“ວັນທີ 26 ເດືອນມັງກອນ–ວັນທີ 1 ເດືອນກຸມພາ. ‘ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ’: ປະຖົມມະການ 5; ໂມເຊ 6,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 26 ເດືອນມັງກອນ–ວັນທີ 1 ເດືອນກຸມພາ. ‘ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ’,” ຈົ່ງຕາມເຮົາມາ: 2026
Better than Paradise [ດີກວ່າທີ່ສຸຂະເສີມ], ໂດຍ ເຄັນໂດ ເຣ ຈອນສັນ
ວັນທີ 26 ເດືອນມັງກອນ–ວັນທີ 1 ເດືອນກຸມພາ: “ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ”
ປະຖົມມະການ 5; ໂມເຊ 6
ສ່ວນຫລາຍໃນປະຖົມມະການ 5 ແມ່ນບັນທຶກລຳດັບເຊື້ອສາຍລະຫວ່າງອາດາມ ແລະ ເອວາ ແລະ ໂນອາ. ເຮົາອ່ານລາຍຊື່ຂອງຫລາຍຄົນ, ແຕ່ເຮົາບໍ່ຮູ້ຫຍັງຫລາຍກ່ຽວກັບເຂົາເຈົ້າ. ແລ້ວເຮົາອ່ານກ່ຽວກັບປະໂຫຍກທີ່ໜ້າສົນໃຈ ແຕ່ບໍ່ຖືກອະທິບາຍນີ້ວ່າ: “ແລະ ເອນົກໄດ້ດຳເນີນຊີວິດກັບພຣະເຈົ້າ: ແລະ ລາວກໍໄດ້ຫາຍຕົວໄປ; ເພາະພຣະເຈົ້າໄດ້ຮັບເອົາລາວໄປ” (ປະຖົມມະການ 5:24). ແນ່ນອນ ຄົງມີເລື່ອງລາວຢູ່ເບື້ອງຫລັງຂໍ້ພຣະຄຳພີນັ້ນ! ແຕ່ປາດສະຈາກຄຳອະທິບາຍເພີ່ມເຕີມ, ກໍມີລາຍຊື່ຂອງຫລາຍລຸ້ນຄົນໄດ້ຖືກລະບຸໄວ້ຕໍ່ໄປ.
ໂຊກດີແຕ່, ໂມເຊ 6 ເປີດເຜີຍຂໍ້ມູນເພີ່ມເຕີມກ່ຽວກັບເລື່ອງລາວຂອງເອນົກ—ແລະ ມັນເປັນເລື່ອງລາວຈົບດີ. ເຮົາຮຽນຮູ້ເຖິງຄວາມຖ່ອມຕົວຂອງເອນົກ, ເຖິງຄວາມບໍ່ໝັ້ນຄົງຂອງເພິ່ນ, ເຖິງສັກກະຍະພາບທີ່ພຣະເຈົ້າເຫັນໃນຕົວເພິ່ນ, ແລະ ເຖິງວຽກງານອັນຍິ່ງໃຫຍ່ທີ່ເພິ່ນໄດ້ເຮັດໃນຖານະສາດສະດາຂອງພຣະເຈົ້າ. ເຮົາກໍເຫັນພາບທີ່ແຈ່ມແຈ້ງຫລາຍກວ່າເກົ່າ ເຖິງຄອບຄົວຂອງອາດາມ ແລະ ເອວາ ຂະນະທີ່ມັນຄືບໜ້າຕະຫລອດທົ່ວຫລາຍລຸ້ນຄົນ. ເຮົາອ່ານກ່ຽວກັບ “ອຳນາດຢ່າງຫລວງຫລາຍ” ຂອງຊາຕານ ແລະ ອ່ານກ່ຽວກັບພໍ່ແມ່ທີ່ສິດສອນລູກໆຕາມ “ວິທີທາງຂອງພຣະເຈົ້າ” (ໂມເຊ 6:15, 21). ໂດຍສະເພາະມີຄ່າຢ່າງຍິ່ງ ແມ່ນສິ່ງທີ່ເຮົາຮຽນຮູ້ກ່ຽວກັບຄຳສອນທີ່ພໍ່ແມ່ໄດ້ສິດສອນ: ໃຫ້ມີສັດທາໃນພຣະເຢຊູຄຣິດ, ການກັບໃຈ, ການບັບຕິສະມາ, ແລະ ການຮັບເອົາພຣະວິນຍານບໍລິສຸດ (ເບິ່ງ ໂມເຊ 6:50–52). ຄຳສອນນັ້ນ, ຄືກັນກັບຖານະປະໂລຫິດທີ່ມາກັບມັນ, “ຢູ່ໃນຕອນຕົ້ນ [ແລະ] ຈະຢູ່ໃນຄາວສິ້ນສຸດໂລກຄືກັນ” (ໂມເຊ 6:7).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ບາບຈຳກັດຄວາມສາມາດຂອງເຮົາໃນການເຫັນ, ຮູ້ສຶກ, ແລະ ໄດ້ຍິນສິ່ງຕ່າງໆຂອງພຣະເຈົ້າ.
ຂະນະທີ່ທ່ານສຶກສາ ໂມເຊ 6:26–36, ທ່ານຮຽນຮູ້ຫຍັງແດ່ກ່ຽວກັບຜົນກະທົບຂອງບາບ? ທ່ານເຄີຍເຫັນຜົນກະທົບເຫລົ່ານີ້ໄດ້ແນວໃດ? ເອນົກມີຄຸນລັກສະນະຫຍັງແດ່ທີ່ຊ່ວຍໃຫ້ເພິ່ນເອົາຊະນະຜົນກະທົບເຫລົ່ານີ້? ພຣະເຈົ້າອວຍພອນເພິ່ນແນວໃດ?
ພຣະເຈົ້າເອີ້ນເຮົາໃຫ້ເຮັດວຽກງານຂອງພຣະອົງ ເຖິງແມ່ນວ່າເຮົາມີຄວາມອ່ອນແອກໍຕາມ.
ຖ້າທ່ານຮູ້ສຶກເປັນຫ່ວງກັບສິ່ງທີ່ພຣະຜູ້ເປັນເຈົ້າໄດ້ເອີ້ນທ່ານໃຫ້ເຮັດ, ທ່ານບໍ່ໄດ້ແມ່ນຄົນດຽວທີ່ຮູ້ສຶກແບບນັ້ນ. ແມ່ນແຕ່ເອນົກກໍຍັງຮູ້ສຶກແບບນັ້ນ ເມື່ອພຣະຜູ້ເປັນເຈົ້າໄດ້ເອີ້ນເພິ່ນໃຫ້ເປັນສາດສະດາ. ຂະນະທີ່ທ່ານອ່ານ ໂມເຊ 6:26–36, ໃຫ້ຊອກຫາເຫດຜົນທີ່ເອນົກຮູ້ສຶກເປັນຫ່ວງ ແລະ ຊອກຫາສິ່ງທີ່ພຣະຜູ້ເປັນເຈົ້າໄດ້ກ່າວ ເພື່ອໃຫ້ກຳລັງໃຈແກ່ເພິ່ນ.
ໃນ ຂໍ້ທີ 37–47, ທ່ານສາມາດຊອກຫາວິທີທີ່ພຣະຜູ້ເປັນເຈົ້າສະໜັບສະໜູນເອນົກ ແລະ ມອບອຳນາດໃຫ້ແກ່ເພິ່ນ ເພື່ອເຮັດວຽກງານຂອງພຣະອົງ (ເບິ່ງ ໂມເຊ 7:13 ນຳອີກ). ທ່ານອາດຢາກປຽບທຽບປະສົບການຂອງເອນົກກັບປະສົບການຂອງສາດສະດາຄົນອື່ນໆ ທີ່ຮູ້ສຶກບໍ່ພຽບພ້ອມ, ດັ່ງເຊັ່ນໂມເຊ (ເບິ່ງ ອົບພະຍົບ 4:10–16), ເຢເຣມີຢາ (ເບິ່ງ ເຢເຣມີຢາ 1:4–10), ນີໄຟ (ເບິ່ງ 2 ນີໄຟ 33:1–4), ແລະ ໂມໂຣໄນ (ເບິ່ງ ອີເທີ 12:23–29). ທ່ານຮູ້ສຶກວ່າ ພຣະເຈົ້າປະສົງໃຫ້ທ່ານຮຽນຮູ້ສິ່ງໃດຈາກຂໍ້ພຣະຄຳພີເຫລົ່ານີ້ ກ່ຽວກັບວຽກງານທີ່ພຣະອົງໄດ້ມອບໃຫ້ທ່ານເຮັດ?
A Seer Hath the Lord Raised Up (Moses 6:36) [ພຣະຜູ້ເປັນເຈົ້າໄດ້ຍົກຜູ້ພະຍາກອນຜູ້ໜຶ່ງຂຶ້ນ (ໂມເຊ 6:36)], ໂດຍ ອີວາ ທິມມະຕີ
ອັກຄະສາວົກ ແລະ ສາດສະດາຫລາຍທ່ານໃນຍຸກປະຈຸບັນກໍໄດ້ສະແດງຄວາມຮູ້ສຶກ ທີ່ຄ້າຍຄືກັນກັບເອນົກ ເມື່ອພວກເພິ່ນອະທິບາຍເຖິງຄວາມຮູ້ສຶກຕອນທີ່ໄດ້ຮັບການເອີ້ນຂອງພວກເພິ່ນ. ຍົກຕົວຢ່າງ, ເບິ່ງປະຈັກພະຍານຂອງ Elder Ulisses Soares ໃນ “Prophets Speak by the Power of the Holy Spirit” (Liahona, May 2018, 98–99).
ທ່ານສາມາດຮຽນຮູ້ຫຍັງແດ່ຈາກສາດສະດາ ແລະ ອັກຄະສາວົກເຫລົ່ານີ້ ກ່ຽວກັບຄວາມຮູ້ສຶກຂອງຄວາມບໍ່ພຽບພ້ອມຂອງທ່ານ? ທ່ານເຄີຍຮູ້ສຶກວ່າພຣະຜູ້ຊ່ວຍໃຫ້ລອດຊ່ວຍເຫລືອທ່ານຕອນພຣະອົງຂໍໃຫ້ທ່ານເຮັດສິ່ງທີ່ຍາກເມື່ອໃດ? ໃຫ້ພິຈາລະນາທີ່ຈະຂຽນປະສົບການຈຳນວນໜຶ່ງໃນອະນາຄົດ ເມື່ອທ່ານຈະຕ້ອງເພິ່ງອາໄສການຊ່ວຍເຫລືອຂອງພຣະຜູ້ຊ່ວຍໃຫ້ລອດ. ທ່ານຈະສາມາດຮັບມືກັບສະຖານະການເຫລົ່ານີ້ດ້ວຍສັດທາໃນພຣະເຢຊູຄຣິດແນວໃດ?
ເບິ່ງ David A. Bednar, “Abide in Me, and I in You; Therefore Walk with Me,” Liahona, May 2023, 123–25; “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50 ນຳອີກ.
ພຣະກິດຕິຄຸນຂອງພຣະເຢຊູຄຣິດໄດ້ຖືກສິດສອນຕັ້ງແຕ່ຕອນຕົ້ນ.
ເປັນເພາະເຮົາມີໜັງສືໂມເຊ, ເຮົາຈຶ່ງຮູ້ວ່າ ພຣະເຈົ້າໄດ້ສິດສອນລູກໆຂອງພຣະອົງຕະຫລອດມາ ເຖິງວິທີຊອກຫາການໄຖ່ນັບຕັ້ງແຕ່ອາດາມ ແລະ ເອວາເປັນຕົ້ນມາ. ຂະນະທີ່ທ່ານສຶກສາ ໂມເຊ 6:48–68, ໃຫ້ຄົ້ນຫາສິ່ງທີ່ເຮົາຕ້ອງຮູ້ ແລະ ເຮັດເພື່ອຈະໄດ້ຮັບການໄຖ່. ໃຫ້ສັງເກດຄຳຖາມຂອງອາດາມໃນ ຂໍ້ທີ 53. ທ່ານເຄີຍສົງໄສບໍ? ທ່ານໄດ້ຮຽນຮູ້ຫຍັງແດ່ຈາກຄຳຕອບຂອງພຣະຜູ້ເປັນເຈົ້າ ໃນ ຂໍ້ທີ 53–65? ທ່ານອາດຈະຄິດເຖິງຂໍ້ພຣະຄຳພີເຫລົ່ານີ້ທີ່ເປັນຂ່າວສານຂອງພຣະຜູ້ເປັນເຈົ້າໃນພິທີຮັບບັບຕິສະມາຂອງອາດາມ. ທ່ານຮຽນຮູ້ຫຍັງແດ່ກ່ຽວກັບການຮັບບັບຕິສະມາຈາກຂ່າວສານຂອງພຣະອົງ? ທ່ານຄິດວ່າ ເປັນຫຍັງພຣະອົງຈຶ່ງປຽບທຽບການຮັບບັບຕິສະມາວ່າເປັນການ “ເກີດໃໝ່”? (ຂໍ້ທີ 59). ທ່ານສາມາດເຮັດຫຍັງໄດ້ແດ່ ເພື່ອສືບຕໍ່ “ເກີດໃໝ່” ຕະຫລອດຊົ່ວຊີວິດຂອງທ່ານ?
ຊອກຫາສັນຍາລັກ. ໃນພຣະຄຳພີ, ສິ່ງຂອງ ຫລື ເຫດການຕ່າງໆເປັນຕົວແທນ ຫລື ເປັນສັນຍາລັກໃຫ້ແກ່ຄວາມຈິງທາງວິນຍານ, ໂດຍສະເພາະຄວາມຈິງກ່ຽວກັບພຣະຜູ້ຊ່ວຍໃຫ້ລອດ (ເບິ່ງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 7). ສັນຍາລັກເຫລົ່ານີ້ສາມາດຊ່ວຍທ່ານໃຫ້ເຂົ້າໃຈຫລາຍກວ່າເກົ່າກ່ຽວກັບພຣະອົງ ແລະ ຄຳສອນຂອງພຣະອົງ. ຍົກຕົວຢ່າງ, ທ່ານຮຽນຮູ້ຫຍັງແດ່ຈາກສັນຍາລັກຂອງຫົວໃຈ ແລະ ຫູຢູ່ໃນ ໂມເຊ 6:27, ຕາ ແລະ ຂີ້ຕົມຢູ່ໃນ ໂມເຊ 6:35, ຫລື ນ້ຳຢູ່ໃນ ໂມເຊ 6:59–60?
“ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ.”
ຫລັງຈາກການສິດສອນອາດາມເຖິງຄວາມຈິງຂອງພຣະກິດຕິຄຸນຂອງພຣະເຢຊູຄຣິດ, ໃນ ໂມເຊ 6:51–63, ພຣະຜູ້ເປັນເຈົ້າໄດ້ບອກໃຫ້ອາດາມສິດສອນສິ່ງເຫລົ່ານັ້ນໃຫ້ກັບຄົນລຸ້ນຫລັງ. ໃຫ້ພິຈາລະນາຂຽນລາຍການຂອງຄວາມຈິງເຫລົ່ານີ້. (ມັນອາດຈະຊ່ວຍໄດ້ຖ້າແບ່ງປັນຂໍ້ພຣະຄຳພີອອກເປັນກຸ່ມຂໍ້ທີ່ນ້ອຍກວ່າ, ເຊັ່ນວ່າ ຂໍ້ທີ 51–52, 53–57, 58–60, 61–63). ເປັນຫຍັງຄວາມຈິງເຫລົ່ານີ້ຈຶ່ງມີຄ່າຕໍ່ຄົນລຸ້ນໃໝ່ໃນຍຸກປະຈຸບັນ? ທ່ານສາມາດຮຽນຮູ້ຫຍັງອີກແດ່ຈາກຄຳແນະນຳຂອງພຣະຜູ້ເປັນເຈົ້າຕໍ່ພໍ່ແມ່ ໃນ ໂມໄຊຢາ 4:14–15 ແລະ ຄຳສອນ ແລະ ພັນທະສັນຍາ 68:25–28; 93:40–50?
ການອ່ານກ່ຽວກັບ “ປຶ້ມແຫ່ງຄວາມຊົງຈຳ” ທີ່ຄອບຄົວຂອງອາດາມ ແລະ ເອວາໄດ້ຮັກສາ ອາດດົນໃຈທ່ານ ຫລື ຄອບຄົວຂອງທ່ານໃຫ້ເຮັດປຶ້ມແຫ່ງຄວາມຊົງຈຳຂອງພວກທ່ານເອງ. ທ່ານຮູ້ສຶກວ່າພຣະຜູ້ເປັນເຈົ້າຕ້ອງການໃຫ້ທ່ານຂຽນຫຍັງແດ່ລົງໄວ້? ໃຫ້ພິຈາລະນາທີ່ຈະເກັບຮັກສາຂໍ້ມູນຈາກປຶ້ມແຫ່ງຄວາມຊົງຈຳຂອງທ່ານ ໄວ້ໃນ FamilySearch.org.
ເບິ່ງ Dieter F. Uchtdorf, “Jesus Christ Is the Strength of Parents,” Liahona, May 2023, 55–59; “Parenting: Touching the Hearts of Our Youth,” “But Why?” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະເຈົ້າສາມາດຊ່ວຍເຮົາເຮັດສິ່ງທີ່ຍາກໄດ້.
-
ເມື່ອເອນົກໄດ້ຖືກເອີ້ນໃຫ້ສັ່ງສອນພຣະກິດຕິຄຸນ, ເພິ່ນກັງວົນວ່າເພິ່ນຈະລົ້ມເຫລວ. ແຕ່ພຣະເຈົ້າໄດ້ຊ່ວຍເພິ່ນ. ໃຫ້ອ່ານເລື່ອງລາວນີ້ນຳກັນໃນ ໂມເຊ 6:26–34 (ເບິ່ງ “ສາດສະດາເອນົກ” ໃນ ເລື່ອງພຣະຄຳພີເດີມ, 19–21 ນຳອີກ). ເປັນຫຍັງເອນົກຈຶ່ງຮູ້ສຶກວ່າເພິ່ນບໍ່ສາມາດສັ່ງສອນພຣະກິດຕິຄຸນ ?(ເບິ່ງ ໂມເຊ 6:31). ພຣະເຈົ້າຊ່ວຍເຫລືອເອນົກແນວໃດ? (ເບິ່ງ ໂມເຊ 6:32–34; 7:13).
-
ລູກໆຂອງທ່ານອາດຈະມັກການແບ່ງປັນ ຫລື ສະແດງກ່ຽວກັບຕົວຢ່າງອື່ນໆຕອນທີ່ພຣະເຈົ້າໄດ້ຊ່ວຍເຫລືອຜູ້ຄົນໃຫ້ເຮັດສິ່ງທີ່ຍາກ—ຍົກຕົວຢ່າງ, ໂນອາ, ດາວິດ, ອຳໂມນ, ຫລື ຊາມູເອນຊາວເລມັນ (ເບິ່ງ ປຶ້ມຮູບພຣະກິດຕິຄຸນ, ເລກທີ 7, 19, 78, 81). ທ່ານຍັງສາມາດແບ່ງປັນປະສົບການຂອງທ່ານເອງນຳອີກ ແລະ ໃຫ້ລູກໆຂອງທ່ານເວົ້າລົມກ່ຽວກັບສິ່ງທີ່ພຣະເຈົ້າໄດ້ຊ່ວຍເຫລືອພວກເຂົາໃຫ້ເຮັດສິ່ງທີ່ຍາກແນວໃດ.
ສັດທາໃນພຣະຄຣິດ, ການກັບໃຈ, ການບັບຕິສະມາ, ແລະ ການຮັບເອົາຂອງປະທານແຫ່ງພຣະວິນຍານບໍລິສຸດ ກຽມເຮົາພ້ອມທີ່ຈະກັບຄືນໄປຫາພຣະເຈົ້າ.
-
ພຣະເຈົ້າໄດ້ສິດສອນອາດາມກ່ຽວກັບສິ່ງທີ່ເຮົາຕ້ອງເຮັດເພື່ອກັບຄືນໄປຫາພຣະອົງ—ມີສັດທາໃນພຣະເຢຊູຄຣິດ, ກັບໃຈ, ຮັບບັບຕິສະມາ, ແລະ ຮັບເອົາຂອງປະທານແຫ່ງພຣະວິນຍານບໍລິສຸດ. ຊ່ວຍລູກໆຂອງທ່ານຊອກຫາຫລັກທຳເຫລົ່ານີ້ໃນ ໂມເຊ 6:52, 57. ຈາກນັ້ນທ່ານສາມາດຊ່ວຍພວກເຂົາໃຫ້ຂຽນບົດປາໄສສັ້ນໆກ່ຽວກັບຫລັກທຳຂໍ້ໜຶ່ງ. ບົດປາໄສແຕ່ລະບົດສາມາດລວມທັງຂໍ້ພຣະຄຳພີຈາກ ໂມເຊ 6, ປະສົບການ, ແລະ ປະຈັກພະຍານ. ປ່ອຍໃຫ້ພວກເຂົາແບ່ງປັນບົດປາໄສຂອງພວກເຂົານຳກັນ.
-
ທ່ານກໍຍັງສາມາດສະແດງຮູບພາບທີ່ເປັນຕົວແທນເຖິງຫລັກທຳຂໍ້ທຳອິດແຫ່ງພຣະກິດຕິຄຸນນຳອີກ (ເບິ່ງ ຫລັກແຫ່ງຄວາມເຊື່ອຂໍ້ທີສີ່). ວາງຮູບພາບເຫລົ່ານັ້ນເປັນແຖວທີ່ນຳໄປຫາຮູບພາບຂອງພຣະເຢຊູຄຣິດ. ຂະນະທີ່ທ່ານອ່ານ ໂມເຊ 6:52, ລູກໆຂອງທ່ານສາມາດຢືນຢູ່ທາງຂ້າງຮູບພາບທີ່ຖືກຕ້ອງເມື່ອພວກເຂົາໄດ້ຍິນຄຳສັບທີ່ສະແດງເຖິງຮູບພາບດັ່ງກ່າວ.
-
ລູກໆຂອງທ່ານອາດຈະມັກການຮ້ອງເພງທີ່ສິດສອນເຖິງຫລັກທຳໃນ ໂມເຊ 6:52, ເຊັ່ນ “ພຣະວິນຍານພຣະເຈົ້າ,” “ບອກມາ ສັດຈະຄືຫຍັງ?,” ແລະ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 30, 34, 72). ຊ່ວຍພວກເຂົາຊອກຫາຫລັກທຳເຫລົ່ານີ້ໃນ ໂມເຊ 6:52.
ພຣະບິດາເທິງສະຫວັນຕ້ອງການໃຫ້ພໍ່ແມ່ສິດສອນລູກໆຂອງຕົນ.
-
ເພື່ອຊຸກຍູ້ໃຫ້ລູກໆຂອງທ່ານສະໜັບສະໜູນພໍ່ແມ່ຂອງພວກເຂົາໃນບົດບາດຄູສອນພຣະກິດຕິຄຸນ, ໃຫ້ພິຈາລະນາທີ່ຈະຂໍໃຫ້ລູກຄົນໜຶ່ງອ່ານໃນ ໂມເຊ 6:58 ແລະ ລະບຸພຣະບັນຍັດທີ່ພຣະເຈົ້າໄດ້ມອບໃຫ້ແກ່ພໍ່ແມ່. ຈາກນັ້ນທ່ານສາມາດສະແດງຮູບຂອງອາດາມ ແລະ ເອວາກຳລັງສິດສອນລູກໆຂອງເຂົາເຈົ້າ (ຄືກັນກັບຮູບທີ່ຢູ່ໃນທ້າຍຂອງໂຄງຮ່າງນີ້), ແລະ ໃຫ້ລູກໆຂອງທ່ານເວົ້າກ່ຽວກັບສິ່ງທີ່ພວກເຂົາໄດ້ເຫັນໃນຮູບດັ່ງກ່າວ. ລູກໆຂອງທ່ານສາມາດແຕ້ມຮູບກ່ຽວກັບຄອບຄົວຂອງພວກເຂົາກຳລັງອ່ານພຣະຄຳພີນຳກັນ, ກຳລັງອະທິຖານນຳກັນ, ຫລື ກຳລັງຫລິ້ນນຳກັນ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.