Genesis 6–11; Moises 8

Ma nakak’e reetal k’a’ruhaq kik’ulman sa’ xkutankil laj Noe li toj yoo chi k’ulmank sa’ li qakutankil? Re xk’eeb’al reetal, il Moises 8:15–24, 28. K’a’ru li na’leb’ nakawil chi ka’sutinb’il?

Taak’e reetal naq li Dios kixb’oq laj Noe choq’ profeet, ut xb’oq ajwi’ jun li profeet sa’ li qakutankil. Maare naru nakatz’iib’aheb’ li na’leb’ nakatzol chirixeb’ li profeet sa’ Moises 8:13–30. Chan ru naq li qayooyookil profeet a’an chanchan laj Noe? Ch’olch’o naq lix profeet li Qaawa’ sa’ li kutan a’in ink’a’ naxye resil jun li b’uut’iha’ malaj naq taqayiib’ jun li jukub’. A’b’an k’a’ru naxye qe? Ut k’a’ru nokoxb’oq chixb’aanunkil? Re xsumenkileb’ li patz’om a’in, naru nakawil jun ch’ol sa’ Enseñanzas de los Presidentes de la Iglesia sa’ li Biblioteca del Evangelio, tz’aqal sa’ li tasal chirixeb’ li b’oqok ut li osob’tesiik yeechi’inb’ileb’. Naru nakasik’ ru jun tijom ut jun b’oqom li aajeleb’ ru choq’ aawe.

Li Elder Allen D. Haynie kixye, “Li Yuwa’b’ej sa’ Choxa li tz’aqal re ru ut li nokoxra kixsik’ ru naq tixk’utb’esi li yaal chiruheb’ li ralal xk’ajol rik’in xtz’uumal re jun profeet” (“Jun yo’yookil profeet choq’ re roso’jikeb’ li kutan,” Jolomil ch’utub’aj-ib’ re abril 2023). Naru nakawil li raatin li Elder Haynie re xsik’b’al chan ru naq li profeet a’an jun reetalil lix rahom li qaChoxahil Yuwa’. Chan ru naq xtaaqenkil lix profeet li Qaawa’ nakatxtenq’a chireek’ankil naq kolb’il aawix sa’ roso’jikeb’ li kutan a’in?

Chi’ilmanq ajwi’ Temas y preguntas, “Profetas,” Biblioteca del Evangelio; “¿Por qué necesitamos profetas?” (video), Biblioteca del Evangelio.

1:37

Wankeb’ li ink’a’ neke’xnaw ma tiik ta naq li Dios tixtaqla li b’uut’iha’ re naq “tixsach ruheb’ li winq” (Genesis 6:7). Li Elder Neal A. Maxwell kixch’olob’ naq sa’ xkutankil li b’uut’iha’, “ak xwakliik xwankil li maak toj reetal naq naxsach ru xwankil lix taql ch’oolej, jo’kan naq moko tiik ta xtaqlankil xkomoneb’ chik li aamej arin sa’ li ruchich’och’” (We Will Prove Them Herewith [1982], 58). Naru ajwi’ nakak’oxla chan ru naq li b’uut’iha’ a’an chaq jun uxtaan. K’a’ru nakataw sa’ Genesis 6:5–13 li naxk’ut lix q’unil uxtaan ut lix rahom li Qaawa’ choq’ reheb’ li kristiaan?

Jo’ naxye sa’ Genesis 9:8–17, k’a’ru nakak’oxla naq nakawil jun li kaqla? K’a’ chik ru nakatzol sa’ Genesis 9:21–25 jo’ jaltesinb’il ru xb’aan laj Jose Smith? Naru ajwi’ nakatz’iib’a xkomon chik li k’a’aq re ru (jo’eb’ li eetalil, malaj yalaq k’a’ru chik) li naxk’e li Dios aawe re naq taajultiko’q aawe laa sumwank. K’a’ru neke’xk’ut li k’a’aq re ru a’an chawu? Chan ru naq nakate’xtenq’a chi jultikank?

Chi’ilmanq ajwi’ Gerrit W. Gong, “Junelik xjultikankil A’an,” Jolomil ch’utub’aj-ib’ re abril 2016; “Chi tuulan, ut chi tuqtu,” Eb’ li B’ich, 110.

Naru nak’eeman reetal wiib’ paay chi na’leb’ sa’ li seraq’ chirixeb’ laj Babel naq ke’xyiib’ li najt xteramil kab’l, ut sa’ li seraq’ chirix laj Enok ut lix tenamit naq ke’xxaqab’ Sion, li xawil sa’ li xamaan xnume’. Li wiib’eb’ chi tenamit a’an yookeb’ chixsik’b’al li choxa, a’b’an jalan xna’leb’eb’ laj Babel. Chan ru naq li tenamit aran Sion ke’xtaw li choxa? (chi’ilmanq Moises 7:18–19, 53, 62–63, 69). K’a’ru nakatzol sa’ Genesis 11:1–9 ut Helaman 6:26–28 chirixeb’ laj Babel? K’a’ru naxk’ut a’in chiqu chirix lix yalb’al qaq’e laa’o re sutq’iik rik’in li Dios? K’a’ru naxk’e qe li Dios re naq naru “toowulaq sa’ choxa”? (Genesis 11:4; chi’ilmanq ajwi’ Jwan 3:16).

• Lix k’ihaleb’ li kok’al nawulak chiruheb’ li seraq’ chirix laj Noe ut li jukub’ kab’l. Maare naru nakak’e xhoonaleb’ laa kok’al re te’xwotz k’a’ru neke’xnaw chirix li seraq’ a’an. Re xtenq’ankileb’, naru nakawoksiheb’ li jalam-uuch sa’ li tusleb’ aatin a’in, “Laj Noe ut lix junkab’al” sa’ Eb’ li Esilal sa’ li Najter Chaq’rab’ (22–25), ut li rox raqal re “Jun li profeet” (B’ichleb’aal choq’ reheb’ li Kok’al, 110–111). Maare taawulaq chiruheb’ laa kok’al reetalinkil li seraq’—maare rik’in roksinkil junaq k’anjeleb’aal re xyiib’ankil junaq jukub’ malaj b’eek jo’eb’ li xul naq ke’ok sa’ li jukub’.

• Naq yooqex chi aatinak chirix laj Noe, tenq’aheb’ laa kok’al chixk’eeb’al reetal naq jwal osob’tesinb’ilo xb’aan naq wan jun xprofeet li Dios sa’ li kutan a’in. Tenq’aheb’ laa kok’al chirilb’al Moises 8:16–24 re te’xtaw k’a’ru kixk’ut laj Noe ut toj neke’xk’ut ajwi’ lix profeet li Qaawa’ sa’ li kutan a’in. Chan ru naq noko’osob’tesiik naq neke’qapaab’ li k’utum a’an?

• Maare taawulaq chiruheb’ laa kok’al xyiib’ankil xjalam-uuch malaj xb’onb’al jun li kaqla naq yookat chixch’olob’ankil k’a’ru nareetali. K’a’ru kiraj li Dios naq taanaq sa’ xch’ool laj Noe ut lix junkab’al rajlal sut naq te’ril jun kaqla?

• Naru ajwi’ nakak’ut chiruheb’ laa kok’al junaq k’a’ru aawe li naxjultika li k’a’ru nim xwankil sa’ laa yu’am, maare jun matq’ab’ re sumlaak, jun jalam-uuch, malaj jun li diario. Kanab’eb’ laa kok’al chixwotzb’al ajwi’ li reheb’. A’in naru texxtenq’a chi aatinak chirix k’a’aq re ru nokoxtenq’a chixk’oxlankileb’ li qasumwank, jo’ li loq’laj wa’ak, li nokoxtenq’a chixk’oxlankil li qasumwank re li kub’iha’ naq taqataaqe li Jesukristo (chi’ilmanq Tzol’leb’ ut Sumwank 20:75–79).

• Maare taawulaq cheru xyiib’ankil jun najt xteramil kab’l rik’in kok’ k’a’aq re ru. Naq yooqex chixyiib’ankil, ch’olob’ naq eb’ laj Babel ke’xk’oxla naq te’ruuq chi wulak sa’ choxa rik’in jun najt xteramil kab’l. Chirix a’an naru teeril jun xjalam-uuch li Kolonel ut taapatz’ reheb’ laa kok’al chan ru naq a’an nokoxtenq’a chi wulak sa’ choxa. Naru ajwi’ teeye cherib’il eerib’ jalan chik na’leb’ naru nekeb’aanu re xtaaqenkil li Kolonel.

• Rochb’een li seraq’ chirix li najt xteramil kab’l re Babel sa’ Genesis 11:1–9, laa’ut ut eb’ laa kok’al naru nekeril Helaman 6:28. Jo’ naxye li raqal a’an, k’a’ut naq eb’ li kristiaan ke’xyiib’ li najt xteramil kab’l re Babel? K’a’ut naq moko kik’anjelak ta li najt xteramil kab’l re wulak sa’ choxa? Chirix a’an naru nekeril 2 Nefi 31:20–21 ut Helaman 3:28 re xtawb’al chan ru toowulaq sa’ choxa. K’a’ raj ru taqaye reheb’ li kristiaan aran Babel?