Genesise 5; Moše 6

Jaaka o ithutuntsha Moše 6:26–36, o ithuta eng ka ga ditlamorago tsa sebe? O bone jang ditlamorago tse? Ke maitsholo a fe a Enoko a nnileng le one a a mo thusitseng go fenya ditlamorago tse? Modimo o mo segofaditse jang e le maduo?

Fa o ka ikutlwa o gatelelwa ke se Morena a go bileditseng go se dira, ga o nosi. Le e leng Enoko o ikutlwile jalo fa Morena a mmitsa go nna moperofeti. Jaaka o bala Moše 6:26–36, batla gore ka go re eng Enoko a ikutlwile a gateletswe le gore Morena o ne a mo raya a re eng go mo neela thotloetso.

Mo ditemana 37–47, o ka batla ditsela tse Morena a thusitseng Enoko le go mo thatafatsa go dira tiro ya Gagwe (le gone bona Moše 7:13). O ka tshwantshanya maitemogelo a ga Enoko le baperofeti ba bangwe ba ba ikutlwileng ba sa kgone, jaaka Moše (bona Ekesodo 4:10–16), Jeremia (bona Jeremia 1:4–10), Nefi (bona 2 Nefi 33:1–4), le Moroni (bona Ethere 12:23–29). O ikutlwela eng ka se Modimo a batlang o se ithuta mo dikwalong tse di boitshepo tse ka ga tiro e a go neetseng go e dira?

Bontsi jwa baaposetole le baperofeti ba malatsi ano ba supile maikutlo a a tshwanang le a ga Enoko fa ba tlhalosa ka fa ba ikutlwileng ka teng fa ba amogela dipitso tsa bone. Ka sekai, bona bopaki jwa ga Mogolwane Ulisses Soares mo “Prophets Speak by the Power of the Holy Spirit” (Liahona, Motsheganong 2018, 98–99).

O ka ithuta eng go tswa mo baperofeti le baaposetole ba ka ga maikutlo a go sa itekanela? Ke leng o utlwa Mmoloki a go thusa fa A go kopa go dira dilo tse di thata? Akanyetsa go kwala maitemogelo a se kae mo isagong fa o tlaa tlhoka go ikaega mo thusong ya Mmoloki. O ka kgona jang go tla mo ditiragalong tse ka tumelo mo go Jeso Keresete?

Bona le gone David A. Bednar, “Abide in Me, and I in You; Therefore Walk with Me,” Liahona, Motsheganong 2023, 123–25; “I’ll Go Where You Want Me to Go,” Hymns, no. 270.

Gonne re na le Buka ya ga Moše, re a itse gore Modimo o ntse a ruta bana ba Gagwe ka fa ba ka bonang thekololo e sale ka Atame le Efa. Jaaka o ithutuntsha Moše 6:48–68, batla se re tshwanetseng go se itse le go se dira go rekololwa. Lemoga potso ya ga Atame mo temana 53. A o kile wa ipotsa ka seo? O ithuta eng go tswa mo karabong ya Morena mo ditemana 53–65? O ka akanya ditemana tse jaaka molaetsa wa Morena kwa tirelong ya kolobetso ya ga Atame. O ithuta eng ka ga kolobetso go tswa mo molaetseng wa Gagwe? O akanya gore ke eng A tshwantshanya kolobetso le go “tsalwa sešha”? (temana 59). O ka dira eng go tswelela o “tsalwa sešha” botshelo jwa gago jotlhe?

Morago ga go ruta Atamo boammaaruri jwa efangele ya ga Jeso Keresete, mo Moše 6:51–63, Morena a bolelela Atame go bo ruta go tshika ya gagwe ya isago. Akanyetsa go dira mola wa boammaaruri jo. (Go ka thusa go kgaoganya diele ka ditlhophana tse di nnye tsa ditemana, jaaka ditemana 51–52, 53–57, 58–60, 61–63). Ke eng boammaaruri jo bo na le boleng go tshika e e golang gompieno? Ke eng gape se o ka se ithutang go tswa mo ditaelong tsa Morena go batsadi mo Mosia 4:14–15 le Dithuto le Dikgolagano 68:25–28; 93:40–50?

Go bala ka ga “buka ya kgakologelo” e lelwapa la ga Atame le Efa ba e tshegeditseng go ka go tlhotlheletsa kgotsa lelwapa lwa gago go dira buka ya gago ya kgakologelo. O ikutlwa ekete morena o ka batla o akaretsa eng? Akanyetsa ka go boloka melaetsa go tswa mo bukeng ya kgakologelo mo FamilySearch.org.

Bona le gone Dieter F. Uchtdorf, “Jesus Christ Is the Strength of Parents,” Liahona, Motsheganong 2023, 55–59; “Parenting: Touching the Hearts of Our Youth,” “But Why?” (ditshwantsho tsa motshikinyego), Motlobo wa Efangele.

• Fa Enoko a ne a bidiwa go rera efangele, o ne a tshwenyegile gore o tlaa palelwa. Mme Modimo a mo thusa. Balang mmogo polelo e mo Moše 6:26–34 (le gone bona “Enoch the Prophet” mo Old Testament Stories, 19–21). Ke eng Enoko a ne a ikutlwa ekete ga a kake a rera efangele? (bona Moše 6:31). Modimo o thusitse jang Enoko? (bona Moše 6:32–34; 7:13).

• Bana ba gago ba ka nna ba itumelela go abelana kgotsa go diragatsa dikai tsa fa Modimo a thusa batho go dira dilo tse di thata—ka sekai Noa, Dafite, Amone, kgotsa Samuele wa Molamane (bona Gospel Art Book, nos. 7, 19, 78, 81). Le gone o ka abelana maitemogelo a gago mme o letle bana ba gago go bua ka fa Modimo a ba thusang ka teng go dira dilo tse di thata.

• Modimo o rutile Atame se re tlhokang go se dira go boela kwa go Ene—go nna le tumelo mo go Jeso Keresete, go ikwatlhaya, go kolobediwa, le go amogela mpho ya Mowa o o Boitshepo. Thusa bana ba gago go bona melawana e mo Moše 6:52, 57. Ke gone o ka ba thusa go kwala puisanyo e khutshwane ka ga nngwe ya melawana. Puisano nngwe le nngwe e ka akaretsa dikwalo tse di boitshepo go tswa Moše 6, maitemogelo, le bopaki. Ba letle ba abelane dipuiso tsa bone mongwe le yo mongwe.

• Le gone o ka supa ditshwantsho tse di kayang melawana ya ntlha ya efangele (bona mokwalo wa tumelo wa bone). Di beye ka mola di latelana go ya kwa setshwantshong sa ga Jeso Keresete? Jaaka o bala Moše 6:50, bana ba gago ba ka ema go bapa le setswantsho se se maleba fa ba utlwa mafoko a setshwantsho se a kayang.

• Bana ba gago ba ka itumelela go opela dipina tse di rutang melawana mo Moše 6:52, jaaka “Faith,” “When I Am Baptized,” le “The Holy Ghost” (Children’s Songbook, 96–97, 103, 105). Ba thuse go bona melawana e mo Moše 6:52

• Go rotloetsa bana ba gago go thusa batsadi ba bone mo tirong ya bone jaaka barutintshi ba efangele, akanyetsa go kopa ngwana go bala Moše 6:58 le go batla taelo e Modimo a e neetseng batsadi. Ke gone o ka supa setshwantsho sa ga Atame le Efa ba ruta bana ba bone (jaaka sengwe se se kwa bokhutlong jwa thulaganyo e) mme letla bana ba gago ba bue ka se ba se bonang mo setshwantshong. Bana ba gago ba ka tshwantsha ditshwantsho tsa malwapa a bone a bala dikwalo tse di boitshepo mmogo, ba rapela mmogo, kgotsa ba tshameka mmogo.