“Ekiek ach sipwe Onomu non Ekiek: Anneani ewe Testamen Noom,” Feito, Tapweto Mwiri—Ren Imw me Mwichefen: Testamen Noom 2026 (2026)
“Anneani ewe Testamen Noom,” Feito, Tapweto Mwiri: Testamen Noom 2026
Kokkot sipwe Onomu non Ekiek
Anneani ewe Testamen Noom
Nupwen Nifai a mochen pesei pwin kewe repwe nuku ewe Samon, a aporousa usun Moses me afanafan seni Isaiah. Nupwen ewe Aposel Paul a mochen pesei ekkewe akkomwen Souneng ar repwe nuku non an Kot kewe pwon, a achema ngenir usun ewe nuku an Noah, Abraham, Sarah, Rahab, me ekkoch. Me nupwen Jises Kraist a ureni ekkewe souemwenin ekkewe Jews ar repwe “kaeo ekkewe pukefel,” a awewei pwe ra “pwarata usui” (John 5:39), ekkewe pukefel I a kapas usun ir ekkewe mak sia eita ngeni ewe Testamen Noom.
Non ekkoch kapas, nupwen ka anneani ewe Testamen Noom, ka anneani kapas ra fen ouroura, ekinamwei, me pesei aramasen Kot ren wesewesen ngeroun ier.
Nge och mettoch a mak fansoun nom epwe wesen anisuk ne kuna atawen osukosuken ikenai? Ewer, mi tongeni! Akkaewin ika en mi chechemeni ion ewe Testamen Noom a ennetin porous ussun.
Eu Testamenin Jises Kraist
Met chok weires en me om famini oupwe mesengeni, ewe ponuwan epwe chok Jises Kraist fansoun meinisin. Iwe om kopwe kutta ponuwan me non ewe Testamen Noom, kutta I. Esap mecheres fansoun meinisin. Epwe namot om kopwe tipepos ne ekipwichi me kutta emwenin pekin ngun. Fan ekkoch ekkewe mak mi wewe ngeni I usun ir mi wenewen, usun non an Isaiah esinesin “Emon monukon a uputiw rech, emon at a kawor angeni kich: … me itan epwe iteni … Ewe Princen Kinamwe” (Isaiah 9:6). Non ekkoch neni, ewe Chon Amanau a ekis awewe, me ren esisin me nonnno fengen—ren awewe, me ren ewe anapanapen asoren man ika ewe uruon Joseph a omusano pwin kewe me angaser seni nengita.
Light of the World [Saramen ewe Fonufan], seni Scott Sumner
Ika ka kutta watten nuku non ewe Chon Amanau nupwen ka kaeo ewe Testamen Noom, kopwe kuna. Meni epwe iei met kopwe achocho ngeni non om kaeo non ei ier. Iotek pwe ewe Ngun epwe emwenuk ne kutta me anonga ekiek won ekkoch porous, tutunap, me osini minne repwe uweiuk kopwe arap ngeni Jises Kraist.
Tumun seni Nang
Kosap esuku ewe Testamen Noom pwe epwe awora eu unusochun me tichikin uruon aramas. Esap ina met ekkewe akkomen chon makkei me chon ochufengeni re sotuni ne forata. Ar watten aurek pwe repwe osukuna och mettoch usun Kot—usun An kokkot fan iten Noun semirit, usun met wewen ach sipwe noun aramas pwon, me ifa usun sipwe kuna ngasano nupwen sia tur. Fan ekkoch ra fori ren ar aporousa mettochun uruo usun ar weweitir, mi pachenong porous seni manauen soufos mi napanap. Genesis eu awewen ei, me pwan ekkewe puk usun Joshua, Sou-Apung, me 1 and 2 Kings. Nge ekkoch chon makkei Testamen Noom rese ekita ar repwe makkei uruo. Nge, ra aiti kich seni angangen sinenapen awewen memmef me sinenapen mak. Ewe Konupin me ewe Proverbs ra masenong non ei kinikin. Me mwirin mi wor ekkewe auchean kapas an soufos, usun ren Isaiah me Malachi, ekkewe ra apasa ewe kapasen Kot ngeni Isaiah nom—me, seni ewe manamanen ewe Paipen, mi chok kapas ngeni kich ikenai.
Met meinisin ekkei soufos, chon awewei memmef, me chon ochufengeni puk mi sinei pwe ar kapas repwe annea me ren aramas non unusen ewe fonufan fite ngorou ier mwirin? Sise sinei. Nge sia ingeno pwe iei wesewesen met a fis. Muu ra kauuta me tur, teninimw ra ono, king ra manau me mano, nge ewe Testamen Noom a manauetam senir meinisin, seni ew tappin aramas ngeni ew tappin aramas, chon mak ngeni chon mak, seni chiaku ngeni chiaku. Ewer ekkoch mettoch ra turuno ika siwin, nge inamo ren och wewe mi amwarar chommong ir mi tumun.
Old Testament Prophet [Soufosun Testamen Noom], seni Judith A. Mehr (tichikin)
Ikkei chok ekkoch mettoch kopwe ekieki nupwen ka anneani ewe Testamen Noom ei ier. Kot a tumunu ekkei makken nom pokiten I mi sinei en me met a fisi ngonuk. I a fen amonnata eu porousen pekin ngun fan itom non ekkei kapas, minne epwe akanok ngeni I me amari om nuku non An kokkot me Noun we Anamon. Meni I epwe emwenuk ngeni och porous ika eu porous minne epwe efeiochu emon en mi sinei—eu porous ka tongeni aporousa ngeni emon chienom, emon chon om famini, ika chiechiom Souneng. Mi chommong tufich. Ese amwarar ne ekieki usun?
Nifai a apasa, “nguni a pwapwaiti ekkewe pukefel” (2 Nifai 4:15). Meni kopwe mefi ena pwan chok napanap nupwen ka anneani chommong ekkewe chok kapas Nifai a anneani—met sia eita ngeni iei ewe Testamen Noom.
Puk non ewe Testamen Noom
Non napengeni noun Souneng kewe tettenin Testamen Noom, ekkewe puk ir mi sokkono etettenir seni ifa usun ra etetten nupwen ra akkom ioifengen non eu kochufengen. Iwe nupwen ewe Paipen non Hebrew mi etetteni ekkewe puk non unungat kinikin—ewe annuk, soufos, me mak—napengeni noun Souneng Paipen ra etetteni ekkewe puk non ruanu kinikin: annuk (Genesis–Deuteronomy), uruo (Joshua–Esther), puken awewei memmef (Job–Konun Solomon), me soufos (Isaiah–Malachi).
Pwata ekkei tetten ir mi auchea? Pokiten om sinei met sokkun puk ka kaeo a tongeni anisuk ne weweiti ifa usun om kopwe kaeo.
Iei och mettoch kopwe ekieki nupwen ka poputa ne anneani “ewe annuk,” ika ekkewe aewin nimu puken ewe Testamen Noom. Ekkei puk, minne ir akkom ra ewis ngeni Moses, meni ra keititiw seni poun chommong chon mak me chon ochufengenir non chommong fansoun. Me kich mi sinei ena, non ekkewe fite puku ier, “chommongun kinikinin minne ra fatafatoch me fokkun auchea” ra angeireno seni ewe Paipen (nengeni 1 Nifai 13:23–26). Inamo, ekkewe puken Moses ir ekkewe ourouren kapasen Kot, inamo ika ir—usun ekkoch angangen Kot ra keit ngeni aramas—repwe weri nikpwakingawen aramas (nengeni Moses 1:41; Nongonongen Achifoua 1:8). Ekkewe kapasen Moronai, a wewe ngeni ewe rekotun Puken Mormon mi pin minne i a anisi ne ochufengeni, ir mi aninisoch me ikei: “Are mi wor ekkoch mettoch mi muan epwene mwanin aramas; ina minne, ousap etipisi mettochun Kot” (peichen itenapen ewe Puken Mormon). Non ekkoch kapas, eu puken pukefel ese namot an esap wor muanin aramas an epwe kapasen Kot.