Genesis 5; Moses 6

Nupwen ka kaeo Moses 6:26–36, met ka kaeo usun ekkewe ekkesiwin ren tipis? Ifa ussun ka fen kuna ekkei ekkesiwin? Met nikinik mi wor ren Enoch minne ra anisi i ne okkufu ekkei ekkesiwin? Ifa usun Kot a efeiochu i ren met a fis?

Ika ka mefi pekus ren met ewe Samon a kokkoruk kopwe fori, kose anamon. Pwan mwo Enoch a mefi ena sokkun nupwen ewe Samon a kokkori i an epwe emon soufos. Nupwen ka anneani Moses 6:26–36, kutta pwata Enoch a mefi pekus me met ewe Samon a apasa an epwe ngeni i pwaracho.

Non verses 37–47, ka tongeni ekkoch aanen pwata ewe Samon a anisi Enoch me apochokuna i ne fori An angang (nengeni pwan Moses 7:13). Ka tongeni anonno fengeni met a fis ngeni Enoch ngeni an ekkoch soufos kewe ra mefi pwe rese naf, usun ren Moses (nengeni Exodus 4:10–16), Jeremiah (nengeni Jeremiah 1:4–10), Nephi (nengeni 2 Nifai 33:1–4), nengeni Moroni (nengeni Ether 12:23–29). Met ka mefi pwe Kot a mochen kopwe kaeo seni ekkei uwokisin usun ewe angang I a fen ngonuk?

Chommong aposel me soufos ikenai ra fen affata ar memmef mi nonno ngeni an Enoch nupwen ra awewei ifa ussun ra mefi nupwen ra angei wiser. Ren awewe, nengeni ewe kapasen pwarata an Elter Ulisses Soares non “Ekkewe Soufos Ra Kapas ren Manamanen ewe Ngun mi fel” (Liahona, May 2018, 98–99).

Met ka tongeni kaeo seni ekkei soufos me aposel usun om memmefin nafangaw? Inet ka fen mefi ewe Chon Amanau a anisuk nupwen I a tingorek kopwe fori mettoch mi weires? Ekieki om kopwe makketiw ekkoch mettoch epwe fis non fansoun mwom nupwen epwe namot ngonuk om kopwe anongonong won an ewe Chon Amanau aninis. Ifa ussun ka tongeni mesengeni ekkei mettoch ren nuku non Jises Kraist?

Nengeni pwan David A. Bednar, “Abide in Me, and I in You; Therefore Walk with Me,” Liahona, May 2023, 123–25; “I’ll Go Where You Want Me to Go,” Kon mi fen, no. 270.

Pokiten mi nom rech ewe puken Moses, kich mi sinei pwe Kot a fen aiti Noun kewe semirit ifa usun repwe kutta ngasano seni nepoputan Adam me Eve. Nupwen ka kaeo Moses 6:48–68, kutta met mi namot sipwe sinei me fori ach sipwe ngaseno. Apareni an Adam ponuweni non uwokisin 53. En mi mwo ekieki ena? Met ka keao seni an ewe Samon ponuweni non uwokisin 53–65? En mi tongeni ekieki ekkei uwokisin pwe ir an ewe Samon porous atun an Adam fenin papatais. Met ka kaeo usun papatais seni An porous? Pwata ka ekieki I a anonnou papatais ngeni ach “upusefan”? (uwokisin 59). Met en mi tongeni fori om kopwe sopweno ne “upusefan” non unusen manauom?

Mwirin an aiti Adam ekkewe ennetin ewe kapas allimen Jises Kraist, non Moses 6:51–63, ewe Samon a ureni Adam pwe epwe aitir ngeni tappin aramasan non fansoun mwach. Ekieki om kopwe fori eu tettenin ekkei ennet. (Meni epwe aninisoch ne eimufeseni ekkewe porous non kukkun mwichen uwokisin, usun ren uwokisn 51–52, 53–57, 58–60, 61–63). Pwata ekkei ennet ra auchea ngeni ekkewe maritan tappin aramas ikenai? Pwan met ka tongeni kaeo seni an ewe Samon aurour ngeni sam me in non Mosaia 4:14–15 me Doctrine and Covenants 68:25–28; 93:40–50?

Anneani usun ewe “puken achechem” an Adam me Eve famini ra isoni epwe pesek ika om famini ami oupwe fori pwisin noum puken achechem. Met ka mefi ewe Samon a mochen kopwe apachanong non? Ekieki om kopwe tumunu porous seni noum we puken achechem won FamilySearch.org

Nengeni pwan Dieter F. Uchtdorf, “Jesus Christ Is the Strength of Parents,” Liahona, May 2023, 55–59; “Parenting: Touching the Hearts of Our Youth,” “But Why?” (videos), Gospel Library.

• Nupwen Enoch a kokko ngeni an epwe afanafana ewe kapas allim, a aureki ika epwe tur. Nge Kot a anisi i. Annea fengeni ei porous non Moses 6:26–34 (nengeni pwan “Enoch the Prophet” non Porousen Testamen Noom, 19–21). Pwata Enoch a mefi pwe i ese tongeni afanafana ewe kapas allim? (Nengeni Moses 6:31). Ifa usun Kot a anisi Enoch? (nengeni Moses 6:32–34; 7:13).

• Noum kewe semirit repwe pwapwaiti ar repwe aporousa ika pwomeni ekkoch awewen nupwen Kot a anisi aramas ne fori mettoch mi weires—ren awewe, Noah, David, Ammon, ika Samuel ewe Chon Leiman (nengeni Gospel Art Book, nos. 7, 19, 78, 81). Ka pwan tongeni aporousa eu mettoch a fis ngonuk me mut ngeni noum kewe semirit repwe aprousa ifa usun Kot a anisir ne fori mettoch mi weires.

• Kot a aiti Adam met mi namot ngeni kich ne niwin ngeni I—epwe wor nuku non Jises Kraist, aier, sipwe papatais, me angei ewe Ngun mi Fel. Anisi noum kewe semirit repwe kutta ekkei nongonong non Moses 6:52, 57. Mwirin ka tongeni anisir ne makkei eu mwochomwochen afanafan usun eu me nein ekkewe nongonong. Eu me eu afanafan mi tongeni pachenong eu uwokisin seni Moses 6, eu mettoch mi fis ngenir, me eu kapasen pwarata. Mut ngenir repwe apasa fengeni ar kewe afanafan.

• Ka pwan tongeni pwari ekkoch sasing mi tupuni ekkewe aewin nongonongen ewe kapas allim (nengeni ewe aruwanun nongonongen achifoua). Waretiw non tetten repwe emwen ngeni echo sasingin Jises Kraist. Nupwen ka anneani Moses 6:52, noum kewe semirit ra tongeni uta unukun ewe sasing mi pung nupwen ra rong ekkewe kapas ewe sasing a tupuni.

• Noum kewe semirit ra tongeni pwapwaiti ar repwe konu ekkoch kon mi afanafana ekkewe nongonong non Moses 6:52, usun ren “Faith,” “When I Am Baptized,” me “The Holy Ghost” (Noun Semirit Puken Kon, 96–97, 103, 105). Anisir repwe kutta ekkei nongonong non Moses 6:52.

• Kopwe pesei noum kewe semirit ar repwe anisi semer me iner kewe non wiser usun sensen kapas allim, ekieki om kopwe tingorei emon semirit epwe anneani Moses 6:58 me affata ewe annuk Kot a ngeni sam me in. Mwirin ka tongeni pwari echo sasingin Adam me Eve ra aiti nour kewe semirit (usun ewe eu nesoponon ei kokkot) me mut ngeni noum kewe semirit repwe kapas usun met ra kuna non ewe sasing. Noum kewe semirit ra tongeni chungani sasingin ar kewe famini ra annea fengen ekkewe pukefel, iotek fengen, ika urumot fengen.