Karikani Bwaai 5; Mote 6

Ngkai kam kamatebwaia Mote 6:26–36, tera ae kam reiakinna i aon taekan te rootaki man te bure? Ko a tia n noori rootaki akanne? Tera anua ni maiu ae reke iroun Enoka are e buokia n tokanikai man taian rootaki akanne? E kanga ni kakabwaiaia te Uea n tokin te tai?

Ngkana ko tia n namakina rootakim ma ana wewete te Uea nakoim ni karaoan te mwakuri, ko bon aki tiku n tii ngkoe ke ko aki maroaa. E bon namakina naba ae ai aron anne Enoka ngke e weteiaki iroun te Uea bwa te burabeti. Ngkai kam wareka Mote 6:26–36, kakaei bukina ngke e namakinna Enoka bwa e aki konaa uotana ao tera are e taekinna te Uea n anganna te unga n nano.

I nanon kiibu 37–47, ko kona n tarai kawai are e boutokaa Enoka iai te Uea ao ni kakorakoraa ni karaoa Ana mwakuri (taraa naba Mote 7:13). Ko kona ni kabotaua are e rinanona Enoka ma burabeti ake tabeman are a namakina te aki tau, n aron Mote (taraa Te Otinako 4:10–16), Ieremia (taraa Ieremia 1:4–10), Nibwaai (taraa 2 Nibwaai 33:1–4), ao Moronaai (taraa Ita 12:23–29). Tera ae ko namakinna bwa e tangiria te Uea bwa ko na reiakinna man kiibu aikai ibukin te mwakuri are E a tia n anganiko bwa ko na karaoia?

A mwaiti abotoro ao burabeti ni boong aikai ake a kabwarabwaraa aia namakin ae ti te arona ma Enoka ngke a kabwarabwaraa bwa tera ae a namakinna ni karekean te wewete nakoia. Te katooto, noora ana kakoaua Unimwaane Ulisses Soares i nanon “A Taetae Burabeti ni Mwaakan te Tamnei ae Raoiroi” (Riaona, Meei 2018, 98–99).

Tera ae ko reiakinna mairouia burabeti ao abotoro aikai ibukin am namakin n aki tau? N ningai ae ko a tia n namakinna bwa e buokiko te Tia Kamaiu ngke E tuangko bwa ko na karaoi bwaai aika a kangaanga? Iangoia bwa ko na kona ni korei tabeua bwaai aika ko na rinanona nakon taai aika a na roko ngkana ko na kainnanoia ni katan n ana buoka te Tia Kamaiu. Ko na kanga ni kaitarai bwaai aika a na riki aikai ma te onimaki iroun Iesu Kristo?

Taraa naba David A. Bednar, “Ko na mena Irou, ao Ngai Iroum, Ngaia are Nakonako ma Ngai,” Riaona, Meei 2023, 123–25; “I’ll Go Where You Want Me to Go,” Boki n Anene n Taromauri, no. 270.

Ibukina bwa iai iroura ana boki Mote, ti ataia bwa e a tia te Atua n reireiniia Natina bwa a na kanga ni kunea kabooan maiuia mai mwiin Atam ao Ewa. Ngkai kam kamatebwai Mote 6:48–68, kakaea bwa tera ae ti riai n ataia ao ni karaoia bwa ti aonga ni kamaiuaki. Noora ana titiraki Atam i nanon kibu 53. Kam a tia n iangoa anne? Tera ae ko reiakinna man ana kaeka te Uea i nanon kiibu 53–65? Ko na bae n iangoi kiibu aikai ngkai ana kaeka te Uea n ana tai ni bwabetitoaki Atam. Tera ae ko reiakinna ibukin te bwabetito man Ana rongorongo? Bukin tera n am iango ngkai E kabotaua te bwabetito ma te “manga bungiaki”? (kibu 59). Tera ae ko konaa ni karaoia bwa ko na reitinako n “manga bungiaki” ni kabanea maium?

Imwiin reireian Atam koauan ana euangkerio Iesu Kristo, n Mote 6:51–63, e tuanga te Uea Atam bwa e na reiakinna nakoia kanoana n taai aika a na roko. Iangoia ni karinanii koaua aikai. (E na ibuobuoki kamaenakon ikota ni kibuntaeka nakon kurubu n kiibu aika a uarereke, n aron kiibu 51–52, 53–57, 58–60, 61–63). Bukin tera a kakaawaki koaua aikai nakoia te roro ae rikirake ni bong aikai? Tera riki ae ko kona n reiakinna man ana kaetieti te Uea nakoia karo i nanon Motiaea 4:14–15 ao Reirei ao Berita aika Tabu 68:25–28; 93:40–50?

Warekan rongorongon te “boki ni kauring” are a kawakinna ana utu Atam ao Ewa e kona ni kaungaa am utu bwa a na karaoa oin aia boki ni kauring. Tera ae ko namakinna bwai e tangiria te Uea bwa ko na koreia? Iangoa kawakinan rongorongo man ami boki ni kauring i aon FamilySearch.org.

Taraa naba Dieter F. Uchtdorf, “Iesu Kristo Bon Korakoraia Kaaro,” Riaona, Meei 2023, 55–59; “Parenting: Touching the Hearts of Our Youth,” “But Why?” (witeo), Gospel Library.

• Ngke e weteaki Enoka bwa e na tataekina te euangkerio, e raraoma bwa e taku bwa e na aki konaa. Ma e buokia te Atua. Ikotaki ni wareka te karaki n Mote 6:26–34 (taraa naba “Enoch the Prophet” n Karaki man te O Tetemanti, 19–21). Bukin tera e namakinna Enoka bwa e aki kona n tataekina te euangkerio? (taraa Mote 6:31). E kanga te Atua ni buoka Enoka? (taraa Mote 6:32–34; 7:13).

• A na kona n kukurei n tibwatibwa am ataei ke n karaoa taian katooto ngke e buokia aomata te Atua ni karaoi bwaai aika a kangaanga—te katooto, Noa, Tawita, Amon, ke Tamuera te Reimwanaite (taraa Gospel Art Book, nambwa. 7, 19, 78, 81). Ko konaa naba n tibwaa oin am taneiai ao tuangiia am ataei bwa a na marooroakinna bwa e kanga ni buokiia te Atua ni karaoi bwaai aika a kangaanga.

• E reireina Atam te bwai ae ti kainnanoia ni karaoia te Atua bwa n oki Nakoina—karekea ara onimaki, rairannano, bwabetitoaki, ao ni karekea ana bwaintituaraoi te Tamnei ae Raoiroi. Buokiia am ataei ni kunei reirei aikai n Mote 6:52, 57. Imwiina ko kona ni buokiia n korea te marooro ae kimototo ibukin taekan teuana man taian reirei. A konaa taetae ke marooro aikai n iai i nanona te kibu man Mote 6, te taneiai, ao te koaua. Tuangiia bwa a na tibwai aia marooro i marenaia.

• Ko konaa naba ni kaotii tamnei ake a tei n onea mwiin te moan tua n te euangkerio (taraa te taekan te onimaki te kaaua). Karereenai n te rain ni karokoa tamnein Iesu Kristo. Ngkai ko wareka Mote 6:52, a konaa n tei am ataei i rarikin te tamnei ae eeti ngkana a aongo taekan te tamnei are a tei ibukiia.

• A na kona ni kukurei am ataei n anenei anene aika a reiakina te tua n Mote 6:52, n aron te “Faith,” “When I Am Baptized,” ao “The Holy Ghost” (Aia Boki n Anene Ataei, 96–97, 103, 105). Buokiia bwa a na kunei reirei aikai n Mote 6:52.

• N kaungaia ami ataei bwa a na boutokaia aia karo i nanon tibwangaia aika taan reirei n te euangkerio, iangoia n tuanga te ataei bwa e na wareka Mote 6:58 ao n kinai ana tua te Atua are e a tia n anga nakoia kaaro. I mwiina ko konaa ni kaota tamnein Atam ao Ewa n reireiniia natiia (n aron teuana are ni kabanean te kabwarabwara aio) ao tuangiia am ataei bwa a na marooroakinna bwa tera ae a nooria n te tamnei. A konaa am ataei ni korei tamneia aia utu ni bootaki ni wareki koroboki aika tabu, bootaki n tataro, ke n bootaki n takakaro.