“Iango aika Ana Ururungaki ao Ni Iangoaki Raoi: Warekan te O Tetemanti,” Nakomai, Iriirai—Ibukin te Mweenga ao te Taromauri: Te O Tetemanti 2026 (2026)
“Warekan te O Tetemanti,” Nakomai, Iriirai: 2026
Iango aika Ana Ururingaki ao ni Iangoaki
Warekan te O Tetemanti
Ngke e tangiria Nibwaai bwa e na anainanoia tarina bwa a na onimakina te Uea, e karakina rongorongon Mote ao ana reirei Itaia. Ngke e tangiria te Abotoro ae Bauro bwa e na kaungai nanoia Kiritian ake ngkoa n iai aia onimaki n ana berita te Atua, e kauringiia aron aia onimaki Noa, Aberaam, Taara, Raaba, ao tabeman riki. Ao Iesu ngke E tuangiia aia mataniwii I-Iutaia n, “ukorii koroboki aika a tabu,” ni kamataata bwa ngaiia are a “kaotioti i bukiu” (Ioane 5:39), E taetae ibukin koroboki ake ti aranna bwa te O Tetemanti.
N taekana teuana, ngkana ko wareka te O Tetemanti, ko wareki taeka ake a karekea te ungannano, te raunnano, ao ni kaungai nanoia ana aomata te Atua n te maan ae tengaa n ririki.
Ma e kona te bwai ae koreaki n taai aika a bwakanako ni kunei kaeka nakon kangaanga ni boong aikai? “Eng, e kona! Ai moarara riki ngkana ko uringnga bwa antai raoi rongorongona ae taekinaki n te O Tetemanti.
Kakoauan Taekan Iesu Kristo
Tera nako kangaanga are ko rinanona ma am utu, te kaeka n tainako bon Iesu Kristo. Ngaia are kakaei kaeka i nanon te O Tetemanti, ukoria Kakaea. E aki bebete n tainako. Ko na riai n iangoia i nanom ma te taotaonaki n nano ao ukora te kairi n te maiu n tamnei. N tabetai koroboki ake a koreaki ibukina a taraa n rangi ni kaineti, n aron are e taekinna Itaia “Ba E bungiaki te tei i bukira, ti anganaki te nati te mwane: … ao e na atongaki arana bwa … Te Uea n Raoi” (Itaia 9:6). N taabo tabeua, te Tia Kamaiu e kanikinaeaki riki n te katei, rinanon kanikina ao kabotau—te katooto, rinanon karaoan te angakarea irouia maan ke rongorongon Iotebwa ngke e kabwarai aia bure tarina ao e kamaiuia man te rongo.
Otan te Aonnaba, iroun Scott Sumner
Ngkana ko ukoukora te onimaki ae korakora riki iroun te Tia Kamaiu ngkai ko kamatebwaia te O Tetemanti, ko na kunea. Tao aio e ko na n riki bwa am kouru ibukin am kamatebwai n te ririki aei. Tataro bwa e na kairiko te Tamnei bwa ko na kunea ao ni kabotoa am iango i aon rongorongo, karaki, ao taetae ni burabeti ake a uotiko ni kaniiko riki nakon Iesu Kristo.
Kawakinaki Mimitongina
Tai kaantaningaa te O Tetemanti bwa e na kaoti bwaai ni kabane ao ni kabwarabwarai rongorongoia aomata ni kawai. Tiaki anne te bwai are a oioi iaona ke ni kataia ni karikia taan koroboki ao taan ikoikoti rongorongo. Aia kantaninga ae abwabwaki riki bwa a na reireia taekan te Atua—ibukin Ana baire ibukiia Natina, n te bwai are e nanonaki bwa Ana aomata ni berita, ao ibukin aron karekean te kabooaki ngkana ti kabwaka. N tabetai a karaoia ni kairekerekea ma bwaai aika a riki ngkoa ni kaineti ma aron otaia iai, n raonaki ma karaki man maiuia burabeti aika korakora. Karikani Bwaai bon te katoto iaon aei, ao booki naba n aron Iotua, Taan Motiki Taeka, ao 1 ao 2 Uea. Ma taan koroboki n te O Tetemanti ake tabeman a aki kataia ni korei rongorongon rimoa. Ma, a reirei rinanona mwakuri n te korobanna n aron te kamatenano ao te konabwai n te koroboki. Taian Areru ao Taekan Rabakau a rin raoi n te karinan aei. Ao ngkanne iai aia taeka aika a kakaawaki burabeti, n aron Itaia ao Maraki, ake a taekina ana taeka te Atua nakoia kain Iteraera n taai akekei—ao, rinanon te kakai n te Baibara, ake a teimatoa n taetae nakoira n taai aikai.
A ataia burabeti aikai, taan kario, ao taan ikoti rongorongo bwa a na tauraoi aia taeka ni warekaki irouia aomata ni kabuta te aonaaba nga ma nga ririki imwiina? Ti aki ataia. Ma ti mimi bwa aio raoi te bwai ae riki. A tei aba aika a boou a rikirake ni korakora ao n tokina a bwaka, a tautaekanaki kaawa, uea a maiu ao a mate; ma te O Tetemanti e bon tiku n arona man te roro teuana nakon teuana, man rongorongo nakon te rongorongo are imwiina, man rairana nakon rairana. Te koaua bwaai tabeua a bua ke a karakaaki, ma e ngae n anne e mwaiti riki ae e a tia ni kawakinaki inanon te kakai.
Burabeti n te O Tetemanti, iroun Judith A. Mehr (te rongorongo)
Aikai bon tabeua bwaai ake ko na katikui n am iango ngkai ko wareka te O Tetemanti n te ririki aei. E kawakini koroboki ake rimoa aikai te Atua ibukina bwa E ataiko ao E ata te bwai are ko rinanona. E a tia ni katauraoa te rongorongo n tamnei ibukim inanon taeka aikai, te bwai are e na kaniiko riki nako Ina ao ni katea am onimaki iaon Ana baire ao Natina ae Tangiraki. Tao E na kairiko nakon te rongorongo ke te iango are e na kakabwaiaa temanna ae ko kina—te rongorongo ae ko kona n tibwaia ma raoraom, kain am utu, ke te rao ae Itiaki. A rangin ni mwaiti angana. E aki kaunga iangoan anne?
E taku Nibwaai, “E kimwareirei tamneiu ni koroboki aika tabu” (2 Nibwaai 4:15). Ko na bae n namakina aekan naba anne ngkai ko wareki taeka aika a mwaiti aika ti te arona ma ake e wareki Nibwaai—are ti aranna ngkai bwa te O Tetemanti.
Booki n te O Tetemanti
N angiin kabouan te O Tetemanti irouia Kiritian, a baireaki booki n aro aika a kakaokoro man aroia ni baireaki ngke a moan ikoikotaki inanon te moan ikoikoti. Ngaia are te Baibara n Ebera e kurubuni booki inanon teniua karinanna—te tua, burabeti, ao koroboki—angiin Baibara ni Kiritian a bairei booki inanon aua karinanna: tua (Karikani Bwaai–Warekaia Iteraera), rongorongon (Iotua–Etita), booki ni kario (Iobi–Ana Anene Toromon), ao burabeti (Itaia–Maraki).
Bukin tera a kakaawaki rinan aikai? Ibukina bwa ataakina bwa te aeka ni boki raa are kona kamatebwaia e kona ni buokiko ni kaotako n aron kamatebwaiana.
Aio te bwai ae kona katikua n am iango ngkai ko waaki ni wareka “te tua,” ke moan booki ake nimaua n te O Tetemanti. Booki aikai, ake a kakoauaki bwa a koreaki iroun Mote, ake tao a tia ni bwatinaki rinanon baia taan koroboki aika a mwaiti ao taan ikoti rongorongo inanon ririki aika mwaiti. Ao ti ataia bwa, n tienture aika bwakanako, “mwakoro aika a mwaiti aika a matata ma ni kakaawaki” a buutaki man te Baibare (taraa 1 Nibwaai 13:23–26). Ma, ana boki Mote bon ana taeka te Atua aika kairaki mai ieta, e ngae ngke—ti te arona ma ana mwakuri nako te Atua ake a kanakoaki rinanoia aomata—ae kaineti ma aki kororaoia aomata (taraa Mote 1:41; Taekan te Onimaki 1:8). Ana taeka Moronaai, are kaineti nakon rekooti ae tabu n Ana Boki Moomon are e ibuobuoki ni ikoti, a ibuobuoki ikai:“Ao ngkai, ngkana arona bwa iai kaairua ao bon aia kaairua aomata; mangaia ae kam na aki kabuakakai ana bwai nako te Atua” (atuun iteranibaan Ana Booki Moomon). N taekana teuana, booki ni koroboki aika a tabu a riai n aki kainaomataki man ana kaairua te aomata bwa a aonga n riki bwa ana taeka te Atua.