“Ekiek sipwe Onomu non Ekiek: Ewe Pwon mi pin,” Feito, Tapweto Mwiri—Ren Imw me Mwichefen: Testamen Noom 2026 (2026)
“Ewe pwon mi pin,” Feito, Tapweto Mwiri: 2026
Kokkot sipwe Onomu non Ekiek
Ewe Pwon mi pin
Non unusen ewe Testamen Noom, kopwe soun anneani ewe kapas pwon mi pin. Ikenai sia kan ekieki pwon mi pin pwe usun pwon mi monomon ren Kot, nge non ewe fonuen nom, pwon mi pin ir pwan eu auchean kinikinin an aramas foffor fengen. Fan iten tumunur me amanauer, a nomot ngeni aramas ar repwe tufichin epinukunuk fengen, me pwon mi pin ir eu aanen tumunu ena epinukunuk.
Iwe nupwen Kot a kapas ngeni Enoch, Noah, Moses, me ekkoch usun ekkewe pwon mi pin, I a tingorer ar repwe tonong non eu epinukunukun nefin ngeni I. Sia eita ngeni ei pwon mi pin ewe minafon pwon mi pin ese much ika ewe an Abraham pwon mi pin—eu kapasen ewe pwon mi pin Kot a fori ren Abraham me Sarah me mwirin eminafosefani ren mwirimwirir Isaac me Jacob (a pwan iteni Israel). Non ewe Testamen Noom, a chok fateno pwe “ewe pwon mi pin.” Kopwe kuna pwe ewe Testamen Noom ina nongonongen ewe porousen aramas kewe ra kuna pwe ir chon angei ei pwon mi pin—ekkewe aramas pwon.
Ewe an Abraham pwon mi pin a soposopono an epwe auchea ikenai, akkaewin ngeni Aramas mi pin non Fansoun soponon. Pwata? Pokiten kich pwan ekkewe aramas pwon, ika are esap kich wesewesen seni mwirimwirin Abraham, Isaac, me Jacob. Ren ei popun, mi auchea ne weweiti met ewe an Abraham pwon mi pin me ifa usun a wewe ngeni kich ikenai.
Met ewe an Abraham Pwon mi pin?
Abraham a mochen “an epwe emon chon tapweno mwirin wenechar mi napanap” (Abraham 1:2), iwe Kot a etiwanong i non eu pwonen nefin mi pin. Esap Abraham ewe a akkom ani ei mochen, me esap i ewe a akkom ne angei eu pwon mi pin. Pokiten, akkaewin, a fen eu pwon mi pin ese much. Abraham a kutta “ekkewe feioch an ekkewe sam” (Abraham 1:2)—feioch ra fen kawor me ren pwon mi pin ngeni Adam me Eve me mwirin ngeni aramas ekkewe ra achocho ne kukutta ekkei feioch.
An Kot pwon mi pin ren Abraham a pwonei feioch mi amwarar: eu feiochoun fonu repwe fonueni, eu watten mwirimwirin, mumuta ngeni angangepinin pristut, me eu it epwe sufon non chommong tappin fansoun epwe feito. Nge anongen ei pwon mi pin esap chok won ekkewe feioch Abraham me an famini repwe angei nge pwan won ewe feioch repwe fis ngeni unusen noun Kot semirit. “Kopwe eu feioch” Kot a affata, “me non en meinisin faminien fonufan repew feiochj” (Genesis 12:2–3).
Met ei pwon mi pin mi ngeni Abraham, Sarah, me mwirimwirir kewe eu kinikinin tufich me nein noun Kot semirit? Non ewe chok weweoch pwe a eu tufich ne efeiochu ekkoch. Ewe faminien Abraham repwe afanafana ei angangen afanafan me Pristut ngeni unusen muu meinisin, aea ngeni ekkoch ekkewe feiochun ewe Kapas allim, minne ir ekkewe feiochun amanau, pwan mwo feiochun manau esemuch (Abraham 2:9, 11). Ren ar noun Kot aramas pwon esap wewen pwe ra murino seni ekkoch; a wewen pwe a wor wiser ne anisi ekkch repwe murino.
Ei pwon mi pin ina ewe feioch Abraham a aneanei. Mwirin an angei, Abraham a apasa non netipan, Noum chon angang a achocho ne kuttok; iei ua kunok (Abraham 2:12).
Ena a ngorou ier a no, nge ei pwon mi pin a fen niwinsefan non ach fansoun. Me iei mi pwonuta non manauen noun Kot aramas. Ewe pwonutan ewe pwon mi pin mi mwitir ammwokutun non ekkewe fansoun soponon usun an Kot angang mi fefeino, ne efeiochu aramas non unusen fonufan. Me ion, usun Abraham, a mochen epwe emon chon tapweno mwirin wenechar mi napanap—ion a achocho ne kutta ewe Samon—ra tongeni winiti kinikinin.
Met Wewen an Abraham Pwon mi pin ngeni Ei?
En emon semiritin ewe pwon mi pin. Ka fori eu pwon mi pin ren Kot nupwen ka papatais me nupwen ka angei ewe sakrament. Me ka angei ewe unusochun ewe pwon mi pin fiti ekkewe angangepinin ewe tempel mi pin.
Seni ekkei pwon mi pin me angangepin, sia winiti noun Kot aramas. Sia fofo ngeni I “ren fofo esemuch”. “Nupwen sia fori eu pwon mi pin ren Kot,” Preseten Russell M. Nelson a aiti kich, “sia nikiti ewe neni nukunapan feinfeino. Kot esap nikiti nefinan seni ekkewe ra fen fori ena sokkun fofor ngeni I. Ennetin, meinisin ekkewe ra fen fori ew pwon mi pin ren Kot a wor ar mumuta ngeni eu sokkun auchean tong me umoumoch. … Pokiten ach pwon mi pin ngeni Kot, I esap tongeni apwangapwang non An achocho ne anisi kich, me sisap tongeni apekusu An umoumochun tipepos ngeni kich.” Kopwe kuna ei non ewe uruon noun Kot aramas pwon me non ewe Testamen Noom, me kopwe kuna pwisin non manauom usun emon me nein Noun semiritin pwon.
Be Not Afraid [Kosap Nuokus], seni Dan Wilson
Iei ewe auchean weweoch a kawor ngeni kich pokiten ewe Niwinsefaniton an Abraham pwon mi pin me ren ewe Soufos Joseph Smith. Iwe nupwen ka anneani usun pwon mi pin non ewe Testamen Noom, kosap chok ekieki usun nefinen Kot ngeni Abraham, Isaac, me Jacob. Ekieki pwan usun Nefinan ngonuk. Nupwen ka anneani usun pwonen chommongun mwirimwirin kose tongeni anneani, kosap chok ekieki usun ekkewe minion kewe ikenai ra eita ngeni Abraham semer. Ekieki pwan usun an Kot pwon ngonuk usun famini esemuch me feifeita esemuch Nupwen ka anneani usun ewe pwonen eu fonu an kewe neuo, kosap chok ekieki usun ewe fonu a pwon ngeni Abraham. Ekieki pwan usun ewe fetanin manauen ewe pwisin fonufan non selestial—eu neni mi pwon ngeni ekkewe mi “tipetekison” kewe “ra ewitiwiti ewe Samon” (Matthew 5:5; Psalm 37:9, 11). Me nupwen ka anneani usun ewe pwon pwe noun Kot kewe aramas pwon repwe efeiochu “meinisin ekkewe faminien ewe fonufan” (Abraham 2:11), kosap chok ekieki usun ewe angangen afanafan an Abraham ika ekkewe soufos kewe ra feito seni i. Ekieki pwan usun met ka tongeni fori—usun emon chon tapweno mwirin Jises Kraist non pwon mi pin—om kopwe ew feioch ngeni ekkewe aramas unukum.