Karikani Bwaai 3–4; Mote 4–5

E bon koaua bwa aia rinerine Atam ao Ewa e a uotii kangaanga aika a mwaiti ake ti rinanona n te maiu ae mamate aei. Ma tiaki nanona bwa ti a uringaaba n aia rinerine. Ngkai ko wareka Karikani Bwaai 3 ao Mote 4, ko na bae ni bon titirakiniko i bon iroum, bukin tera ngkai e kakawaki te Bwaka nakon ana babaire te Atua?

Ni kaineti nakon Mote 5:9–12, e kanga aron aia namakin Atam ao Ewa ibukin te Bwaka? Ko na kanga ni kammwakura aia taeka nakon am taneiai n te aonaaba ae bwaka aei? Tera riki ae ko reiakinna man 2 Nibwaai 2:19–25?

Taraa naab Motiaea 3:19; Aramwa 12:21–37; ao Reirei ao Berita aika Tabu 29:39–43.

Karakinan Atam ao Ewa bon teuana mai buakon te kaantaninga ao kabooan maiura rinanon Iesu Kristo. N nooria bwa bukin tera, ko kona ni waaki man ukoukora mwiin te Bwaka inanon Karikani Bwaai 3:1–7; Mote 4:22–31 ao mwaakenna ke korei baike ko kunei. Ko kanga n rootaki man mwiin baika a riki aikai? Ngkanne ko kona ni rinanon Mote 5:4–15, n ukora ana babaire te Atua bwa e na kamaiura man mwiin baikai. Bukin tera Atam ao Nei Ewa a “kukurei” imwiin kawaraia iroun te anera? Tera ae ko reiakinna mai irouia ibukin ana babaire Tamara are i Karawa?

Taraa naba “Because of Him” (witeo), Gospel Library.

2:44

Te kibuntaeka aei n tabetai e kona ni kairuaki ni kananonaaki bwa te buumwaane e na tautaeka ni karaoa te ribuaka nakon buuna. Inanon ara bong aikai, a reirei burabeti bwa te buuaine ao te buumwaane a riai n taraiia i bon imarenaia bwa rao aika ti te arona ngaiia ni kakoroi bukin mwiokoaia inanon te utu (taraa “Te Utu, Te Katanoata nakon te Aonaaba” [Gospel Library]). A kabwarabwara Uninmwaane Dale G. Renlund ao Titita Ruth Lybbert Renlund bwa te buu te mwaane ae tamaroa “e na ukoukora aron te mwakuri n ibuobuoki, e na kaoti ana kairua ao n ukoukora kabwaraan ana bure: e na waekoa n anga te kamoamoa; e na rang tararuai kainnanoia ana utu; e na namakina te uota ae korakora n tibwangana ni karekei bwaai ibukin kainnanoia n te aro n rabwata ao n tamnei ibukiia ana utu; e na karinea buuna te aine ma te karinerine ae rianako ao ni mataiakinaki. … E na kakabwaia ana utu” (The Melchizedek Priesthood: Understanding the Doctrine, Living the Principles [2018], 23).

N aron ae reireia Unimwaane Dale G. Renlund, “Ana kouru Tamara are i Karawa n te nakoa ni karo bon tiaki karaoaia Natina bwa a na karaoa ae eti; bon karikaia Natina bwa a na rineia ni karaoa ae eti ao n tokina n riki n ai Arona” (“N te Bong aei Kam na Rineia,” Riaona, Nobembwa 2018, 104). Bukin tera ngkai e rangi ni kakaawaki n ana babaire te Atua bwa ti rineia bwa ti na karaoa ae eti?

Ngkai ko wareka Mote 4:1–4, kakaea bwa tera are a karaoia Tamara are i Karawa ao Iesu Kristo ni kamanoa inaomatam n rinea—am rinerine. Ko na kanga ni karekea mwaakaia ni kamanomano? Ibukin iango tabeua, iangoia ni kamatebwaia te mwakoro ae “Karaoi rinerine aika a kaungaaki” inanon Ibukin Kakorakoraia Kairake: Te Kairi ibukin Karaoan Rinerine (4–5).

Iangoia ni wareka naba are angareirei iaona Riaai ibukin te inaomata n rinerine inanon 2 Nibwaai 2:11–20, 25–30. Bukin tera ngkai e riai te kakaitara ibukin te inaomata n rinerine? Ko na kanga n kaota am kakaitau nakon Iesu Kristo ngkai ko karaoiko bwa ko “inaomata n rinerine? (2 Nibwaai 2:27).

Taraa naba Dallin H. Oaks, “Opposition in All Things,” Liahona, Meei 2016, 114–17; Topics and Questions, “Agency,” Gospel Library; “Choose the Right,” Hymns, no. 239.

Ngkai ko wareka Mote 4:4–12; 5:13–33, iangoia korei n karinani kawai are e kataia Tatan ni kaririia nanon Atam ao Ewa ao natiia. E kanga ni kataia ni karaoi naba akanne ni bong aikai? E kanga ni buokiko Tamara are i Karawa n totokoi ana kamwane Tatan?

Imwiin kanakin te uaanikai are tabiuaki, a kataia ni karabaia Atam ao Ewa ngke a bebeekan. Imwiina, e a karekei kunikaia te Uea. Ngkai ko wareka Mote 4:13–16, 27, iangoi aikai imwiina aikai:

• Iangoia inanom tera ae tei ibukin te bebeekan ao te kunikai inanon koroboki aika tabu, (taraa, n aron te katooto, Te Kaotioti 7:9, 13–15; 2 Nibwaai 9:14; Reirei ao Berita aika Tabu 109:22–26, 76). Tera ae ko reiakinna man aia taneiai Atam ao Ewa n te bebeekan ao te kunikai?

• Ngkana ko a tia n entaau n te tembora, tera ae a na taekinna nakoim Atam ao Ewa ibukin kakawakin kaamenti man te tembora ao tera ae tei ibukina.

Taraa naba “Sacred Temple Clothing” (witeo), Gospel Library.

4:12

Ngkai ko kamatebwaia Mote 5:4–9, 16–26, iangoa anuan Atam ao Ewa ao natiia aika Kain ao Abera nakon aia anga karea. Bukin tera e butimwaea ana anga karea Abera te Uea ao e aki butimwaea Kain?

Tera ae tuangko te Uea bwa ko na anga bwa am anga karea? Iai te bwai inanon kiibu aikai ae katamaroa arom n iango ibukin anga karea akanne?

• Ni buokiia am ataei bwa a rangi ni matata raoi ni Bwakan Atam ao Ewa, ko kona ni kaewei tamnei man “Atam ao Ewa” (inanon Karaki man te O Tetemanti, 13–16) ao korokoroi ni kanakoi. Imwina ko kona ni ikotaki ni mwakuri ni karinanii tamnei ngkai ko maroroakina te bwai are e riki nakoia Atam ao Ewa. Ngkai ko karaoia, maroroakinna bukin tera e kakaawaki, n ana babaire Tamara are i Karawa, ibukin Atam ao Ewa bwa a na kitana te Onaroka are Eten.

• A kona am ataei n namakina te kakaitau ibukin ana Mwakuri ni Kamaiu Iesu Kristo ngkai a mataata bwa E kanga n tokanikai mai imwiin te Bwaka. Ngkai kam ikotaki ni wareka Mote 4:25; 6:48; I-Rom 5:12; 2 Nibwaai 2:22–23, buokiia am ataei ni kakaei kawai ni kabwanina te tiententi aei: “Ibukin te Bwaka, I …” Ngkanne ngkai kam ikotaki ni wareka Mote 5:8–11, 14–15; 6:59; Aramwa 11:42, a kona ni kabwanina te tiententi aei: “Ibukin Iesu Kristo, I …” Tibwaia imwarenami ami kakaitau ibukin Iesu Kristo.

• Iangoia ni kabongana te bwai n reirei ni kabootau ni kabwarabwara tuan te inaomata: kaoia am ataei bwa a na karana te iteraniba ibukin waaki ni kakukurei n te wiiki aei, ma anganiia ti teuana te kara bwa a na kabongana. Bukin tera e raoiroi riki karekean ara rinerine? Kam kona ni ikotaki ni wareka Mote 4:1–4 ao maroroakinna bukin tera ngkai e tangiriia te Atua bwa ti na kona rinerine imarenan te eti ao te kairau. A kanga Tamara are i Karawa ao Iesu Kristo ni buokiira ni karaoi rinereine aika a raraoi?

• Buokiia ataei n iangoi ao ni korei tamnein rinerinee aika raraoi aika a kona ni karaoi n ira Iesu Kristo. Ikotaki n anenea te kuna iaon karaoakin rinerine aika raraoi, n aron “Rinea te Kawai ae Eti” (Aia Boki n Anene Ataei,, 160–61). Kam kona ni karaki imarenami ibukin te tai are ko karaoa te rinerine ae raoiroi, ao kabwarabwaraa am namakin imwiina.

• Ngke a kitana te Onaroka are Eten Atam ao Ewa, a bon aki kona ni bootaki ma Tamara are i Karawa. Wareka Mote 5:4, 8 ma am ataei, ao buokiia ni kunea te bwai are a karaoia Atam ao Ewa n namakinna bwa a kaan riki ma Ngaia ao n ongo Irouna. Tera bwaai tabeua aika ti kona n taekin nakon Tamara are i Karawa n ara tataro?