choni ewe imwen Israel a wewen pwe a wor eu om pwon mi pin ngeni Samach non Nang me Jises Kraist. A wewen pwe en, usun Abraham, ka fis pwe “kopwe eu feioch” ngeni noun Kot semirit(Genesis 12:2; Abraham 2:9–11). A wewen, non ekkewe kapas an Peter, pwe ami eu mwirimwirin aramas mi kefinita, eu pristut seni emon king, eu muu mi pin, eu aramas mi sokkono; pwe oupwe aronga fetanei usun an kewe manaman ewe a kori kemi seni non rochopwak ngeni an saram mi amwarar (1 Peter 2:9). A wewen pwe ka “mut ngeni Kot epwe Nemenem”—pwe en emon ewe mi “nikitu ngeni Kot” nupwen ka afona om pwon mi pin ngeni I.