Kabwarabwaraan te O Tetemanti

Teuana te kawai ae kakawaki ni kanuaakin te tamnei n te O Tetemanti bon kakaean te Berena ni Kamaiu, Iesu Kristo (taraa Ioane 6:48). N aron te katooto, ko kanga n noora te Tia Kamaiu n aikai?

• Manna (Te Otinako 16:4, 11–15; Ioane 6:35)

• Te tibuteteei ae te karea (Te Otinako 12:3–5; Ioane 1:29)

• Te naeta te buraati (Warekaia Iteraera 21:4–10; Ioane 3:14)

• Iona (Iona 1:4–17; Mataio 12:38–41)

Tera ae a reireia banna ni katooto aikai Ibukina? Tera riki bwai n ibuobuoki nakon Iesu Kristo n te O Tetemanti ae ko a kaman ataia?

N ana rongorongo “Iesu Kristo bon te Kaubwai ae Rangi ni Kakawaki,” Unimwaane G. Renlund e kaungai nanora n “ururingnga ao ni kabanea ara iango n tainako iroun Iesu Kristo” (Riaona, Nob. 2023, 98). Iangoia ni wareka ana rongorongo ibukin bwaai ake ko kona ni karaoi ni kunea Iesu Kristo tiaki tii n te O Tetemanti ma inanon maium naba.

Taraa naba “Types or Symbols of Christ” in Guide to the Scriptures, “Jesus Christ,” Gospel Library; “Seek the Lord Early,” Children’s Songbook, 108.

E reirei Beretitenti Dallin H. Oaks: “Te Tama e kabwarabwara Natina ae Ana Riki Temanna, ae Iesu Kristo, bwa ara Tia Kamaiu ao te tia Kabooi Maiura ao n tua nakoira bwa ti na “ongo Irouna.’ Man te kairiiri aei ti kamatoa bwa taeka ake a taekinaki mairoun te ‘Atua’ ke te ‘Uea’ bwa bon ana taeka n taainako Iehova, ara Uea are e a tia n uti, ae Iesu Kristo” (“Ana Anga Reirei Iesu Kristo,” Riaona, Meei 2023, 102).

14:7

Ngke e titirakinaki Iesu irouia mataniwiin Iutai ibukin Rikina, E taku, “Ba ngke e tuai ni bungiaki Aberaam, ao bon iai Ngai.” A rangi ni miimi aomata ngke a ongo taeka aikai mairoun Iesu, ao a tauraoi ni karebanaia (taraa Ioane 8:58–59). Iangoia ni wareka Te Otinako 3:13–15; 6:3–5 n taraia bwa bukin tera ngkai aki kukurei Iutaia n te bwai are e karaoia Iesu.

Bukin tera ngkai e kakawaki iroum bwa ko na ataia bwa Iesu Kristo bon Iehova?

N te moan kaotioti, te Uea e kaota nakon Nibwaai rokon te Baibara, ni kabwarabwaraa bwa a “mwaiti bwaai aika a mataata ma ni kakawaki” aika a na buutaki mai iai. Iangoia ni wareka 1 Nibwaai 13:21–29, 38–42, n ukoria bwa e kanga ana baire te Uea ni “kaoti bwaai aika a mataata ma ni kakawaki.” Ni kaineti ma 2 Nibwaai 3:12, e kanga te Baibara ao ana Boki Moomon ni uaia ni mwakuri?

Ngkai ko kamatebwaia te O Tetemanti n te ririki aei, ko na kamatebwaii naba “booki ake tabeua” ake e a kaman noori Nibwaai. A raonaki ma:

• Ana Boki Mote, mwakoron ana rairairi Iotebwa Timiti ibukin te Baibara. E kaokii koaua ao rongorongo ake aki kuneaki n te rongorongo ae ngkai n Karikani Bwaai 1–6.

• Ana boki Aberaam, are e kaokaki nakon Iotebwa Timiti n aron are ngke e tuoi koroboki ake ngkoa n te taetae n Aikubita (taraa Topics and Questions, “Book of Abraham,” Gospel Library).

• Rongorongo aika a kakaokoro ma n ana Rairairi Iotebwa Timiti, tabeua mai buakona a kaoti iaon bwaai aika a na taraaki mai inano, te abentekiti n te Baibara, ao Bwai ni Kairi nakon Koroboki aika Tabu.

Aikai tabeua banna ni katooto n rongorongo man te O Tetemanti are e kaokaki rinanon te Burabeti Iotebwa Timiti: ana kaawa Enoka ae Tion (Mote 7:18–19), Miin Aberaam ibukin te boowi i karawa (Aberaam 3:22–28), ao ana mwakuri Merekitereka (Ana Rairairi Iotebwa Timiti, Karikani Bwaai 14:25–40). Bukin tera ngkai “a matata ao a kakaawaki” rongorongo aikai iroum?

Te O Tetemanti bon rongorongon te Atua ni ukoria ni karaoira bwa ti na riki bwa Ana “bwai ae kakawaki” n te berita ae tabu (Te Otinako 19:5). Ni bukina anne, te anga ae tamaroa ni katauraoi ni wareka te O Tetemanti bon reiakinan berita aika tabu—riki te berita ae tabu ae akea tokina are e anga te Atua nakoia burabeti ake ngkoa n aron Aberaam, Itaaka, Iakoba, ao kanoaia. Ao te anga ae moan te nakoraoi riki n reiakinan berita aika tabu bon man kamatebwaian ana rongorongo Beretitenti Russell M. Nelson “Te Berita ae Tabu ae Akea Tokina” (Riaona, Okitobwa 2022, 4–11).

Ngkai ko wareware, titirakiniko i bon iroum: Bukin tera ngkai a kakaawaki berita aika tabu nakoiu? Te “aekaki n tangira ae e onoti ao n nanoanga” raa ae I karekea mairoun te Atua ngkai I kawakin au berita aika tabu ma Ngaia? Ngkai ko wareka te O Tetemanti n te ririki aei, kamatairikiko n tarai bwaai ake e tangiria n reireiniko iai te Atua n am reitaki n te berita ae tabu ma Ngaia.

Taraa naba Ieremia 31:31–34.

• Taekan ao aron katein te O Tetemanti e na kona ni kangaanga bwa a na mataata iai ataei, ma ko kona ni buokiia n noora Iesu Kristo inanon taian kanikinaa ao karaki. Tao ko kona ngkoe ma am ataei n taraa te tamnei ae inano, Te Burabeti ae Itaia e a Kaman Taekina Bungiakin Kristo. Tuangiia am ataei bwa a na kotei rongorongo ake a noori. Kataia anaa nanoia, riki, nakon Iesu te merimeri. Ngkanne ko kona ni wareware ma ngaiia n ana rongorongo Itaia are e koreia ibukin bungiakin te Tia Kamaiu n Itaia 7:14; 9:6. Tibwaia ma am ataei bwa e kanga am namakin ngke ko ukora taekan te Tia Kamaiu n te O Tetemanti n te ririki aei.

  

• Ko kona ngkoe ma am ataei ni wareka Taian Areru 23 ke Itaia 53:3–9 ao kakaei taeka ake a kauringko iai taekan Iesu Kristo. Tera ae reireiniira taeka aikai Ibukin Maiuna ao Ana Mwakuri ni Kamaiu?

• Berita aika Tabu bon botoniango aika a kakawaki n te O Tetemanti. Ni kabwarabwara te botoniango aei nakoia am ataei, ko kona ni marooro mangaiia ibukin berita ake a karaoi ao ni kawakin ma aia utu ke raoraoia ao bukin tera ngkai e kakawaki kawakinan berita aikai. Ko kona ngkanne n taraa tamnein te bwabetito ao ni maroroakina taekan te berita, ke te berita ae tabu, are ti karaoia ma te Atua ngke ti bwabetitoaki (taraa Motiaea 18:10, 13). Ko kona naba ni kaota tamnein te tembora ao n tibwaua am namakin ibukin berita aika tabu ake ti karaoi ikekei.

• Te iteraniba n te waaki ni kakukurei n te wiiki aei e kona ni buokiia am ataei ni kukurei ni karaoi ao ni kawakin berita aika tabu ma te Tama are i Karawa. Kam kona naba n anenea te anene i aon karaoan berita aika tabu, n aron “I Will Be Valiant” (Aia Boki n Anene Ataei, 103).

• Iai temanna ae a kinaa am ataei are e aranna n aara aika kakaokoro n taabo aika a kakaokoro? Tao te karo ke te tia reirei ae weteaki n ae kaokoro n te tabo ni mwakuri, n te mweenga, ao n te taromauri. Maroroakin aara akanne, ngkanne baane wareka Te Otinako 6:3 ao kaoia am ataei bwa a na kakaei aara are e kinaaki iai Iesu Kristo imwaain bungiakina (taraa naba ana Rairairi Iotebwa Timiti ni bwaai aika a na taraaki mai inano c).