“ວັນທີ 9–15 ເດືອນກຸມພາ. ‘ໂນອາໄດ້ພົບພຣະຄຸນໃນສາຍພຣະເນດຂອງພຣະຜູ້ເປັນເຈົ້າ’: ເບິ່ງ ປະຖົມມະການ 6:8; ໂມເຊ 8:27,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 9–15 ເດືອນກຸມພາ. ‘ໂນອາໄດ້ພົບພຣະຄຸນໃນສາຍພຣະເນດຂອງພຣະຜູ້ເປັນເຈົ້າ’,” ຈົ່ງຕາມເຮົາມາ: 2026
Jehovah Keeps a Promise [ພຣະເຢໂຮວາຮັກສາຄຳສັນຍາ], ໂດຍ ແຊມ ລໍເລີ
ວັນທີ 9–15 ເດືອນກຸມພາ: “ໂນອາໄດ້ພົບພຣະຄຸນໃນສາຍພຣະເນດຂອງພຣະຜູ້ເປັນເຈົ້າ”
ເບິ່ງ ປະຖົມມະການ 6:8; ໂມເຊ 8:27
ການທີ່ມີຊີວິດຢູ່ໃນຍຸກສຸດທ້າຍ, ເຮົາມີເຫດຜົນພິເສດທີ່ຈະເອົາໃຈໃສ່ຕໍ່ເລື່ອງລາວຂອງນໍ້າຖ້ວມໃຫຍ່. ເມື່ອພຣະເຢຊູຄຣິດໄດ້ສິດສອນວິທີທີ່ເຮົາຄວນເຝົ້າເບິ່ງການສະເດັດມາຄັ້ງທີສອງຂອງພຣະອົງ, ພຣະອົງໄດ້ກ່າວວ່າ, “ດັ່ງທີ່ວັນເວລາຂອງໂນອາເປັນສັນໃດ, ມັນກໍຈະເປັນສັນນັ້ນໃນຕອນບຸດມະນຸດສະເດັດມາ” (ໂຈເຊັບ ສະມິດ—ມັດທາຍ 1:41). ນອກເໜືອຈາກນີ້, ຄຳທີ່ບັນຍາຍເຖິງວັນເວລາຂອງໂນອາ, ເຊັ່ນ “ເສື່ອມໂຊມ” ແລະ “ເຕັມໄປດ້ວຍຄວາມຮຸນແຮງ,” ກໍສາມາດເອົາມາໃຊ້ເພື່ອບັນຍາຍເຖິງວັນເວລາຂອງເຮົາໄດ້ຢ່າງງ່າຍດາຍເຊັ່ນກັນ (ປະຖົມມະການ 6:12–13; ໂມເຊ 8:28). ເລື່ອງລາວກ່ຽວກັບຫໍຄອຍເມືອງບາເບນກໍຮູ້ສຶກວ່າ ສາມາດເອົາມານຳໃຊ້ກັບວັນເວລາຂອງເຮົາໄດ້ເຊັ່ນດຽວກັນ, ພ້ອມດ້ວຍການບັນຍາຍຂອງມັນກ່ຽວກັບຄວາມທະນົງຕົວທີ່ຕາມມາດ້ວຍຄວາມສັບສົນ ແລ້ວກໍຄວາມແບ່ງແຍກ.
ເລື່ອງລາວບູຮານເຫລົ່ານີ້ມີຄ່າ ບໍ່ແມ່ນພຽງແຕ່ຍ້ອນວ່າ ມັນສະແດງໃຫ້ເຮົາເຫັນວ່າ ຄວາມຊົ່ວຮ້າຍໄດ້ເກີດຂຶ້ນຊໍ້າແລ້ວຊໍ້າອີກຕະຫລອດທົ່ວປະຫວັດສາດເທົ່ານັ້ນ. ທີ່ສຳຄັນໄປກວ່ານັ້ນ, ມັນສິດສອນເຮົາເຖິງວິທີທີ່ຈະຈັດການກັບມັນ. ໂນອາ “ໄດ້ພົບເຫັນພຣະຄຸນໃນສາຍພຣະເນດຂອງພຣະຜູ້ເປັນເຈົ້າ” (ໂມເຊ 8:27). ແລະ ຄອບຄົວຂອງຢາເຣັດ ແລະ ນ້ອງຊາຍຂອງລາວໄດ້ຫັນໄປຫາພຣະຜູ້ເປັນເຈົ້າ ແລະ ໄດ້ຖືກປົກປ້ອງຈາກຄວາມສັບສົນ ແລະ ຄວາມແບ່ງແຍກໃນເມືອງບາເບນ (ເບິ່ງ ອີເທີ 1:33–43). ຖ້າຫາກເຮົາຢາກຮູ້ຈັກວິທີທີ່ຈະຮັກສາຕົວເອງ ແລະ ຄອບຄົວຂອງເຮົາໃຫ້ປອດໄພ ຈາກຄວາມເສື່ອມໂຊມ ແລະ ຄວາມຮຸນແຮງ, ເລື່ອງລາວຢູ່ໃນບົດເຫລົ່ານີ້ ມີຫລາຍສິ່ງທີ່ຈະສິດສອນເຮົາ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ປະຖົມມະການ 6; ໂມເຊ 8
ມັນມີຄວາມປອດໄພທາງວິນຍານ ໃນການຕິດຕາມສາດສະດາຂອງພຣະຜູ້ເປັນເຈົ້າ.
ທ່ານເຫັນສິ່ງໃດແດ່ໃນຄຳບັນຍາຍເຖິງວັນເວລາຂອງໂນອາທີ່ເບິ່ງຄືວ່າ ຄ້າຍຄືກັນກັບສະພາບການໃນວັນເວລາຂອງເຮົາ? ໂດຍສະເພາະ, ໃຫ້ເບິ່ງໃນ ໂມເຊ 8:15–24, 28. ຫົວຂໍ້ໃດແດ່ທີ່ທ່ານເຫັນຢ່າງຊໍ້າໆ?
ຄວາມຄ້າຍຄືກັນທີ່ສຳຄັນຢ່າງໜຶ່ງທີ່ທ່ານຈະໄດ້ເຫັນກໍຄືວ່າ ພຣະເຈົ້າໄດ້ເອີ້ນໂນອາໃຫ້ເປັນສາດສະດາ, ແລະ ພຣະອົງກໍໄດ້ເອີ້ນສາດສະດາໃນສະໄໝນີ້ເຊັ່ນກັນ. ໃຫ້ຄິດທີ່ຈະເຮັດລາຍການຂອງຄວາມຈິງຕ່າງໆທີ່ທ່ານຮຽນຮູ້ກ່ຽວກັບສາດສະດາຈາກ ໂມເຊ 8:13–30. ສາດສະດາທີ່ມີຊີວິດຢູ່ຂອງເຮົາຄືກັນກັບໂນອາແນວໃດ? ແນ່ນອນ, ສາດສະດາຂອງພຣະຜູ້ເປັນເຈົ້າໃນສະໄໝນີ້ ບໍ່ໄດ້ເຕືອນກ່ຽວກັບນໍ້າຖ້ວມ ຫລື ເຊື້ອເຊີນເຮົາໃຫ້ຊ່ວຍສ້າງເຮືອໃຫຍ່. ແຕ່ເພິ່ນກຳລັງເຕືອນເຮົາກ່ຽວກັບຫຍັງ? ແລະ ພຣະອົງກຳລັງລໍຄອຍຫຍັງຢູ່? ເພື່ອຊ່ວຍຕອບຄຳຖາມເຫລົ່ານີ້, ທ່ານສາມາດທົບທວນບົດໜຶ່ງຈາກ Teachings of Presidents of the Church ໃນ ຫ້ອງສະໝຸດພຣະກິດຕິຄຸນ, ໂດຍສະເພາະພາກ “Invitations and Promises”. ບາງທີ ທ່ານສາມາດເລືອກຄຳເຕືອນຢ່າງໜຶ່ງ ຫລື ສອງຢ່າງທີ່ເບິ່ງຄືວ່າ ສຳຄັນຕໍ່ຄອບຄົວຂອງທ່ານໂດຍສະເພາະ.
ແອວເດີ ອາເລັນ ດີ ເຮນີ ໄດ້ສິດສອນວ່າ, “ພຣະບິດາຜູ້ສະຖິດຢູ່ໃນສະຫວັນໄດ້ເລືອກແບບແຜນຂອງການເປີດເຜີຍຄວາມຈິງແກ່ລູກໆຂອງພຣະອົງຜ່ານທາງສາດສະດາ” (“A Living Prophet for the Latter Days,” Liahona, May 2023, 25). ໃຫ້ຄິດທີ່ຈະສຶກສາຂ່າວສານຂອງແອວເດີ ເຮນີ, ຊອກຫາເຫດຜົນທີ່ການມີສາດສະດາເປັນສັນຍາລັກເຖິງຄວາມຮັກຂອງພຣະບິດາເທິງສະຫວັນ. ການຕິດຕາມສາດສະດາຂອງພຣະຜູ້ເປັນເຈົ້າໄດ້ຊ່ວຍໃຫ້ທ່ານຮູ້ສຶກປອດໄພທີ່ຈະໃຊ້ຊີວິດໃນຍຸກສຸດທ້າຍແນວໃດ?
ເບິ່ງ Topics and Questions, “Prophets,” ຫ້ອງສະໝຸດພຣະກິດຕິຄຸນ; “Why Do We Have Prophets?” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
Why Do We Have Prophets?
ປະຖົມມະການ 6:5–13
ນໍ້າຖ້ວມເປັນການກະທຳແຫ່ງພຣະເມດຕາຂອງພຣະເຈົ້າ.
ບາງຄົນອາດສົງໄສກ່ຽວກັບຄວາມຍຸດຕິທຳຂອງພຣະເຈົ້າໃນການສົ່ງນໍ້າຖ້ວມມາເພື່ອ “ທຳລາຍມະນຸດ” (ປະຖົມມະການ 6:7). ແອວເດີ ນຽວ ເອ ແມ໊ກສະແວວ ໄດ້ອະທິບາຍວ່າ ໃນຕອນທີ່ນໍ້າຖ້ວມນັ້ນ, “ຄວາມເສື່ອມໂຊມໄດ້ໄປເຖິງຈຸດທີ່ທຳລາຍອຳເພີໃຈທີ່ດວງວິນຍານທັງຫລາຍບໍ່ສາມາດ, ໃນຄວາມຍຸດຕິທຳ, ຖືກສົ່ງມາທີ່ນີ້ໄດ້” (We Will Prove Them Herewith [1982], 58). ທ່ານອາດພິຈາລະນາວິທີທີ່ນໍ້າຖ້ວມເປັນການກະທຳແຫ່ງຄວາມເມດຕາ. ທ່ານພົບເຫັນຫຍັງແດ່ໃນ ປະຖົມມະການ 6:5–13 ທີ່ສະແດງໃຫ້ເຫັນເຖິງພຣະເມດຕາອັນອ່ອນໂຍນ ແລະ ຄວາມຮັກຂອງພຣະຜູ້ເປັນເຈົ້າທີ່ມີຕໍ່ຜູ້ຄົນເຫລົ່ານັ້ນ?
ປະຖົມມະການ 9:8–17
ໝາຍສຳຄັນ ຫລື ສັນຍາລັກຊ່ວຍເຮົາຈື່ຈຳພັນທະສັນຍາຂອງເຮົາກັບພຣະຜູ້ເປັນເຈົ້າ.
ອີງຕາມ ປະຖົມມະການ 9:8–17, ຮຸ້ງກິນນ້ຳຊ່ວຍໃຫ້ເຮົານຶກເຖິງສິ່ງໃດ? ການແປຂອງໂຈເຊັບ ສະມິດ, ປະຖົມມະການ 9:21–25 (ຢູ່ໃນພາກຫ້ອຍທ້າຍຂອງພຣະຄຣິສຕະທຳຄຳພີ) ຕື່ມໃສ່ຄວາມເຂົ້າໃຈຂອງທ່ານແນວໃດ? ທ່ານອາດພິຈາລະນາທີ່ຈະເຮັດລາຍການຂອງສິ່ງອື່ນໆ (ເຊັ່ນ ສັນຍາລັກ, ວັດຖຸ, ຫລື ສິ່ງອື່ນໆ) ທີ່ພຣະເຈົ້າໄດ້ມອບໃຫ້ທ່ານເພື່ອຢໍ້າເຕືອນທ່ານເຖິງພັນທະສັນຍາຂອງທ່ານ. ສິ່ງເຫລົ່ານີ້ສິດສອນທ່ານຫຍັງແດ່? ມັນຊ່ວຍທ່ານຈົດຈຳຫຍັງແດ່?
ເບິ່ງ Gerrit W. Gong, “Always Remember Him,” Liahona, May 2016, 108–11; “Reverently and Meekly Now,” Hymns, no. 185 ນຳອີກ.
The Tower of Babel [ຫໍຄອຍເມືອງບາເບນ], ໂດຍ ເດວິດ ກຣີນ
ປະຖົມມະການ 11:1–9
ການຕິດຕາມພຣະເຢຊູຄຣິດເປັນທາງດຽວສູ່ພຣະບິດາເທິງສະຫວັນ.
ເລື່ອງລາວຂອງຜູ້ຄົນແຫ່ງບາເບນທີ່ກຳລັງສ້າງຫໍຄອຍໃຫ້ຄວາມກົງກັນຂ້າມທີ່ໜ້າສົນໃຈແກ່ເລື່ອງລາວຂອງເອນົກ ແລະ ຜູ້ຄົນຂອງເພິ່ນທີ່ກຳລັງສ້າງຊີໂອນ, ຊຶ່ງທ່ານໄດ້ສຶກສາແລ້ວອາທິດທີ່ຜ່ານມາ. ທັງສອງກຸ່ມຄົນກຳລັງພະຍາຍາມທີ່ຈະໄປເຖິງສະຫວັນ ແຕ່ໃນວິທີທີ່ແຕກຕ່າງກັນ. ຜູ້ຄົນແຫ່ງຊີໂອນໄດ້ຮັບສະຫວັນໄດ້ແນວໃດ? (ເບິ່ງ ໂມເຊ 7:18–19, 53, 62–63, 69). ທ່ານຮຽນຮູ້ຫຍັງແດ່ຈາກ ປະຖົມມະການ 11:1–9 ແລະ ຮີລາມັນ 6:26–28 ກ່ຽວກັບຜູ້ຄົນຂອງບາເບນ? ສິ່ງນີ້ສິດສອນເຮົາຫຍັງແດ່ກ່ຽວກັບຄວາມພະຍາຍາມຂອງເຮົາເອງທີ່ຈະກັບຄືນສູ່ທີ່ປະທັບຂອງພຣະເຈົ້າ? ພຣະອົງໄດ້ຈັດຫາຫຍັງແດ່ ເພື່ອຊ່ວຍໃຫ້ເຮົາ “[ໄປເຖິງ] ສະຫວັນ”? (ປະຖົມມະການ 11:4; ເບິ່ງ ໂຢຮັນ 3:16 ນຳອີກ).
ຮຽນຮູ້ຢ່າງຕັ້ງໃຈ. ການຮຽນຮູ້ສາມາດມີສ່ວນຮ່ວມຫລາຍກວ່າການອ່ານ ຫລື ການຟັງເທົ່ານັ້ນ. ຍົກຕົວຢ່າງ, ເມື່ອທ່ານກຳລັງຮຽນຮູ້ກ່ຽວກັບຫໍຄອຍເມືອງບາເບນ, ທ່ານ ແລະ ຄອບຄົວຂອງທ່ານ ຫລື ຫ້ອງຮຽນ ສາມາດຂຽນ, ໃສ່ເຈ້ຍນ້ອຍຫລາຍແຜ່ນ, ສິ່ງທີ່ພາເຮົາອອກຈາກພຣະເຈົ້າ. ຫລັງຈາກນັ້ນ, ທ່ານສາມາດຂຽນສິ່ງທີ່ນຳເຮົາເຂົ້າໃກ້ພຣະເຈົ້າຫລາຍຍິ່ງຂຶ້ນໃສ່ເຈ້ຍນ້ອຍອີກຫລາຍແຜ່ນ. ຈັດຮຽງເຈ້ຍກຸ່ມທຳອິດໃຫ້ເປັນຮູບຫໍຄອຍ ແລະ ກຸ່ມທີສອງໃຫ້ເປັນຮູບພຣະວິຫານ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ປະຖົມມະການ 6:14–22; 7–8; ໂມເຊ 8:16–24
ການຕິດຕາມສາດສະດາຂອງພຣະຜູ້ເປັນເຈົ້າຈະເປັນພອນໃຫ້ເຮົາ ແລະ ຄອບຄົວຂອງເຮົາ.
-
ເດັກນ້ອຍສ່ວນຫລາຍມັກເລື່ອງລາວຂອງໂນອາ ແລະ ເຮືອໃຫຍ່. ໃຫ້ພິຈາລະນາທີ່ຈະໃຫ້ໂອກາດລູກໆຂອງທ່ານໃນການແບ່່ງປັນສິ່ງທີ່ພວກເຂົາຮູ້ກ່ຽວກັບມັນ. ເພື່ອຊ່ວຍພວກເຂົາ, ທ່ານສາມາດໃຊ້ຮູບພາບໃນໂຄງຮ່າງນີ້, “ໂນອາ ແລະ ຄອບຄົວຂອງເພິ່ນ” ໃນ ເລື່ອງພຣະຄຳພີເດີມ (22–25), ແລະ ວັກທີສາມຂອງ “Follow the Prophet” (Children’s Songbook, 110–11). ລູກໆຂອງທ່ານອາດມັກສະແດງບົດຕ່າງໆຂອງເລື່ອງລາວນັ້ນ—ຍົກຕົວຢ່າງ, ໂດຍການທຳທ່າໃຊ້ເຄື່ອງມືເພື່ອສ້າງເຮືອໃຫຍ່ ຫລື ຍ່າງຄືກັນກັບສັດທີ່ກຳລັງຂຶ້ນເຮືອໃຫຍ່.
-
ຂະນະທີ່ທ່ານເວົ້າກ່ຽວກັບໂນອານຳກັນ, ຊ່ວຍໃຫ້ລູກໆຂອງທ່ານເຫັນວ່າ ເຮົາໄດ້ຮັບພອນຫລາຍສໍ່າໃດທີ່ມີສາດສະດາຂອງພຣະເຈົ້າໃນມື້ນີ້. ຊ່ວຍລູກໆຂອງທ່ານຄົ້ນຄວ້າ ໂມເຊ 8:16–24 ເພື່ອຊອກຫາສິ່ງທີ່ໂນອາໄດ້ສິດສອນທີ່ບັນດາສາດສະດາຂອງພຣະຜູ້ເປັນເຈົ້າຍັງສິດສອນຢູ່ໃນທຸກວັນນີ້. ເຮົາຈະໄດ້ຮັບພອນແນວໃດເມື່ອເຮົາເຊື່ອຟັງຄຳສອນເຫລົ່ານີ້?
ປະຖົມມະການ 9:15–16
ພຣະເຈົ້າຈະຮັກສາຄຳສັນຍາຂອງພຣະອົງທີ່ໃຫ້ໄວ້ກັບເຮົາ.
-
ລູກໆຂອງທ່ານອາດມັກແຕ້ມຮູບ ຫລື ລະບາຍສີຮຸ້ງກິນນໍ້າ ຂະນະທີ່ທ່ານເວົ້າກ່ຽວກັບສິ່ງທີ່ມັນເປັນຕົວແທນ (ເບິ່ງ ການແປຂອງໂຈເຊັບ ສະມິດ, ປະຖົມມະການ 9:21–25 [ໃນພາກຫ້ອຍທ້າຍຂອງພຣະຄຣິສຕະທຳຄຳພີ]). ພຣະເຈົ້າຢາກໃຫ້ໂນອາ ແລະ ຄອບຄົວຂອງເພິ່ນຄິດເຖິງຫຍັງເມື່ອໃດກໍຕາມທີ່ພວກເພິ່ນເຫັນຮຸ້ງກິນນໍ້າ?
-
ທ່ານຍັງສາມາດເອົາບາງຢ່າງທີ່ທ່ານມີທີ່ຢໍ້າເຕືອນທ່ານກ່ຽວກັບບາງຢ່າງທີ່ສຳຄັນໃນຊີວິດທ່ານໃຫ້ລູກໆຂອງທ່ານເບິ່ງນຳອີກ, ເຊັ່ນ ແຫວນແຕ່ງງານ, ຮູບພາບ, ຫລື ປຶ້ມບັນທຶກສ່ວນຕົວ. ໃຫ້ລູກໆຂອງທ່ານແບ່ງປັນຕົວຢ່າງຂອງພວກເຂົາເອງ. ສິ່ງນີ້ສາມາດນຳໄປສູ່ການສົນທະນາກ່ຽວກັບສິ່ງທີ່ຊ່ວຍໃຫ້ເຮົາຈົດຈຳພັນທະສັນຍາຂອງເຮົາ, ເຊັ່ນ ສິນລະລຶກ, ຊຶ່ງຊ່ວຍໃຫ້ເຮົາລະນຶກເຖິງພັນທະສັນຍາແຫ່ງການບັບຕິສະມາຂອງເຮົາ ທີ່ຈະຕິດຕາມພຣະເຢຊູຄຣິດ (ເບິ່ງ ຄຳສອນ ແລະ ພັນທະສັນຍາ 20:75–79).
ພຣະເຈົ້າໄດ້ບອກຄອບຄົວຂອງໂນອາວ່າ ຮຸ້ງກິນນໍ້າຈະເປັນ “ໝາຍສຳຄັນຂອງພັນທະສັນຍາ ຊຶ່ງເຮົາກຳລັງເຮັດຢູ່ ລະຫວ່າງເຮົາກັບເຈົ້າ” (ປະຖົມມະການ 9:12).
ປະຖົມມະການ 11:1–9
ການຕິດຕາມພຣະເຢຊູຄຣິດເປັນທາງດຽວສູ່ສະຫວັນ.
-
ມັນອາດເປັນການມ່ວນຊື່ນທີ່ຈະສ້າງຫໍຄອຍຈາກທ່ອນໄມ້ນ້ອຍ ຫລື ວັດຖຸອື່ນໆກັບລູກໆຂອງທ່ານ. ຂະນະທີ່ພວກທ່ານເຮັດເຊັ່ນນັ້ນ, ໃຫ້ອະທິບາຍວ່າ ຜູ້ຄົນແຫ່ງບາເບນຄິດວ່າພວກເຂົາສາມາດໄປເຖິງສະຫວັນໂດຍການສ້າງຫໍຄອຍສູງ. ແລ້ວພວກທ່ານກໍສາມາດເບິ່ງຮູບຂອງພຣະຜູ້ຊ່ວຍໃຫ້ລອດນຳກັນ ແລະ ຖາມລູກໆຂອງທ່ານວ່າ ພຣະອົງຊ່ວຍເຮົາໃຫ້ໄປເຖິງສະຫວັນແນວໃດ. ຈາກນັ້ນ ພວກທ່ານສາມາດເວົ້າລົມກັນກ່ຽວກັບສິ່ງທີ່ພວກທ່ານສາມາດເຮັດໄດ້ເພື່ອຕິດຕາມພຣະຜູ້ຊ່ວຍໃຫ້ລອດ.
-
ນອກຈາກການອ່ານເລື່ອງລາວຂອງຫໍຄອຍບາເບນໃນ ປະຖົມມະການ 11:1–9 ແລ້ວ, ທ່ານ ແລະ ລູກໆຂອງທ່ານສາມາດອ່ານ ຮີລາມັນ 6:28. ອີງຕາມຂໍ້ນີ້, ເປັນຫຍັງຜູ້ຄົນເມືອງບາເບນຈຶ່ງສ້າງຫໍຄອຍ? ເປັນຫຍັງການສ້າງຫໍຄອຍນີ້ຈຶ່ງເປັນທາງທີ່ຜິດທີ່ຈະໄປເຖິງສະຫວັນ? ແລ້ວພວກທ່ານສາມາດຄົ້ນຄວ້າ 2 ນີໄຟ 31:20–21 ແລະ ຮີລາມັນ 3:28 ເພື່ອຊອກຫາວີທີທີ່ຖືກຕ້ອງທີ່ຈະໄປເຖິງສະຫວັນ. ເຮົາຈະໃຫ້ຄຳແນະນຳໃດກັບຜູ້ຄົນເມືອງບາເບນ?
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.