Эхлэл 6–11; Мосе 8

Өнөө үеийн нөхцөл байдалтай төстэй зүйлийг та Ноагийн үеийн дүрслэлээс олж харж байна уу? Ялангуяа Мосе 8:15–24, 28-ыг үзнэ үү. Ямар сэдвүүд дахин дахин дурдагдаж байна вэ?

Таны олж харах нэг чухал төстэй зүйл бол Бурхан Ноаг бошиглогчоор дуудсан ба Тэрээр өнөө үед ч мөн бошиглогч дуудсан байгаа. Та Moсе 8:13–30-аас бошиглогчдын талаар сурч мэдсэн үнэнүүдийн жагсаалтыг гаргаж болно. Одоогийн бошиглогч маань Ноатай юугаараа адилхан бэ? Мэдээж Их Эзэний өнөөгийн бошиглогч Үерийн талаар сэрэмжлүүлж эсвэл биднээс хөвөгч авдар барихад туслахыг хүсээгүй. Харин тэр бидэнд юуны тухай сэрэмжлүүлдэг вэ? Тэр биднийг юу хийхэд урьдаг вэ? Эдгээр асуултад хариулахад туслахын тулд та Gospel Library дахь Сүмийн ерөнхийлөгчдийн сургаалаас нэг бүлгийг ялангуяа “Урилга ба амлагдсан адислалууд” хэсгийг үзэж болно. Та ялангуяа өөртөө чухал санагдсан ямар нэг сэрэмжлүүлэг болон урилгыг сонгож болох юм.

Ахлагч Аллэн Д.Хэйни “бошиглогчоор дамжуулан хайраар дүүрэн төгс Тэнгэр дэх Эцэг маань хүүхдүүддээ үнэнийг илчлэх загварыг сонгосон билээ” (“Хожмын үеийн амьд бошиглогч,” Лиахона, 2023 оны 5 сар) хэмээн заасан. Ахлагч Хэйнигийн захиасыг судалж, бошиглогчтой байх нь Тэнгэрлэг Эцэгийн хайрыг илтгэж буй шалтгаануудыг хайж олохыг бод. Их Эзэний бошиглогчийг дагах нь хожмын үед аюулгүй амьдарч байгаагаа мэдрэхэд тань хэрхэн тусалсан бэ?

Мөн Gospel Library дахь Сэдэв ба асуултын “Бошиглогч” гэсэн сэдвийг мөн Gospel Library дахь “Why Do We Have Prophets?” видеог үзнэ үү.

1:37

“Хүнийг газрын хөрснөөс арчин зайлуулах” (Эхлэл 6:7)-ын тулд үер илгээсэн Бурханы шударга ёсонд зарим хүн эргэлздэг. Ахлагч Нийл А.Максвэлл үерийн үед ‘бузар булай нь сонгох эрхийг устгах хүртлээ гаарч, шударга ёсны дагуу сүнснүүдийг нааш илгээх боломжгүй болсон байсан’ хэмээн тайлбарласан байдаг (We Will Prove Them Herewith [1982], 58). Та нар үер хэрхэн нигүүлсэнгүй үйлдэл байсныг бодож үзэж болно. Эхлэл 6:5–13-аас та Их Эзэний хүмүүсийг хайрлах хайр, нигүүлсэнгүй сэтгэлийг харуулсан юуг олж мэдсэн бэ?

Эхлэл 9:8–17-д цэдэглэснээр, солонго таны оюун санаанд юуг авчрах вэ? Иосеф Смитийн орчуулга, Эхлэл 9:21–25 (Библийн хавсралт) таны ойлголтыг юугаар баяжуулдаг вэ? Мөн та нар Бурханы гэрээнүүдийг тань сануулахын тулд өгсөн бусад зүйлийн (бэлгэдэл, эд зүйлс гэх мэт) жагсаалтыг гаргаж болно. Эдгээр зүйл танд юу зааж байна вэ? Эдгээр нь танд дурсан санахад хэрхэн нөлөөлдөг вэ?

Гэррит В.Гонгийн “Түүнийг үргэлж сана” хэмээх захиасыг 2016 оны 4 сарын Ерөнхий чуулган, 95–98; “Reverently and Meekly Now” дууллыг Hymns, 185-аас үзнэ үү.

Цамхаг барьж буй Бабелын хүмүүсийн түүх, өнгөрсөн долоо хоногт та нарын судалсан Сионыг байгуулж буй Енох ба түүний хүмүүсийн түүхийн хооронд сонирхолтой ялгаа бий. Хоёр бүлэг хүмүүс хоёулаа тэнгэрт хүрэхээр хичээж байсан ч өөр өөр арга замаар хичээж байв. Сионы хүмүүс тэнгэрийг хэрхэн олж авсан бэ? (Moсе 7:18–19, 53, 62–63, 69-ийг үзнэ үү). Та нар Эхлэл 11:1–9 болон Хиламан 6:26–28-аас Бабелын хүмүүсийн тухай юу мэдэж авсан бэ? Энэ нь Бурханы оршихуйд эргэж ирэх хүчин чармайлтын талаар бидэнд юу зааж байна вэ? Бурхан бидэнд “тэнгэрт хүрэхэд” туслах юуг өгсөн бэ? (Эхлэл 11:4; мөн Иохан 3:16-г үзнэ үү).

• Ихэнх хүүхэд Ноа болон хөвөгч авдрын түүхэнд дуртай байдаг. Хүүхдүүддээ энэ талаар мэддэг зүйлээ хуваалцах боломж олгох талаар бодож үзээрэй. Та тэдэнд туслахын тулд энэ тоймын зургуудыг, Хуучин Гэрээний түүхүүд “Ноа ба түүний гэр бүл” хичээлийг мөн “Бошиглогчийг дага” (Хүүхдийн дууны ном) дууллын гуравдугаар бадгийг ашиглаж болно. Танай хүүхдүүдэд түүхийн аль нэг хэсгийг жүжигчилж үзүүлэх нь таатай санагдаж болох юм. Жишээлбэл, багаж хэрэгсэл ашиглан бүхээг барьж эсвэл амьтад шиг бүхээг рүү алхан орж үзүүл.

• Та нар Ноагийн тухай хамтдаа ярилцахдаа бид өнөө үед Бурханы бошиглогчтой байхаар хэчнээн их адислагдсаныг ойлгоход нь хүүхдүүддээ тусал. Мосе 8:16–24-ийг судалж, өнөө үед Их Эзэний бошиглогчдын заасаар байгаа, Ноагийн заасан зүйлсийг олоход хүүхдүүдэд тусал. Бид эдгээр сургаалыг дагаснаар хэрхэн адислагдсан бэ?

• Таныг солонго нь юу төлөөлдөг тухай ярьж байх хооронд танай хүүхдүүдэд солонго зурах эсвэл будах нь таатай санагдаж болно (Иосеф Смитийн орчуулга, Эхлэл 9:21–25-ыг үзнэ үү [Библийн хавсралт]). Бурхан Ноа болон түүний гэр бүлийг солонго харсан үедээ юуны тухай бодоосой гэж хүссэн бэ?

• Та хуримын бөгж, зураг, өдрийн тэмдэглэл гэх мэт амьдралд тань болж өнгөрсөн ямар нэгэн чухал үйл явдлыг сануулдаг зүйлийг хүүхдүүдэд үзүүлж болно. Хүүхдүүдэд өөрсдийн жишээгээ хуваалцах боломж олго. Энэ нь Есүс Христийг дагах баптисмын гэрээгээ санахад бидэнд тусалдаг ариун ёслол гэх мэт гэрээнүүдээ санахад маань туслах зүйлсийн талаар ярилцахад хүргэж болно (Сургаал ба Гэрээнүүд 20:75–79-ийг үзнэ үү).

• Хүүхдүүдтэйгээ легогоор эсвэл бусад зүйлээр цамхаг барих хөгжилтэй байж болно. Ингэж барихдаа Бабелын хүмүүс өндөр цамхаг барьснаар тэнгэрт хүрч чадна гэж бодсоныг тайлбарла. Дараа нь та нар Аврагчийн зураг руу хамтдаа хараад, Тэр биднийг тэнгэрт хүрэхэд хэрхэн тусалдгийг хүүхдүүдээсээ асуу. Дараа нь та нар бие биетэйгээ Аврагчийг дагахын тулд хийж болох зүйлсийнхээ талаар ярилцаж болно.

• Та болон танай хүүхдүүд Эхлэл 11:1–9 дээрх Бабелын цамхгийн түүхийг уншихаас гадна Хиламан 6:28-ыг уншиж болно. Энэ шүлэгт цэдэглэснээр хүмүүс яагаад Бабелын цамхгийг барьсан бэ? Энэ цамхгийг барих нь яагаад тэнгэрт хүрэх буруу арга зам байсан бэ? Дараа нь та нар 2 Нифай 31:20–21 болон Хиламан 3:28-аас тэнгэрт хүрэх зөв арга замыг хайж олж болно. Бабелын хүмүүст бид ямар зөвлөгөө өгөх байсан бэ?