“Pepuweri 9–15. ‘Noha Kelehpw Me Keniken Pahn Kupwur en Kauno‘: Senesis 6–11; Moses 8,” Kohdo, Idawehn Ie—Ong Nan Ihmw oh Mwomwohdiso: Kadehde Mering 2026 (2026)
“Pepuweri 9–15 ‘Noha Kelehpw Me Keniken Pahn Kupwur en Kauno’,” Kohdo, Idawehn Ie: 2026
Siohwa kin Kolokolete ehu Inou, sang Sam Lawlor
Pepuweri 9–15: “Noha Kelehpw Me Keniken Pahn Kupwur en Kauno”
Senesis 6–11, Moses 8
Momour nan imwin rahn akat, kitail ahniki kahrepe kesempwal en tehk mwahu soaiepen Nohliko. Ni ansou me Sises Krais ketin padahngki ia mwomwen atail pahn mwasahn Sapwellime Ketdo Keriauo, E mahsanih, “Duwehte rahn en Noha kan, e pil pahn duwehte ni ketdo sapahl en Sapwellime Iehroso” (Sosep Smith—Madiu 1:41). Oh pil, lokaia kan me kasalehda en Noha rahn akan, soangen “doadoahk en mwersuwed” oh “audaudiki wiewia me suwediong emen,” kak wia kasalepen atail ansou wet (Senesis 6:12–13; Moses 8:28). Soaiepen Imwen Doulik en Papilonia pil doke atail rahnet, ah kasansaladahn aklapalap me pingiping oh pwalpesengo kodohr mwuri.
Soai en mahs koa inenen kesempwal kaidehnte pwehki irail kasalehiong kitail me mesuwed kin kopwkopwurupwuriong erein nan poadoapoad. Me kesempwalsang, irail padahkihong kitail dahme kitail pahn wiahng. Noha “kelehpw me keniken pahn Kupwur en Kauno” (Moses 8:27). Oh peneinei kan en Sared oh rie pwutako sohpeilahngehr Kauno oh perehre sangehr pingiping oh pwalpeseng nan Papilonia (kilang Ihder 1:33–43). Ma kitail pahn medewe ia mwomwen atail pahn kak perepere pein kitail oh atail peneinei kan seip nan ansoun korapsen oh paiolens, soai kan nan iralaud pwukat kak padahkihong kitail mehkot tohto.
Madamadau kan ong Kasukuhl Nan Ihmw oh Mwomwohdiso
Senesis 6; Moses 8
Mie seipdi en palingehnnan ideidawehn sapwellimen Kauno soukohp.
Ke kilang ada mehkot Nan kasansaladahn en Noha rahno me mwomwen duwehte irair kan nan atail rahn akat? Ni mehlel, kilang nan Moses 8:15–24, 28. Soangen oaralap da ke kilang me kopwurupwuriong?
Ehu me duwehte me kesempwal me ke pahn kilang iei me Koht ketin malipehier Noha en wia soukohp emen, oh E pil ketin malipehier emen Soukohp rahnet. Wiahda ehu lisd en mehlel akan ke esehla duwen soukohp akan sang Moses 8:13–30. Ia mwomwen atail soukohp ieias et duwehte Noha? Sapwellimen Kauno soukohp rahnet sohte melahn kaparkin kitail duwen ehu Nohlik de lukulukei kitail en sawas wiahda ehu warihmw. Ahpw dahme e kapkaparkin kitail? Oh dahme e lukulukehiong kitail en wia? En sewese sapengala peidek pwukat, ke kak pwurehng kilang ehu iralaud sang Teachings of Preseidents of the Church nan Laipreri en Rongamwahu, ni mehlel nan seksin en “luhk akan oh Kapai Inoudier kan. Ke kak pilada ehu kapar oh ehu luhk me mwomwen keiou kesempwal ong uhk.`
Elder Allen D. Hayne padahngki, “Sahm Nanleng me unsek oh limpoak piladahr ehu mwohmw duwen kasalehda mehlelo ong Sapwellime seri kan sang Soukohp emen” (“A Living Prophet for the Latter Days,” Liahona, Mei 2023, 25). Pil onopiki en Elder Hayne padahko, kilikilang kahrepe kan me kitail ahnikihki soukohp men iei e wia kilel ehu duwen sapwellimen Sahm Nanleng limpoak. Ia mwomwen ideidawehn sapwellimen Kauno soukohp sewese iukadahr en ahniki pepehm mwahu momour nan imwin rahn akan?
Pil kilang Topics and Questions, “Soukohp akan,” Laipreri en Rongamwahu; “Why Do We Have Prophets?” (kasdo), Laipreri en Rongmawahu.
Why Do We Have Prophets?
Senesis 6:5–13
Nohliko wia sapwellimen Koht doadoahk en mahk.
Ekei aramas kin medewe duwen pwung mehlel en Koht ni ah kadaredo Nohliko pwe en “kamwomwasang aramas“ (Senesis 6:7). Elder Neal A. Maxwell kawehwehda me ni ansou en Nohliko, “korapsen lelehr pwoint ehu me kauwelahr-pilipil me ngehn akan solahr kak, ni pwung, pekederkihdo wasah” (We Will Prove Them Herewith [1982], 58). Ke kak pil medewe ia mwomwen Nohliko ah wia doadoahk en mahk ehu. Dahme ke diar nan Senesis 6:5–13 me kasalehda sapwellimen Kauno mahk oh limpoak ong Sapwellime aramas akan?
Senesis 9:8–17
Doken kan de kilel kan kin sewese Ie tamataman ahi inou sarawi kan ong Kauno.
Me sansalehr nan Senesis 9:8–17, dahme ehu iahia kak katamaniong uhk? Dahme en Sosep Smith Kawehwe, Senesis 9:21–25 9nan Paipel apendiks) kapatahieng ahmw wehwehki? Ke pil kak wiahda ehu list ong soahng teikan (soangen kilel kan, dipwisou kan, de ehu tohrohr) me Koht ketkihong uhkehr pwe en katamankin uhk ahmw inou sarawi kan. Dahme mepwukat padahkihong uhk? Ia mwomwen arail sewese iuk en tamataman?
Pil kilang Gerrit W. Gong, “Always Remember HIm,” Liahona, Mei 2016, 108–11, “Reverently and Meekly Now,” Koul en Sarawi kan, nempe 185.
Imwen Doulik en Papilonia, sang David Green
Senesis 11:1–9
Ideidawehn Sises Krais iei ihte ahl kolahng Sahm Nanleng.
Soaiepen aramas en Papilonia wihwiahda imwen douliko wiahda ehu me weksang soaiepen Enok oh nah aramas akan ahr wihwiahda Saiono, me ke onopikiher wihk teio. Koaros pwihn en aramas akan songosong en lela nalneng ahpw ni mwohmw wekpeseng kei. Ia mwomwen aramas akan en Saion alehdi nanleng? (kilang Moses 7:18–19, 53, 62–63, 69). Dahme ke esehsang Senesis 11:1–9 oh Ilemen 6:26–28 duwen aramas en Papilonia? Dahme met padahkihong kitail duwen pein atail nanantihong pwuralahng rehn Koht? Dahme Koht ketkidahr pwe en sewese kitail “leldahla nanleng”? Senesis 11:4, pil kilang Sohn 3:16).
Patpatehng nan pwukoahn kasukuhl. Kasukuhl kak iangahki laudsang wie wadawadete de rongorongete. Ni karasepe, ansou kasukuhliki duwen imwen doulik en Papiloniahu, kowe oh ahmw peneinei de tohn kilahs kak nting, pohn tehn doaropwe, soahng kan me kin waikitaildo lahsang Koht. Mwuhr, pohn ekei kisin tehn doaropwe, ke kak ntingihdi soahng kan me kin waikitaildo karanihala Koht. Koasoanehdi tehn doaropwe kan nan keioun pwihn en wia mwomwen dahwer oh me keriau en mwomwen tehnpas sarawi.
Ong pil ekei, kilang pwuken sounpwunget ong makasihn en Liahona oh Ong Kakehlepen me Pwulopwul.
Madamadau kan ong Kasukulih Seri kan
Senesis 6:14–22; 7–8; Moses 8:16–24
Ideidawehn sapwellimen Kauno soukohp pahn kapaiada ngehi oh ahi peneinei.
-
Pali tohtohnseri kan mwahuki soaiepen Noha oh warihmwo. Medewe kihong noumw seri kan ansou mwahu en ehukihda dahme irail ese. En sewese irail, ke kak doadoahngki kilel kan Nan audlain wet, “Noah and His Family” nan Soai kan nan Kadehde Mering (22–25), oh kesiluhn ire ong “Follow the Prophet” (Children’s Songbook, 110–11). Noumw seri kan kak peperniki kamwomwada pali kan en soaio—ni karasepe, sang ni momwehda wie doadoahngki ehu mehn doadoahk pwehn wiahda warihmwo de alialu duwehte mahn akan pidpidelong nan warihmwo.
-
Ni amwail koasoaipene duwen Noha, sewese noumw seri kan en kilang ia wen atail kapaida en ahniki soukohp en Koht emen rahnet. Sewese noumw seri kan en rapahki nan Moses 8:16–24 pwe ren diar soahng kan Noha padahngkiher me sapwellimen Koht soukohp akan kin wie padapadahngkihte rahnwet. Ia mwomwen atail pahn kapaiada ansou kitail peikiong padahk pwukat?
Senesis 9:15–16
Koht pahn ketin kolokolete Sapwellime inou kan ong Ie.
-
Noumw seri kan kak pereniki mahlinih de koalorih ehu iahia ansou ke kosoia dahme e wia kasalepe (kilang En Sosep Smith Kawehwe, Senesis 9:21–25 [nan Paipel apendiks]). Dahme Koht ketin kupwuriki Noha oh ah peneinei en kin medewe ansou koaros irail kilangada ehu iahia?
-
Ke pil kak kasalehiong numw seri kan mehkot rehmw me kin katamaniong uhk mehkot kesempwal nan ahmw mour, soangen rohng en kapwopwoud, de ehu ternel. Mweidohng noumw seri kan en kasalehda pein arail karasaras. Met kak elehda ehu koaskoasoaipene duwen soahng kan me kak sewese kitail tamataman atail inou sarawi kan, soangen kamadipw sarawi, me kin sewese kitail tamataman atail inou en pepdais ong Idawehn Sises Krais (kilang Doctrine and Covenants 20:75–79).
Koht mahsanihong en Noha peneinei me iahiahu pahn wia “kilel poatoapoat en ei inou ong kumwail” (Senesis 9:12).
Senesis 11:1–9
Ideidawehn Sises Krais iei ihte ahl kolahng nanleng.
-
E kak kaperen en wiahda ehu dahwero sang piloak kan de ehu dipwisou tohrohr ong noumw seri kan. Ni amwail wia, kawehwehda me aramas akan en Babel medewe irail kak lelahng nanleng sang ni kauwada ehu imwen doulik reirei. Kumwail eri kak kilangpene ehu kilelen Sounkomouro oh kowe idek rehn noumw seri kan ia mwomwen Ah kin sewese kitail lelahng nanleng. Mwuhr kumwail kak kosoia pene duwen soahng kan kumwail kak wia pwe en idawehn Sounkomouro.
-
Me patehng wie wadwadekete Soai en imwen doulik en Papilonia nan Senesis 11:1–9, kowe oh noumw seri kan kak wadek Ilemen 6:28. Me doke ire wet, dahme aramas kan en Papilonia wiahkihda ehu imwen doulik? Dahme wiahkihda imwen douliko ahl sapwung ehu ong lela nanleng? Mwuhr ke kak rapahki nan 2 Nihpai 31:20–21 oh Ilemen 3:28 en rapahkihda ahl pwung kolahng nanleng. Ia kaweid kitail kak wiahng aramas en Papilonia kan?
Ong pil ekei, kilang pwuken sounpwunget ohg makasihn en Kempoakepah.