“19–25 enero. Lix tʼanik laj Adan ut li xEva: Genesis 3–4; Moises 4–5,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“19–25 enero. Lix tʼanik laj Adan ut li xEva,” Kim, Taaqehin: Li Najter Chaq’rab’ 2026
Adam and Eve [Laj Adan ut xEva], xb’aan laj Douglas M. Fryer
19–25 enero: Lix tʼanik laj Adan ut li xEva
Genesis 3–4; Moises 4–5
Sa’ xtiklajik, maare chanchan naq moko chaab’il ta li resil laj Adan ut li xEva. Ke’isiik chaq laj Adan ut li xEva sa’ li Awimq Eden. Ke’taqlaak sa’ jun ruchich’och’ natam wi’ li rahilal ut li kamk (chi’ilmanq Genesis 3:16–19). Ke’isiik chaq ajwi’ chiru rilob’aal lix Choxahil Yuwa’. A’b’an li yaal li kik’ojob’aman wi’chik rik’in li profeet aj Jose Smith sa’ lix hu laj Moises naxk’e xkomon chik li qanawom chirix li t’ane’k.
Yaal, k’a’jo’ xch’ina-usal chaq li Awimq Eden. A’b’an toj wan li k’a’ru ajb’il chaq ru xb’aan laj Adan ut li xEva. Ke’raj ru k’iik—laa’o ajwi’ naqaj ru a’an. Ki’ajman naq xb’een te’elq chaq sa’ li Awimq Eden re naq te’ruuq chi ok sa’ li b’e re sutq’iik rik’in li Dios ut re wulak jo’ chanru a’an. Ki’ajman naq te’yale’q rix, te’xsik’ xb’eheb’, te’ok sa’ majelal, te’xtzol xjalb’al xk’a’uxl, ut te’xkanab’ rib’ sa’ ruq’ li Kolonel. Lix tojb’al rix li maak xb’aan li Kolonel tixtenq’aheb’ chi k’iik ut chixk’ulb’al “li sahil ch’oolejil re lix tojb’al qix” (Moises 5:11). Chi jo’kan, naq nakawil resil lix t’anik laj Adan ut li xEva, maak’e reetal li ch’a’ajkilal, k’e b’an reetal li k’a’ru us—maak’e reetal naq ke’isiik chaq laj Adan ut xEva sa’ lix hilob’aal na’aj, k’e b’an reetal li loq’alil naru taqak’ul b’antiox reheb’ a’an.
Li na’leb’ re tzolok sa’ li ochoch ut sa’ li iglees
Genesis 3; Moises 4
Li t’ane’k a’an jun raqal aajel ru re lix k’uub’anb’il na’leb’ li Dios.
Yaal naq xb’aan xb’aanuhom laj Adan ut xEva ke’chal li ch’a’ajkilal naqanumsi laa’o sa’ li yu’am. A’b’an ink’a’ naraho’ qach’ool xb’aan li ke’xb’aanu. Naq nakawil Genesis 3 ut Moises 4, maare taapatz’ aawib’, k’a’ut naq aajel ru li t’ane’k sa’ lix k’uub’anb’il na’leb’ li Dios?
Jo’ naxye Moises 5:9–12, k’a’ru ke’reek’a laj Adan ut xEva chirix lix t’anikeb’? Chan ru naru nakayu’ami li raatineb’ a’an sa’ laa b’eenik sa’ li t’anenaqil ruchich’och’ a’in? K’a’ chik ru nakatzol sa’ 2 Nefi 2:19–25?
Chi’ilmanq ajwi’ Mosiah 3:19; Alma 12:21–37; ut Tzol’leb’ ut Sumwank 29:39–43.
Leaving Eden [Elk sa’ Eden], xb’aan li xAnnie Henrie Nader
Genesis 3:1–7; Moises 4:22–31; 5:4–15
Li Jesukristo naxyeechi’i li qayo’onihom ut lix tojb’al qix.
Li seraq’ chirix laj Adan ut xEva a’an naxjayali li yo’onihom ut li tojb’al-ix natawman rik’in li Jesukristo. Re xk’eeb’al reetal k’a’ut, naru taatz’il rix k’a’ru xtoch’om li t’ane’k sa’ Genesis 3:1–7; Moises 4:22–31 ut taajuch’ malaj taatz’iib’a li na’leb’ nakataw. Chan ru naq a’in naxtoch’ laa yu’am? Chirix a’an naru taawil Moises 5:4–15 re xsik’b’al lix k’uub’anb’il na’leb’ li Dios li natojok qix chiru xtoch’om li t’ane’k. K’a’ut naq “ke’sahoʼ xchʼool” laj Adan ut xEva chirix naq ke’ula’aniik xb’aan li anjel? K’a’ru nakatzol rik’ineb’ chirix lix k’uub’anb’il na’leb’ li qaChoxahil Yuwa’?
Chi’ilmanq ajwi’ “Gracias A Él” (video), Biblioteca del Evangelio.
Because of Him
Genesis 3:16; Moises 4:22
K’a’ru naraj naxye naq laj Adan “taataqlanq sa’ xb’een” li xEva?
Xb’aan naq ink’a’ neke’xtaw ru li raatinul li raqal a’in, wankeb’ li neke’xk’oxla naq maak’a’ reek’ naq li b’eelomej tixrahob’tesi li rixaqil. Sa’ li qakutan, eb’ lix profeet li Qaawa’ neke’xk’ut naq junaqik xwankileb’ raj li b’eelomej ut li ixaqilb’ej sa’ lix santil teneb’ankileb’ sa’ li junkab’al (chi’ilmanq “Li Junkab’al: Jun Jek’inb’il Aatin choq’ re li Ruchich’och’” [ChurchofJesusChrist.org]). Li Elder Dale G. Renlund ut li Hermana Ruth Lybbert Renlund ke’xch’olob’ naq jun b’eelomej li tiik xch’ool “tixsik’ k’anjelak chiru li ras riitz’in; tixk’e reetal lix majelal ut tixpatz’ xkuyb’al xmaak; taab’antioxinq sa’ junpaat; tixk’oxla li rajomeb’ lix komon; tixk’ul sa’ xb’een li teneb’ank re “xk’eeb’al li kʼaʼru naʼajman ru re li yuʼam aʼin, ut xkʼeebʼal xkolbʼalebʼ rix” lix junkabʼal; taaroxloq’i chi tz’aqal li rixaqil. … Taarosob’tesi lix junkab’al” (The Melchizedek Priesthood: Understanding the Doctrine, Living the Principles [2018], 23).
Nawaj ru lix taql inch’ool ut naq tinka’pak’aliiq re naq tink’iiq.
Li Elder Dale G. Renlund kixye, “Li rajom li qaChoxahil Yuwa’ maawa’ naq eb’ li ralal xk’ajol te’xb’aanu li k’a’ru us, a’an naq eb’ li ralal xk’ajol te’xsik’ ru xb’aanunkil li us, ut sa’ roso’jik te’wulaq jo’ a’an” (“Sik’omaq ru anajwan,” Jolomil ch’utub’aj-ib’ re octubre 2018). K’a’ut naq aajel ru sa’ lix k’uub’anb’il na’leb’ li qaChoxahil Yuwa’ naq taqasik’ ru xb’aanunkil li us?
Naq yooqat chirilb’al Moises 4:1–4, k’e reetal k’a’ru ke’xb’aanu li qaChoxahil Yuwa’ ut li Jesukristo re xkolb’al rix laa wankilal re sik’ok-u—a’an lix taql laa ch’ool. Chan ru naru taak’ul lix wankilaleb’ re kolok? Re xtawb’al aana’leb’, naru nakawil li tasal “Chasik’ ru li chaab’il” sa’ Choq’ re Xkawilaleb’ li Saaj: Jun tenq’ re xsik’b’al ru laa b’e (4–5).
Naru ajwi’ nakawil li raatin laj Lehi chirix li xtaql ch’oolej sa’ 2 Nefi 2:11–20, 25–30. K’a’ut naq na’ajman ru li ka’pak’aliik re roksinkil li xtaql ch’oolej? Chan ru naru nakak’ut chiru li Jesukristo naq nakab’antioxi naq a’an “xatxkanabʼ chixsikʼbʼal ru” laa b’e? (2 Nefi 2:27).
Chi’ilmanq ajwi’ Dallin H. Oaks, “Taawanq chixka’pak’alil chixjunil li k’a’aq re ru,” Jolomil ch’utub’aj-ib’ re abril 2016; Temas y preguntas, “Albedrío,” Biblioteca del Evangelio; “Sik’ li us,” Eb’ li B’ich, 151.
Xwaklesinkileb’ xch’ool chi tz’aqonk. Naab’al li tzolok naru nab’aanuman sa’ junesal, jo’ junkab’al, malaj sa’ li tzoleb’aal; sa’ jar ch’uut, malaj sa’ ka’kab’il. Naru taajal chan ru taab’aanumanq, re naq te’tz’aqonq li ani ink’a’ raj te’tz’aqonq. Sa’ li tzolok a’in, naru nakab’oq jun kristiaan malaj jun ch’uut chirilb’al Moises 4 ut li hu Choq’ re Xkawilaleb’ li Saaj naq junaq chik li ch’uut neke’rileb’ li raqal sa’ 2 Nefi 2. Chirix a’an naru te’xtzol rib’ chirib’ileb’ rib’ chirix li xe’ril.
Laj Satanas naraj “inb’alaq’inkil ut xmutz’ob’resinkil wu.”
Naq yooqat chirilb’al Moises 4:4–12; 5:13–33, naru nakatz’iib’a chan ru naq laj Satanas kixyal raalenkil laj Adan, xEva, ut eb’ lix kok’al. Chan ru naxb’aanu ajwi’ li aaleek a’an sa’ qakutankil laa’o? Chan ru nakatxtenq’a li qaChoxahil Yuwa’ chixtz’eqtaanankil li aaleek xb’aan laj Satanas?
“Laaʼin, li Qaawaʼ … kebʼintiqibʼ.”
Chirix naq ke’xyal ru li ru che’ li xyeheʼ naq inkʼaʼ taakʼuxmanq, laj Adan ut xEva ke’xyal tzʼapbʼal ru xtʼustʼuukilalebʼ. Moqon, li Qaawa’ kixyeechi’i xtiqib’ankileb’. Naq yooqat chirilb’al Moises 4:13–16, 27, k’oxlan chirix a’in:
-
K’oxla k’a’ru naru na’eetaliman rik’in li t’ust’uukilal ut li t’ikr sa’eb’ li loq’laj hu (chi’ilmanq Apokalipsis 7:9, 13–15; 2 Nefi 9:14; Tzol’leb’ ut Sumwank 109:22–26, 76). K’a’ru nakatzol rik’in li ke’xk’ul laj Adan ut xEva rik’in li t’ust’uukilal ut li t’ikr?
-
Wi ak aak’ulum laa loq’laj tiqib’ankil sa’ li santil ochoch, k’oxla k’a’ raj ru te’xye laj Adan ut xEva aawe chirix lix nimal ru li loq’laj aq’ej re li santil ochoch ut k’a’ru nareetali.
Chi’ilmanq ajwi’ “La ropa sagrada del templo” (video), Biblioteca del Evangelio.
Sacred Temple Clothing
Li Dios tixk’ulub’a lin mayej wi tinq’axtesi chi anchal inch’ool ut chi wank inpaab’aal.
Naq nakawil Moises 5:4–9, 16–26, k’e reetal li ke’xk’oxla laj Adan ut xEva ut li ralaleb’, laj Kain ut laj Abel, chirix xq’atesinkil li mayej. K’a’ut naq li Qaawa’ kixk’ulub’a xmayej laj Abel, a’b’an ink’a’ li re laj Kain?
K’a’ru naraj li Qaawa’ naq taamayeja? Ma wan junaq na’leb’ sa’eb’ li raqal a’in li naxnimob’resi laa na’leb’ chirixeb’ li mayej a’an?
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Li Jesukristo nokoxkol chiru li t’ane’k.
-
Re xtenq’ankileb’ laa kok’al chixtawb’al chik ru lix t’anik laj Adan ut xEva, naru taawisi reetalileb’ li jalam-uuch sa’ “Adan y Eva” (sa’ Eb’ li Esilal sa’ li Najter Chaq’rab’, 13–16) ut taaseteb’. Sa’ junkab’al, teetusub’eb’ li jalam-uuch naq yooqex chi aatinak chirix li k’a’ru ke’xk’ul laj Adan ut xEva. Sa’ a’an, tz’ilomaq ajwi’ rix k’a’ut naq aajel ru, sa’ lix k’uub’anb’il na’leb’ li qaChoxahil Yuwa’, naq laj Adan ut li xEva ke’el chaq sa’ li Awimq Eden.
-
Laa kok’al naru neke’xb’antioxi lix tojb’al rix li maak xb’aan li Jesukristo wi neke’xtaw ru chan ru naq a’an nanumta sa’ xb’een xtoch’om li t’ane’k. Naq yooqex chirilb’al Moises 4:25; 6:48; Romanos 5:12; 2 Nefi 2:22–23, tenq’aheb’ laa kok’al chixtz’aqob’resinkil ru li ch’ol aatin a’in: “Xmaak li t’ane’k, laa’in …” Chirix a’an, naq teeril Moises 5:8–11, 14–15; 6:59; Alma 11:42, naru te’xtz’aqob’resi ru li ch’ol aatin a’in: “B’antiox re li Jesukristo, laa’in …” Wotzomaq cherib’il eerib’ lee b’antioxihom chirix li Jesukristo.
Naru tinsik’ ru li us.
-
K’oxla xb’aanunkil jun ch’ina k’anjel jo’ a’in re xk’utb’al k’a’ru li xtaql ch’oolej: patz’ reheb’ laa kok’al naq te’xb’on li perel re kok’ k’anjel re li xamaan a’in, a’b’an k’e jun ajwi’ xb’onol li b’onleb’ reheb’. K’a’ut naq aajel raj ru naq naab’al raj xb’onol li b’onleb’? Chirix a’an naru teeril Moises 4:1–4 ut teetz’il rix k’a’ut naq li Dios naraj naq tooruuq chixsik’b’al ru li qab’e, li us malaj li ink’a’ us. Chan ru naq li qaChoxahil Yuwa’ ut li Jesukristo nokohe’xtenq’a chixsik’b’al ru li us?
-
Tenq’aheb’ laa kok’al chixk’oxlankil ut chixyiib’ankil xjalam-uuch li k’a’ru us naru neke’xsik’ ru xb’aanunkil re xtaaqenkil li Jesukristo. Malaj naru nekeb’icha jun li b’ich na’aatinak chirix xsik’b’al ru li us, jo’ “Tinsik’ ru li us” (B’ichleb’aal choq’ reheb’ li Kok’al, 82–83). Naru nekeseraq’i cherib’il eerib’ resil hoonal b’ar wi’ xesik’ ru k’a’ruhaq chaab’il, ut k’a’ru xereek’a chirix xb’aanunkil a’an.
The Fall [Li t’ane’k], xb’aan laj Robert T. Barrett
Naru nintijok chiru lin Choxahil Yuwa’.
-
Naq laj Adan ut xEva ke’isiik chaq sa’ li Awimq Eden, ink’a’ chik ke’ru chi wank chiru rilob’aal lix Choxahil Yuwa’eb’. Il Moises 5:4, 8 rik’ineb’ laa kok’al, ut tenq’aheb’ chixtawb’al k’a’ru ke’xb’aanu laj Adan ut xEva re reek’ankil naq nach’ wankeb’ rik’in a’an ut re rab’inkil a’an. K’a’ru naru naqaye re li qaChoxahil Yuwa’ sa’eb’ li qatij?
Re xtawb’al xkomon chik li na’leb’, chi’ilmanq li hu Amigos re li po a’in.
In Similitude of the Sacrifice of the Only Begotten of the Father [Jo’ reetalil li mayej re li Junaj Yoʼlajenaq chiru li Yuwaʼbʼej], xb’aan laj Mike Malm (chi’ilmanq Moises 5:5–9)