“2–8 febrero. “Li Qaawa’ Sion kixye re lix tenamit”: Moises 7,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“2–8 febrero. “Li Qaawa’ Sion kixye re lix tenamit,”” Kim, Taaqehin: Li Najter Chaq’rab’ 2026
Enoch Sees the Meridian of Time [Laj Enok naril xjachlebʼaal ru li kutan], xb’aan li xJennifer Paget
2–8 febrero: “Li Qaawa’ Sion kixye re lix tenamit”
Moises 7
Chalen chaq xtiklajik, naab’aleb’ ke’xyal xb’aanunkil li kixb’aanu laj Enok ut lix tenamit: xxaqab’ankil jun tenamit b’ar wi’ maak’a’ li neb’a’il chi moko li rahob’tesink. Jo’ xtenamit li Dios, laa’o ajwi’ naqaj a’an. Xxaqab’ankil Sion naqaye re, ut a’an naraj naxye—rochb’een xtenq’ankileb’ li neb’a’ ut xxaqab’ankil li tuqtuukilal—naq noko’ok sa’ sumwank, nokowan sa’ tiikilal, ut noko’ok sa’ junajil chiqib’il qib’ ut rik’in li Jesukristo, “lix Rey Sion” (Moises 7:53). Wi li ruchich’och’, laa tenamit, malaj laa junkab’al moko wan ta jo’ nakawaj, naru nakapatz’, K’a’ru ke’xb’aanu laj Enok ut lix tenamit rik’in a’an? Chan ru naq “junajeb’ xch’ool ut junajeb’ xk’a’uxl” (Moises 7:18) us ta naab’al li wech’ink-ib’ sa’ xsutameb’? Wankeb’ k’iila na’leb’ sa’ Moises 7 chirix Sion, ut jun reheb’ li nim xwankil choq’ reheb’ laj Santil Paab’anel sa’ Roso’jikeb’ li Kutan, a’an naq Sion maawa’ ka’ajwi’ jun tenamit—a’an ajwi’ li k’a’ru wan sa’ li aamej ut li musiq’ej. Jo’ kixye li Qaawa’, li Sion a’aneb’ “li saqeb’ ru xch’ool” (Tzol’leb’ ut Sumwank 97:21). Chi jo’kan, re xxaqab’ankil Sion, maare taqatikib’ sa’ li qaam ut sa’ li qajunkab’al.
Li na’leb’ re tzolok sa’ li ochoch ut sa’ li iglees
Naru nintenq’an chixxaqab’ankil Sion.
Naq li profeet aj Jose Smith kitzolok xb’een wa chirix laj Enok ut lix Tenamit re Santilal, kiwaklesiik xch’ool. A’an “kixnaw naq wulajenaq chik li kutan naq li Qaawa’ tixxaqab’ wi’chik Sion sa’ xb’een li ruchich’och’” (Santos, 1:108–109), ut chi jo’kan naq kixtikib’ xsik’b’al xxaqab’ankil Sion. Rilb’al Moises 7 naru naxwaklesi aach’ool laa’at chixb’aanunkil ajwi’ a’an.
Re xtikib’ankil, naru nakatz’il rix li patz’om “K’a’ru a’an li Sion?” ut “Chan ru naq jalan a’an rik’in li jar na’ajej sa’ li ruchich’och’?” Naru nakatz’iib’aheb’ lix sumenkil a’an li nakataw naq yooqat chirilb’al Moises 7, sa’eb’ li raqal 16–21, 27, 53, 62–69.
Xsumenkileb’ li patz’om a’an maare tixk’e chak’e reetal naq toj wan naab’al li qak’anjel re xxaqab’ankil Sion. Chan ru taqab’aanu? Us raj xk’oxlankileb’ li hoonal naq xaweek’a naq “junaj aachʼool ut junaj aakʼaʼuxl” rik’in jun chik li kristiaan (Moises 7:18). Maare kik’ulman a’an sa’ li teep, li junkab’al, li trab’aaj, malaj li eskweel. K’a’ru ke’xb’aanu li kristiaan re xyoob’ankil li junajil sa’ tiikilal?
Arin wankeb’ wiib’ oxib’ chik li raqal ut aatin naru nakawoksi re xtawb’al aana’leb’ ut aamusiq’ankil. Sik’ ru jun malaj wiib’ oxib’ reheb’ re rilb’al, ut tz’iib’a li musiq’anb’ilat chixb’aanunkil re xxaqab’ankil Sion.
-
Filipenses 2:1–4; 4 Nefi 1:15–18; Tzol’leb’ ut Sumwank 97:21; 105:5.
-
Ulisses Soares, “As iitz’inb’ej rik’in li Kristo,” Jolomil ch’utub’aj-ib’ re octubre 2023.
-
D. Todd Christofferson, “Juno rik’in li Kristo,” Jolomil ch’utub’aj-ib’ re abril 2023.
Li Dios naraj naq lix tenamit te’wanq chi “junajeb’ xch’ool ut junajeb’ xk’a’uxl” (Moises 7:18).
Li Jesukristo, a’an “lix Rey Sion.”
K’a’ru naraj naxye naq li Jesukristo wan choq’ aaRey? Ke’ reetaleb’ lix k’ab’a’ li Jesukristo sa’ li raqal a’in. K’a’ru neke’xk’ut chawu chirix a’an? K’a’ru naraj naxye li ok “saʼ li okebʼaal ut taqeʼk saʼ xkʼabʼaʼ [li Jesukristo]”?
Chi’ilmanq ajwi’ “Chalqat, xReyeb’ li rey,” Eb’ li B’ich, 29.
Li Dios nayaab’ak—ut nasaho’ xch’ool—chirixeb’ li ralal xk’ajol.
Wankeb’ li neke’xk’oxla naq najt wan li Dios ut naq maak’a’ naraj re li naqak’ul sa’ li qayu’am. Maawa’ a’an li na’leb’ kixk’ul laj Enok chirix li Dios sa’ li k’utb’esinb’il matk’ tz’iib’anb’il resil sa’ Moises 7. K’a’ru kixtzol chirix li Dios—ut k’a’ru nakatzol laa’at—sa’eb’ li raqal 28–40? K’a’ut naq kisach xch’ool laj Enok naq kiril naq yoo chi yaab’ak li Dios? K’a’ut naq nim xwankil choq’ aawe xnawb’al naq naru nayaab’ak?
Rik’in li kiril sa’ li matk’, laj Enok ajwi’ kiyaab’ak. A’b’an li Dios kixk’e ajwi’ chi saho’k sa’ xch’ool. K’e reetal k’a’ut sa’ Moises 7:41–69. K’a’ru nakatzol sa’ lix k’utb’esinb’il matk’ laj Enok li naru tatxtenq’a “chixwaklesinkil aachʼool, [chi] sahaq aawaam,” us ta wan “xkʼahil” laa yu’am (raqal 44)?
Chi’ilmanq ajwi’ Jeffrey R. Holland, “La grandiosidad de Dios,” Liahona, noviembre 2003, 70–73.
Li Jesukristo taachalq wi’chik sa’ roso’jikeb’ li kutan.
Lix k’utb’esinb’il matk’ laj Enok, jo’ tz’iib’anb’il resil sa’ Moises 7:59–67, a’an jun reheb’ li xb’eenil profeetil aatin chirix li xkab’ xk’ulunik li Kolonel. Ma naxtoch’ aach’ool li raatinuleb’ li raqal a’in chirix li roso’jikeb’ li kutan? Jo’ nakak’oxla laa’at, chan ru naq yookeb’ chi tz’aqlok ru li profeetil aatin wankeb’ sa’ li raqal 62? K’a’ru neke’xk’ut li aatin a’in chawu chirix lix k’anjel li Dios sa’ roso’jikeb’ li kutan?
Chi’ilmanq ajwi’ Henry B. Eyring, “Eb’ li ixq sa’ Sion,” Jolomil ch’utb’aj-ib’ re octubre 2020.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Li Dios naraj naq toowanq chi “junajeb’ qach’ool ut junajeb’ qak’a’uxl.”
-
Re xtenq’ankileb’ laa kok’al chi tzolok chirix laj Enok ut li Sion, naru nakawoksi “Li profeet aj Enok” sa’ Eb’ li Esilal sa’ li Najter Chaq’rab’ (19–21) malaj li xkab’ raqal li b’ich “Jun li profeet” (B’ichleb’aal choq’ reheb’ li Kok’al, 58–59). Chirix a’an naru nakapatz’ reheb’ laa kok’al naq tate’xtenq’a chixyeeb’al li seraq’ sa’ tz’aqal raatineb’ a’an. Lix jalam-uuch laj Enok li wan sa’ tusleb’ aatin a’in naru texxtenq’a.
-
Naru nakab’aanu a’in re xtenq’ankileb’ laa kok’al chixtawb’al ru k’a’ru naraj naxye li wank chi “junaj qach’ool ut junaj qak’a’uxl” (Moises 7:18): Yiib’ jun aamej re hu ut set sa’ wiib’ oxib’ li jachal, jun choq’ re li junjunq chi kok’al. Kanab’eb’ chixtz’iib’ankil lix k’ab’a’ chiru lix jachal, toja’ naq te’k’anjelaq sa’ komonil re xyiib’ankil li aamej. Naq neke’xb’aanu a’an, naru nakaye k’a’ru nakara chirixeb’ laa kok’al sa’ junjunqal.
-
Tenq’aheb’ laa kok’al chirajlankil jarub’ sut na’el li aatin “Sion” sa’ Moises 7:18–21, 62–63, 68–69. Rajlal sut naq te’xtaw li aatin, tenq’aheb’ chixk’eeb’al reetal li naxye li raqal chirix Sion (chi’ilmanq ajwi’ K’utul Raqal reheb’ li Loq’laj Hu, “Sion,” Biblioteca del Evangelio). Chan ru naru toowanq chi mas wi’chik jo’eb’ li kristiaan sa’eb’ li raqal a’in?
Waklesi xch’ooleb’ chixtzolb’aleb’ li loq’laj hu sa’ junesal. Maare nakatk’utuk chiru laa junkab’al sa’ ochoch malaj sa’ jun tzoleb’aal sa’ domingo, a’ut q’axal taatenq’aheb’ li kristiaan chixkawob’resinkil lix paab’aaleb’ chirix li Jesukristo wi taatenq’aheb’ chi k’ayk rik’in xtzolb’aleb’ rajlal li loq’laj hu sa’ junesal. Wotz li yookat chixnumsinkil laa’at sa’ xtzolb’aleb’ li loq’laj hu, ut waklesi xch’ooleb’ laa junkab’al malaj laj tzolonel chixwotzb’al xnumsihomeb’ a’an. Naq naqab’i naq yookeb’ chi osob’tesiik li qas qiitz’in naq neke’ril li loq’laj hu, nokomusiq’aak chi kok’ aj xsa’ chixsik’b’aleb’ li osob’tesiik a’an rik’in li Qaawa’. (Chi’ilmanq Li K’utuk jo’ li Kolonel, 25.)
Lin Choxahil Yuwa’ naraj naq tinsik’ ru xtaaqenkil a’an.
-
Re xtikib’ankil li aatinak chirix Moises 7:32–33 rik’ineb’ laa kok’al, naru nakat-aatinak rik’ineb’ chirix k’a’ruhaq toje’ xe’xsik’ ru xb’aanunkil. Chirix a’an naru teerileb’ li raqal re xtawb’al k’a’ru naraj li qaChoxahil Yuwa’ naq taqasik’ ru xb’aanunkil. K’a’ru naru taqab’aanu re xk’utb’al naq yooko chixsik’b’al ru li Dios? Maare laa kok’al naru te’xk’utb’esi chi junjunqaleb’ jun reheb’ li b’aanuhom a’an, ut li jun siir chik te’xq’ehi k’a’ru nareetali li b’aanuhom a’an.
Li Jesus taak’ulunq wi’chik sa’ li ruchich’och’.
-
Sa’ Moises 7:59, laj Enok kixk’e jun patz’om re li Qaawa’. Patz’ reheb’ laa kok’al naq te’xtaw li patz’om, toja’ naq taapatz’ reheb’ naq te’xtaw xsumenkil a’an sa’ li raqal 60. Naru ajwi’ nakat-aatinak rik’ineb’ chirix junaq hoonal naq xe’royb’eni xsutq’ijik jun xkomoneb’ sa’ ochoch. Patz’ reheb’ k’a’ru xe’reek’a ut k’a’ru xe’xb’aanu re xkawresinkileb’ rib’. Chan ru naq naru taqakawresi qib’ choq’ re lix sutq’ijik li Jesus?
-
Maare naru nakak’uteb’ xjalam-uuch li Kolonel naq kixk’utb’esi rib’ chiruheb’ li kristiaan (chi’ilmanq Hu reheb’ li Jalam-uuch re li Evangelio, 60, 82, 83, ut 84). K’a’ru yookeb’ chixb’aanunkil li kristiaan sa’eb’ li jalam-uuch? K’a’ ta wi’ ru ke’reek’a li kristiaan naq ke’xnaw ru li Jesus? Naru ajwi’ nekeb’icha jun li b’ich chirix li xkab’ xk’ulunik li Kolonel, jo’ “Naq taak’ulunq li Kolonel” (B’ichleb’aal choq’ reheb’ li Kok’al, 46–47), ut taapatz’ reheb’ li kok’al k’a’ru neke’xk’oxla naq taak’ulmanq naq taak’ulunq li Jesus. Kanab’eb’ li kok’al chixwotzb’al k’a’ru neke’reek’a chirix rilb’al li Jesus naq taak’ulunq wi’chik.
Re xtawb’al xkomon chik li na’leb’, chi’ilmanq li hu Amigos re li po a’in.