Moses 7

Nupwen ewe Soufos Joseph Smith a keran aewin kaeo usun Enoch me Teninimwan we mi Pin, i a pesepes. A “sinei ewe ran a wareto nupwen ewe Samon epwe forata sefan Saion won ewe fonufan” (Saints, 1:108–9), me i a poputani eu nakatamen manauen an epwe aueata Saion. Anneani Moses 7 a tongeni pesei kich ne sopweno ena achocho ikenai.

Kopwe tongeni poputa ren om nenengeni ekkewe kapaseis “Met Saion?” me Ifa usun mi sokkono seni unusen ewe fonufan?” Ekieki ne etettenatiw ponuwan mi feito reom nupwen ka kaeo Moses 7, akkaewin uwokisin 16–21, 27, 53, 62–69

Om ponuwen ekkei kapaseis meni repwe affataochu pwe mi chok chommong angang ne aueata Saion. Iwe ifa usun sipwe fori? Meni epwe anisi ne ekieki ekkoch fansoun nupwen ka mefi pwe ka “eu netip me eu ekiek” ngeni emon (Moses 7:18. Meni me non eu wart, famini, ika mwich non eu imwen angang ika sukun. Met aramas ra fori ne forata eu etipewin wenechar?

Ikkei pwan ekkoch pekin aninis en mi tongeni akkatoner ne kutta ekkoch ekiek me ourour. Fini eu ika chommong om kopwe kaeo, me mwirin makketiw met ka mefi ourur pwe kopwe fori ne aueta Saion.

• Philippians 2:1–4; 4 Nifai 1:15–18; Doctrine and Covenants 97:21; 105:5.

• Ulisses Soares, “Pwipwi me Momongeang non Kraist,” Liahona, Nov. 2023, 70–73.

• M. Russell Ballard, “Ew non Kraist,” Liahona, May 2023, 77– 77.

Met wewen ngonuk om ani Jises Kraist pwe om king? Apareni ekkewe pwan ekkoch itenapen Jises Kraist non ei uwokisin. Met ra aituk usun I? Met ekieki pwe wewen ne feito “non ren ewe tit me [tota] me ren [I]”?

Nengeni pwan “Come, O Thou King of Kings,” Kon mi fen, no. 59.

Ekkoch aramas ra nennengeni Kot usun emon ese chiechioch ewe ese wor an memmef ren met mi fis ngeni kich. Enoch a angei eu sokkonon ekiek usun Kot non ewe nemasepwi mi rekotitiw non Moses 7. Met a kaeo usun Kot—me met ka kaeo—non uwokisin 28–40? Pwata ka ekieki pwe Enoch a mairu ne kuna Kot a kechiw? Pwata mi ouchea ngonuk om kopwe sinei pwe I mi fori?

Nupwen ewe nemasepwi a soposopono, Enoch a pwan kechiw. Nge Kot a pwan ureni i ekkoch popun an epwe pwapwa. Kutter non Moses 7:41–69. Met ka kaeo seni an Enoch nemasepwi minne a tongen anisuk ne “seikata netipom, me pwapwa,” inamo ewe “netipengaw” non manauom (uwokisin 44)?

Nengeni pwan Jeffrey R. Holland, “The Grandeur of God,” Liahona, Nov. 2003, 70–73.

An Enoch nemasepwi, akkaewin met mi rekotitiw non Moses 7:59–67, ina eu akkaewin osini non uruo usun an ewe Chon Amanau Oruan Wareto. Met a amwasangok usun ewe napanap ekkei uwokisin ra anapanapa ekekwe fansoun soponon? Ren awewe, ekieki ifa usun ka mefi pwe ekkewe osini seni uwokisin 62 ra pwonuta. Met ekkei kapas ra aituk usun an Kot angang non ekkewe fansoun soponon?

Nengeni pwan Henry B. Eyring, “Ekkewe Fefin non Saion,” Liahona, Nov. 2020, 67–69.

• Om kopwe anisi noum kewe semirit repwe kaeo usun Enoch me Saion, ka tongeni nounou “Enoch ewe Soufos” non Porousen Testamen Noom (19–21), ika ewe oruwan uwokisin seni “Follow the Prophet” (Noun Semirit Puken Kon, 110–11). Mwirin ka tongeni eisini noum kewe semirit repwe anisuk ne aporousa sefani ewe porous non pwisin ar kapas. Ekkewe sasingin Enoch non ei kokkot mi makketiw meni repwe aninisoch.

• Iei eu aan om kopwe anisi noum kewe semirit ne weweiti met wewen ach siwpe “eu netip me eu ekiek” (Moses 7:18): Fori eu ngasangas seni toropwe me fichietiw non kukkunun kinikin, epwe naf ngeni emon me emon ekkewe semirit. Mut ngenir repwe makkei iter won nour kewe toropwe me angang fengen ne apacha fengeni ewe foun ngasangas. Nupwen ra fori, ka tongeni kapas usun mettoch ka sani usun emon me emon kewe semirit.

• Anisi noum kewe semirit repwe anneani fan fite ewe kapas “Saion” a pwa non Moses 7:18 -21,– 62, 68–69. Iteiten fansoun ra kuna ewe kapas, anisir ne kuna met ewe uwokisin a apasa usun Saion (nengeni pwan Emwen ngeni ekkewe Pukefel, “Zion,” Gospel Library). Ifa usun sia tongeni kon winiti usun ekkewe aramas mi anapanapetiw non ekkei uwokisin?

• Om kopwe esinei Moses 7:32–33 ngeni noum semirit, meni kopwe kapas ngenir usun eu pekin finata ra keran fori. Mwirin oua tongeni annea fengeni ekkewe uwokisin ren ami oupwe kutta met Samach non Nang a mochen sipwe fini. Met pekin finata sia tongeni fori ach sipwe pwarano pwe sia fini I? Meni noum kewe semirit ra tongeni nikesiwin ne pwomeni pomwen eu me nein ekkei pekin finata nupwen ekkewe ekkoch ra esinna met ewe foffor ra fori.

• Non Moses 7:59, Enoch a eisini ewe Samon eu kapaseis. Tingorei noum kewe semirit repwe kutta, me mwirin urenir repwe kutta ponuwan non uwokisin 60. En mi pwan tongeni kapas ngenir usun eu fansoun nupwen ra esuku emon epwe niwin ngeni neimw. Eisinir ifa usun ra mefi me met ra fori ar repwe monneta. Ifa usun sipwe monneta ngeni Jises an epwe niwin?

• Ekieki om kopwe pwari ekkoch sasingin fansoun nupwen ewe Chon Amanau a pwa ngeni aramas (usun Gospel Art Book, nos. 60, 82, 83, and 84). Met kewe aramas ra fori non ekkewe sasing? Epwe ifa usun an ekkewe aramas mefi nupwen ra churi Jises? Ka pwan tongeni konu echo kon usun an ewe Chon Amanau Oruwen Wareto, usun ren “When He Comes Again” (Noun Semirit Puken Kon, 82–83), Mut ngeni kewe semirit repwe aporousa ifa usun ra mefi usun ar kuna Jises nupwen I a niwin sefan.