“Iren Ketemen kan: Inou Sarawio,” Kohdo, Idawehn Ie—Ong Nan Ihmw oh Mwomwohdiso: Kadehde Mering 2026 (2026)
“Inou Sarawio,” Kohdo, Idawehn Ie: 2026
Iren Ketemen kan
Inou Sarawio
Nan Kadehde Mering, pak tohto ke pahn wadekadahr lepin lokaia inou sarawi. Rahn pwukat kitail kin medewe inou sarawi kan ni eh wia inou kesempwal ong Koht, ahpw mahso, inou sarawi kan pil wia kiseh kesempwal duwen aramas akan ahr kin ehupene nan pwungarail. Ong arail seipdi oh komourla, aramas anahne kak likih mehteikan, oh inou sarawi wia ehu ahl en katengehdi likilik wet.
Eri ansou Koht mahseniong Enok, Noha, Moses. oh mehteikan duwen inou sarawi kan, e ketin Luke irail en wiahda ehu ehupene en likilik ong Ih. Kitail kahdaniki inou wet inou kapw oh poatoapoato de en Eipraam inouo—ehu kasansal ong inou me Koht ketin wiahiongehr Eipram oh Sara oh eri kapwurehiong ong kadaudokara Aisek ih Seikop (me pil kahdaniki Israel). Nan Kadehde Mering, ihme e dehdehki iei “inou sarawio.” Ke pahn kilang me Kadehde Mering iei soaiepen aramas akan me kilang pein irail me pahn sohsohpai inou wet—aramas en inou sarawio.
Inou sarawi en Eipraam kin doulahte kesempwal rahnwet, mehlel ong Souleng en Imwin-rahn akan. Pwekida? Pwehki atail pil wia aramas en inou kei, menda ma kitail wia udahn kadaudok en Eipraam, Aisek, oh Seikop de soh. Pwehki kahrepe wet, e kesempwal en wehwehki dahieu Inou Sarawi en Eipram oh ia mwomwen ah doke kitail rahnwet.
Dahieu Inou Sarawi en Eipraamo?
Eipraam mwhuki “wia emen soun idawehn me pwung kehlail men” (Abraham 1:2), eri Koht ketin lukehiong ih nan ehupenehn inou sarawi ehu. Kaidehn Eipraam me keiou en ahniki ineng wet, oh kaidehn ihme keiou en alehdi ehu inou. E wia, mwohn koaros, inou ehu me poatoapoat. Eipraam rapahkiher “kapai kan en pahpa koa” (Abraham 1:2)—kapai kan me kodahr sang inou ong Adam ih Ihp oh mwuri ong aramas me ni poadidi rapahkiher kapai pwukat.
Sapwellimen Koht inou Ong Eipraam inoukiher kapai kaselel kan: sohsohn sahpw, kadaudoke kalaimwun, kak alehdi tiahk sarawi kan en prihsduhd, oh ehu ahd me pahn waun erein dih kan. Ahpw me dahme kesempwal ong inou wet kaidehnte kapai kan Eipraam oh ah peneinei pahn alehdi ahpw pil ong kapai irail pahn wia ong luhwen sapwellimen Koht seri kan. “I pahn kapaiukada oh kalinganahla edomw pwe en wiahla mehn kapai,” Koht mahsaniher, “wehi koaros en sampah pahn peki rehiI en kapaiairailda duwehte ei kapaiaiukadahr” (Senesis 12:2–3).
Inou Sarawi wet kihong Eipraam, Sara, oh kadaudokara kan dewen me paiamwahu kan nan pwungen sapwellimen Koht seri kan? Ihte me e kihong irail paiamwahu en kapaiada mehteikan. Peneinei en Eipraam pahn “wahiong doadoahk oh Prihsduhd wet Ong wehi koaros,” ehukihwei “kapai kan en Rongamwahuo, me iei kapai kan en komourlasang, oh pil mour soutik” (Abraham 2:9, 11). Ni arail wia sapwellimen Koht aramas en inou Sarawio sohte wehwehki irail mwahusang mehteikoa; e wehwehki mie arail pwukoah en sewese mehteikan en mwahula.
Inou Sarawio wia kapai me Eipraam inangiho. Mwurin alehdi, Eipraam indahier nan ah mohngiong, “Sapwellimomwi ladu menet rapahkin komwi ier; met I diar komwi ier” (Abraham 2:12).
Sounpar kid kei samwalahro mwo, ahpw inou wet pil kopwurupwurdohr nan atail rahnet. Oh ansou wet e wihwiawi nan mour en sapwellimen Koht aramas akan. Pweidahn inou wet wie kekehlailla nan Imwin rahn akat ni Sapwellimen Koht doadoahk wet ah kohkohla mwowe, kapkapaiada peneinei kan nan sampah. Oh mehmen me, duwehte Eipraam, men wiahla soun idawehn kehlail en me pwungo—mehmen me kin rapahki Kauno ni ngidingid—kak wia kiseh.
Ia wehwehn Inou Sarawi en Eipraam ong Ie?
Ke wia seri en inouo men. Ke wiahda inou sarawi ong Koht ansou ke pepdaislahr oh ansou ke kin alehda kamadipw sarawi. Oh kowe alehdi inouo pwon sang ni tiahk sarawi kan en tehnpas sarawi.
Sang inou sarawi kan oh tiahk sarawi kan, kitail wiahla sapwellimen Koht aramas. Kitail katengtengki iongehr Ih “ehupene kan me poatoapoat.” “Ni ahnsou kitail wiahda inou sarawi ehu rehn Koht,” Preseden Russell M. Nelson padahngkiher, “kitail mweselsang momour en sampah kohkohlahte. Koht sohte pahn likidmeliehla Sapwellime ehuiong irail kan me nantiheng en tengedi Reh. Ni mehlel, irail kan koaros me wiadahr arail inou ehng Koht alehdier soangen limpoak oh mahk kesempwal ehu. … Pwehki atail inou sarawi kan rehn Koht, E sohte pahn kin ketin pwangahkihda sewesei kitail, oh sohte pahn kin ketin pwangahkihda Sapwellime limpoak en kanengamah ong kitail.” Ke pahn kilang met nan poadoapoad en sapwellimen Koht aramas en inou kan nan Kadehde Mering, oh ke pahn kilang nan pein ahmw mour ni ahmw wia emen Sapwellime seri en inou kan.
Dehr Masopwehk, sang Dan Wilson
Met iei wehwe kesempwal kohieng kitail pwehki Kopwurpwurdohn inou en Eipraam sang Soukohp Sosep Smith. Eri ni ahmw pahn wadekadahr duwen inou sarawi kan nan Kadehde Mering, dehr medewehte en Koht ehuong Eipraam, Aisek, oh Seikop. Pil medewe duwen Sapwellime ehuong uhk. Ansou ke wadek duwen inou en kadaudokomw tohtohu, dehr medewehte duwen million koa me rahnwet kin likwerihki Eipraam arail pahpa. Pil medewe duwen sapwellimen Koht inou en peneinei soutik kan oh keirda soutik ong uhk. Ni ahmw pahn wadek duwen inou en sapwen sohso ehu, dehr medewehte sahpw me inoupe kohiengehr Eipraam. Pil medewe duwen sampah eh pahn alehdi mouren selesdiel—sohso ehu me inouiengehr me “ohpampap” me “kin likih Kauno” (Madiu 5:5; Melkahka kan 37:9, 11, Oh ansou ke wadek duwen inou me sapwellimen Koht aramas en inou kan kapaiada “peneinei koaros nan sampah” (Abraham 2:11), dehr medewehte en Eipram misin de soukohp akan me wia kadaudoke. Pil medewe duwen dahme ke kak wia—ni ahmw wia emen me wiadahr inou en idawehn Sises Krais—en wia kapai ong peneinei kan.