Te Whare o Iharaira

Kei tētahi wāhi i roto i te koraha kei te taha rāwhiti o Kainana, i tatari a Hākopa i runga i te āmaimai kia tūtaki ki tana tuakana mahanga a Ehau. I te kitenga whakamutunga a Hākopa i a Ehau, neke atu i te 20 tau ki muri, i te hiahia a Ehau ki te whakamate i a ia. Ka pau te pō e nonoke ana, e rapua ana tētahi manaakitanga i te Atua. Nā te whakapono, te tārake, me te ū o Hākopa ka whakautu te Atua i āna inoi. I taua pō ka tīnia te ingoa o Hākopa ki a Iharaira, ko tētahi tikanga o taua ingoa, arā, “ko te tangata e ū ana ki te Atua” (Kenehi 32:28, kīwae b).

Koinei te wā tuatahi e kitea ai te ingoa o Iharaira i roto i te Paipera, ā, he ingoa e kaha kitea puta noa i te pukapuka, ā, puta noa i ngā hītori. Nāwai rā ka hāngai tēnei ingoa ki ngā tāngata tokomaha. Ka puta i Iharaira ngā tama 12, ā, i mōhiotia ngātahitia ōna uri ko “te whare o Iharaira,” ngā “iwi o Iharaira,” ngā “tamariki a Iharaira,” ngā “Iharaira” rānei.

Puta noa i ngā hītori, ka whai whakaarotia nuitia e ngā tamariki a Iharaira ō rātou hononga ki tētahi o ngā iwi tekau mā rua o Iharaira. He mea nui tō rātou whakapapa nō tō rātou tuakiri kawenata. I whakapuakina e te Āpotoro a Pāora “he uri ia nō te iwi o Peniamine” (Romana 11:1). Ko tētahi take i tonoa atu e Rīhai ana tama ki te tiki i ngā papa parāhe, arā, kei runga i ngā papa rā “tētahi whakapapa nō ōna tūpuna” (1 Nīwhai 5:14). Ka kite a Rīhai, nā, he uri whakaheke ia nō Hōhepa, ā, he mea nui ki tana whānau kia mārama rātou ki tō rātou hononga ki te whare o Iharaira i ngā tau whai muri iho.

I te Hāhi i ēnei rā, tērā pea ka rongo koe e pā ana ki a Iharaira i roto i ngā kīanga pērā i “te whakahuihuinga o Iharaira.” Kei te waiata tātou e pā ana ki te “Kaihoko o Iharaira,” te “Manako o Iharaira,” me “Koutou ngā Erata o Iharaira.” I roto i ēnei horopaki, kāore tātou i te waiata e pā ana ki te kīngitanga onamata o Iharaira, te iwi o nāianei rānei e kīa nei ko Iharaira. Engari kē, kei te kōrero e pā ana ki te hunga kua whakahuihuia mai nei i ngā iwi o te ao ki roto ki te Hāhi o Ihu Karaiti. Kei te kōrero tātou e pā ana ki te hunga kua ū ki te Atua, kua rapua māriretia e rātou Ana manaakitanga, ā, ko te hunga, mā roto i te rumakitanga, kua meinga ko Tōna iwi kawenata. Hei roto i ngā kupu a Tumuaki Russell M. Nelson, ko te tikanga o te kōrero e mea ana nō Iharaira au, arā, kia “tukuna te Atua kia whai mana i ō tātou oranga, … kia tukuna te Atua hei mana nui i roto i ō tātou oranga.”

Ka whakapuakina e tō manaakitanga peteriaka tō hononga ki tētahi o ngā iwi o te whare o Iharaira. He nui ake tērā i te kōrero whakapapa noa iho. E hāngai ana tēnā ki te nāianei me te āpōpō. Mehemea nō te whare o Iharaira, he hononga kawenata tōu ki te Matua i te Rangi rāua ko Ihu Karaiti. Ko tōna tikanga, e tika ana māu, pērā i a Aperahama, kia tū “hei manaakitanga” ki ngā tamariki a te Atua (Kenehi 12:2; Aperahama 2:9–11). Ko tōna tikanga, hei roto i ngā kupu a Pita, “he whakatipuranga kōwhiria koutou, he tohungatanga ariki, he iwi tapu, he iwi whano kē; kia whakaatu atu i ngā mihi o te mea nāna koutou i karanga kia puta i te pōuritanga ki roto i te māramatanga whakamīharo” (1 Pita 2:9). Ko tōna tikanga, kia “tukuna te Atua kia kaha rawa” mōu —ko koe tētahi e “ū ana ki te Atua” i a koe e whakahōnore ana i ō kawenata ki a Ia.