Karikani Bwaai 18–23

E a tia te Uea ni karaoi berita aika mimitong nakoia aika a kakaonimaki, ma n tabetai inanon bwaai aika a riki inanon maiura a kona ni karioi ara iango bwa tina titiraki bwa a kanga berita aikai ni kona ni kakoroaki nanoia. A bon bae n tia n namakina naba anne Aberaam ao Taara. Tera ae ko reiakinna man aia taneiai? E kona n ibuobuoki moanakin am kamatebwai man rinanoan te berita are e karaoia te Uea inanon Karikani Bwaai 17:4, 15–22. Tera aroia Aberaam ao Taara? (taraa Ana Rairairi Iotebwa Timiti, Karikani Bwaai 17:23 [inanon Karikani Bwaai 17:17, footnote b]; Karikani Bwaai 18:9–12). E kanga ana kaeka te Uea ni buokiia ni karekea te onimaki ae korakora riki n Ana berita? (taraa Karikani Bwaai 18:14).

Tera ae ko kunea man kiibu aikai are e kamatoa am onimaki? Tera tabeua bwaai aika ko rinanoi—inanon maium ke maiun temanna—ae e a tia ni kakorakora am onimaki are e na kakoroa nanon Ana berita te Uea n oin ana tai ao ana kawai? Ko na bae naba ni iangoia bwa ko na kanga ni kateimatoa am onimaki ngkana berita ake a beritanaki aikoa reke n te maiu aei. Tera taeka n reirei ae ko kunea n Ebera 11:8–13 ao n ana rongorongo Beretitenti Russell M. Nelson “E a Uti Kristo; A na Mwaing Maunga Man te Onimaki Irouna”? (Riaona,, Meei 2021, 101–4).

Taraa naba Reirei ao Berita aika Tabu 88:68.

Tera reirei aika ko reiakin iaon te birinako man te buakaka ngkai ko wareka taekan Rota ma ana utu? Te katooto, tera ae anaaki iai nanom n te bwai are a taekinna anera ao ni karaoia ni buoka Rota ma ana utu ni birinako man te kamaunaaki? (taraa Karikani Bwaai 19:12–17). E kanga te Uea ni buokiko ao am utu ni birinako ke ni karekea te katantan man ana mwakuri te riaboro n te aonaaba? Iangoi taai ike ko a tia ni kairoroaki n “[tan] rikaaki” (kibu 26) ngke ko na bon ti taraa moaa ma te onimaki iroun te Tia Kamaiu. Tera ae raona are n Ruka 9:62 nakon otam n te koaua aei?

Taraa naba Ana Rairairi Iotebwa Timiti, Karikan Bwaai 19:9–15 (n te abentekiti n te Baibara).

E reirei Unimwaane Jeffrey R. Holland:

“N taraana, te bwai raoi ae riki iroun buun Rota bwa e aki ti tan rikaaki; iai nanona ae kan oki rikaaki. E na taraa n ae e ngae ngke imwain ae e kiitana tian te kaawa, e bon rangi n tangira Totom ao Komora ni kaubwaina are e anganna. …

“E kona n ae buun Rota e tanrikaaki n rawa n tara te Uea n te bwai are E tuangnga bwa e na katikui imwiina. … Ngaia are e aki tii tanrikaaki; ma e tanrikaaki ma nanona. Ni kauarerekeana, irekerekena nakon bwaai ake mai imwaiina e a taotira riki nakon onimakinan taai aika a na roko. Anne, ni koauana, bon raon mwakoron ana bure.

“… I bubuti nakoimi bwa tai tiku iaon kanoan boong aika a tia n nako, ke ni kabanea am tai n tanginiwenea kanoan ngkoananoa, e ngae ngke tao a nako raoi kanoaia boong aikanne. Ti bon reiakinaki ni kanoan ara bong aika a tia n nako ma tiaki kona n tiku iaona. Ti tanrikaaki n uneakin bwaai aika ti karaoi aika a raraoi ma ti aki kona ni manga kaokia. Ao ngkana ti a tia n reiakin bwaai aika ti riai n reiakinaki ao ni uoti ma ngaira te kabanea n tamaroa n ake ti a tia n rinanoi, ao ma ikanne are ti na taraa mwain kawaira ao ma n uringa are te onimaki e aki toki ni kokotei taai taai aika a na roko. …

“… Maiuakinan te maiu are ngkoa, n raonaki ma te kairua, bon tiaki te bwai ae eti! Bon tiaki ana euangkerio Iesu Kristo. …

“Nakoia ni kabane [aomata] n roro nako, I bubuti, ‘Uringa buun Rota’ [Ruka 17:32]. Te onimaki bon ibukin taai aika a na roko. Te onimaki e kateaki iaon bwaai ake ngkoa ma e aki tangiria ni kan tiku ikanne. Te onimaki e onimakinna bwa te Atua iai bwaai aika korakora aika e kawakin ibukira n tatabemaniira ao bwa Kristo bon Ngaia te ‘ibonga ae rietata ni bwaai aika a raraoi aika a na roko’ (Ebera 9:11)” (“The Best Is Yet to Be,” Ensign, Tianuare 2010, 24, 26–27).

E ngae ngke ti aki atai ni kabane bukina ngkai te Atua e tuanga Aberaam bwa e na anga Itaaka bwa te karea, ti ataia bwa bon kataakin ana onimaki iroun te Atua. Ti ataia naba bwa bon “ti te arona ma te Atua ngke e anga Natina te Rikitemanna” (Iakobwa 4:5). Ngkai ko wareka Karikan Bwaai 22:1–19, ko kona ni kakaei kanikinaa ke baika a titebo imarenan Aberaam ni kareana Itaaka ao Ana angakarea te Tama iaon Natina, Iesu Kristo. Iangoia korei baike ko kunei n te taibora n aron aio:

Tera kanikinaa ke baika titebo nakon Ana anga karea te Tia Kamaiu ae ko kunea bwa e rangi ni manena? Iangoia n anenea ke ni wareka taekan te anene n taromauri are e kaota Ana tangira Tamara are i Karawa ibukira, n aron “God Loved Us, So He Sent His Son,” Anene n Taromauri, nambwa 187. Ko na bae ni korea mwiin am namakin iaon Tamara are i Karawa ao Iesu Kristo ao aia anga karea ibukim.

Ngkana ko tangiria ni kamatebwaia riki ana anga karea ara Tia Kamaiu, iangoia ni wareka ana rongorongo Beretitenti Jeffrey R. Holland “Nora ana Tibutetei te Atua” (Riaona, Meei 2019, 44–46). Bukin tera te tibutetei e rangi ni korakora n riki bwa te kanikinaa ibukin Natin te Atua? Tera ae e reireia Beretitenti Holland are e karikirakea nanom ni karinerine ibukin ana bwaintangira Tamara are i Karawa?

Taraa naba “Akedah (The Binding)” (video), Gospel Library.

12:57

• N reiakina taekan aia onimaki Aberaam ao Taara n ana berita te Atua, kam kona ngkoe ao am ataei ni marooro iaon te tai ngke a riai n tataninga ibukin te bwai ae a rangi n tangiria. Kam kona imwiina n tarai tamneia Taara ao Itaaka are ni moan te kabwarabwara aei ao marooro iaon ana berita te Atua are e karaoia nakon Taara ao Aberaam (taraa naba “Aberaam ao Taara” inanon Karaki man te O Tetemanti, 28–31). Buokiia am ataei bwa ana iangoi bwaai aika e a tia te Atua ni beritani nakoira ngkana ti kakaonimaki. Kaungaia bwa a na taotaona nanoia ao n onimaki bwa e na bon kawakin Ana berita te Atua.

  

  2:20

• Ni buokiia am ataei bwa a na reiakina kakaawakin te koaua are ni Karikani Bwaai 18:14, ko kona ni korei taeka teuana imwiin teuana ake man te moan tiententi n te kibu anne i aon te moti ni beeba aika kaokoro. Imwiina bootii beeba, ao kaoiia am ataei bwa a na kaeti raoi taeka aikai nakon etiia. Kam kona ngkoe ma am ataei ni wareka Karikani Bwaai 17:15–21; 21:1–7 ni kakaea katootoon te bwai ae e karaoia te Uea are e taraa ni kaangaanga. Tibwaia ma am ataei ae ko onimaki bwa te Uea e na kakoroi nanon ana berita, e ngae ngke a taraa ni kaangaanga ke ni maan karaoana.

• Titirakiniia am ataei ngkana iai te tai ae temanna e kaoiia bwa a na karaoa te bwai ae ataia bwa e aki eti. Ti na kanga ni “birinako” man kaangaanga aikai? Koroia ni kakimototoa Karikani Bwaai 19:15–26 man kabwarabwarakin ae ana utu Rota a maeka n te kaawa ae rangin ni buakaka ao anera a kauringiia bwa ana kitanna. Ngkai kam kaai ni bootaki ni wareki kiibu 15–17, 26, tuangiia bwa tera nanon aei iroura ni boong aikai ae ti na “birinako” man te buakaka ao “tai tara mwim” (te kibu 17).

• Kabongai tamnein Aberaam ao Itaaka ao Taurakin Iesu (taraa Gospel Art Book, nambwa 9,57) a kona ni buokiia am ataei ni kabotaua te karaki inanon Karikani Bwaai 22 ma ana anga karea te Tia Kamaiu (taraa Mataio 27:26–37). Tera ae ti kona n reiakinna ibukin Tamara are i Karawa ao Iesu Kristo man rongorongon Aberaam ao Itaaka ao te Kamateaki n te kaibangaki? (Taraa naba “Aberaam ao Itaaka,” inanon Karaki man te O Tetemanti, 34–37)

  

  2:0

• Ko kona ni iangoa te takakaro ae bebete karaoana ma am ataei are e na kairiia bwa a na ira te kaetieti? Tao te kairiiri bwa a na kona ni kairaki nakon tamnein te Tia Kamaiu ae karabaaki. Te takakaro aei e na karika te mamarooro iaon bwaai aika e tua Tamara are i Karawa bwa ti na karaoi bwa ti na kona ni manga maeka ma Ngaia ao Iesu Kristo. Iangoia n anenea te anene n aron “Keep the Commandments” (Aia Boki n Anene Ataei, 146–47). Te iteraniba ibukin te waaki ni kakukurei n te wiki aei e kona n ibuobuoki naba.