Israel Fifo no

Beebi wɔ Canaan n’anee wɔ sar no do no, Jacob dze ayamuhyehye tweɔɔn dɛ ɔnye n’ata nuabanyin Esau bedzi ehyia. Mber a nna Jacob dze hun Esau akyɛr no yɛ bɛyɛ mfe 20 a odzi kan, a nna Esau pɛ dɛ oku no. Jacob dzii anafua no nyina wɔ aperdzi mu, a nna ɔrohwehwɛ nhyira efi Nyankopɔn hɔ. Jacob ne gyedzi, nwɔwdo, na enyimpisi ho nsunsuando no, Nyankopɔn yii ne mpaabɔ ano. Dɛm anafua no wɔsesaa Jacob ne dzin yɛɛ Israel, dzin a n’ase kyerɛ, bi kã ho no, “ɔtweɔn Nyankopɔn” (Genesis 32:28,ase nsɛnsin b).

Iyi nye mber a odzi kan a dzin Israel pue wɔ Bible mu, na ɔyɛ dzin a ɔkɔ do wɔ nwoma no na abakɔsɛm nyina mu. Annkyɛr na dzin no wɔdze frɛɛ nyimpa dodow. Nna Israel wɔ mbabanyin 12, na nna hɔn asefo bɔ mu no wɔfrɛ hɔn “Israel fifo” no, “Israel ebusuakuw” no, “Isarelmba” no, anaa “Israefo.”

Abakɔsɛm nyina mu no, nna ɔsom bo ma Israelmba papaapa dɛ wɔyɛ asefo a wofi Israel ebusuakuw duebien no mu kor mu. Nna dɛm ebusuasantsen no kã hɔn ahyɛmudzi su a ohia ho. Ɔsomafo Paul bɔɔ no dawur dɛ ofi “Benjamin busuakuw mu” (Romefo 11:1). Siantsir kor a Lehi somaa ne mbambanyin ma wɔkɔr Jerusalem dɛ wɔrekɛgye ayewa mprɛtse no nye dɛ nna mprɛtse no wɔ “n’egyanom ebusuasantsen” (1 Nephi 5:14). Lehi hun dɛ nna ɔyɛ Joseph n’asenyi, na n’asefo hɔn ntseasee fa hɔn nkitahodzi wɔ Israel fifo ho no yɛɛ hɔn ehiadze wɔ mfe a nna odzi do no mu.

Asɔr mu ndɛ no, bia ebɛtse Israel ho asɛm wɔ kasa mu tse dɛ “Israel mboano.” Yɛtow “Israel Pomfo” no, “Hope of Israel” no, na “Ye Elders of Israel” ho ndwom. Gyinabew horow yinom mu no, yɛrennkã anaa yɛronntow tsetse Israel ahenman anaa Ndɛ ɔman no a wɔfrɛ no Israel ho asɛm anaa ndwom. Mbom, yɛrekã nkorɔfo a wɔaboaboa hɔn ano fi amanaman wɔ wiadze nyina mu aba Jesus Christ N’Asɔr mu no. Yɛrekã nkorɔfo a wɔnye Nyankopɔn nam, a enyiberdo ara wɔhwehwɛ Ne nhyira, na wɔnam enuma do abɛyɛ N’ahyɛmu nkorɔfo. President Russell M. Nelson ne nsɛm mu no, yɛbɛyɛ Israelfo n’ase kyerɛ dɛ “yɛbɛma Nyankopɔn edzi nyim wɔ hɛn abrabɔ mu, … yɛbɛma Nyankopɔn ayɛ nhyɛdo tum kɛse wɔ hɛn abrabɔ mu.”

Wo Patriarch nhyira da wo nkitahodzi a enye Israel fifo ebusuakuw no mu kor wɔ no edzi. Ɔno bor ebusua abakɔsɛm kakra a ɔyɛ enyigyedze. Ɔfa wo ndɛ so ho na wo ndaamba so ho. Ekã Israel fifo ho n’ase kyerɛ dɛ enye Ɔsor Egya na Jesus Christ wɔ ahyɛmu nkitahodzi. N’ase kyerɛ dɛ ɔwo, tse dɛ Abraham no, wɔ dɛ “eyɛ nhyira” ma Nyankopɔn ne mba (Genesis 12:2; Abraham 2:9–11). N’ase kyerɛ dɛ, wɔ Peter ne nsɛm mu no, “hom yɛ ebusuakuw a wɔasan mu eyi hom, asɔfokuw adehye, ɔman krɔnkrɔn, nkorɔfo a Nyame enya hɔn ayɛ nankasa ne dze, dɛ hom mfa nyia oyii hom fii sum mu baa n’anwanwa kan mu no ne nkamfo no nkyerɛ” (1 Peter 2:9). N’ase kyerɛ dɛ ɔwo “ma Nyankopɔn dzi nyim”—dɛ eyɛ obi a “ɔnye Nyankopɔn nam” ber a idzi enye No ntamu ahyɛmudzi horow no nyi.