“Iango aika Ana Ururingaki ao ni Iangoaki: Te Berita ae Tabu,” Nakomai, Iriirai–Ibukiia Aomata n Tatabemaniia ao Utu: Te O Tetemanti 2026 (2026)
“Te Berita ae Tabu,” Nakomai, Iriirai: 2026
Iango aika Ana Ururingaki ao ni Iangoaki
Te Berita ae Tabu
I nanon te O Tetemanti ni kabanea, ko na wareka te taeka ae okioki ae berita. N te bong aei ti aki toki n iangoa te berita bwa te berita ae tabu ma te Atua, ma n te aonaaba n taai akekei, a bon kakaawaki naba berita n te itera are e kakaawaki n aia reitaki aomata i marenaia. Ibukin kamanoakiia ao maiuia, aomata a kainnanoia bwa a na kona n onimakiniia i marenaia, ao te berita bon te kawai ni kamanoa te onimakinaki anne.
Ngaia are ngke e taetae te Atua nakon Enoka, Noa, Mote, ao tabeman ibukin taian berita aika tabu, E bon kaoiia bwa a na rin n te reitaki n onimaki ma Ngaia. Ti arana te berita ae tabu aei bwa te berita ae tabu ae boou ae akea tokina ke te berita ae tabu nakon Aberaam—te rongorongo nakon ana berita ae tabu te Atua are e karaoia ma Aberaam ao Taara ao i mwiina e kabooua ma kanoaia aika Itaaka ao Iakoba (are e aranaki naba bwa Iteraera). N te O Tetemanti, e bon ti ataaki bwa te “berita ae tabu.” Ko na nooria bwa te O Tetemanti bon aan rongorongoia aomata ake a taraia bwa taan bwaibwai n te berita aio—aomatan te berita.
Ana berita Aberaam e reitinako ni kakaawaki ni boong aikai, riki nakoia Aomata aika a Itiaki ni Bong aika Kaitira. Bukin tera? Ibukina bwa ngaira naba aomatan te berita, ngkana ngaira ke tiaki ana kariki Aberaam, Itaaka, ao Iakobwa. Ibukin aei, e kakaawaki bwa tina ota bwa ana berita Aberaam bon ngaia ao arona are e kaineti iai nakoira n te bong aei.
Tera ana Berita Aberaam?
Aberaam e tangiria “n irira ae raoiroi” (Aberaam 1:2), ngaia are te Atua e kaoia bwa e na reitaki inanon te berita. Aberaam tiaki ngaia te moan ni karekea te nano aei, ao bon tiaki te moan aomata ni karekea te berita. Bon ngaia, ni bwaai ni kabane, te berita ae tabu ae akea tokina. E ukoukora “aia kakabwaia bakatibu” Aberaam (Aberaam 1:2)—kakabwaia ake a anga man te berita nakon Atam ao Nei Ewa ao ake i mwiina nakoia naake a ukoukori kakabwaia aikai ma te nanomwaaka.
Ana berita te Atua ma Aberaam bon kakabwaia aika tamaroa: n te bwaibwai i aon te aba, rooro ae mwaiti n taai aika a na roko, karekean te otenanti n te nakoanibonga, ao te ara are e na karineaki irouia rooro aika a na roko. Ma boton te berita aei bon tiaki ti te kakabwaia are Aberaam ma ana utu a na karekea ma te kakabwaia naba are a na reke nakoia nikiraia natin te Atua. “Ao N na kakabwaiako,” e taetae te Atua, “ao kona riki n ae e na kabwaia te aba iai” (Karikani Bwaai 12:2–3).
Te berita aei E anga te kakabwaia aei nakon Aberaam, Taara, ao aia kariki aroia ni kakabwaia ibuakoia natin te Atua? Ti n te aro are e na reke tibwangaia ni kakabwaiaiia tabeman. Ana utu Aberaam a na “uota te mwakuri n ibuobuoki aei ao te Nakoanibonga nakoia aba ni kabane,” n tibwai “kakabwaia n te Euangkerio, are bon kakabwaia n te kamaiuaki, riki n te maiu ae akea tokina” (Aberaam 2:9, 11). Te riki bwa ana aomata ni berita te Atua tiaki nanona bwa a tamaroa riki nakoia tabeman; e nanonaki bwa iai tibwangaia ni buokiia tabeman bwa a na tamaroa riki.
Te berita aio bon te kakabwaia are e a kaman tataningaia Aberaam. Imwiin rekena, e taku Aberaam inanona, “Am tia mwakuri e a tia ni ukoukoriko ma nanona ni koaua; ngkai I a tia ni kuneko” (Aberaam 2:12).
Anne bon nga ma nga ririki n nako, ma te berita aei e a tia ni kaokaki i nanon ara bong. Ao e a kakoroaki bukina inanon maiuia ana aomata te Atua n te tai aei. Kakoroan nanon te berita bon kanikinaean boong aika kaitira ngkai a rikirake ana mwakuri te Atua, ni kakabwaiaia utu ni kabutaa te aonaaba. Ao aomata nako, n aron Aberaam, ake a tangiria n riki bwa taan iriira te raoiroi—aomata nako ake a ukoukora te Uea ma nanoia ae korakora—a kona n riki bwa kaaina.
Tera Nanon te Berita nakon Aberaam Irou?
Ngkoe bon natin te berita. Ko karaoa te berita ae tabu ma te Atua ngke ko bwabetitoaki ao ngke ko kana te toa. Ao ko karekea bwaninin te berita ae tabu ma taian otenanti aika a tabu n te tembora.
Rinanon berita ao otenanti aika a tabu aikai, ti riki bwa ana aomata te Atua. Ti kabaeaki ma Ngaia “n kabae aika akea tokiia.” “N te tai are ti karaoa te berita ae tabu ma te Atua,” e reirei Beretitenti Russell M. Nelson, “ti kaai ni kiitana te aba n aki toki. Te Atua E na bon aki katoka Ana reitaki ma naake a bakaea reken te reitaki ma Ngaia. Ni koauana, ni kabane naake a karaoa te berita ae tabu ma te Atua iai aia konaa ni karekea te aeka n tangira ao n nanoanga ae onoti. … Ibukin ara berita ma te Atua, E na bon aki kua n Ana mwakuri ni buokiira, ao ti na bon aki kabuaa Ana nanomatoa n Tangira nakoira.” Ko na noora aio n rongorongoia ana aomata ni berita te Atua n te O Tetemanti, ao ko na nooria n bon oin maium bwa ngke temanna natina n te berita ae tabu.
Tai Maaku, iroun Dan Wilson
Aio te atatai ae kakaawaki are ti anganaki ibukin Kaokan Bwai n te berita nakon Aberaam rinanon te Burabeti Iotebwa Timiti. Ngaia are ngkana ko wareka taekan te berita n te O Tetemanti, tai tii iangoa taekan ana reitaki te Atua ma Aberaam, Itaaka ao Iakobwa. Iangoa naba taekan Ana reitaki ma ngkoe. Ngkana ko wareka taekan te berita ni mwaitiia ana kariki, tai tii iangoia aika mirion ake a arana Aberaam bwa tamaia. Iangoa naba ana berita te Atua n te utu ae akea tokina ao n rikirake n akea tokina. Ngkana ko wareka taekan te berita n aban rikiia, tai iangoa tii te aba ni berita nakon Aberaam. Iangoa naba taekan tokin kawain te aonaaba n te tiretio—te berita ae karekeaki nakoia aika a “nimamanei” ake a “kaantaninga iroun te Uea” (Mataio 5:5; Taian Areru 37:9, 11). Ao ngkana ko wareka taekan te berita are ana aomata ni berita te Atua e na kakabwaiaia “a na bane utun te aonaba” (Aberaam 2:11), tai iangoa taekan ana mwakuri n ibuobuoki Aberaam ke burabeti ake a riki mai irouna. Iangoia naba bwa tera ae ko kona ni karaoia—ngkai te tia iriira Iesu Kristo n te berita—n riki bwa te kakabwaia nakoia ana utu ake a katobibiko.