Genesis 12–17; Abraham 1–2

“Chiqajunilo naqak’ul qana’leb’ sa’ li qajunkab’al [ut] li qatenamit,” chan li Elder Neil L. Andersen, “a’ut nink’oxla naq wan jun na’ajej sa’ li qaam li ka’ajwi’ laa’o naqab’eresi ut naqak’uub’. … Rik’in xnumik li hoonal, li rajom li qaam neke’wan xyu’am ut neke’k’utun sa’ li k’a’ru naqasik’ ru xb’aanunkil” (“Educate Your Desires, Elder Andersen Counsels,” ChurchofJesusChrist.org). K’oxla chan ru naq Abraham 1:1–19 naxk’ut xyaalal lix k’utum li Elder Andersen. Eb’ li patz’om a’in maare te’xk’e aana’leb’:

• K’a’ru kirataw laj Abraham? Chan ru naq kik’utb’esiman li rajom xch’ool sa’ li kixb’aanu? Chan ru naq li Dios kixk’ulub’a li rajom xch’ool?

• K’a’ru nakawaj laa’at? Chan ru naq nak’utb’esiman a’an sa’ li nakab’aanu? Chan ru naq li Dios naxk’ulub’a li rajom aach’ool?

• Ma wan li na’leb’ sa’eb’ li raqal a’in choq’ re li ani wan xkomon sa’ xjunkab’al li ink’a’ naraj li tiikilal?

Laj Abraham ut xSara k’a’jo’ naq ke’raj xkok’aleb’, a’ut ink’a’ ke’xk’ul a’an chiru k’iila chihab’ (chi’ilmanq Genesis 15:1–6). K’a’ru nakatzol sa’ Hebreos 11:8–13 chirix li ke’xb’aanu laj Abraham ut xSara rik’in li yalb’a-ix a’in? Chan ru naq li Kolonel nakatxtenq’a chixpaab’ankil li naxyeechi’i, us ta “toj chi najt” wan?

Chi’ilmanq ajwi’ “La liberación de Abraham” (video), Biblioteca del Evangelio.

1:38

K’a’ut naq aajel ru choq’ aawe xnawb’al naq li Dios ki’ok sa’ sumwank rik’in laj Abraham? Xb’aan naq li Dios naraj ajwi’ ok sa’ sumwank aawik’in. A’an kixyeechi’i naq taakanaaq li sumwank a’in choq’ reheb’ li ralal xk’ajol laj Abraham, malaj li “riyajil,” ut naq “jo’ k’ihaleb’ li neke’k’uluk re li Evangelio a’in … te’k’ehe’q sa’ ajl jo’ aawiyajil” (chi’ilmanq Abraham 2:10–11). Sa’ jalan chik aatin, li sumwank nakana aawik’in—naq nakub’e aaha’ ut q’axal wi’chik naq nakat-ok sa’ sumwank sa’ li santil ochoch (chi’ilmanq Galatas 3:26–29; Tzol’leb’ ut Sumwank 132:30–32).

Chi jo’kan naq maare taawaj rilb’al Abraham 2:6–11 ut xtz’iib’ankil k’a’ru kixyeechi’i li Dios re laj Abraham ut xSara (chi’ilmanq ajwi’ Genesis 12:1–3; 13:15–16; 15:1–6; 17:1–8, 15–22). Chan ru naru te’k’anjelaq aawe li yeechi’ihom a’in?

Eb’ li yeechi’ihom a’in neke’reetali ajwi’ li junelik q’e kutan. Chan ru te’tz’aqloq ru sa’ li junelik q’e kutan li yeechi’ihom chirix li eechaninb’il ch’och’ ut li alalb’ej k’ajolb’ej maak’a’jo’ xk’ihaleb’? (chi’ilmanq Tzol’leb’ ut Sumwank 131:1–4; 132:20–24, 28–32).

Rochb’eeneb’ li yeechi’inb’il osob’tesihom, li Dios kixye re laj Abraham naq “osob’tesinb’ilaqeb’ [li kristiaan] sa’ xk’ab’a’ a’an” (Genesis 12:2; tiqb’il xkawil li aatin). K’a’ru nakak’oxla naq naraj naxye a’an? Chan ru naq osob’tesinb’ilaqeb’ li kristiaan sa’ laa k’ab’a’? (chi’ilmanq Abraham 2:11).

Re k’utuk chirix li sumwank, li Elder Dale G. Renlund ki’aatinak chirixeb’ xb’oolam li nima’ Amazonas, ut li Awa’b’ej Emily Belle Freeman ki’aatinak chirix li b’eek chiru jun b’e jwal taqsink rik’in jun oqej toqb’il (chi’ilmanq “Xk’ulb’al lix wankil li Dios rik’ineb’ li sumwank,” Jolomil ch’utub’aj-ib’ re abril 2023; “Li b’eek sa’ sumwanjik rik’in li Kristo,” Jolomil ch’utub’aj-ib’ re octubre 2023). Il jun malaj xkab’ichaleb’ li aatin a’in re xtawb’aleb’ li ch’ol aatin li neke’tenq’an chixsumenkil li patz’om “K’a’ut naq li Dios naraj naq tin’ok sa’ sumwank rik’in?”

Chi’ilmanq ajwi’ Temas y preguntas, “Convenio abrahámico,” Biblioteca del Evangelio; “Na’leb’ re xk’oxlankil: Li sumwank,” sa’ li hu a’in.

K’oxla naq yookat raj chixk’eeb’al jun kristiaan chixnaw ru laj Melkisedek xb’een wa. K’a’ raj ru taaye? Naru taataw aana’leb’ sa’ Alma 13:13–19; Tzol’leb’ ut Sumwank 107:1–4. K’a’ruheb’ lix chaab’ilal li Kristo nakataw rik’in laj Melkisedek sa’eb’ li raqal a’an? Chan ru naq laa tzolb’al chirix lix yu’am laj Melkisedek nawan xwankil sa’ li nakak’oxla chirix li Tijonelil re Melkisedek?

K’a’ru nakatzol chirix lix na’leb’ laj Abraham chirix li b’ihomal sa’ Genesis 14:18–24? K’e reetal li kixye a’an re li rey sa’ xb’een Sodoma sa’ Genesis 14:23. Chan ru naq xpaab’ankil li chaq’rab’ chirix li lajetqil nawan xwankil sa’ li nakak’oxla chirix li tumin?

Naq taawil Genesis 16, maare taak’oxla junaq hoonal naq xanumsi li k’a’ru moko tiik ta, jo’ xAgar. K’e reetal naq “Ismael” naraj naxye “li Dios na’ab’in.” Chan ru xk’ut li Dios naq a’an nakatrab’i?

Chiʼilmanq ajwiʼ “Tijok saʼ muqmu,” Ebʼ li Bʼich, 79.

• Naq laa’at ut eb’ laa kok’al nekeril Abraham 1:18 ut 2:8, naru nakapatz’ reheb’ naq te’rab’i xk’ab’a’ jun xcha’al li junxaqalil wan sa’ xkab’ichaleb’ li raqal. Naru nakab’aanu jun b’atz’unk b’ar wi’ jun ch’ina al naxtz’ap li ru ut laa’at nakak’am xb’e chi uq’ej. Chirix a’an naru nakach’olob’ k’a’ru naqeek’a naq li Jesukristo nokoxb’eresi chi uq’ej malaj naxkol qix.

• Maare taawulaq chiruheb’ laa kok’al xk’utb’esinkil li seraq’ wan sa’ Genesis 13:5–12, chanchan naq a’aneb’ laj Abraham, laj Lot, ut eb’ laj ilol xul. Jo’ laj Abraham, chan ru naru toowanq jo’ aj k’ojob’ahom re li tuqtuukilal rik’ineb’ li qajunkab’al malaj qamiiw? Naru nekek’utb’esi lix sumehomeb’.

• Maare naru nakak’ut chiruheb’ laa kok’al jun sek’ chi ha’, eb’ li chahim sa’ choxa, malaj li jalam-uuch li wan sa’ xraqik li tusleb’ aatin a’in. A’in naru tixtenq’aheb’ chixtawb’al ru li kixyeechi’i li Dios sa’ Genesis 13:16; 15:1–6. Aatinanqex chirix xpaab’ankileb’ lix yeechi’ihom li Dios, us ta chanchan naq maamin taaruuq chi tz’aqlok ru.

• Re xtzolb’aleb’ laa kok’al chirix li sumwank, patz’ reheb’ naq te’xye aawe junaq hoonal b’ar wi’ xe’ok sa’ aatin rik’in jun kristiaan malaj naq a’an x’ok sa’ aatin rik’ineb’. Wi tixtenq’aheb’, naru nakawotz resil jun hoonal b’ar wi’ xat-ok sa’ aatin laa’at—jo’eb’ li sumwank xat-ok wi’ rik’in li Dios naq xkub’e aaha’ malaj xatwulak sa’ li santil ochoch. Chan ru naq xjala laa wanjik rik’in li Dios sa’ xk’ab’a’eb’ laa sumwank? Sik’eb’ ru wiib’ oxib’ li ch’ol aatin sa’ Genesis 15:1–6; 17:1–8; Abraham 2:9–11 re xyeeb’aleb’ li osob’tesiik kixyeechi’i li Dios re laj Abraham ut xSara.

• Re xtenq’ankileb’ laa kok’al chixkawresinkileb’ rib’ chi ok sa’ sumwank rik’in li Dios naq te’kub’eeq xha’, naru nakawoksiheb’ li kok’ k’anjel neke’yeeman sa’ xtiqb’al li aatin A malaj xtiqb’al li aatin B.

• Naq lix yu’am laj Abraham kiwan sa’ xiwxiw, kixb’oq li Dios. Naq li xAgar kiwan xjunes sa’ li yamyookil ch’och’, kixtzol naq na’ab’iik xb’aan li Dios. Naru nakawotzeb’ li wiib’ seraq’ a’in rik’ineb’ laa kok’al: “Laj Abraham ut li xSara” ut “Li xAgar” in Eb’ li Esilal sa’ li Najter Chaq’rab’, 28–31, 32–33. K’a’ru naqatzol chirix li Dios sa’eb’ li seraq’ a’an? Chirix a’an naru nekewotz cherib’il eerib’ hoonal naq xereek’a naq li Dios nekexrab’i. Jun li b’ich jo’ “Natijok jun ch’ina al,” (B’ichleb’aal choq’ reheb’ li Kok’al, 6–7) naru naxk’ut xyaalal li na’leb’ a’in.

2:20

1:23