ఆదికాండము 12–17; అబ్రాహాము 1–2

“మనమందరం మన కుటుంబాలు [మరియు] మన సంస్కృతి ద్వారా ప్రభావితులమయ్యాము,” అని ఎల్డర్ నీల్ ఎల్. ఆండర్సెన్ బోధించారు, “అయితే మనం ప్రత్యేకంగా మరియు వ్యక్తిగతంగా నియంత్రించే మరియు సృష్టించే స్థలం మనలో ఉందని నేను నమ్ముతున్నాను. … చివరికి, మన అంతర్గత కోరికలకు జీవం ఇవ్వబడుతుంది మరియు అవి మన ఎంపికలలో, మన చర్యలలో కనిపిస్తాయి” (“Educate Your Desires, Elder Andersen Counsels,” ChurchofJesusChrist.org). ఎల్డర్ ఆండర్సెన్ బోధించిన దానిని అబ్రాహాము 1:1–19 ఎలా నిరూపిస్తుందో పరిగణించండి. ఇటువంటి ప్రశ్నలు సహాయపడవచ్చు:

• అబ్రాహాము దేనిని కోరుకున్నాడు? అతని కోరికలు అతని చర్యలలో ఎలా స్పష్టంగా కనిపించాయి? దేవుడు అతని కోరికలకు ఎలా మద్దతిచ్చారు?

• మీ కోరికలు ఏవి? మీ చర్యలలో అవి ఎలా కనిపిస్తాయి? దేవుడు మీకు ఎలా మద్దతు ఇస్తారు?

• నీతిని కోరని కుటుంబ సభ్యులు గలవారి కొరకు ఈ వచనాలు ఏ సందేశాన్ని కలిగియున్నాయి?

అబ్రాహాము మరియు శారా యొక్క గొప్ప కోరికలలో ఒకటి—బిడ్డను కనాలనేది—చాలా సంవత్సరాలుగా నెరవేరలేదు (ఆదికాండము 15:1-6 చూడండి). అబ్రాహాము మరియు శారా ఈ పరీక్షను ఎలా ఎదుర్కొన్నారనే దాని గురించి హెబ్రీయులకు 11:8–13 నుండి మీరు ఏమి నేర్చుకుంటారు? తన వాగ్దానాలు “దూరంగా” ఉన్నా, వాటిని “హత్తుకోవడానికి” రక్షకుడు మీకు ఎలా సహాయం చేస్తారు?

1:38

ప్రభువు అబ్రాహాముతో చేసిన నిబంధన గురించి తెలుసుకోవడం మీకెందుకు ముఖ్యమైనది? ఎందుకంటే దేవుడు మీతో అటువంటి నిబంధనే చేయాలనుకుంటున్నారు. ఈ నిబంధన అబ్రాహాము సంతతి లేదా “సంతానము” తో కొనసాగుతుందని మరియు ”ఈ సువార్తను అంగీకరించు వారందరు … నీ సంతానముగా యెంచబడుదురు” (అబ్రాహాము 2:10–11) అని ఆయన వాగ్దానమిచ్చారు. మరో మాటలో చెప్పాలంటే, నిబంధన మీలో కొనసాగుతుంది—మీరు బాప్తిస్మం తీసుకున్నప్పుడు మరియు మీరు దేవాలయంలో నిబంధనలు చేసినప్పుడు మరింత పూర్తిగా (గలతీయులకు 3:26–29; సిద్ధాంతము మరియు నిబంధనలు 132:30–32 చూడండి).

ఆ కారణంగా, మీరు అబ్రాహాము 2:6–11ని అధ్యయనం చేసి, అబ్రాహాము మరియు శారాలకు దేవుడు వాగ్దానం చేసినవాటిని సరిగ్గా జాబితా చేయాలని అనుకోవచ్చు (ఆదికాండము 12:1–3; 13:15–16; 15:1–6; 17:1–8, 15–22 కూడా చూడండి). ఈ దీవెనలు మీకు ఎలా వర్తించవచ్చు?

ఈ వాగ్దానాలలో కొన్ని శాశ్వతమైన పోలికలు ఉన్నాయి. వారసత్వ భూమి లేదా అధిక సంతానం వంటి వాగ్దానాలు ఎలా శాశ్వతంగా నెరవేరుతాయి? (సిద్ధాంతము మరియు నిబంధనలు 131:1–4; 132:20–24, 28–32 చూడండి).

వాగ్దానమివ్వబడిన దీవెనలకు అదనంగా, “ఆశీర్వాదముగా నుండుము” (ఆదికాండము 12:2; వివరణ చేర్చబడింది) అని దేవుడు అబ్రాహాముతో చెప్పారు. దాని అర్థం ఏమిటని మీరనుకుంటున్నారు? మీరు ఆశీర్వాదముగా ఎలా ఉంటారు? (అబ్రాహాము 2:11 చూడండి).

నిబంధనలను గురించి బోధించడానికి, ఎల్డర్ డేల్ జి. రెన్‌లండ్ అమెజాన్ నదిలో బలమైన ఆటుపోట్ల గురించి మాట్లాడారు మరియు అధ్యక్షురాలు ఎమిలీ బెల్లి ఫ్రీమాన్ విరిగిన చీలమండతో రాతి మార్గంలో నడవడం గురించి మాట్లాడారు (“నిబంధనల ద్వారా దేవుని శక్తి పొందుట,” లియహోనా, మే 2023, 35–37; “క్రీస్తుతో నిబంధన అనుబంధములో నడుచుట,” లియహోనా, నవ. 2023, 76–79 చూడండి). “నేను ఆయనతో నిబంధనలు చేసుకోవాలని దేవుడు ఎందుకు కోరుకుంటున్నారు?” అనే ప్రశ్నకు సమాధానమివ్వడంలో సహాయపడే వాక్యాల కోసం ఈ సందేశాలలో ఒకటి లేదా రెండింటిని శోధించండి.

ఈ వనరులో “జ్ఞాపకముంచుకోవలసిన ఆలోచనలు: నిబంధన,” కూడా చూడండి.

మీరు మెల్కీసెదెకును అతని గురించి తెలియని వ్యక్తికి పరిచయం చేస్తున్నారని ఊహించుకోండి. మీరు ఏమి చెబుతారు? ఉపాయాల కొరకు జోసెఫ్ స్మిత్ అనువాదము, ఆదికాండము 14:26–27, 33–38 (బైబిలు అనుబంధములో); ఆల్మా 13:13–19; సిద్ధాంతము మరియు నిబంధనలు 107:1–4లో చూడండి. మెల్కీసెదెకు గురించిన ఈ వర్ణనలలో మీరు క్రీస్తు వంటి ఏ లక్షణాలను కనుగొంటారు? మెల్కీసెదెకు జీవితం గురించి మీ అధ్యయనం మెల్కీసెదెకు యాజకత్వాన్ని మీరు చూసే విధానాన్ని ఎలా ప్రభావితం చేస్తుంది?

ఆదికాండము 14:18–24 మరియు జోసెఫ్ స్మిత్ అనువాదము, ఆదికాండము 14:36–40 (బైబిలు అనుబంధములో) నుండి సంపద పట్ల అబ్రాహాము వైఖరి గురించి మీరు ఏమి తెలుసుకుంటారు? ఉదాహరణకు, ఆదికాండము 14:23లో సొదొమ రాజుకు అతని ప్రతిస్పందనను గమనించండి. దశమభాగ చట్టానికి విధేయత చూపడం డబ్బు పట్ల మీ దృక్పథాన్ని ఎలా ప్రభావితం చేసింది?

మీరు ఆదికాండము 16 చదువుతున్నప్పుడు, హాగరు వలె మీకు అన్యాయం జరిగిందని మీరు భావించిన సమయం గురించి మీరు ఆలోచించవచ్చు. “ఇష్మాయేలు” అంటే “దేవుడు వింటాడు” అని గమనించండి. దేవుడు మీ మాట విన్నట్లు ఆయన మీకు ఎలా చూపించారు?

• మీరు మరియు మీ పిల్లలు అబ్రాహాము 1:18 మరియు 2:8 చదువుతున్నప్పుడు, రెండు వచనాలలో ప్రస్తావించబడిన శరీరంలోని కొంత భాగాన్ని వినమని మీరు వారిని ఆహ్వానించవచ్చు. పిల్లవాడు కళ్ళు మూసుకునే ఆటను మీరు ఆడవచ్చు మరియు మీరు పిల్లవాడి చేయి పట్టుకొని ఎక్కడికైనా నడిపించవచ్చు. అప్పుడు యేసు క్రీస్తు మనల్ని చేయి పట్టుకొని నడిపించడం లేదా మనల్ని రక్షించడం ఎలా అనిపిస్తుందో మీరు మాట్లాడవచ్చు.

• మీ పిల్లలు ఆదికాండము 13:5–12లోని కథను అబ్రాహాము, లోతు మరియు పశువుల కాపరులుగా నటిస్తూ ఆనందించవచ్చు. మన కుటుంబంతో లేదా స్నేహితులతో సమాధానపరచువారిగా ఉండడంలో అబ్రాహాము మాదిరిని మనం ఎలా అనుసరించవచ్చు? వారి జవాబులను నటించి చూపడానికి ప్రయత్నించండి.

• మీ పిల్లలకు ఒక పాత్రనిండా ఇసుక, రాత్రి ఆకాశంలో నక్షత్రాలు లేదా ఈ నమూనా చివర ఉన్న చిత్రాన్ని చూపించడాన్ని పరిగణించండి. ఇది ఆదికాండము 13:16; 15:1–6లో దేవుని వాగ్దానాలను అర్థం చేసుకోవడానికి వారికి సహాయం చేస్తుంది. దేవుని వాగ్దానాలు అసాధ్యమని అనిపించినప్పటికీ, వాటిని విశ్వసించడాన్ని మీరు ఎలా నేర్చుకున్నారనే దాని గురించి మాట్లాడండి.

• మీ పిల్లలకు నిబంధనల గురించి బోధించడానికి, వారు వాగ్దానం చేసిన సమయం గురించి లేదా ఎవరైనా వారికి వాగ్దానం చేసిన సమయం గురించి చెప్పమని వారిని అడగండి. ఉపయోగకరంగా ఉన్నట్లయితే, బాప్తిస్మం సమయంలో లేదా దేవాలయంలో మీరు దేవునితో చేసిన నిబంధనలతో సహా మీ స్వంత ఉదాహరణలను పంచుకోండి. మీ నిబంధనలు దేవునితో మీ సంబంధాన్ని ఎలా ప్రభావితం చేశాయి? దేవుడు అబ్రాహాము మరియు శారాలకు వాగ్దానం చేసిన కొన్ని ఆశీర్వాదాలను పంచుకోవడానికి ఆదికాండము 15:1–6; 17:1–8; అబ్రాహాము 2:9–11 నుండి కొన్ని వాక్యభాగాలను ఎంచుకోండి.

• మీ పిల్లలు బాప్తిస్మం తీసుకున్నప్పుడు దేవునితో నిబంధన చేయడానికి సిద్ధపడేందుకు వారికి సహాయం చేయడానికి, మీరు అనుబంధము ఎ లేదా అనుబంధము బిలో సూచించబడిన కొన్ని ప్రోత్సాహకార్యక్రమ ఉపాయాలను ఉపయోగించవచ్చు.

• అబ్రాహాము ప్రాణము ప్రమాదంలో ఉన్నప్పుడు, అతడు దేవుణ్ణి ప్రార్థించాడు. హాగరు అరణ్యంలో ఒంటరిగా ఉన్నప్పుడు, దేవుడు తన మాట విన్నారని ఆమె తెలుసుకుంది. ఈ రెండు కథలను మీ పిల్లలతో పంచుకోవడం గురించి ఆలోచించండి: పాత నిబంధన కథలు, 28–31, 32–33లోని “అబ్రాహాము మరియు శారా” మరియు “హాగరు”. ఈ కథల నుండి దేవుని గురించి మనం ఏమి నేర్చుకుంటాము? దేవుడు మీ మాట విన్నారని మీరు భావించినప్పటి అనుభవాలను మీరు ఒకరితో ఒకరు పంచుకోవచ్చు.

2:20

1:23