Karikani Bwaai 6–11; Mote 8

Iai te bwai ae ko nooria ni kabwarabwaraa kanoan ana bong Noa are e taraa n ti te arona ma baika a riki inanon ara tai ni maiu? N ae onoti, kakaea ni Mote 8:15–24, 28. Tera botoniango ake ko noori ake a kaokiokaki?

Teuana te bwai ae kakawaki ae ti te arona ma are ko na nooria bwa te Atua e wetea Noa bwa e na riki bwa te burabeti, ao E a tia naba wetea te burabeti n te bong aei. Iangoia ni korei rinanin koaua ake ko reiakin ibukiia burabeti man Mote 8:13–30. Ao aekakira aron ara burabeti ae maiu n aron Noa? E koaua, e aki kauring ana burabeti te Uea n te bong aei e aki ibukin te Ieka ke ni kaoira bwa ti na ibuobuoki ni kabaa te aake. Ma tera ae kauringiira ibukina? Ao tera ae kaora iai bwa ti na karaoia? N ibuobuoki ni kaekai titiraki aikai, ko kona n rinanoa te mwakoro man Teachings of Presidents of the Church n te Gospel Library, ai moarara riki, te mwakoro ae “ Kakao ao Kakabwaia aika a Beritanaki”. Tao ko kona ni rinea teuana te kauring ao teuana te kakao are e taraa n rangi ni kakawaki iroum.

E reirei Unimwaane Allen D. Haynie, “E a tia Tamara are i Karawa ae kororaoi ao n tatangira n rinea bannan kaotan te koaua nakoia Natina rinanoia burabeti” (“A Living Prophet for the Latter-Days,” Riaona, Meei 2023, 25). Iangoia kamatebwaia ana rongorongo Unimwaane Haynie, ni kakaea bukina ngkai karekean te burabeti bon kanikinaean ana tangira Tamara are i Karawa. E kanga iriiran ana burabeti te Uea ni buokiko n namakina te kamanoaki ni maiu inanon boong aika kaitira?

Taraa naba Topics and Questions, “Prophets,” Gospel Library; “Why Do We Have Prophets?” (witeo), Gospel Library.

1:37

Tabeman aomata a titiraki bwa bukin tera ana motikitaeka te Atua e karokoa te ieka bwa e na “kamaunaia aomata” (Karikani Bwaai 6:7). E kabwarabwaraa Unimwaane Neal A. Maxwell bwa n tain te Ieka, “e a roko n tiana kamaunanakoan te inaomata n rinerine are a aki kona tamnei, n te motikitaeka, ni kanakoaki nakomai” (We Will Prove Them Herewith [1982], 58). Ko kona naba n iangoia bwa e kanga n riki te Ieka bwa te mwakuri n nanoanga. Tera ae ko kunea ni Karikani Bwaai 6:5–13 are e kaota ana nanoanga ao ana tangira te Uea ibukiia aomata?

Ni kaineti ma Karikani Bwaai 9:8–17, tera ae e kona nei wirara ni karekea nakon am iango? Tera ae ko karekea n Ana Rairairi Iotebwa Timiti, Karikani Bwaai 9:21–25 (inanon te Bible appendix) are e ikotia ma are bon mataatam? Ko kona naba n iangoa karaoan rinanin tabeua bwaai (n aron kanikinaa, bwaai, ke bwaai riki tabeua) ake e a tia n anganaiko te Uea ni kauringko ibukin am berita aika tabu. Tera ae ko reireinaki ni kiibu aikai? A kanga ni buokiko n uringnga?

Taraa naba Gerrit W. Gong, “Always Remember Him,” Liahona, May 2016, 108–11; “Reverently and Meekly Now,” Hymns, no. 185.

Rongorongoia aomata ake kaain Babera ake a katea te taua e katauraoa te kabotau ae kakaongora nakon rongorongon Enoka ma ana aomata ni katean Tion, are ko kamatebwaia n te wiiki ae nako. Ni kauoua kurubu n aomata aikai a kataia n roko i karawa ma ni kawai aika a kakaokoro. A kanga ana aomata Tion ni karekea karawa? (taraa Mote 7:18–19, 53, 62–63, 69). Tera ae ko reiakinna man Karikani Bwaai 11:1–9 ao Ereman 6:26–28 ibukiia ana aomata Babera? Tera ae e reireiniia iaon oin ara kona n oki nako matan te Atua? Tera ae e a tia ni katauraoia te Atua bwa e na buokiira n “roko i karawa”? (Karikani Bwaai 11:4; taraa naba Ioane 3:16).

• Angiina ataei a tatangira karanakinan Noa ao te aake. Iangoia n anganiia am ataei tibwangaia bwa a na tibwaua aia atatai i aona. Arom ni buokiia, ko kona kabonganai tamnei inanon te kamataata aei, “Noa ma ana Utu” n Te O Tetemanti (22–25), ao te kateniua ni kibu n “Iriira te Burabeti” (Aia Boki n Anene Ataei, 110–11). A na bae n tangiria am ataei ni katei kaia n te kaotioti mwakoron te karaki—te katooto, ae aongkoa ko kabongana te bwai ni mwakuri ni kabaa te aake ke n nakonako n aroia maan n rin inanon te aake.

• Ngkai kam kaai ni maroroakina taekan Noa, buokiia am ataei n nooria bwa ti kanga ni kakabwaiaaki ngkai iai ana burabeti te Atua n te bong aei. Buokiia am ataei bwa a na karaoa aia ukeuke n Mote 8:16–24 ni kakaai bwaai aika e reirei Noa iaona ae a teimatoa ana burabeti te Uea n anga reirei iaona n te bong aei. Ti kanga ni kakabwaiaaki ngkana ti ongotaeka nakon reirei aikai?

• A na bae n tangiria am ataei ni kan koro tamnei ke ni karana nei wirara ngkai ko tabe ni taekina te bwai are e tei ibukina (taraa naba Ana Rairairi Iotebwa Timiti, Karikan Bwai 9:21–25 [inanon te Bible appendix]). Tera ae tangiria te Atua bwa a na iangoia Noa ao ana utu ngkana a noora nei wirara?

• Ko kona naba ni kaotia nakoia ataei te bwai ae iai iroum ae na kauringko n te bwai ae kakawaki ni maium, n aron te mwamwa ni mare, te tamnei, ke te tieno. Tuangiia ataei bwa a na tibwauai oin aia katooto. Aei e na kona ni kaira aron maroroakinan bwaai ake a buokiira n uringa ara berita, n aron te toa, are e buokiira n uringa ara berita n te bwabetito bwa tina iriira Iesu Kristo (taraa Reirei ao Berita aika Tabu 20:75–79).

• E na kona ni kaunga ngkana e kateaki te taua man taian mwakoro ni kai ke tabeua bwaai ma am ataei. Ngkai ko karaoia, kabwarabwara bwa a taku aomata aika kaain Babera bwa a kona n roko i karawa man katean te taua ae moan te rietaata. Ngkanne kam kona ni kabane n taraa tamnein te Tia Kamaiu ao titirakiniia am ataei bwa E kanga ni buokiira bwa ti na roko i karawa. Ngkanne kam kona ni maroroakinna i marenami taekan bwaai ake kam kona ni karaoi n iriira te Tia Kamaiu.

• N reitaki ma warekan karakinan te taua are Babera n Karikani Bwaai 11:1–9, ko kona ngkoe ma am ataei ni wareka Ereman 6:28. Ni kaineti ma te kibu aei, bukin tera a katea te taua kaain Babera? Bukin tera katean te taua aei te kawai ae bure n nako karawa? Ngkanne ko kona ni rinanon 2 Nibwaai 31:20–21 ao Ereman 3:28 ni kakaea te kawai ae eti nako karawa. Tera te reirei ae ti na anganiia aomata aika kaain Babera?