Mote 7

Ngke e moan reiakina taekan Enoka Iotebwa Timiti ao ana Kawa ae Tabu, e karekea kairana mai iroun te Tamnei. E “ataia bwa e a roko te bong are te Uea e na manga katea riki Tion iaon te aonaaba” (Saints, 1:108–9), ao e na moana wakinana i nanon maiuna ni katea Tion. Warekan Mote 7 e kona ni kaungako n reitaanako te kekeiaki anne n te bong aei.

Ko na bae ni moanna man ukoran nanon te titiraki “Tera Tion?” ao “E kanga ni kaokoro ma aron te aonaaba?” Iangoia ni korei kaeka ake a roko nakoim ngkai ko kamatebwaia Mote 7, riki kiibu aika 16–21, 27, 53, 62–69.

Am kaeka nakon titiraki aikai tao e na kamataataa ae e bon korakora katabeara ibukin katean Tion. Ngaia are ti na kanga ni karaoia? Tao e na ibuobuoki iangoan taai ngke ko namakinna ae “ti teuana nanoia ao teuana aia iango” ma ake tabeman (Mote 7:18). Tao bon inanon te uoote, te utu, ke te kurubu n te tabo ni mwakuri ke n reirei. Tera ae a karaoia aomata ni karika katiteuanakiia ae tamaroa?

Aikai tabeua bwaai n ibuobuoki are ko kona n ukorii ni kakaei iango ao kairakim mai iroun te Tamnei. Rinea teuana ke ae mwaiti ni kamatebwaia, ao imwina korea te bwai are ko namakinna ni karaoia ni katea Tion:

• I-Biribi 2:1–4; 4 Nibwaai 1:15–18; Reirei ao Berita aika Tabu 97:21; 105:5.

• Ulisses Soares, “Taari Mwane ao Aine i nanon Kristo,” Riaona, Nobembwa 2023, 70–73.

• D. Todd Christofferson, “Ti Temanna Ngkami inanon Kristo,” Riaona, Meei 2023, 77–80.

Tera nanon aei iroum ni karika Iesu Kristo bwa am Uea? Taraa teuana naba aran Iesu Kristo are n te kibu aio. Tera ae reireiniko Iaona? Tera n am iango ae nanonaki n nakomai “riin n te mataroa ao [tamwarake] irou[Na]”?

Taraa naba “Nakomai, Aia Uea Ueea,” Anene n Taromauri, nambwa 59.

Tabeman aomata a tara te Atua bwa te aomata ae raroa are akea ana namakin ae rootaki iai n te bwai ae riki nakoira. E karekea ana atatai Enoka ae kaokoro n te mii ni burabeti are e koreaki ni Mote 7. Tera ae e reiakinna iaon te Atua—ao tera ae ko reiakinna—ni kiibu 28–40? N am iango e aera ngkai Enoka e miimii ngkai e nora te Atua n tang? Bukin tera e kakawaki iroum atakina bwa e aera E karaoa anne?

N tain reitinakon te mii ni burabeti, e tang naba Enoka. Ma e tibwaia naba te Atua ma ngaia bukin te kimwareirei. Kakaei inanon Mote 7:41–69. Tera ae ko reiakinna man miin ni burabeti Enoka are e kona ni buokiko n “tabekarake nanom, ao kukurei,” e ngae ngke iai te “korakai” inanon maium (kibu 44)?

Taraa Jeffrey R. Holland, “The Grandeur of God,” Riaona, Nobembwa 2003, 70–73.

Miin ni burabeti Enoka, riki are e koreaki ni Mote 7:59–67, bon teuana te moan taetae ni burabeti n te rongorongo ae tauaki mwiia ni Kauaokin te Tia Kamaiu. Tera ae anaa nanom iaon kawai ae a kabwarabwarai kiibu aikai n taekan boong aika kaitira? Te katooto, iangoia bwa tera am namakin iaon taetae ni burabeti ake n te kibu 62 ni kakoroaki nanoia. Tera ae e reireiniko kiibu aikai n taekan ana mwakuri te Atua ni boong aika kaitira?

Taraa naba Henry B. Eyring, “Ainen Tion,” Riaona, Nobembwa 2020, 67–69.

• Ni buokiia am ataei n reiakina taekan Enoka ao Tion, ko kona ni kabongana “Enoka te Burabeti” inanon Karaki man te O Tetemanti (19–21) ke te kauoua ni kibu man “Follow the Prophet” (Aia Boki n Anene Ataei, 110–11). Imwina ko kona n tuangiia am ataei bwa a na buokiko ni manga karakina te karaki ni bon oin aia taeka. Tamnein Enoka inanon te kabwarabwara aei e na bae n ibuobuoki.

• Aio te kawai teuana ni buokiia am ataei ni mataata bwa tera ae nanonaki n “ti teuana nanoia ao teuana aia iango (Mote 7:18): Karaoa te aati te beeba ao koreia ni kauarerekei, ae na tau ni katoaia ataei bwa ana iai aia mwakoro. Tuangiia bwa a na korei araia iaon aia mwakoro ni beeba ao n uaia ni mwakuri ni katoma raoi te aati anne. Ngkai a karaoia, ko na bae n taekin bwaai ake ko tangiri iaoia ataei n tatabemaniia nako.

• Buokiia am ataei bwa ana wareka mwaitin te tai ae otioti iai te taeka “Tion” ni Mote 7:18–21, 62–63, 68–69. Ni katoatai ngkana a kunea te taeka, buokiia n ataia bwa tera ae taekinna te kibu anne ibukin Tion (taraa naba te Kairi nakon Koroboki aika Tabu, “Tion,” Gospel Library). Ti na kanga n riki n aroia aomata aika a kabwarabwaraaki inanon kiibu aikai?

• Ni kabwarabwara Mote 7:32–33 nakoia am ataei, ko na bae ni marooro ma ngaiia iaon te rinerine are a tibwa tia ni karaoia. Imwiina kam kona n uaia ni warekii kiibu ni kakaea bwa tera ae tangiria Tamara are i Karawa bwa ti na rineia. Tera rinerine aika ti kona ni karaoi ni kaotia ae ti Rineia? Tao a na kona am ataei ni kakaibibiti ni karaoa kain teuana te rinerine ngkai ake tabeman a kataia ni keetinna bwa tera ae e karaoaki.

• Inanon Mote 7:59, ao e tabeka te titiraki Enoka nakon te Uea. Kaoiia am ataei bwa a na kakaea, ao imwiina tuangiia bwa a na kakaea rekena n te kibu 60. Ko na bae naba ni marooro ma ngaiia ngke a kantaningaa temanna bwa e na okira mweengana. Titirakiniia bwa tera aia namakin ao tera ae a karaoia ni katauraoiia. Ti na kanga ni katauraoira ibukin okin Iesu?

• Iangoia ni kaoti tamnei n taai ngke e kaoti te Tia Kamaiu nakoia aomata (n aron Gospel Art Book, nambwa 60, 82, 83, ao 84). Tera ae a karaoia aomata n taian tamnei? A na tera aia namakin aomata ngkana a kaitibo ma Iesu? Kam kona naba n anenea te anene iaon taekan Mangaokin te Tia Kamaiu, n aron “When He Comes Again” (Aia Boki n Anene Ataei, 82–83), ao titirakiniia ataei bwa n aia iango kanga e na kangaa arona ngkana e a manga oki Iesu. Kariaia ataei bwa ana tibwaua aron aia namakin iroun Iesu ngkana E a manga oki.