Genesis 3–4; Moses 4–5

Mi pung pwe an Adam me Eve finata a emwen ngeni ekkewe chommong weires sia mefi non fansoun manauach iei. Nge ena esap wewen pwe sia niemam ren ar finata. Nupwen ka anneani Genesis 3 me Moses 4, ka tongeni eisinuk pwisin, pwata ewe Turutiw a auchea ngeni an Kot kokkot?

Anongonong ngeni Moses 5:9–12, ifa usun Adam me Eve ra mefi usun ewe Turutiw? Ifa usun ka tongeni awewei ar kapas ngeni met a fis ngonuk non ei fonufan mi turutiw? Pwan met ka kaeo seni 2 Nifai 2:19–25?

Nengeni pwan Mosaia 3:19; Alma 12:21–37; and Doctrine and Covenants 29:39–43.

Porousen Adam me Eve eu porousen epinukunuk me ngaseno me ren Jises Kraist. Om kopwe kuna pwata, ka tongeni poputa ne kutta ekkewe popun ewe Turutiw non Genesis 3:1–7; Moses 4:22–31 me esisina ika makketiw met ka kuna. Ifa usun ekkei pungun ewe turutiw ra siwinuk? Mwirin ka tongeni kutta Moses 5:4–15, kutta an Kot kokkot an epwe angasa kich seni ekkei ekkesiwin mi pwano non mettoch mi fis. Pwata Adam me Eve ra “pwapwa” mwirin an ewe chon nang a churir? Met oua kaeo senir usun an Samach non Nang kokkot?

Nengeni pwan “Because of Him” (fitio), Gospel Library.

2:44

Ei mak non pukefel fan ekkoch a wewengaw ngeni wewen pwe emon mwan mi pupunu mi pungoch non an epwe foffor ngeni punuwan non kirikiringaw. Non ach fansoun, noun ewe Samon soufos ra afanafana pwe emon mwan me fefin ir pupunu repwe nennengeni fengenir non nonno pok ne apwonueta wiser non ewe famini (nengeni “Ewe Famini: Eu Esinesin ngeni ewe Fonufan” [Gospel Library]). Elter Dale G. Renlund me Sister Ruth Lybbert Renlund ra awewei pwe emon mwan mi pupunu mi wenechar “epwe kutta an epwe iamwir; i epwe weweiti muan me kutta omusomus; i epwe mwitir ne awora mwar; i epwe ekiekochu met chochon ewe famini ra mochen; i epwe mefi ewe watten wis an epwe awora ‘met mi namot ngeni manau me tumunun’ an famini; i epwe tumunu punuwan ren watten sufon me afaniochu. … I epwe efeiochu an famini” (Ewe Melkisetek Pristut: Weweiti ew Nongonong, Manaueni ekkewe Nongonong [2018], 23).

Nupwen Elder Dale G. Renlund a afanafana, “An Samach non Nang auchean popun non an tumun ngeni noun kewe esap ren an noun kewe semirit repwe fori met mi pung; nge ren an noun kewe semirit repwe finata ar repwe fori met mi pung me winiti ussun I” (“Choose You This Day,” LiahonaNov. 2018, 104). Pwata mi fokkun auchea non an Samach non Nang kokkot pwe sipwe fini ne fori met mi pung?

Nupwen ka anneani Moses 4:1–4, kutta met Samach non Nang me Jises Kraist ra fori ne tumunu om pungun finata—om tufichin finata. Ifa usun ka tongeni angei ar manamanen eppet? Ren ekkoch kokkot, ekieki ne kaeo ewe kinikin “Make inspired choices” non Ren ewe Pochokunen Serafo: Eu Emwen ren Fori Finiom (4–5).

Ekieki pwan ne anneani met Liai a afanafana usun pungun finata non 2 Nifai 2:11–20, 25–30. Pwata ungeni mi namot ngeni pungun finata? Ifa usun ka tongeni pwarano om kinisou ngeni Jises Kraist ren an fori om kopwe “ngaseno ne finata”? (2 Nifai 2:27).

Nengeni Dallin H. Oaks, “Opposition in All Things,” Liahona, May 2016, 114–17; Topics and Questions, “Agency,” Gospel Library; “Choose the Right,” Kon mi fen, no. 239.

Nupwen ka anneani Moses 4:4–12; 5:13–33, ekieki ne etetteni ekkoch aanen an Setan achoch ne sotuni Adam me Eve me nour kewe semirit. Ifa usun i a achocho ne fori ekkei pwan mettoch ikenai? Ifa usun Samach won Nang a anisuk ne ungeni an Setan nikatuputup?

Mwirin ar ochoch seni ewe foun ira mi annuk, Adam me Eve ra sotuni ne pwonuono pwisin ar seneno. Mwirinon, ewe Samon a fangafangoch an epew oufoufer. Nupwen ka anneani Moses 4:13–16, 27, ekieki ekkewe mi tettenitiw fan:

• Ekipwichi met seneno me ufouf ra tongen esisinata me non ekkewe pukefel (nengeni, ren awewe, Revelation 7:9, 13–15; 2 Nifai 9:14; Doctrine and Covenants 109:22–26, 76). Met ka kaeo seni met a fis ngeni Adam me Eve ren pekin seneno me ufouf?

• Ika ka fen endow me non ewe tempel, ekieki met Adam me Eve repwe fen apasa ngonuk usun ewe auchean om tempel garment me met mi tupuni.

Nengeni pwan ““Sacred Temple Clothing” (fitio), Gospel Library.

4:12

Nupwen ka anneani Moses 5:4–9, 16–26, ekieki napanapen Adam me Eve me nour kewe anuon Cain me Abel ngeni asor. Pwata ewe Samon a etiwa an Abel asor nge esap an Cain?

Met ewe Samon a tingoreok kopwe aani asor? Mi wor och mettoch non ekkei uwokisin mi anapanapa om ekiek usun ekkena asor?

• Kopwe anisi noum kewe semirit ar repwe weweochuiti ewe Turutiw an Atam me Eve, ka tongeni kapini ekkewe sasing seni “Adam and Eve” (non Porousen Testamen Noom, 13–16) me fichireu. Mwirin oua tongeni angang fengen ne etetteni ekkewe sasing nupwen oua aporousa met kewe a fis ngeni Adam me Eve. Nupwen oua fori, kapas usun pwata mi auchea, non an Samach non Nang kokkot, ren Adam me Eve ar repwe no seni ewe Tannipi Eden.

• Noum kewe semirit ra tongeni mefi kinisou ren ewe Achasefan an Jises Kraist nupwen ra weweiti ifa usun I a okkufu ekkewe mwirimiwirin ewe Turutiw. Nupwen oua anneani fengeni Moses 4:25; 6:48; Romans 5:12; 2 Nifai 2:22–23, anisi noum kewe semirit repwe kutta aanen ar repwe awesei ei sentence: “Pokiten ewe Turutiw, Ngang …” Mwirin, nupwen oua anneani Moses 5:8–11, 14–15; 6:59; Alma 11:42, ra tongeni awesi ei: “Pokiten Jises Kraist, Ngang …” Aporousa fengeni ami kinisou ren Jises Kraist.

• Ekieki eu mecheresin pisekin nesen ne aporousa ewe nongonongen pungun finata: tingorei noum kewe semirit repwe enuwa peichen urumotun ei wik, nge ngenir chok eu enuwan repwe nounou. Pwata epwe murino an epwe wor pekin finata? Mwirin ka tongeni annea fengeni Moses 4:1–4 me kapas usun pwata Kot a mochen kich sipwe tufichin finata nefinen och me ngaw. Ifa usun Samach non Nang me Jises Kraist ra anisi kich ne fori pekin finata mi och?

• Anisi noum kewe semirit repwe ekieki usun me chungani ekkoch sasingin pekin finata mi och ra tongeni fori ne tapweno mwirin Jises Kraist. Are oua tongeni kon fengeni echo kon usun fori mi pung, usun ren “Choose the Right Way” (Noun Semirit Puken Kon, 160–61). Oua tongeni ureni fengeni kemi usun eu fansoun nupwen oua fori eu ochun pekin finata me aporousa ifa usun oua mefi mwirin.

• Nupwen Adam me Eve repwene tou seni ewe Tannipi Eden, rese chiwen tongeni nom ren Samach non Nang. Anneani Moses 5:4, 8 fiti noum kewe semirit, me anisir ne kutta met Adam me Eve ra fori ar repwe mefi arap ngeni I me rongorong ngeni I. Met ekkoch mettoch sia tongeni apasa ngeni Samach non Nang non ach kewe iotek?