Senuweri 26–Pepuweri 1. ‘Kasukuhlihki Mepwukat ni Saledek ong Noumw Seri kan’: Senesis 5; Moses 6,” Kohdo, Idawehn Ie—Ong Ihmw oh Mwomwohdiso: Kadehde Mering 2026 (2026)

“Senuweri 26–Pepuweri 1. ‘Kasukuhlihki Mepwukat ni Saledek ong Noumw Seri kan’,” Kohdo, Idawehn Ie: 2026

Mwahusang Paradais, sang Kendal Ray Johnson

Senuweri 26–Pepuweri 1: “Kasukuhlihki Mepwukat ni Saledek ong Noumw Seri kan”

Senesis 5, Moses 6

Pali laud en Senesis 5 wia lisd en dihkan nanpwungen Adam oh Ihp oh Noha. Kitail wadekadahr tohtohn ahd ekei, ahpw kitail sohte esehla me laud duwen irail. Kitail ahpw wadakada lain kopwuriamwei ahpw sohte kawehwehda wet: “E momour mwohn sihlangin Koht erein eh mour: e ahpw sohrala pwehki Koht ah ketin ketkihsang sampah” (Senesis 5:24). Ni mehlel mie mehkot kesempwal nan ire wet! Ahpw ma sohte pil ekei kawehwepe, lisd en dihkan pahn pwurehng tepida.

Ni kalahngan, Moses 6 kin kasalehda mengihtik kan duwen soaiepen Enok—oh e wia soai kaselel ehu. Kitail esehla en Enok ah karakarahk, ah pepehm en sohitar kan, soahng kan Koht kilang Reh, oh doadoahk kesempwal e wiahier ni ah wia soukohp en Koht emen. Kitail pil kilangada kilel sansalamwahu ehu duwen peneinei en Adam oh Ihp ni ah kekeirda erein dihkan. Kitail wadek duwen en Sehdan “kaunda kehlailo” ahpw pil duwen peneinei kan me kasukuhlihki neirail seri kan “sapwellimen Koht ahl akan” (Moses 6:15, 21). Me keieun kesempwal iei dahme kitail esehla duwen padahk me peneinei pwukat padahngkiher: pwoson Sises Krais, koluhla, pepdais, oh alehda Ngehn Sarawi (kilang Moses 6:50–52). Padahko, duwehte prihsduhd me kin iangih, “mie ni tapio [oh] pahn pil mie ni imwilahn sampah” (Moses 6:7).

Madamadau kan ong Kasukuhlen nan Ihmw oh Mwomwohdiso

Moses 6:26–36

Dihp kin kalopihedi ahi kak en kilang, pehm, oh rong soahng kan me pid Koht.

Ni ahmw pahn onopiki Moses 6:26–36, dahme ke esehla me wia imwilahn dihp? Ia mwomwen ahmw kilangehr imwilahu pwukat? Soangen mwohmw da kei me Enok ahniki me sewese en powehdi soangen wiepe pwukat? Ia mwomwen Koht ah kapaidahr ih ni imwilahu?

Moses 6:26–47

Koht ketin malipeie en wia Sapwellime doadoahk mendahte ahi luwet akan.

Ma mie ansou ke ahnikidahr pepehm en toutoulahr ong dahme Kauno ketin malipeiuk en wia, ke sohte kelehpw. Pil Enok ahnikidahr pepehmo ansou me Kauno ketin malipehier en wia soukohp men. Ni ahmw wadek Moses 6:26–36, kilangada dahme kahrehda Enok ahnekida pepehm en toutoulahr oh dahme Kauno mahsaniher pwehn kihong ih komwad.

Nan ire tikitik kan 37–47, ke kak kilangada mwohmw akan me Kauno utungadahr Enok oh kakehlakadahr ih en wia Sapwellime doadoahk (pil kilang Moses 7:13). Ke kak karasahieng en Enok ekspihriens ong en soukohp teikan me ahnekidahr pepehm en sohitaro, me duwehte Moses (kilang Eksodus 4:10–16), Seramaia (kilang Seramaia 1:4–10), Nihpai (kilang 2 Nihpai 33:1–4), oh Moronai (kilang Ether 12:23–29). Dahme ke pepehm Koht ketin kupwurki ken esehlasang iren pwuhk sarawi pwukat duwen doadoahk E ketkihong uhkehr en wia?

Enok wie kapakap — Emen Soun Kairoir Kauno ketin Piladahr oh Kakehlakadahr (Moses 6:36, sang Eva Timothy

Tohtohn wahnpoaron oh soukohp en rahn-pwukat kasaledahr arail pepehm kan me duwehte en Enok ni arail koasoaiahda dahme irail pehmadahr ni ahr alehdi arail pwukoah kan. Ni karasepe, kilang kadehde en Elder Ulisses Soares nan “Soukohp akan Kin Lokaiahki Manaman en Ngehn Sarawi” (Liahona, Mei 2018, 98–99).

Dahme ke kak esehlahsang soukohp oh wahnpoaron akan duwen ahmw pepehm en sohitar akan? Ansou da me ke pehmadahr Sounkomouro ah sewese iuk ansou E kiheng uhkehr en wia mehkot apwal kan? Medewe ntingihdi ekei ekspihriens kan nan ahmw rahn kohkohdo kan ansou ke pahn anahne likih sawasepen Sounkomouro. Ia mwomwen ahmw pahn keila karanih soangen kemwekid pwukat ni pwoson Sises Krais?

Pil kilang David A. Bednar, “Abide in Me, and I in You; Therefore Walk with Me,” Liahona, Mei 2023, 123–25; “I pahn Mih Wasa Me Komw Kupwurki,” Koulen Sarawi kan, nempe 270.

Moses 6:48–68

Rongamwahu en Sises Krais wet kasukuhlkiher sang ni tapio.

Pwehki mie rehtail pwuhk en Moses, kitail ese me Koht kin wie kaskasukuhlki Sapwellime seri kan duwen mwomwen rapahkihda mahkepen dihp sangete ansoun Adam oh Ihp. Ni ahmw onopiki Moses 6:48–68, rapahki dahme kitail anahne ese oh wia pwehn poadoandoarala. Kilang en Adam kalelapako nan ire tikitik 53. Mie pak ke medewe mwo? Dahme ke esehsang en Kauno pasapengo nan ire tikitik kan 53–65? Ke kak medewe me ire pwukat iei sapwellimen Kauno padahk ni en Adam ah pepdaislahu. Dahme ke eselahr duwen pepdais sang Sapwellime padahko? Dahme ke lemehki me E ketin karasahieng pepdais ong “ipwsapahl”? (ire tikitik 59). Dahme ke kak wia pwehn doulahte “ipwsapahl” erein ahmw mour?

Rapahki kilel kan. Nan pwuhk sarawi kan, dipwisou oh kemwekid kan kak pak tohto wia weliepe de kasalehda kilel en mehlel akan en palingehn, pak tohto mehlel akan duwen Sounkomouro (kilang Teaching in the Savior’s Way, 7). Kilel pwukat kak kalaude ahmw wehwehki Ih oh Sapwellime padahk. Ni karasepe, dahme ke esehsang kilel kan en mohngiong oh saleng akan nan Moses 6:27, mese kan oh kilehi nan Moses 6:35, de pihl nan Moses 6:59–60?

Moses 6:51–62

”Kasukulihki Mepwukat ni Saledek ong Noumw Seri kan.”

Mwurin kaskasukuhlihki mehlel kan en rongamwahu en Sises Krais ong Adam, nan Moses 6:51–62, Kauno mahsanihong Adam en padahkihong dih en rahn kohkohdo kan mepwukat. Medewe wiahda ehu lisd en mehlel pwukat. (E kak sawas en kihpeseng mahseno ong pwihn en ire tikitik kei, me duwehte ire tikitik kan 51–52, 53–57, 58–60, 61–63). Dahme mehlel pwukat kesempwal kiheng dih kekeirdahn rahn pwukat? Dahme ke pil kak esehla sang sapwellimen Kauno kaweid kan ong pahpa nohno kan nan Mosaia 4:14–15 oh Doctrine and Covenants 68:25–28; 93:40–50?

Wadwadek duwen “pwuhk en tamataman” me en Adam oh Ihp peneinei wiadahr kak kamarainih iuk de ahmw peneinei en wiahda pein noumwail pwuhk en tamataman. Dahme ahmw pepehm Kauno pahn kupwurki ken iangahki? Medewe seipihdi audepehkan sang noumw pwuhk en tamataman pohn FamilySearch.org.

Pil kilang Dieter F. Uchtdorf, “Sises Krais iei Kehlepen Peneinei kan,” Liahona, Mei 2023, 55–59; “Parenting:Touching the hearts of Our Youth,” “But Why?” (kasdo kan), Laiprehri en Rongamwahu.

Ong pil ekei, kilang pwuhk en nan sounpwunget ong makasaihn en Liahona oh Ong Kakehlepen Me Pwulopwul.

Madamadau kan ong Kasukulih Seri kan

Moses 6:26–34

Sises Kak Seweseie Wia Dahme Apwal Kan.

Ansou Enok alehdi malipilip ong kalohngki rongamwahuo, e periki ede sohte pweida. Ahpw Koht ketin sewesedahr. Wadek pene soai wet nan Moses 6:26–34 (pil kilang “Soukohp Enok” nan Soai kan nan Kadehde Mering, 19–21). Dahme Enok pehmiki me e sohte kak kalohngki rongamwahuo? (kilang Moses 6:31). Ia mwomwen Koht ah ketin sewese Enok? (kilang Moses 6:32–34; 7:13).
Noumw seri kan kak perenki ehukihda de kamwomwada karasaras teikan duwen ansou Koht ketin sewese aramas wia mehkot apwal kan—ni karasepe, Noha, Depit, Ammon, de Samuel mehn Lamanite (kilang Gospel Art Book, nempe kan 7, 19, 78, 81). Ke pil kak ehukihda ehu pein ahmw ekspihriens oh mweidohng noumw seri kan en koasoaia duwen mwomwen Koht ah kin ketin sewesei irail wia soahng apwal kan.

Moses 6:50–62

Pwoson Krais, koluhla, pepdais, oh alehdi Ngehn Sarawi kak kaunopiehda pwuralahng rehn Koht.

Koht ketin kasukuhlihkiher Adam dahme kitail anahne wia pwe kitail en kak pwuralahng Reh—ahniki pwoson Sises Krais, koluhla, pepdaisla, oh alehda kisakis en Ngehn Sarawi. Sewese noumw seri kan rapahkihda kosonned pwukat nan Moses 6:52, 57. Eri ke kak sewesei irail intingihada ehu padahk mwotomwot duwen ehu kosonned akan. Ehu ehu padahk kak iangahki ehu iren pwuhk sarawi sang Moses 6, ehu ekspihriens, oh ehu kadehde. Mweidohng irail en ehukipene arail padahk kan ong emen emen.
Ke pil kak kasalehda kilel kan me wia weliepen kosonned keiou en rongamwahuo (kilang kapahieu en iren pwoson). Kairak irailla nan ehu lain me kolahng ehu kilelen Sises Krais. Ni ahmw pahn wadek Moses 6:52, noumw seri kan kak kesihker limwahn kilel me kasalehda lepin lokaia kan irail rong.
Noumw seri kan kak perenki kokouliki koul kan me padahngki kosonned akan nan Moses 6:52, me duwehte “Faith,” “When I Am Baptized,“ oh “The Holy Ghost” (Children’s Songbook, 96–97, 103, 105). Sewese irail en rapahkihda kosonned pwukat nan Moses 6:52.

Moses 6:57–58

Sahm Nanleng ketin kupwurki pahpa nohno kan en kasukuhlih neirail seri kan.

Pwehn kangoange noumw seri kan en utung arail pahpa nohno kan nan arail pwukoahn sounpadahk en rongamwahu, kiheng emen seri en wadek Moses 6:58 oh kilangada kosonned me Koht ketkihong pahpa nohno kan. Mwuri ke kak kasalehda ehu kilelen Adam ih Ihp ara kaskasukuhlih neira seri kan (duwehte me mih ni Imwin audlain wet) oh mweidohng noumw seri kan en koasoaia dahme irail kilang nan kilelo. Noumw seri kan kak mahlinihda kilel en arail peneinei kan ni ahr wadwadekpene pwuhk sarawi kan, kapakap pene, de mwadmwadong pene.

Ong pil ekei, kilang pwuhk en nan sounpwunget ong makasaihn en Kempoakepah.

Adam ih Ihp padapadahkih neira seri kan pahn tuhke pwoat — Adam oh Ihp Padapadakih Neira Seri kan, sang Del Parson

Praimeri akdipidi peit: Rongamwahu wet kin kasukuhlih kin ie duwen pwuralahng rehn Sahm Nanleng — Adam oh Ihp Padapadakih Neira Seri kan, sang Del Parson