Karikani Bwaai 12–17; Aberaam 1–2

E reirei Unimwaane Neil L. Andersen, “Ti bane n rootaki irouia ara utu [ao] ara katei, ma I bon kakoaua i nanou bwa iai te bwai i nanora ae e okoro ae ti konaa n taua arona ao ni karaoia iroura n tatabemaniira nako. … E na bon riki ae, tangiria nanora a karekeaki ni maiura ao a nooraki n ara rinerine ao n ara mwakuri” (“Educate Your Desires, Elder Andersen Counsels,” ChurchofJesusChrist.org). Iangoia bwa e kanga Aberaam 1:1–19 ni kaotia bwa tera ae reireia Unimwaane Andersen. Titiraki n aron aikai a kona n ibuobuoki:

• Tera ae tangiria i nanona Aberaam? E kanga aron nanona are e tangiria n oti n ana mwakuri nako? E kangaa te Atua ni boutokaa nanona are e tangiria?

• Tera ae tangiria nanom? A kanga n kaotaki i nanon ara mwakuri? E kanga ni boutokaiko te Atua?

• Tera rongorongo man kiibu aikai ibukiia naake iai aia utu aika a aki tangira te raoiroi?

Teuana mai buakon nanoia ae a rangi n tangiria Aberaam ao Taara—bon karekean natiia—ae tuai man kakoroaki bukina i nanon ririki aika a bati (taraa Karikani Bwaai 15:1–6). Tera ae ko reiakinna man Ebera 11:8–13 bwa a kangaa Aberaam ao Taara n kaitaraa te kataaki aei? E kanga te Tia Kamaiu ni buokiko n “taui” Ana berita, e ngae ngke a rang “raroa nako”?

Taraa naba “Deliverance of Abraham” (witeo), Gospel Library.

1:38

Bukin tera ngkai e kakaawaki iroum ataakin taekan te berita are e karaoia te Atua ma Aberaam? Ibukina bwa e tangiria te Atua ni karaoa te berita ae tabu ae ai aron arei ma ngke. E berita bwa te berita ae tabu aei e na reitinako nakoia kanoan Aberaam, ke “ana kariki,” ao bwa “naake a butimwaea te Euangkerio aei a na … warekaki bwa a na kariki” (taraa Aberaam 2:10–11). N taekana teuana, e reitinako i nanom te berita ae tabu—ngkana ko bwabetitoaki ao n kabwaninna riki ngkana ko karaoi berita aika tabu i nanon te tembora (taraa I-Kariraia 3:26–29; Reirei ao Berita aika Tabu 132:30–32).

Ni bukina anne, ko na bae n tangiria n kamatebwaia Aberaam 2:6–11 ao ni karaoa rinanin ae bon, eti raoi, are e a tia ni beritanna te Atua nakon Aberaam ao Taara (taraa naba Karikani Bwaai 12:1–3; 13:15–16; 15:1–6; 17:1–8, 15–22). A na kanga kakabwaia aikai ni kaineti nakoiu?

Tabeua mai buakon kakabwaia aikai a ti te aroana ma ake mai karawa. A kanga aron berita n aron te rikia n te abaaba ke te kanoa ae bubura ni kakoroaki bukiia n akea tokina? (taraa Reirei ao Berita aika Tabu 131:1–4; 132:20–24, 28–32).

Irarikin berita ake a beritanaki, E tuanga Aberaam te Atua bwa “ngaia te kakabwaia” (Genesis 12:2; kaairaki katuruturuana). “Tera nanon aei iroum? Ko na kangaa n riki ngke bwa te kakabwaia? (taraa Aberaam 2:11).

N angareirei n taekan berita aika tabu, E taekina taekan taian naao aika bubura n te Karaanga ae te Amazon Unimwaane Dale G. Renlund, ao Beretitenti Emily Belle Freeman e taekina taekan te nakonako n te kawai ae kiriatiibu ma te touniwae ae maoto (taraa “Karekean Mwaakan te Atua rinanon Berita aika Tabu,” Riaona, Meei 2023, 35–37; “Nakonako ni Berita aika tabu n Reitaki ma Kristo,” Riaona, Nob. 2023, 76–79). Ukora teuana ke taian rongorongo ni kauoua aikai ibukin te kibuntaeka ae na ibuobuoki ni kaeka te titiraki ae “Bukin tera e tangirai te Atua bwa N na karaoi berita aika tabu ma Ngaia?”

Taraa naba Topics and Questions, “Abrahamic Covenant,” Gospel Library; “Thoughts to Keep in Mind: The Covenant,” i nanon te boki n reirei aei.

Iangoia bwa aongkoa ko kabwarabwaraa Merekitereka nakon temanna ae e aki kinaa. Tera ae ko na taekinna? Tarai iango i nanon Joseph Smith Translation, Karikani Bwaai 14:26–27, 33–38 (i nanon te Abentekiti n te Baibara); Aramwa 13:13–19; Reirei ao Berita aika Tabu 107:1–4. Tera anuan maiun Kristo ae ko kunea i nanon kabwarabwaraan Merekitereka? E kanga aron kamatebwaian maiun Merekitereka iroum n roota aron am taratara n te nakoanibonga ae te Merekitereka?

Tera ae ko reiakinna ibukin anuan maiun Aberaam nakon kaubwaina man Karikani Bwaai 14:18–24 ao Joseph Smith Translation, Karikani Bwaai 14:36–40 (i nanon te Abentekiti n te Baibara)? Te katooto, noora ana kaeka nakon Uean Totom n Karikani Bwaai 14:23. E kanga aron te ongotaeka nakon tuan te kabwianibwai n roota am taratara n te mwane?

Ngkai ko wareka Karikani Bwaai 16,, ko kona n iangoia te tai ngke ko taku bwa ko bwainikirinaki, n ai aron Aka. Ataia bwa “Itimaera” nanona “E ongo te Atua.” E kanga ni kaotia nakoim te Atua bwa E ongo iroum?

Taraa naba “Secret Prayer,” Boki n Anene, nambwa. 144.

• Ngkai ko wareware ma am ataei n wareka Aberaam 1:18 ao 2:8, ko kona ni kaoiia bwa a na kakauongo nakon mwakoron te rabwata ae e taekinaki n kiibu aika uoua aikai. Tao kam kona n takakaro ike a kona ataei ni kamakii mataia ao ko taua bain te ataei ni kairia nakon te tabo teuana. Imwiina ko kona n marooroakinna bwa tera te namakin ngkana e kairiira Iesu n taui baira ao ni kamanoira.

• A na konaa ni kukurei am ataei n karaoa te kaotioti man te karaki man Karikani Bwaai 13:5–12, n bakan riki bwa Aberaam, Rota, ao taan kawakin man. Ti na kanga n ira ana banna ni katooto Aberaam ae ngaia te tia raoi ma ana utu ao raoraona? Kataia karaoa katamneian aia kaeka.

• Iangoia ni kaota te rabwa ae kanoana te tano nakoia am ataei, taian itoi i karawa n te tairiki, ke te tamnei ae i bukin te boki reirei aei. E konaa ni buokiia ni kamatataiia n ana berita nako te Atua n Karikani Bwaai 13:16; 15:1–6. Marorooia bwa ko kanga n tia n reiakinna n onimakina ana berita nako te Atua, e ngae ngke a taraa ni kangaanga.

• N reiakiniia am ataei taekan berita aika tabu, tuangiia bwa a na tuangko taekan te tai teuana ngke a karaoa te berita ke temanna e karaoa te berita nakoia. Ngkana e ibuobuoki, tibwai tabeua am katooto—ni ikotaki ma berita aika tabu ake ko a tia ni karaoia ma te Atua n te bwabetito ke i nanon te tembora. A kanga am berita aika tabu n roota aron am reitaki ma te Atua? Rinei tabeua kibuntaeka man Karikani Bwaai 15:1–6; 17:1–8; Aberaam 2:9–11 n tibwauai tabeua kakabwaia ae beritan te Atua nakoia Aberaam ao Taara.

• Ni buokiia am ataei bwa a na tauraoi ni karaoa te berita ae tabu ma te Atua ngkana a bwabetitoaki, ko konaa ni kabonganai tabeua iango ni karaoan waaki ni kakukurei ake a kaotaki i nanon abentekiti A ke abentekiti B.

• Ngkana e a reke n te kangaanga maiun Aberaam, e wetea te Atua. Ngke e tiku n ti ngaia Aka n te rereua, e reiakinna bwa e ongo irouna te Atua. Iangoi tibwauaan karaki aika uoua aikai ma am ataei: “Abraham and Sarah” ao “Hagar” i nanon Karaki man te O Tetemanti, 28–31, 32–33. Tera ae ti reiakinna ibukin te Atua man taian karaki aikai? Imwiina ko kona n tibwaia ma ngaiia n tatabemaniia taneiai ngke ko namakinna bwa e ongo iroum te Atua. Te anene n aron “A Child’s Prayer” (Aia Boki n Anene Ataei, 12–13) e konaa n kakorakora te reirei aei.

2:20

1:23