Genesis 1–2Moises 2–3Abraham 4–5

Us ta ink’a’ naqanaw chan ru tz’aqal kiyo’ob’tesiman li ruchich’och’, naru naqak’e reetal k’a’ru kixsik’ ru xk’utb’esinkil li Dios chirix li Yo’ob’tesink. K’a’ru naxk’ut li Dios chawu chirix a’an sa’ Genesis 1:1–25; Moises 2:1–25; ut Abraham 4:1–25? K’a’ut naq naraj naq taanaweb’ li na’leb’ a’an? Naq nakak’oxlaheb’ li seraq’ a’an, naru ajwi’ nakak’oxla k’a’ru neke’xk’ut chawu chirix li qaChoxahil Yuwa’, li Jesukristo, li ruchich’och’, ut laa’at ajwi’.

Re naq chaab’ilaq wi’chik laa tzolb’al, maare taawileb’ li raqal a’in naq wanqat chi b’eek sa’ xyiheb’ lix yo’ob’tesihom li Dios, malaj naq yooqat chirab’inkil jun li b’ich jo’ “Ex xyiib’ahom qaDios ut Rey” (Eb’ li B’ich, 31). Naru nakataweb’ xjalam-uucheb’ lix yo’ob’tesihom li nakate’xtenq’a chireek’ankil li oxloq’ chirix laj Yo’ob’tesinel. Naru nakawotzeb’ li jalam-uuch a’an, rochb’een lix nawom aach’ool, rik’ineb’ laa was aawiitz’in.

Chi’ilmanq ajwi’ Tzol’leb’ ut Sumwank 101:32–34.

Naq yooqat chirilb’al Genesis 1:26–27; Moises 2:26–27; ut Abraham 4:26–27, k’oxla li naraj naxye naq yo’ob’tesinb’ilo sa’ “xjalam-uuch” malaj “rilob’aal” li Dios, winq ut ixq. K’a’ut naq nim xwankil choq’ aawe xnawb’al li na’leb’ li k’utb’il sa’eb’ li raqal a’in? Chan ru naxjal li na’leb’ a’in li k’a’ru nakak’oxla chawix, chirixeb’ laa was aawiitz’in, ut chirix li Dios? Chan ru naru tatxtenq’a naq ch’a’aj nakaweek’a chirix laa yu’am?

Re aatenq’ankil chixsumenkileb’ li patz’om a’in, yal xtz’aqob’resinkil ru jun ch’ol aaatin jo’ ain: “Ninnaw naq yo’ob’tesinb’ilin sa’ xjalam-uuch li Dios, jo’kan naq ninsik’ ru …” Rilb’al “Loq’ laa junxaqalil” sa’ Choq’ re Xkawilaleb’ li Saaj: Jun tenq’ re xsik’b’al ru laa b’e (perel 22–29) naru nakatxtenq’a. Maare naru taasik’ xb’aanunkil k’a’ruhaq tixk’ut chiru li Dios naq nakanaw naq loq’ laa junxaqalil.

Sa’ li video “La más grande creación de Dios” (Biblioteca del Evangelio), li Awa’b’ej Russell M. Nelson naxwotz xnawom chirix li sachb’a-ch’oolejil junxaqalil wan qe. Naq yooqat chirilb’al li video, patz’ aawib’: “K’a’ru naraj lin Choxahil Yuwa’ naq tinweek’a chirix lin junxaqalil?” Chan ru naq jalan a’an chiru li maare te’xye li kristiaan?

2:51

Wankeb’ li maare neke’xye naq li wank chi yo’ob’tesinb’il sa’ xjalam-uuch li Dios naraj naxye naq chixjunil li naqak’oxla, li naqeek’a, ut li naqaj ru ak k’ulub’anb’il xb’aan a’an ut naq ink’a’ tento (malaj ink’a’ naru) took’iiq. K’a’ru laa na’leb’ chirix a’an? K’a’ru li na’leb’ nakataw sa’ Mosiah 3:19 ut Eter 12:27?

Chi’ilmanq ajwi’ Russell M. Nelson, “El cuerpo: Un don magnífico que debemos apreciar,” Liahona, agosto 2019, 50–55.

“Ke’sumub’aak laj Adan ut li xEva choq’ re li yu’am a’in jo’ ajwi’ choq’ re li junelik q’e kutan xb’aan lix wankil li junelikil tijonelil” (Russell M. Nelson, “Lecciones que aprendemos de Eva,” Liahona, enero 1988). K’oxla li na’leb’ a’in naq nakawil Genesis 1:27–28; 2:18–25; Moises 3:18, 21–25; ut Abraham 5:14–19. Chan ru naru nakak’e xsantilal li sumlaak jo’ naxk’e li Dios?

Chi’ilmanq ajwi’ 1 Korintios 11:11; “Li Junkab’al: Jun Jek’inb’il Aatin choq’ re li Ruchich’och’,” Biblioteca del Evangelio.

K’a’ru naxye sa’ Genesis 1:28; Moises 2:28; ut Abraham 4:28 chirix li qateneb’ankil rik’ineb’ lix yo’ob’tesihom li Dios? K’a’ chik ru li na’leb’ nakataw sa’ Tzol’leb’ ut Sumwank 59:16–21 ut 104:13–18?

Chi’ilmanq ajwi’ Gérald Caussé, “Li qamertoomil sa’ ruchich’och’,” Jolomil ch’utub’aj-ib’ re octubre 2022; Temas y preguntas, “Responsabilidad y conservación medioambiental,” Biblioteca del Evangelio.

Li Dios kixsantob’resi li hilob’aal kutan, ut naxpatz’ naq taqak’uula xsantilal. Naq nakawil Genesis 2:2–3; Moises 3:2–3; ut Abraham 5:2–3, k’oxla k’a’ut naq “osob’tesinb’il” li hilob’aal kutan choq’ aawe.

Chi’ilmanq ajwi’ Tzol’leb’ ut Sumwank 59:9–13; “El día de reposo es una delicia” (video), Biblioteca del Evangelio.

0:50

• K’a’ru naru nakab’aanu re naq sahaqeb’ xch’ool laa kok’al naq textzoloq chirix li Yo’ob’tesink? Maare naru taak’ameb’ chirix kab’l re xsik’b’al li k’a’ru kiyo’ob’tesiik sa’eb’ lix tasalil li Yo’ob’tesink. Laa kok’al naru ajwi’ neke’rileb’ xjalam-uucheb’ lix yo’ob’tesihom li Jesus (chi’ilmanq “Lix yo’ob’tesinkil li ruchich’och’” sa’ Eb’ li Esilal sa’ li Najter Chaq’rab’, 8–12). Chirix a’an naru teeye k’a’ru nekereek’a chirix li Jesukristo chirix naq xeril resil li Yo’ob’tesink.

• Naru nekeb’icha jun li b’ich chirix li qach’ina-usil ruchich’och’ jo’ “Raabʼilin xbʼaan li Dios saʼ choxa” (B’ichleb’aal choq’ reheb’ li Kok’al, 16–17). Laa kok’al naru neke’xye xkomon chik li k’a’aq re ru kixyo’ob’tesi li Dios li natenq’ank reheb’ chireek’ankil lix rahom.

• Laa kok’al naru te’xtzol roxloq’inkil lix junxaqalileb’ a’an jo’eb’ ajwi’ li ras riitz’in naq te’xtzol naq chiqajunilo yo’ob’tesinb’ilo jo’ xjalam-uuch li Dios. Re xtenq’ankileb’ chixtawb’al ru a’in, naru nakakanab’eb’ laa kok’al chirilb’aleb’ rib’ sa’ jun lem malaj jun jalam-uuch naq yooqat chixyaab’asinkil Moises 2:26–27 choq’ reheb’. Naru ajwi’ nakak’ut chiruheb’ naq eb’ li kok’ xul a’aneb’ “xjalam-uucheb’” lix na’ xyuwa’ (chi’ilmanq li jalam-uuch sa’ li tusleb’ a’in). A’in naru texxtenq’a chixtz’ilb’al rix k’a’ut naq aajel ru choq’ eere xnawb’al naq yo’ob’tesinb’ilex jo’ xjalam-uuch li qaChoxahil Yuwa’.

  

• Maare taawulaq cheru xyiib’ankil xjalam-uuch li junxaqalil ut xsetb’al re xyiib’ankil jun rompecabezas. Naq laa kok’al yooqeb’ chixyiib’ankileb’ lix rompecabezas, naru te’xye chan ru naru te’xk’ut chiru li qaChoxahil Yuwa’ naq neke’xb’antioxiheb’ lix junxaqalil.

• Naq yooqat chirilb’al Moises 3:2–3, patz’ reheb’ laa kok’al naq te’rab’i chi us k’a’ru kixb’aanu li Dios sa’ xwuq li kutan. Tenq’aheb’ laa kok’al chixtawb’al malaj chixyiib’ankil xjalam-uuch k’a’aq re ru naru neke’xb’aanu chiru li domingo re naq santaq ut jalanaq chiruheb’ li jun siir chik chi kutan. Ye reheb’ k’a’ut naq aajel ru choq’ aawe xsantob’resinkil li hilob’aal kutan.

• Tenq’aheb’ laa kok’al chixyeeb’al li te’xye raj re jun li ramiiw re xch’olob’ankil k’a’ut naq neke’xb’aanu k’a’aq re ru chiru li domingo li naroxloq’i li qaChoxahil Yuwa’ ut li Jesus. Ye reheb’ naq naru neke’roksi Genesis 2:2–3. Chan ru naq xsantob’resinkil li hilob’aal kutan naxk’ut li qarahom choq’ re li qaChoxahil Yuwa’ ut li Jesukristo?