“Maati 16–22. ‘E Kani Karekea te Kabwaia te Atua”: Karikani Bwaai 42–50,” Nakoma, Iriira—Ibukin te Mweenga ao te Taromauri: Te O Tetemanti 2026 (2026)
“Maati 16–22. ‘E Kani Karekea te Kabwaia te Atua,” Nakomai, Iriirai: 2026
Te Kabwarabure, iroun Megan Rieker
Maati 16–22: “E Kani Karekea te Kabwaia te Atua”
Karikani Bwaai 42–50
E a koro 22 te ririki man te tai are e kabonakoaki iai Iotebwa irouia tarina nakon te tautoronaki. E korakai Iotebwa n taian kakatai aika moan te mwaiti, n ikotaki ma bukibuki aika a kewe ao te karinaki inanon te karabuti. Ngke e manga tibwa noriia tarina, Iotebwa bon te koowana i Aikubita n te tai anne, te tia tautaeka iaan te barao. E na beebete kataekan kaina irouia tarina, ao n iangoa te bwai ae a tia ni karaoia nakon Iotebwa, kanga anne ae e kona n oota te aba iai. Ma e kabwarai aia bure Iotebwa. Tiaki tii anne, ma e buokiia naba n nora oin bukin rawawatana. “E kani karekea te kabaia te Atua” (Karikani Bwaai 50:20), e tuangiia, ibukina bwa e uotia nakon te nne are e kona ni kamaiuia “ni kabane ana utu tamana” (Karikani Bwaai 47:12) man te rongo.
N aanga aika a mwaiti, Iotebwa bon titebo ma Iesu Kristo. E ngae ngke ara bure e angan Iesu te rawawata ae korakora, E kabwarai ara bure, e kainaomataira ngaira ni kabane man te toki are e riaon buakakan te rongo. Tao ti kainnanoa kabwaraan ara bure ke ti na kabwarai buure—n teuana te tai ti riai ni bane ni karaoi ni kauoua—ana katooto Iotebwa e buokiira bwa ti na kabanea ara iango iroun te Tia Kamaiu, are e reke mai iai te kamarurungaki ao te kaiokaki.
Iango ibukin te Kamatebwai n te Mweenga ao n te Taromauri
Karikani Bwaai 45:5–7; 47: 12
“Ao E kanakomaiai te Atua i mwaimi bwa N na kawakiningkami.”
Ko a tia n noori baika ti te arona imarenan maiun Iotebwa ao ana mwakuri ni kamaiu Iesu Kristo? N tarai tabeua katooto man baika ti te arona aikai, kataia kabotaua:
-
Karikani Bwaai 37:3 ma Mataio 3:17.
-
Karikani Bwaai 37:26–28 ma Mataio 26:14–16.
-
Karikani Bwaai 45:5–7 ma Ruka 4:18.
-
Karikani Bwaai 47:12 ma Ioane 6:35.
Tera iango ao namakin ake ko karekei ibukin te Tia Kamaiu ao Ana mition ngkai ko wareki kibun taeka aikai?
Karikani Bwaai 45; 50:15–21
Te kabwarabure e uota te kamarurungaki.
Warekan rongorongon Iotebwa ngke kabwarai aia bure tarina ibukin aia mwakuri ake a tia ni karaoi e kona ni kaira am iango nakon temanna are matoatoa iroum kabwaraan ana bure. A na rangi n ibuobuoki titiraki akana imwiina ngkai ko kataia ni maiuakina te reirei aei:
-
Bukin tera ngkai e na taraa ni kangaanga iroun Iotebwa bwa e na kabwarai aia bure tarina? (n rinanoa te bwai are a tia ni karaoia nakoina, taraa Karikani Bwaai 37). Tera te taneiai ke anua are e tia n angan Iotebwa te korakora ni kabwarabure? (taraa, ibukin te katoto, Karikani Bwai 45:1–15 ke 50:15–21).
-
Tera te kakabwaia are e reke man kabwaraan aia bure tarin Iotebwa? N aron te katooto, kabotaua aia reitaki ana utu Iakoba ni moan waakin te karaki (taraa, ibukin te katooto, Karikani Bwai 37:3–11) ma te reitaki ane n te kabane (taraa Karikani Bwai 45:9–15; 50:15–21). E na kanga bwaai n riki ni kaokoro ngke a arona bwa e aki tauraoi ni kabwarabure Iotebwa?
-
Iangoia korea aran temanna are e kainnanoa am kabwarabure—ngkana e bubuti kabwaraan ana bure ke aki. Tera ae ko kona ni karaoia ni kaoa mwaakan ni kamaiu te Tia Kamaiu inanon te kangaanga anne? Ngkana e taraa n rangi ni kangaanga te kabwarabure, iangoia n rinanoa ana reirei Uninmnwaane Gerrit W. Gong n te kaonoua ni kabane ni barakaraba man ana rongorongo “Te Kukurei ae Akea Tokina” (Riaona, Nob. 2022, 85). Tera ae ko kunea are e anganiko te kaantaninga ngkai ko kona ni kabwarai buure?
Taraa naba Reirei ao Berita aika Tabu 64:9–11; “Forgiveness: My Burden Was Made Light” (video), Gospel Library.
Forgiveness: My Burden Was Made Light
Karikani Bwaai 49
E anga taeka ni kakabwaia Iakoba nakoia ana utu n te taetae ni burabeti.
Ana kakabwaia Iotebwa nakoia kanoana iai inanon tamnei aika ootara, ma e kangaanga ae na oota te aba iai. Ma te kakaitau bwa te euangkerio ae kaokaki e anganira tabeua buokara. Ngkana ko wareka te kakabwaia nakon Iotebwa i nanon Karikani Bwaai 49:22–26, wareki naba kiibu aikai, ao taraia bwa tera iango ake a kaotii: 1 Nibwaai 15:12; 2 Nibwaai 3:4–5; Iakobwa 2:25; Reirei ao Berita aika Tabu 50:44.
Ngkai ko wareka rongorongon ana kakabwaia Iuta i nanon Karikani Bwai 49:8–12, uringnga bwa Iesu Kristo bon kanoan Iuta. Tera ae ko kunea inanon kiibu aikai are a kauringko ibukin te Tia Kamaiu? (taraa naba Te Kaotioti 5:5–6, 9; 1 Nibwaaii 15:14–15; Reirei ao Berita aika Tabu 45:59; 133:46–50).
Warekan kakabwaia aikai e na kona ni kaunga nanom ni rinanoa am kakabwaia n tamanuea—ke, ngkana e tuai reke, karekea teuana. Tera taeka ke mwakoro n taeka inanon ana kakabwaia a kaira am iango nakon Iesu Kristo?
Taraa naba Randall K. Bennett, “Am Kakabwaia n Tamanuea—Kairaki Karekeana iroun Tamara are i Karawar,” Riaona, Meei 2023, 42–44.
Karikani Bwai 50:19–21
Te Atua e kona ni buokai ni karekei ibuobuoki inanon kataakiu.
E ngae ngke e kona n aki matata ngkai e rinanon kataaki aika kangaanga, n tokin te tai e kona n tanrikaaki Iotebwa nakon ana kangaanga i Aikubita ao n nooria bwa “e kani karekea te kabwaia te Atua” (Karikani Bwai 50:20). Ngkana ko kona ni kawara Iotebwa ngke e mena n te mwanono ke n te karabuti, ko na kanga ni karaua nanona? E kanga Karikani Bwaai 50:19–21 ni buokiko inanon am tai ni kataaki?
Taraa naba Reirei ao Berita aika Tabu 122; “A Matoara Nanoia Aika Raraoi,” Anene n Taromauri, nambwa 85.
Iotebwa Timiti ibuakoia Burabeti, iroun Paul Mann (te rongorongo)
Karikani Bwai 50:24–25
“E na kateirakeaki te tia mamata iroun te Uea ae Atuau.”
Ngkai ko wareka Karikani Bwaai 50:24–25 ao Ana Rairairi Iotebwa Timiti, Karikani Bwaai 50:24–38 (inanon te Bible appendix), iangoia inanom bukin tera ngkai e rangi ni kakawaki iroun Iotebwa ni moantaai n ataa rongorongon Mote ao Iotebwa Timiti inanon tienture ake imwaina. E kanga Iotebwa Timiti ni kakoroa nanon ana taetae ni burabeti Iotebwa ibukina? (taraa Reirei ao Berita aika Tabu 1:17–23; 20:7–12; 39:11; 135:3).
Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Karikani Bwaai 42–44; 45:4–15
I kona ni kaota te tangira ao te kabwarabure nakon au utu.
-
E na rangi ni kaunga aei ibukiia am ataei ngkana a katea kain karakinan Iotebwa ngke e a kaitibo ma ana utu (taraa Karikani Bwaai 42–44). Ke a kona ni kabongana “Iotebwa ao te Roongo” (inanon Karaki man te O Tetemanti, 57–60) ke tamnei inanon te kamataata aei n reiakina te reirei i bon imarenaia. Aikai tabeua titiraki are a kona ni buokiia am ataei n reiakinaki man te karaki:
-
Tera ae karaoia Iotebwa ni kaota ana tangira ibukin ana utu? (taraa Karikani Bwaai 45:4–15).
-
Bukin tera ngkai ko namakinna bwa e kabwarai aia bure tarina Iotebwa?
-
E kanga am iango n aia namakin tarin Iotebwa ngke a kunea bwa a kabwaraaki aia bure iroun Iotebwa? Antai inanon maium ae kainnanoa kabwaraakin ana bure? Ko na kanga ni kaota te tangira ao te kabwarabure?
2:26Joseph and the Famine
-
Ngkai ko tauraoi n anga reirei, titiraki, “Tera ae a na karaoia au ataei bwa aonga n reiakinaki?” N aron te katooto, inanon te waaki ni kakukurei aei a katea kain te karaki am ataei ke a manga karakinna riki. Karaoan aei e kona ni buokiia n uringnga bwa tera ae riki ao tuan te euangkerio are inanon te karaki.
-
Ko kona ngkoe ma am ataei ni tibwaua ami taneiai ngke a kabwara ana bure temanna ke e kabwaraaki aia bure iroun temanna. Ko kona ngkanne n anenea te kuna n aron “Love One Another” (Aia Boki n Anene Ataei, 136) or “Help Me, Dear Father” (Aia Boki n Anene Ataei, 99).
Karikani Bwaai 48:8–9
E buokai te Uea rinanon kakabwaia n te nakoanibonga.
-
Ko kona ngkoe ma am ataei n taraa tamnein Iakobwa ngke kakabwaiaia natina mwaane ni kabanean te kamataata aei ao maroroakinna bwa tera ae riki (taraa Karikani Bwaai 48:8–9). Ngkana e kainnanoaki, kabwarabwara bwa Iakoba, taman Iotebwa, e tangiria n anga te kakabwaia n te nakoanibonga nakoia ana utu. Tao ko kona n tibwaia imarenami taneiai are kam karekea iai buokami mairoun te Atua rinanon kakabwaia n te nakoanibonga. Baikara bukina tabeua ngkai ti bubuti te kakabwaia n te nakoanibonga?
Karikani Bwaai 45:5–11
Tamara are i Karawa e kanakoa Iesu Kristo bwa e na kamaiuai.
-
Ko na kanga ni buokiia am ataei n noora te Tia Kamaiu ni karakinan Iotebwa ngke e kamaiuia ana utu man te rongo? Iangoia karaoa te tiata ma uoua rinanin ana kaoram ae koreaki Iotebwa ao Iesu Kristo. Buokiia am ataei ni ukoukori koroboki aika tabu aikai ao kanoaa te tiata ma bwaai aika iai irouia Iotebwa ao Iesu: Karikani Bwaai 37:3 ao Mataio 3:17; Karikani Bwaai 37:26–28 ao Mataio 26:14–16; Karikani Bwaai 45:5–7 ao Ruka 4:18; ao Karikani Bwaai 47:12 ao Ioane 6:35.
-
Titirakiniia am ataei tera ae nanonaki ni kamaiua ke ni kainaomata temanna. Ngkana iai mai ibuakoia ae a tia ni karekea ana taneiai ae e a tia ni kamaiuaki ke ni kainaomataki man te kabuanibwai, kaoia bwa ana tibwauaia. E kanga Iotebwa ni kamaiuia tarina? (taraa Karikani Bwaai 42:1–3; 45:5–7). Ngkanne kam kona n taraa tamnein te Tia Kamaiu ao tuangiia am ataei bwa a na maroroakinna bwa e kanga Iesu ni kawakiniira.
Ibukin iango riki tabeua, taraa te beeba ni kaongora n te namwakaina aio n Te Rao maekatiin.