Li sumwank

Laj Abraham kiraj “wank choq’ aj taaqenel re li tiikilal” (Abraham 1:2), jo’kan naq li Dios ki’ok sa’ sumwank rik’in. Laj Abraham maawa’ li xb’een li ki’ajok re a’an, ut maawa’ li xb’een li ki’ok sa’ sumwank. Ch’olch’o naq a’an jun sumwank maak’a’ roso’jik. Laj Abraham kixsik’eb’ “li jar osob’tesink reheb’ li yuwa’b’ej” (Abraham 1:2)—li jar osob’tesink li ke’k’ehe’ sa’ sumwank re laj Adan ut xEva, ut reheb’ chixjunil ani te’sik’oq ru li osob’tesink a’an chi anchaleb’ xch’ool.

Sa’ lix sumwank, li Dios kixyeechi’i xninqal ru osob’tesiik re laj Abraham: li ch’och’ choq’ reechanihomeb’, maak’a’jo’ xk’ihaleb’ li alalb’ej k’ajolb’ej, li k’ojob’anb’il k’anjel re li tijonelil, ut jun li k’ab’a’ej li nimanb’ilaq ru chiru k’iila chihab’. A’b’an lix ch’oolil li sumwank maawa’ ka’ajwi’ li osob’tesink li tixk’ul laj Abraham ut lix junkab’al, a’an b’an naq eb’ a’an ajwi’ te’wanq choq’ osob’tesink chiru chixjunileb’ li ralal xk’ajol li Dios. “Tatkanaaq choq’ xyo’leb’aal li usilal,” chan li Dios, ut “osob’tesinb’ilaqeb’ sa’ laa k’ab’a’ chixjunil li tenamit sa’ ruchich’och’” (Genesis 12:2–3).

Ma naraj naxye a’in naq osob’tesinb’ileb’ laj Abraham, li xSara, ut eb’ li ralal xk’ajol sa’ xb’eeneb’ li jun siir chik chi ralal xk’ajol li Dios? Ka’ajwi’ ke’osob’tesiik chixtenq’ankileb’ li ras riitz’in. Lix junkab’al laj Abraham “te’xk’am li k’anjel ut li Tijonelil a’in rik’ineb’ chixjunil li tenamit,” ut te’xwotz “li osob’tesink re li Evangelio, a’an li osob’tesink re li kolb’a-ib’, re ajwi’ li junelik yu’am” (Abraham 2:9, 11). Li wank jo’ xtenamit li Dios re li sumwank ink’a’ naraj naxye naq chaab’ileb’ wi’chik a’an chiru li ras riitz’ineb’; naraj naxye naq teneb’anb’ileb’ chixtenq’ankileb’ li ras riitz’in chi chaab’ilo’k.

Li sumwank a’in, a’an li osob’tesink kirataw laj Abraham. Chirix naq kixk’ul, laj Abraham kixye sa’ xch’ool, “Laa moos xatxsik’ chi anchal xch’ool; anajwan ut xatintaw” (Abraham 2:12).

K’iila mil chihab’ chaq kik’ulman a’an, a’b’an k’ojob’anb’il wi’chik li sumwank a’in sa’ li qakutankil. Toj yoo chi tz’aqob’resiik ru anajwan sa’ xyu’ameb’ lix tenamit li Dios. Yoo chixseeb’ankil rib’ lix tz’aqob’resinkil ru li sumwank sa’ li kutan a’in naq naxik chi uub’ej lix k’anjel li Dios, ut yoo chirosob’tesinkileb’ li junkab’al chiru li ruchich’och’. Yalaq ani li naraj wank choq’ aj taaqenel re li tiikilal, jo’ kiraj laj Abraham—yalaq ani li naxsik’ li Qaawa’ chi anchal xch’ool—a’an ajwi’ naru taatz’aqonq.

Laa’at jun alalb’ej malaj rab’inb’ej re li sumwank. Nakat-ok sa’ sumwank rik’in li Dios naq nakub’e aaha’ ut naq nakak’ul li loq’laj wa’ak. Ut nakak’ul lix tz’aqalil li sumwank rik’ineb’ li santil k’ojob’anb’il k’anjel re li santil ochoch.

Rik’ineb’ li sumwank ut k’ojob’anb’il k’anjel a’in, noko’ok jo’ xtenamit li Dios. Nokob’ak’e’ rik’in a’an “sa’ li junelikil sumwanjik.” “Naq noko’ok sa’ sumwank rik’in li Dios,” chan li Awa’b’ej Russell M. Nelson, “maajo’q’e chik tookanaaq sa’ xyi. Li Dios ink’a’ tixtz’eqtaana lix sumwanjik rik’ineb’ li neke’xkab’la li chapok-ib’ a’in rik’in a’an. Relik chi yaal, eb’ li neke’ok sa’ sumwank rik’in li Dios naru neke’xk’ul li rahok ut li usilal k’a’jo’ xninqaleb’ ru. … Sa’ xk’ab’a’ li qasumwank rik’in li Dios, maajun wa tixkanab’ qatenq’ankil, ut maajun wa taa’oso’q lix chaab’il kuyum choq’ qe.” Taak’e reetal a’an sa’ li resilal lix tenamit li Dios re li sumwank sa’ li Najter Chaq’rab’, ut taak’e reetal a’an sa’ laa yu’am jo’ ralal xk’ajol a’an re li sumwank.

Naqanaw li xnimal ru na’leb’ a’in b’antiox re lix k’ojob’ankil wi’chik li sumwank re laj Abraham rik’in li profeet aj Jose Smith. Chi jo’kan, naq nakawileb’ li sumwank sa’ li Najter Chaq’rab’, maak’oxla ka’ajwi’ lix sumwanjik li Dios rik’in laj Abraham, laj Isaak, ut laj Jakob. K’oxla aj b’an wi’ lix sumwanjik aawik’in laa’at. Naq nakawil naq kiyeechi’iman re laj Abraham naq te’wanq ralal xk’ajol chi ink’a’ taaruuq rajlankil xk’ihaleb’, maak’oxla ka’ajwi’ li k’iila millon li ralal xk’ajol anajwan. K’oxla aj b’an wi’ li junkab’al ut li k’iik chi junelik li naxyeechi’i li Dios aawe laa’at. Naq nakawil naq kiyeechi’iman li ch’och’ choq’ reechanihom, maak’oxla ka’ajwi’ li ch’och’ yeechi’inb’il re laj Abraham. K’oxla aj b’an wi’ li choxahil loq’alil tixk’ul li ruchich’och’—jun eechanihom yeechi’inb’il reheb’ li “tuulaneb’” li “k’ojk’ookeb’ xch’ool rik’in li Qaawa’” (Mateo 5:5; Salmos 37:9, 11). Ut naq nakawil naq kiyeechi’iman naq lix tenamit li Dios re li sumwank te’rosob’tesi “chixjunil li junkab’al re li ruchich’och’” (Abraham 2:11), maak’oxla ka’ajwi’ lix k’anjel laj Abraham malaj xk’anjeleb’ li profeet li ke’chal chirix. K’oxla aj b’an wi’ k’a’ru taab’aanu laa’at—jo’ aj taaqenel re li Jesukristo sa’ li sumwank—re tatwanq choq’ osob’tesink choq’ reheb’ li junkab’al wankeb’ chasutam.