Karikani Bwaai 37–41

N angiin te tai, te tekeraoi e taraa ni kitana Iotebwa, ma e aki kitanna te Uea. Ngkai ko wareka karakinan Iotebwa, iangoi titiraki n aron aikai: Tera ae e karaoia Iotebwa ni kaania nakon te Uea? E kanga te Uea ni “mena irarikina”? (taraa Karikani Bwaai 39; 40:1–19; 41:9–45). Tera ae ko reiakinna man karakinan Iotebwa ae e kona ni buokiko n ataia bwa e raoraoniko te Uea inanon maium?

Ko kona naba n tabeki titiraki ae aekakin aikai bon ibukin maium. Tera kakoaua ae ko a tia n nori ae e aki kitaniko te Uea n tain kataakim? Iangoia bwa ko na kanga n tibwaa are ko rinanona nakoia kaain am utu ke roro aika a na roko (taraa 1 Nibwaai 5:14).

E koaua, e na bon reke kataakim tabeua inanon taai aika a na roko. Tera ae ko kona ni karaoia ngkai ni kakoauaa bwa kataakim aikai aki katikiko nako mai iroun te Uea? Iangoia ni korea te reta ni bon kaungako inanon taai aika a na roko bwa ko na tiku ni kaan Nakoina n aki tabe ma te bwai ae riki. Tao ko kona ni kaairii nonoori man maiun Iotebwa ke man ana rongorongo Unimwaane D. Todd Christofferson “Ara Reitaki ma te Atua” (Riaona, Meei 2022, 78–81).

Taraa naba Ioane 14:18; I-Rom 8:28; Aramwa 36:3; Reirei ao Berita aika Tabu 121:7–8; “Abide with Me!,” Anene n Taromauri, Nobembwa 166.

Iai te bwaintangira iroun Iotebwa n ata te rongorongo mairoun te Uea rinanon te mii. Tera ae ko kona n reikinna man Karikani Bwaai 37:5–11; 40:5–8; 41:14–25, 37–38 i aon karekean ao atakin te kaotioti mairoun te Uea? N aron te katooto, tera ae ko reiakinna man bannan Iotebwa ngke e taraa ni kangaanga te oota n te kaotioti? (taraa Karikani Bwaai 40:8; 41:16).

Iangoia bwa e kanga ni kaota nanona nakoim te Uea. Tera ae ko karaoia ni mwakurii kaotioti are E a tia n anganiko? Tera arom n ukoukorii riki kairi mai Irouna?’

Ngkana e na anga ana taeka n reirei Iotebwa bwa e kanga aron totokoan te karirii ni karaoan te wene ni bure, tera ae na taekinna n am iango? Iangoa aron aei ngkai ko wareka aron ana taneiai inanon Karikani Bwaai 39. Te katooto, iangoia bwa e kanga Iotebwa ni kaeka nakon tabeaianga n aron aikai:

• Ngkana tao bon akea ae ataa te bwai ae I karaoia, tera ae tukai man karaoana? (tarai kiibu 8–9).

• I keiaki n totokoia, ma e tara n aki toki te kariiri (taraa kibu 10).

• Tera ae I riai ni karaoia ngkana I a mena inanon te kariiri ae korakora? (taraa kibu 12).

Ko na kanga ni kabwarabwaraa bwa bukin tera e kakaawaki iran nanon tuan te itiaki? (taraa Ibukin Kakorakoraia Kairake: Te Kairi ibukin Karaoan Rinerine, 23–28).

Ana banna ni katooto Iotebwa, e koaua, bwa e kona ni kaineti nakon kariiri ake tabeua. Uringan are e rinanona Iotebwa n am iango, iangoa karaoan te babaire ni kararoa ao n totokoa te kariiri. Te katooto, ko kona n iangoa teuana te kariiri ao korei bwaai ake ko na tuuki ao ko na kanga ni “birinako” ngkana e a roko te kariiri.

Aikai tabeua kiibu ake a na kona ni kaira am babaire. Tera ae ko reiakinna man aikai n tatabeua nako bwa e kanga te Tia Kamaiu ni buokiko n totokoa te kaririaki? Mataio 4:1–11; 1 I-Korinto 10:13; 1 Nibwaai 15:23–24; 3 Nibwaai 18:17–18.

Ngkai ko karaoa am babaire, e na kona naba n ibuobuoki iangoan taai ake mai imwaina ngke ko tokanikai n totokoa ke n tuukii kariiri. E kanga ni buokiko te Tia Kamaiu? (taraa 2 Nibwaai 4:18–33).

Rairan nanon miin Barao iroun Iotebwa e kairi nakon tabeua taeka n reirei aika wanawana ao baika a bon kakaraoaki ibukin te kamanoaki man te rongo (taraa Karikani Bwaai 41:15–57). Iangoia bwa tera ana taeka te Uea i bon ibukim n te rongorongo aei. Tera n am namakin ae E tangiriko bwa ko na katauraoia ibukin te kangaanga inanon maium n taai aika a na roko?

Taraa naba David A. Bednar, “We Will Prove Them Herewith,” Riaona, Nobembwa 2020, 8–11.

• Warekan aron nanobuakaia ana utu Iotebwa e kona ni karekea te marooro iaona bwa ti na kanga ni karaoa ae raoiroi nakoia ara utu. Ni karakina karakin Iotebwa ao tarina man Karikani Bwaai 37, ko kona ni kabonganai tamnei inanon te kabwarabwara aei ke inanon “Miin Iotebwa ae Kairaki n te Tamnei” (inanon Karaki man te O Tetemanti, 47–51). Kariaia am ataei bwa a na tibwai baike a atai iaon te karaki. Ko kona n tuangiia am ataei ni iangoia ae aongkoa a mena n ana utu Iotebwa. Tera ae a na tia n taekinna ke ni karaoia n riki bwa te tia raoi inanon te utu? Te katooto, tera ae nanonaki n “taetae raoi” inanon ara utu? (kibu 4). E kanga n riki Iesu Kristo bwa te tia raoi n ana utu te Atua?

  

  2:17

• Ngkana a kaitaraaki am ataei ma kangaanga, a riai n ataia ae te Uea e na raoniia, n aron ae raona Iotebwa. Tao ko kona ni buokiia am ataei ni korei rinanin bwaai aika a kangaanga aika a riki nakon Iotebwa (taraa Karikani Bwaai 37:23–28; 39:20; ke “Miin Iotebwa ae Kairaki n te Tamnei” ao “Iotebwa i Aikubita,” inanon Karaki man te O Tetemanti, 47–51, 52–56). Imwiin taian kangaanga ake a kunei, kaoiia am ataei bwa ana kaokiokia n taekina, “E memena te Uea iroun Iotebwa” (Karikani Bwaai 39:2).

  

  2:17

  

  2:50

• Tao a kona am ataei ni kakaea inanon Karikani Bwaai 39:1–3, 20–23 te bwai ae riki ngkana e taekinaki te kibu n taeka “E Memena Iehova iroun Iotebwa” ao taeka ae titebo ma anne. Kariaia bwa a na tibwaia bwa tera n aia iango nanon te kibu n taeka aei. Ti kanga n ataia ae te Uea e raoraoniira? Tibwaia imarenaia bwa tera aia namakin ae te Atua e raraoniia n taai ni kangaanga.

• Aio te reirei ae kona n noraki are e kona ni buokiia am ataei ni iriira ana katooto Iotebwa ni birinako mai iroun buun Botibwa: Kabonganai uoua maekineti n tei ibukin Iesu Kristo ao Taatan. Kabongana te kaibiti ae uarereke, n aron kiribin te beeba, n tei bwa onean mwiira. Imwiina kariaia am ataei bwa a na nora ae e kanga ana kairoro te maekineti iaon te kaibiti n rangi ni korakora ngkana a kamwainga te bwai anne ni kaan nakon te makineti. E kanga ana taneiai Iotebwa ni Karikani Bwaai 39:7–12 ni kamataataa raoi te koaua aei? Tera ae ti kona ni karaoia n tannako man te bure ao ni kaniia Iesu? Te witeo “Temptation Fades as We Seek Christ in Every Thought” (Gospel Library) ao te anene n aron “I Kainnanoiko Ngai” (Anene n Taromauri, nambwa 98) e kona n ibuobuoki ma te marooro aei.

  

  2:58

  Kabongana te anene. “Anene n taromauri ao tabeua kuuna aika tabu a kona ni buokiia am ataei n namakina te Tamnei, ao n reiakinii koaua n te euangkerio. Tangin bwanaa, aron biriia, ao kuuna aika bebete a kona ni buokiia ataei n uring koaua n te euangkerio inanon ririki nako. Ngkai ko anene ma ataei, buokiia bwa a na kunea ao ni mataata iaon tuua ake a reiakinaki n te anene.” (Reirei n Ana Kawai te Tia Kamaiu, 32).

• Buokiia am ataei n iangoi kataakiia ake a na kaitarai. Kariaia bwa a na karaoa te kaotioti bwa a na kanga ni “birinako” mani kangaanga aikai.