Genese 5 ; Mose 6

’A mā’imi māite ai ’outou i te Mose 6:26–36, e aha tā ’outou i ’apo mai nō ni’a i te mau hope’ara’a o te hara ? Mea nāhea tō ’outou ’itera’a i teie mau hope’ara’a ? E aha te mau ’ateriputi e vai ra ia Enoha ’o tei tauturu iāna ’ia upo’oti’a i ni’a i teie mau hope’ara’a ? Nāhea te Atua i te ha’amaita’ira’a iāna nō te reira ?

Mai te peu tē ’ite ra ’outou ’ua teimaha roa ’outou e te mea tā te Fatu i pi’i ia ’outou ’ia rave, ’aita ’outou e vai ’ōtare noa. ’Ua ’ite ato’a ’o Enoha i te reira ’a pi’i ai te Fatu iāna ’ia riro ’ei peropheta. ’A tai’o ai ’outou i te Mose 6:26–36, ’a ’imi nō te aha ’o Enoha i ’ite ai i te teimaha ’e te mea tā te Fatu i parau nō te fa’aitoito iāna.

I roto i te mau ’īrava 37–47, e nehenehe ’outou e ’imi i te mau rāve’a ’a pāturu ai te Fatu ia Enoha ’e ’ua hōro’a ia Enoha i te mana nō te rave fa’aoti i tāna ’ohipa (hi’o ato’a Mose 7:13). E nehenehe ’outou e fa’aau i te ’itera’a o Enoha ’e tō te tahi atu mau peropheta ’o tei mana’o e’ita e mara’a, mai ia Mose (hi’o Exodo 4:10–16), Ieremia (hi’o Ieremia 1:4–10), Nephi (hi’o 2 Nephi 33:1–4), ’e ’o Moroni (hi’o Etera 12:23–29). I tō ’outou mana’o e aha tā te Atua e hina’aro ’ia ’apo ’outou mai roto mai i teie mau pāpa’ira’a mo’a, nō ni’a i te ’ohipa ’o tāna i hōro’a ia ’outou nō te rave ?

’Ua fa’a’ite e rave rahi mau ’āpōsetolo ’e te mau peropheta o teie ’anotau i te hō’ē ā mau nino’a mana’o e tō Enoha, ’a fa’ata’a mai ai rātou i te mea tā rātou i nīoa i te fāri’ira’a i tō rātou pi’ira’a. ’Ei hi’ora’a, ’a hi’o i te ’itera’a pāpū o Elder Ulisses Soares i roto i « Tē parau nei te mau peropheta nā roto i te mana o te Vārua Maita’i » (Liahona, Mē 2018, 98–99).

E aha tā ’outou e nehenehe e ’apo mai roto mai i teie mau peropheta ’e teie mau ’āpōsetolo, nō ni’a i tō ’outou mau nīno’a mana’o nō te ’aravihi ’ore ? E aha te taime ’a ’ite ai ’outou i te Fa’aora i te tauturura’a ia ’outou, ’a ani ai ’oia ia ’outou ’ia rave i te mau ’ohipa pa’ari ? ’A feruri i te pāpa’i i te tahi mau ’ohipa i tupu nō tō ’outou ananahi, ’ia tītau-ana’e-hia ia ’outou ’ia tūru’i i ni’a i te tauturu a te Fa’aora. Nāhea ’outou ’ia ’āparau i teie mau tupura’a ’ohipa ma te fa’aro’o ia Iesu Mesia ?

Hi’o ato’a ’ia David A. Bednar, « ’Ei roto ’oe iā’u nei e pārahi ai, ’e ’ei roto vau ia ’oe ; nō reira, ’a haere mai nā muri iho iā’u, » Liahona, Mē 2023, 123–25 ; « E pe’e au ia oe, » Te mau Hīmene, N 165.

Nō te mea tei ia tātou ra te buka a Mose, ’ua ’ite īa tātou ē ’ua ha’api’i te Atua i tāna mau tamari’i nāhea rātou e fa’ari’i i te fa’aorara’a mai ia Adamu ’e ia Eva mai ā. ’A mā’imi māite ai ’outou i te Mose 6:48–68, ’a ’imi i te mea e ti’a ia tātou ’ia ’ite ’e ’ia rave ’ia fa’aorahia tātou. ’A hi’o maita’i i te uira’a a Adamu i roto te ’īrava 53. ’Ua ui a’ena ānei ’outou ia ’outou iho i teie uira’a ? E aha tā ’outou i ’apo mai roto mai i te pāhonora’a a te Fatu i roto i te mau ’īrava 53–65 ? ’A feruri na i teie mau ’īrava mai te poro’i a te Fatu i te ’ōro’a bāpetizora’a o Adamu. E aha tā ’outou i ’apo mai nō ni’a i te bāpetizora’a nā roto mai i tāna poro’i ? I tō ’outou mana’o, nō te aha ’oia i fa’aau ai i te bāpetizora’a i te « fānau-fa’ahou-ra’a » ? (’īrava 59). E aha tā ’outou e nehenehe e rave nō te tāmau noa ’ia « fānau-fa’ahou-hia » i te roara’a o tō tātou orara’a ?

I muri a’e i te ha’api’ira’a ia Adamu i te mau parau mau o te ’evanelia a Iesu Mesia, i roto i te Mose 6:51–63, ’ua parau te Fatu ia Adamu ’ia ha’api’i te reira i te mau u’i nō ananahi. ’A feruri i te hāmani i te tahi tāpura nō teie mau parau mau. (E nehenehe e tauturu ’ia vāhi te tuha’a nā roto i te pupu na’ina’i roa o te mau ’īrava, mai te mau ’īrava 51–52, 53–57, 58–60, 61–63). Nō te aha e mea faufa’a mau teie mau parau nō te u’i ’āpī i teie mahana ? E aha atu ā tā tātou e nehenehe e ha’api’i mai roto mai i te mau arata’ira’a a te Fatu i te mau metua i roto i te Mosia 4:14–15 ’e Te Ha’api’ira’a Tumu ’e te mau Fafaura’a 68:25–28 ; 93:40–50 ?

E nehenehe te tai’ora’a i te « buka ha’amana’ora’a » ’o tā Adamu ’e ’o Eva i tāpe’a ia fa’auru ia ’outou ’e tō ’outou ’utuāfare ’ia hāmani i tā ’outou iho buka ha’amana’ora’a. I tō ’outou mana’o, e aha tā te Fatu e hina’aro ’ia tu’u ’outou i roto ? ’A feruri ’ia nē’iroro [sauvegarder] i te mau ha’amāramaramara’a nā roto mai i tā ’outou buka ha’amana’ora’a i ni’a te FamilySearch.org.

Hi’o ato’a Dieter F. Uchtdorf, « ’O Iesu Mesia te pūai o te mau metua, » Liahona, Mē 2023, 55–59 ; Vaira’a buka ’evanelia ; « Parenting : Touching the Hearts of Our Youth, » « But Why ? » (video), Gospel Library.

• I te pi’ira’ahia ’o Enoha ’ia poro i te ’evanelia, ’ua ha’ape’ape’a ’oia ’ia ’ore ’oia e manuia. ’Ua tauturu rā te Atua iāna. ’A tai’o ’āmui i teie ’ā’amu i roto i te Mose 6:26–34 (hi’o ato’a « Enoha te peropheta » i roto Te mau ’ā’amu o te Faufa’a Tahito, 19–21). Nō te aha ’o Enoha i ’ite ai ē, e’ita e ti’a iāna ’ia poro i te ’evanelia ? (hi’o Mose 6:31). Mea nāhea tō te Atua tauturura’a ia Enoha ? (hi’o Mose 6:32–34 ; 7:13).

• E hina’aro paha tā ’outou mau tamari’i e fa’a’ite ’e ’aore rā e ha’uti ta’ata ora i te tahi atu mau hi’ora’a, nō te mau ta’ata ’o tei tauturuhia e te Atua ’ia rave i te mau ’ohipa fifi—’ei hi’ora’a, Noa, ’o Davida, ’o Amona, ’e ’aore rā Samuela te ’āti Lamana (hi’o Buka hōho’a ’evanelia, N 7, 19, 78, 81). E nehenehe ato’a ’outou e fa’a’ite i tō ’outou iho ’itera’a ’e e vaiiho i tā ’outou mau tamari’i ’ia parau mai, mea nāhea te Atua i te tauturura’a ia rātou ’ia rave i te mau ’ohipa pa’ari.

• ’Ua ha’api’i te Atua ia Adamu i te mea e tītauhia ia tātou ’ia rave nō te ho’i atu iāna ra—’ia roa’a te fa’aro’o ia Iesu Mesia, ’ia tātarahapa, ’ia bāpetizohia, ’e ’ia fāri’i i te hōro’a o te Vārua Maita’i. Tauturu i tā ’outou mau tamari’i ’ia ’itehia ia rātou i teie mau parau tumu i roto te Mose 6:52, 57. I muri iho e tauturu ia rātou ’ia pāpa’i i te tahi a’ora’a poto ia au i te tahi mau parau tumu. E ti’a i te a’ora’a tāta’itahi ’ia tu’uhia te tahi pāpa’ira’a mo’a nō roto mai i te Mose 6, hō’ē ’ohipa i tupu ’e te ’itera’a pāpū. E vaiiho ia rātou ’ia a’o mai i tā rātou a’ora’a te tahi i te tahi.

• E nehenehe ato’a ’outou e pia i te mau hōho’a ’o tē vauvau nei i te mau parau tumu mātāmua o te ’evanelia (hi’o Te hīro’a fa’aro’o maha). ’A tu’u i te mau hōho’a i ni’a i te rēni e fa’atoro atu i te hōho’a o Iesu Mesia. ’A tai’o ai ’outou i te Mose 6:52, e nehenehe tā ’outou mau tamari’i e ti’a i pīha’i iho i te hōho’a ti’a, ’ia fa’aro’o ana’e rātou i te mau ta’o tā te hōho’a e hi’o hia nei.

• E au paha tā ’outou mau tamari’i ’ia hīmene i te mau hīmene ’o tē ha’api’i nei i te mau parau tumu i roto te Mose 6:52, mai te « Te fa’aro’o, » « ’Ia bāpetizohia vau, » ’e « Te Vārua Maita’i » (Buka hīmena nā te mau tamari’i, 50–51, 53, 56). ’A tauturu ia rātou ’ia ’ite i teie mau parau tumu i roto i te Mose 6:52.

• Nō te fa’aitoito i tā ’outou mau tamari’i ’ia turu i tō rātou mau metua i roto i tō rātou ti’ara’a ’ei ’orometua ha’api’i i te ’evanelia, ’a feruri i te ani i te hō’ē tamari’i ’ia tai’o te Mose 6:58 ’e ’ia noa’a iāna te fa’auera’a tā te Atua i hōro’a i te mau metua. I muri iho e nehenehe ’outou e fa’a’ite i te tahi hōho’a nō Adamu ’e ’o Eva e ha’api’i ra i tā rāua mau tamari’i (mai terā i te pae hope’a o teie arata’i ha’api’ira’a), ’e e vaiiho i tā ’outou mau tamari’i ’ia paraparau mai i te mea tā rātou e ’ite ra i ni’a te hōho’a. E nehenehe tā ’outou mau tamari’i e pāpa’i hōho’a i tō rātou ’utuāfare e tai’o ’āmui ra i te mau pāpa’ira’a mo’a, e pure ’āmui ra, ’e ’aore rā e ha’uti ’āmui ra.