“29 diciembre–4 enero. Li xb’een ch’olob’anb’il esil chirix li Jesukristo: Xch’olob’ankil li Najter Chaq’rab’,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“Xch’olob’ankil li Najter Chaq’rab’,” Kim, Taaqehin: Li Najter Chaq’rab’ 2026
29 diciembre–4 enero: Li xb’een ch’olob’anb’il esil chirix li Jesukristo
Xch’olob’ankil li Najter Chaq’rab’
Naq nakak’oxla xtzolb’al li Najter Chaq’rab’ chiru li chihab’ a’in, k’a’ru nakaweek’a? Ma yo’oon wankat? Ma naka’ch’ino’ aach’ool? Ma nakatxuwak? Naru na’eek’aman chixjunil a’in. Li Najter Chaq’rab’ kitz’iib’aak sa’ najter q’e kutan, jo’kan naq chaab’il xtzolb’al, a’b’an maare ch’a’aj ajwi’. Kitz’iib’aak xb’aaneb’ li najter tenamit li jwal jalaneb’ chiqu, ut wan naq ch’a’aj b’ayaq xtawb’al ru choq’ qe. A’b’an sa’ li hu a’in naqataweb’ li kristiaan li ke’xk’ul li k’a’ru naqak’ul laa’o. Naqak’e reetaleb’ li na’leb’ li neke’xch’olob’ xyaalal lix choxahilal li Jesukristo ut lix evangelio. Yaal, jalan jalanq xyu’ameb’ laj Abraham, li xSara, li xAna, ut laj Daniel rik’in li qayu’am laa’o. A’b’an ke’xnumsi li sahilal ut li rahilal sa’ junkab’al, li paab’aal ut li wiib’ank ch’oolej, li chaab’ilo’k ut li majelo’k—jo’ naqanumsi chiqajunilo. Jo’kan ajwi’, ke’xk’anjela xpaab’aal, ke’xjal xk’a’uxl, ke’ok sa’ sumwank, ke’xnumsi li musiq’ejil na’leb’, ut maajo’q’e ke’xkanab’ royb’eninkil li yeechi’inb’il Kolonel. Naq naqatzol chan ru naq kik’anjelak li Dios sa’ xyu’ameb’, naqak’e ajwi’ reetal a’an sa’ li qayu’am, ut qochb’een laj salmista naqaye: “Lochlookil xam laa waatin choq’ we laa’in: a’an nakutanob’resink re lin b’e. … Jo’kan naq laj k’anjel chawu q’axal naxra” (Salmos 119:105, 140).
Li na’leb’ re tzolok sa’ li ochoch ut li iglees
Li Najter Chaq’rab’ naxch’olob’ xyaalal li Jesukristo.
Re too’ch’oolaniiq sa’ musiq’ej rik’in li Najter Chaq’rab’, naru naqasik’ li yu’am wa, a’ li Jesukristo (chi’ilmanq Jwan 6:48). Chan ru nakak’e reetal li Kolonel sa’eb’ li raqal a’in?
-
Mana (Exodo 16:4, 11–15; Jwan 6:35)
-
Li karneer re li mayej (Exodo 12:3–5; Jwan 1:29)
-
Li k’anti’ re q’an ch’iich’ (Numeros 21:4–10; Jwan 3:14)
-
Laj Jonas (Jonas 1:4–17; Mateo 12:38–41)
K’a’ru neke’xk’ut li raqal a’in chirix li Kolonel? Ma wankeb’ chik reetalil li Jesukristo sa’ li Najter Chaq’rab’ ak nakanaw?
Sa’ “Li Jesukristo a’an li maatan,” li Elder Dale G. Renlund kixwaklesi qach’ool “chixjultikankil ut junelik chixjayalinkil qib’ rik’in li Jesukristo” (Jolomil ch’utub’aj-ib’ re octubre 2023). Naru taawil li raatin a’an, ut taasik’ k’a’ru naru taab’aanu re xtawb’al li Jesukristo ink’a’ ka’ajwi’ sa’ li Najter Chaq’rab’, sa’ aj b’an wi’ laa yu’am laa’at.
Chi’ilmanq ajwi’ “Ebʼ li eetalil malaj li jaljookil ru aatin chirix li Kristo” sa’ K’utul Raqal reheb’ li Loq’laj Hu, “Jesukristo,” Biblioteca del Evangelio; “Tinsik’ li Qaawa’ sa’ lin ka’ch’inal,” B’ichleb’aal choq’ reheb’ li Kok’al, 67.
Sik’eb’ li eetalil li neke’xch’olob’ xyaalal li Jesukristo. Li Qaawa’ kixye re laj Abraham, “Chixjunil li kʼaʼaq re ru, wan kʼaʼru li chanchan wiʼ, ut chixjunil li kʼaʼaq re ru yoʼobʼtesinbʼil ut yiibʼanbʼil re xchʼolobʼankil inyaalal” (Moises 6:63). Maare yookat chi tzolok malaj k’utuk, a’ut li ilok wan wi’ li Jesukristo naru tatxtenq’a chixtawb’al xyaalaleb’ li loq’laj hu ut naru tixnimob’resi laa rahom choq’ re ut laa paab’aal chirix a’an. (Chi’ilmanq Li K’utuk jo’ li Kolonel, 7.)
Li Jesukristo a’an li Jehova sa’ li Najter Chaq’rab’.
Li Awa’b’ej Dallin H. Oaks kixk’ut: “Li Yuwa’b’ej kixye resil li Jesukristo, li Ralal Junaj Chiribʼil, jo’ laj Kolol qe ut aj Tojol qix ut kooxtaqla naq “taqab’i a’an.” Rik’in li b’eresihom a’in naru naqaye naq lix k’ihaleb’ li aatin li yeeb’ileb’ xb’aan li “Dios” malaj li “Qaawa’” sa’eb’ li loq’laj hu, a’aneb’ li raatin li Jehova, li Qaawa’ waklijenaq, li Jesukristo” (“Eb’ lix k’utum li Jesukristo,” Jolomil ch’utub’aj-ib’ re abril 2023).
Eb’ lix k’utum li Jesukristo
Naq eb’ laj jolominel sa’ xb’eeneb’ laj Judio ke’xpatz’i re li Jesus ani a’an, a’an kixye, “Toj maji’aq nayo’laak laj Abraham, ak laa’inin chaq.” Li raatin kixsach xch’ooleb’ li ani ke’ab’in re li Jesus, ut ke’raj xkutinkil chi pek (chi’ilmanq Jwan 8:58–59). Naru nakawil Exodo 3:13–15; 6:3–5 re xtawb’al ru k’a’ut naq ke’josq’o’ laj Judio rik’in li kixye li Jesus.
K’a’ut naq nim xwankil choq’ aawe xnawb’al naq li Jesukristo a’an li Jehova?
Li Qaawa’ kixk’ojob’ wi’chik k’iila “naʼlebʼ saqen ru ut loqʼebʼ” rik’in laj Jose Smith.
Sa’ jun k’utb’esinb’il matk’, li Qaawa’ kixk’ut chiru laj Nefi lix k’utunik chaq li Santil Hu, ut kixch’olob’ naq “kʼiila naʼlebʼ saqen ru ut loqʼebʼ” isinbʼilaqebʼ chaq saʼ li hu. Naru nakawil 1 Nefi 13:21–29, 38–42 re xtawb’al chan ru naq li Qaawa’ kixk’uub’ “xk’eeb’al chi naweʼk li saqen ru ut loqʼil naʼlebʼ.” Jo’ naxye sa’ 2 Nefi 3:12, chan ru naq li Santil Hu ut lix Hu laj Mormon neke’k’anjelak sa’ komonil?
Naq taatzol li Najter Chaq’rab’ chiru li chihab’ a’in, tattzoloq ajwi’ sa’eb’ “jalan chik li hu” ke’ril laj Nefi. A’aneb’ a’in:
-
Lix hu laj Moises, jun raqal re lix jaltesinkil ru li Santil Hu xb’aan laj Jose Smith. A’an naxkutanob’resi wi’chik li na’leb’ ut li seraq’ li ink’a’ chik neke’tawman sa’ Genesis 1–6.
-
Lix hu laj Abraham, li kik’utb’esiik chiru laj Jose Smith naq kixtz’ileb’ rix li najteril hu aj Egipcio (chi’ilmanq Temas y preguntas, “Libro de Abraham,” Biblioteca del Evangelio).
-
Jun raqal re lix jaltesinkil ru li Santil Hu xb’aan laj Jose Smith, li natawman sa’ li K’utul Raqal reheb’ li Loq’laj Hu.
A’aneb’ a’in junjunq reheb’ li seraq’ re li Najter Chaq’rab’ ke’qak’ul wi’chik rik’in laj Jose Smith: li tenamit Sion re laj Enok (Moises 7:18–19), lix k’utb’esinb’il matk’ laj Abraham chirix li ch’utam sa’ choxa (Abraham 3:22–28), ut lix k’anjel laj Melkisedek (JJS, Genesis 14:25–40). K’a’ut naq “saqeneb’ ru ut loqʼeb’” li seraq’ a’in choq’ aawe?
Adam and Eve Offering Sacrifices [Laj Adan ut xEva neke’xq’axtesi li mayej], xb’aan laj Keith Larson (xraqalil)
Li Najter Chaq’rab’ nikinxtenq’a chixtawb’al ru lin sumwanjik rik’in li Dios.
Li Najter Chaq’rab’ a’an naxseraq’i chan ru naq li Dios naxsik’ qak’eeb’al jo’ li “reechanihom” rik’in sumwank (Exodo 19:5). Jo’kan ut, re xkawresinkil aawib’ re rilb’al li Najter Chaq’rab’ jwal us tzolok chirixeb’ li sumwank—jo’ li sumwank li junelik nakana li kik’ehe’ xb’aan li Dios reheb’ li najter profeet jo’ laj Abraham, laj Isaak, laj Jakob, ut eb’ li ralal xk’ajol. Ut re tzolok chirixeb’ li sumwank jwal us rilb’al li raatin li Awa’b’ej Russell M. Nelson, “El convenio sempiterno” (Liahona, octubre 2022, 4–11).
Naq yooqat chirilb’al, patz’ aawib’: K’a’ut naq aajeleb’ ru li sumwank choq’ we? K’a’ruheb’ “li rahok ut li usilal k’a’jo’ xninqaleb’ ru” li nink’ul rik’in li Dios naq ninpaab’eb’ lin sumwank rik’in a’an? Naq nakawil li Najter Chaq’rab’ chiru li chihab’ a’in, k’e reetal k’a’ru naraj xk’utb’al chawu li Dios chirix laa sumwanjik rik’in a’an?
Chi’ilmanq ajwi’ Jeremias 31:31–34.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Naru nintzolok chirix li Jesukristo sa’ li Najter Chaq’rab’.
-
Maare jwal ch’a’aj chiruheb’ li kok’al xtawb’aleb’ ru li aatin ut li na’leb’ sa’ li Najter Chaq’rab’, a’b’an naru nakatenq’aheb’ chixk’eeb’al reetal li Jesukristo sa’eb’ li eetalil ut li seraq’. Laa’at ut eb’ laa kok’al naru nekeril li jalam-uuch rub’el a’in, Li profeet aj Isaias naxye resil lix yo’lajik li Kristo chi rub’elaj. Kanab’eb’ laa kok’al chixyeeb’al k’a’ru neke’ril. Tenq’aheb’ chixk’eeb’al reetal li k’uula’al Jesus. Chirix a’an naru nakawil rik’ineb’ li kixtz’iib’a laj Isaias chirix lix yo’lajik li Jesus sa’ Isaias 7:14; 9:6. Wotz rik’ineb’ laa kok’al li nakaweek’a chirix xsik’b’al li Kolonel sa’ li Najter Chaq’rab’ chiru li chihab’ a’in.
Li profeet aj Isaias naxye resil lix yo’lajik li Kristo chi rub’elaj, xb’aan laj Harry Anderson
-
Laa’at ut eb’ laa kok’al naru ajwi’ nekeril Salmos 23 malaj Isaias 53:3–9 re xtawb’aleb’ li aatin li neke’xk’e chi jultiko’k eere li Jesukristo. K’a’ru neke’xk’ut li aatin a’in chiqu chirix lix yu’am ut lix tojb’al rix li maak li kixb’aanu?
Lin Choxahil Yuwa’ naraj ok sa’ sumwank wik’in.
-
Li sumwank a’an jun na’leb’ jwal jultikanb’il sa’ li Najter Chaq’rab’. Re xk’utb’al li na’leb’ a’in chiruheb’ laa kok’al, naru nakat-aatinak rik’ineb’ chirixeb’ li yeechi’ihom neke’xk’e ut neke’xb’aanu rik’ineb’ lix junkab’al malaj ramiiw, ut k’a’ut naq aajel ru xb’aanunkil li k’a’ru naqayeechi’i. Chirix a’an naru nekeril xjalam-uuch jun kub’iha’ re aatinak chirix li yeechi’ihom, malaj li sumwank, noko’ok wi’ rik’in li Dios naq nakub’e qaha’ (chi’ilmanq Mosiah 18:10, 13). Naru ajwi’ nakak’ut xjalam-uuch li santil ochoch ut nakawotz li nakaweek’a chirixeb’ li sumwank noko’ok wi’ aran.
-
Li perel re kok’ k’anjel re li xamaan a’in naru naxtenq’aheb’ laa kok’al chiroyb’eninkil chi saheb’ xch’ool li kutan naq te’xk’uub’ ut te’xpaab’eb’ li sumwank rik’in li qaChoxahil Yuwa’. Naru ajwi’ nekeb’icha jun b’ich chirix li ok sa’ sumwank, jo’ “Naq nakub’e lin ha’” (B’ichleb’aal choq’ reheb’ li Kok’al, 53).
Li Jesukristo a’an li Jehova sa’ li Najter Chaq’rab’.
-
Ma neke’xnaw ru anihaq laa kok’al li jalan jalanq xk’ab’a’ a’ yaal b’ar nawan? Maare junaq yuwa’b’ej malaj aj k’utunel li patz’b’il xk’ab’a’ chi jalan sa’ trab’aaj, sa’ ochoch, malaj sa’ iglees. Aatinanqex chirixeb’ li k’ab’a’ej a’an; chirix a’an ilomaq Exodo 6:3 ut b’oqeb’ laa kok’al chixtawb’aleb’ li k’ab’a’ej kinawman wi’ ru li Jesus rub’elaj naq kiyo’la.
Re xtawb’al xkomon chik li na’leb’, chi’ilmanq li hu Amigos re li po a’in.