“5–11 enero. “Aʼin lin kʼanjel ut lin loqʼal”: Moises 1; Abraham 3,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“5–11 enero. “Aʼin lin kʼanjel ut lin loqʼal,”” Kim, Taaqehin: Li Najter Chaq’rab’ 2026
5–11 enero: “Aʼin lin kʼanjel ut lin loqʼal”
Moises 1; Abraham 3
Li Santil Hu natikla rik’in li aatin “Sa’ xtiklajik chaq li Dios kixyo’ob’tesi li choxa ch’och’” (Genesis 1:1). A’b’an k’a’ru kiwan naq toj maji’aq nayo’ob’tesiik a’an? Ut k’a’ut naq li Dios kixyo’ob’tesi chixjunil a’an? Rik’in xtz’uumal re li profeet aj Jose Smith, li Qaawa’ kixsumeheb’ li patz’om a’in.
A’an kixk’e qe li resil jun lix k’utb’esinb’il matk’ laj Abraham, b’ar wi’ kiril naq koowan jo’ musiq’ej “rub’elaj naq kiwan li ruchich’och’” (chi’ilmanq Abraham 3:22–28). Li Qaawa’ kixk’e ajwi’ qe jun musiq’anb’il xjaltesinkil ru li waqib’ ch’ol sa’ xtiklajik li hu Genesis, a’an lix Hu laj Moises yeeb’il re—li ink’a’ natikla rik’in “sa’ xtiklajik.” Natikla b’an rik’in jun seraq’ chirix li k’a’ru kixnumsi laj Moises li nokoxtenq’a chixtawb’al ru li seraq’ chirix li Yo’ob’tesink. Us xtikib’ankil xtzolb’al li Najter Chaq’rab’ sa’eb’ li loq’laj hu a’in re roso’jikeb’ li kutan, xb’aan naq neke’aatinak chirixeb’ li aajel ruhil patz’om li tooxtenq’a sa’ li tzolok: Ani li Dios? Aniho laa’o? K’a’ru lix k’anjel li Dios, ut k’a’ru li qak’anjel sa’ a’an? Naru naqileb’ li ch’ol sa’ xtiklajik li hu Genesis jo’ li kixye li Qaawa’ re laj Moises re xsumenkil lix tz’aam: “Chawuxtaana ru laa moos, at Dios, ut chaye we chirix li ruchich’och’ a’in, ut eb’ li ani wankeb’ chi sa’, ut jo’kan ajwi’ chirix li choxa” (Moises 1:36).
Li na’leb’ re tzolok sa’ li ochoch ut sa’ li iglees
Jo’ jun ralal li Dios, toj sa’ choxa taawulaq inb’e.
“Wi li Qaawa’ yoo raj chawaatinankil sa’ kristiaanil,” chan li Awa’b’ej Russell M. Nelson, “li xb’een wa tixk’e chanaw a’an anihat tz’aqal laa’at” (“Decisiones para la eternidad” [Ch’utam choq’ reheb’ li saaj sa’ chixjunil li ruchich’och’, mayo 2022], Biblioteca del Evangelio). Ak re naq laj Satanas tixyal raj xq’e chixsachb’al aana’leb’ chirix li na’leb’ a’an. K’e reetal li na’leb’ a’in sa’ li kixye li Dios re laj Moises sa’ Moises 1:4, 6 ut sa’ li kixye laj Satanas sa’ Moises 1:12. K’a’ru nakatzol sa’eb’ li raqal a’in chirix xjalanil li Dios rik’in laj Satanas?
Li Awa’b’ej Nelson kixye ajwi’, “Chan ru naq nakak’oxla anihat chi tz’aqal nawan xwankil sa’ xb’een chixjunil li taasik’ ru xb’aanunkil” (“Decisiones para la eternidad”). Naru nakatz’iib’a li nakasik’ ru xb’aanunkil xb’aan naq laa’at jo’ ralal xk’ajol li Dios wankat xb’een wa chiru chixjunil chik li k’a’aq re ru.
B’ar chik wankeb’ li raqal malaj ch’ol aatin sa’ Moises 1 li nakate’xtenq’a chixtawb’al ru laa loq’alil? Naru nakawil xkomon chik li raatin li Awa’b’ej Nelson sa’ “Decisiones para la eternidad” sa’ li raqal “ Primero, conozcan la verdad de quiénes son.” K’a’ru nakaweek’a naq taab’aanu re xk’eeb’al naq li wank jo’ ralal li Dios a’an li na’leb’ li q’axal nim xwankil chawix?
Chi’ilmanq ajwi’ “Laa’in jun ralal li Dios,” Eb’ li B’ich (1985), 194; “Nuestra verdadera identidad” (video), Biblioteca del Evangelio; Temas y preguntas, “Hijos de Dios,” Biblioteca del Evangelio.
Our True Identity
Rik’in xtenq’ li Qaawa’, naru nintz’eqtaana laj Satanas.
Jo’ k’utb’il sa’ Moises 1, us ta naqak’ul ninqi musiq’ejil na’leb’, ink’a’ kolb’il qix chiru li aaleek chi junajwa chik. Relik chi yaal, laj Satanas naxyal qaalenkil re naq taawiib’anq qach’ool chirix li xqanumsi rik’in li musiq’ejil na’leb’. Naq nakawil li kixye laj Moises re laj Satanas sa’eb’ li raqal 12–26, k’a’ru nakatzol li tatxtenq’a re naq tatkanaaq chi tiik sa’ lix nawom aach’ool? K’a’ru kitenq’ank re laj Moises chi numtaak sa’ xb’een laj Satanas?
Li kixk’ul laj Moises naxk’ut naq laj Satanas nokoraale rik’in xb’alaq’ jo’ chanchan xna’leb’ ut xwankil li Dios. K’oxlan chirixeb’ k’a’aq re ru yal pak’b’ileb’, jo’ jun ki’il q’een yiib’anb’il, malaj jun k’uula’al muñeek. Chan ru nakanaw naq moko yaaleb’ ta? Chirix a’an k’oxla li pak’b’il na’leb’ naroksi laj Satanas sa’ li kutan a’in re aawaaleenkil. K’a’ru nakatzol sa’ Moises 1:13–18 chirix xk’eeb’al reetal ut xtz’eqtaanankil lix pak’b’il na’leb’? Chan ru naru nakatxtenq’a li Qaawa’? (chi’ilmanq Moises 1:24–26).
Chi’ilmanq ajwi’ Mateo 4:1–11; Gary E. Stevenson, “Minaab’alaq’i,” Jolomil ch’utub’aj-ib’ re octubre 2019; “Soy un hijo de Dios” (video), Biblioteca del Evangelio.
I Am a Son of God
Naru nak’uub’aman li tzolok sa’ li junkab’al, a’b’an naru ajwi’ sa’ junpaat. “Li tzolok sa’ junkab’al nak’ule’ yalaq k’a’ hoonal, maare naq nekexwa’ak, nekeb’aanu lee k’anjel, nekexb’atz’un, [malaj] nekexxik chi b’eek” (Li K’utuk jo’ li Kolonel, 31). Qayehaq, rochb’een xtzolb’al chan ru naq laj Moises kixtz’eqtaana laj Satanas sa’ Moises 1, naq yookex chi wa’ak jo’ junkab’al, naru nekeye chan ru naq xetz’eqtaana lix wankil laj xik’ ilonel.
Lix k’anjel ut lix loq’al li Dios, a’an intenq’ankil chixk’ulb’al li junelik yu’am.
Chirix naq ke’k’utb’esiman lix yo’ob’tesihom li Dios chiru, laj Moises kixye re li Qaawa’: “Ye we … k’a’ut naq wan li k’a’aq re ru a’in” (Moises 1:30). K’a’ru nakaweek’a chirix li kixsume li Qaawa’ sa’ Moises 1:31–39? K’a’ru xjalanil li koleʼk chiru li kamk rik’in li junelik yu’am? (chi’ilmanq Temas y preguntas, “Vida eterna,” Biblioteca del Evangelio). K’a’ru naxb’aanu li Jesukristo re xk’eeb’aleb’ chi uxmank sa’ wiib’al? Kik’utb’esiik ajwi’ li na’leb’ chiru laj Abraham, li tz’iib’anb’il sa’ Abraham 3. K’a’ru nakataw sa’eb’ li raqal 24–26 li tixsume lix patz’om laj Moises?
Kinwan chaq jo’ jun musiq’ej naq maji’ ninyo’la sa’ li ruchich’och’.
Ka’ch’in ajwi’ li qanawom chirix li qayu’am naq maji’ nokoyo’la. A’b’an naab’al re li naqanaw natawman sa’ lix k’utb’esinb’il matk’ laj Abraham sa’ Abraham 3:22–28. Naq nakawileb’ li raqal a’in, tz’iib’aheb’ li na’leb’ nakataw—jo’eb’ li na’leb’ chawix laa’at ut chirix li Jesukristo. K’a’ut naq nim xwankileb’ li na’leb’ a’in choq’ aawe? K’a’ru xtoch’omeb’ a’an sa’ laa yu’am?
Chi’ilmanq ajwi’ Temas y preguntas, “Vida preterrenal,” Biblioteca del Evangelio.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Laa’in jun ralal li Dios.
-
Chirix rilb’al li raatin li Dios re laj Moises sa’ Moises 1:4, naru nakanab’eb’ laa kok’al chirilb’aleb’ rib’ sa’ li lem ut te’xye rib’ li aatin chanchan a’an: “Laa’in jun ralal li Dios.” Chirix a’an naru te’xye a’an chirib’ileb’ rib’: “Laa’at jun ralal li Dios.” Naru ajwi’ nakataweb’ xjalam-uucheb’ li kristiaan jalan jalanqeb’, ut taapatz’ reheb’ laa kok’al naq te’xk’ut chi ruq’ li junjunq ut te’xye, “A’an jun ralal li Dios.” Wotzomaq k’a’ut naq sa eech’ool chixnawb’al naq laa’ex ralal xk’ajol li Dios. Chan ru naxk’e li na’leb’ a’an chawil aawib’ ut eb’ laa was aawiitz’in?
-
Laa’at ut eb’ laa kok’al naru nekejuntaq’eeta li raatin li Dios re laj Moises sa’ Moises 1:4 rik’in li raatin laj Satanas sa’ li raqal 12. Chan ru naru nakatenq’aheb’ laa kok’al chixtz’ilb’al rix b’ar wan li raatin li Dios ut b’ar wan li raatin laj Satanas?
Moses Sees Jehovah [Laj Moises naril li Jehova], xb’aan laj Joseph Brickey (xraqalil)
Wan jun li k’anjel naraj li qaChoxahil Yuwa’ naq tinb’aanu.
-
Naq taawil Moises 1:6 rik’ineb’ laa kok’al, naru nakat-aatinak rik’ineb’ chirix li “k’anjel” kixk’e li Dios re laj Moises. Naru nakawoksi li Hu reheb’ li Jalam-uuch re li Evangelio, 13–16, malaj Eb’ li Esilal sa’ li Najter Chaq’rab’, 64–84, re xtenq’ankileb’ laa kok’al chixk’eeb’al reetal li kixb’aanu laj Moises chi tenq’anb’il xb’aan li qaChoxahil Yuwa’. K’a’ru li k’anjel naraj li Dios naq taqab’aanu? (chi’ilmanq Tzol’leb’ ut Sumwank 11:20).
Naru tinnumtaaq sa’ xb’een li aaleek naxk’e laj Satanas.
-
Naq nakawil Moises 1:12–26 rik’ineb’ laa kok’al, tenq’aheb’ chixk’eeb’al reetal li kixb’aanu laj Moises re xtz’eqtaanankil laj Satanas (che’ilmanq li raqal 13, 15, 18, 20–22, 26). Maare taawulaq chiruheb’ xk’utb’esinkil k’a’ru naru te’xb’aanu re xtz’eqtaanankil li aaleek (jo’ tijok, sutq’isink-ib’, malaj xpatzb’al xtenq’ankileb’).
Kinwan chaq sa’ musiq’ej rub’elaj naq kinyo’la sa’ li ruchich’och’.
-
Xnawb’al naq kiwan chaq xyu’ameb’ naq maji’ neke’yo’la sa’ ruchich’och’ naru naxtenq’aheb’ laa kok’al chixsik’b’al ru li k’a’ru nakana chi junelik. Re xtenq’ankileb’ chi tzolok chirix a’an, naru nakaye aatin reheb’ li tento te’xtaw sa’ Abraham 3:22–28, jo’ “rubʼelaj naq kiwan li ruchichʼochʼ,” “musiqʼejebʼ,” “taqayiibʼ jun ruchichʼochʼ,” ut “taqayalebʼ rix.” Jo’ naxye sa’eb’ li raqal a’in, k’a’ut naq li qaChoxahil Yuwa’ kooxtaqla sa’ li ruchich’och’?
-
Jun b’ich jo’ “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 86–87) naru naxk’ut xyaalal li na’leb’ k’utb’il sa’ Abraham 3. Naru nakapatz’ reheb’ laa kok’al naq te’xyiib’ xjalam-uuch li raatinul li b’ich.
-
Tenq’aheb’ laa kok’al chixk’oxlankil hoonal naq xe’xsik’ ru malaj ink’a’ xe’xsik’ ru xb’aanunkil li kixpatz’ li Dios reheb’ (chi’ilmanq Abraham 3:25; chi’ilmanq ajwi’ Choq’ re Xkawilaleb’ li Saaj: Jun tenq’ re xsik’b’al ru laa b’e). K’e xhoonaleb’ re naq te’xtzol malaj te’aatinaq chirix li te’xb’aanu raj. Chan ru tooxtenq’a li Kolonel naq ink’a’ us li naqasik’ ru xb’aanunkil?
Re xtawb’al xkomon chik li na’leb’, chi’ilmanq li hu Amigos re li po a’in.