Genesis 5; Moises 6

Naq nakawil Moises 6:26–36, k’a’ru nakatzol chirix lix toch’om li maak? Chan ru naq aawilom lix toch’om a’an? K’a’ru kixb’aanu laj Enok li kitenq’ank re chi numtaak sa’ xb’een li toch’om a’an? Chan ru naq li Dios kirosob’tesi xb’aan a’an?

Us ta nalukta aach’ool xb’aan li nakatxb’oq li Qaawa’ chixb’aanunkil, moko aajunes ta wankat. Laj Enok kilutka ajwi’ xch’ool naq kib’oqe’ choq’ profeet xb’aan li Qaawa’. Naq nakawil Moises 6:26–36, k’e reetal k’a’ut naq kilukta xch’ool laj Enok ut k’a’ru kixye li Qaawa’ re xk’eeb’al xkawilal xch’ool.

Sa’eb’ li raqal 37–47, naru nakak’e reetal k’a’ru kixb’aanu li Qaawa’ re xtenq’ankil laj Enok ut re xk’eeb’al xmetz’ew sa’ xb’aanunkil lix k’anjel (chi’ilmanq ajwi’ Moises 7:13). Naru nakajuntaq’eeta li kixk’ul laj Enok rik’in jalaneb’ chik li profeet li xe’reek’a xnimal xmajelal: laj Moises (chi’ilmanq Exodo 4:10–16), laj Jeremias (chi’ilmanq Jeremias 1:4–10), laj Nefi (chi’ilmanq 2 Nefi 33:1–4), ut laj Moroni (chi’ilmanq Eter 12:23–29). K’a’ru nakak’oxla naq li Dios naraj naq taatzol sa’eb’ li raqal a’in chirix li k’anjel li naxk’e aawe?

Naab’aleb’ li profeet sa’ qakutankil laa’o neke’xye ajwi’ naq neke’xuwak jo’ chanchan laj Enok naq neke’xk’ul xk’anjel jo’ profeet. Naru nakawil a’an sa’ li aatin kixye li Elder Ulisses Soares sa’ “Eb’ li profeet neke’aatinak rik’in lix wankil li Santil Musiq’ej” (Jolomil ch’utub’aj-ib’ re abril 2018).

K’a’ru naru nakatzol rik’ineb’ li profeet ut apostol a’in chirix li wiib’ank ch’oolej chirix li qamajelal? Ma ak xaweek’a jun sutaq li Kolonel chatenq’ankil naq xpatz’ aawe naq taab’aanu li k’a’ru ch’a’aj? Naru nakatz’iib’a resil li k’a’ru taanumsi junaq kutan taawaj wi’ ru naq tatxtenq’a li Kolonel. Chan ru naq taanumsiheb’ a’an chi wanq aapaab’aal chirix li Jesukristo?

Chi’ilmanq ajwi’ David A. Bednar, “Tatkanaaq wikʼin, ut laaʼin aawikʼin; joʼkan ut chatbʼeeq wikʼin,” Jolomil ch’utub’aj-ib’ re abril 2023; “Tinxik b’ar taawaj naq tinxik,” Eb’ li B’ich, 174.

B’antiox re lix hu laj Moises, naqanaw naq chalen chaq xkutankil laj Adan ut xEva li Dios naxk’ut chiruheb’ li ralal xk’ajol chan ru te’toje’q rix. Naq yooqat chirilb’al Moises 6:48–68, k’e reetal li tento taqanaw ut taqab’aanu re naq taatoje’q qix. K’e reetal lix patz’om laj Adan sa’ li raqal 53. Ma xapatz’ jun sutaq a’in? K’a’ru nakatzol rik’in lix sumehom li Qaawa’ sa’eb’ li raqal 53–65? Naru nayeeman naq eb’ li raqal a’in a’aneb’ li aatin kixk’e li Qaawa’ naq kub’eek re xha’ laj Adan. K’a’ru nakatzol chirix li kub’iha’ sa’ li raatin? K’a’ut naq kixjuntaq’eeta li kub’iha’ rik’in li “yo’laak wi’chik”? (raqal 59). K’a’ru naru nakab’aanu re naq rajlal yooqat chi “yo’laak wi’chik” chiru chixjunil laa yu’am?

Chirix xk’utb’aleb’ li na’leb’ re lix evangelio li Jesukristo chiru laj Adan, sa’ Moises 6:51–63, li Qaawa’ kixye re laj Adan naq tixk’uteb’ a’an chiruheb’ li ralal xk’ajol. Maare naru taatz’iib’a k’a’ruheb’ li na’leb’ a’an. (Naru nakajacheb’ ru li raqal sa’ kok’ ch’uut chi raqal, jo’ a’in: eb’ li raqal 51–52, 53–57, 58–60, 61–63). K’a’ru xtenq’ankil te’xk’ul li saaj kristiaan anajwan naq nak’utman li na’leb’ a’an chiruheb’? K’a’ chik ru naru nakatzol rik’in li nayeeman reheb’ li na’b’ej yuwa’b’ej sa’ Mosiah 4:14–15 ut Tzol’leb’ ut Sumwank 68:25–28; 93:40–50?

Li tzolok chirix “xhuhil li jultikaak” re lix junkab’al laj Adan ut li xEva, maare tatxmusiq’a laa’at malaj laa junkab’al chixtz’iib’ankil jun xhuhil li jultikaak. K’a’ru nakaweek’a naq li Qaawa’ taaraj raj naq taatz’iib’a? Naru taak’uula li na’leb’ sa’ laa huhil re jultikaak sa’ FamilySearch.org.

Chi’ilmanq ajwi’ Dieter F. Uchtdorf, “Li Jesukristo a’an lix kawilaleb’ li na’b’ej yuwa’b’ej,” Jolomil ch’utub’aj-ib’ re abril 2023; “Ser buenos padres: Tocar el corazón de nuestros jóvenes,” (video), Biblioteca del Evangelio.

• Naq laj Enok kib’oqe’ chixjultikankil li evangelio, ki’ok xk’a’uxl xb’aan xmajelal. A’b’an li Dios kixtenq’a a’an. Ilomaq li seraq’ a’in sa’ Moises 6:26–34 (chi’ilmanq ajwi’ “Li profeet aj Enok” sa’ Eb’ li Esilal sa’ li Najter Chaq’rab’, 19–21). K’a’ut naq laj Enok kireek’a naq ink’a’ taaruuq chixjultikankil li evangelio? (chi’ilmanq Moises 6:31). Chan ru naq li Dios kixtenq’a laj Enok? (chi’ilmanq Moises 6:32–34; 7:13).

• Maare taawulaq chiruheb’ laa kok’al xwotzb’al malaj xk’utb’esinkil xkomoneb’ chik li seraq’ naq li Dios kixtenq’aheb’ li kristiaan chixb’aanunkil li k’a’ru ch’a’aj—jo’ laj Noe, laj David, laj Ammon, malaj laj Samuel aj Lamanita (chi’ilmanq Hu reheb’ li Jalam-uuch re li Evangelio, 7, 19, 78, 81). Naru ajwi’ nakawotz junaq laa seraq’ ut taakanab’eb’ laa kok’al chixyeeb’al chan ru naq li Dios naxtenq’aheb’ chixb’aanunkil li k’a’ru ch’a’aj.

• Li Dios kixk’ut chiru laj Adan k’a’ru tento taqab’aanu re naq tooq’ajq rik’in a’an—taawanq qapaab’aal chirix li Jesukristo, taqajal qak’a’uxl, takub’eeq qaha’, ut taqak’ul li maatan re li Santil Musiq’ej. Tenq’aheb’ laa kok’al chixtawb’aleb’ li na’leb’ a’an sa’ Moises 6:52, 57. Chirix a’an naru nakatenq’aheb’ chixtz’iib’ankil wiib’ oxib’ li aatin chirix jun reheb’ li na’leb’ a’an. Naru neke’roksi sa’ li raatineb’ jun raqal re Moises 6, jun numsihom, malaj xnawom xch’ooleb’. Kanab’eb’ chixwotzb’al chirib’ileb’ rib’ li aatin ke’xk’uub’.

• Naru ajwi’ nakak’uteb’ li jalam-uuch neke’reetali li xb’eenil na’leb’ re li evangelio (chi’ilmanq li xkaa xraqalil li paab’aal). K’eheb’ li jalam-uuch chi tustu toj reetal naq taawulaq rik’in xjalam-uuch li Jesukristo. Naq yooqat chixyaab’asinkil Moises 6:52, laa kok’al naru neke’xaqli chixk’atq li jalam-uuch nareetali li aatin yookat chixyeeb’al.

• Maare taawulaq chiruheb’ laa kok’al xb’ichankileb’ li b’ich neke’k’utuk chirixeb’ li na’leb’ sa’ Moises 6:52, jo’ “Li paab’aal,” “Naq nakub’e lin ha’,” ut “Li Santil Musiq’ej” (B’ichleb’aal choq’ reheb’ li Kok’al, 50–51, 53, 56). Tenq’aheb’ chixtawb’aleb’ li na’leb’ a’an sa’ Moises 6:52.

• Re xwaklesinkil xch’ooleb’ laa kok’al re naq te’xtenq’aheb’ lix na’ xyuwa’ sa’ lix k’anjeleb’ re xk’utb’al li evangelio, naru nakapatz’ re jun reheb’ naq taaril Moises 6:58 ut tixye li chaq’rab’ kixye li Dios reheb’ li na’b’ej yuwa’b’ej. Chirix a’an naru nakak’ut xjalam-uuch laj Adan ut xEva naq yookeb’ chixtzolb’aleb’ lix kok’al (jo’ li jalam-uuch wan sa’ xraqik li tusleb’ aatin a’in) ut taakanab’eb’ laa kok’al chi aatinak chirix li neke’ril sa’ li jalam-uuch. Laa kok’al naru te’xyiib’ xjalam-uuch lix junkab’aleb’ naq yookeb’ chirilb’aleb’ li loq’laj hu, chi tijok, malaj chi b’atz’unk sa’ komonil.