Gyenesis 3–4; Moses 4–5

Ɛyɛ nokorɛ sɛ deɛ Adam ne Hawa yiiɛ no na ɛde ɔhaw pii a yɛhyia wɔ asetena mu no baeɛ. Nanso ɛno nkyerɛ sɛ yɛnu yɛn ho wɔ deɛ wɔyiiɛ no ho. Berɛ a wokenkan Gyenesis 3 ne Moses 4, wobɛtumi abisa wo ho sɛ, adɛn nti na na Ahweaseɛ no ho hia ma Onyankopɔn nhyehyɛeɛ?

Sɛdeɛ Moses 5:9–12, kyerɛ no, sɛn na Adam ne Hawa tee nka wɔ Ahweaseɛ no ho? Sɛn na wobɛtumi de wɔn nsɛm no adi dwuma wɔ wo suahunu ahoroɔ wɔ wiase a ahwe aseɛ yi mu? Deɛn bio na wusua firi 2 Nephi 2:19–25?

San hwɛ Mosiah 3:19; Alma 12:21–37; ne Nkyerɛkyerɛ ne Apam 29:39–43.

Adam ne Hawa abasɛm no yɛ anidasoɔ ne ɔgyeɛ a ɛnam Yesu Kristo so. Sɛ wopɛ sɛ wohunu deɛ enti a, wobɛtumi ahyɛ aseɛ ahwehwɛ Ahweaseɛ no nsunsuansoɔ wɔ Gyenesis 3:1–7; Moses 4:22–31 na woayɛ ahyɛnso anaa woatwerɛ deɛ wobɛhunu. Sɛn na saa nsunsuansoɔ yi ka wo? Afei wobɛtumi ahwehwɛ Moses 5:4–15, ahwehwɛ Onyankopɔn nhyehyɛeɛ a ɔde bɛgye yɛn afiri saa nsunsuansoɔ yi mu. Adɛn nti na Adam ne Hawa “ani gyeeɛ” berɛ a ɔbɔfoɔ no kɔsraa wɔn akyire no? Deɛn na wosua firi wɔn hɔ fa Ɔsoro Agya nhyehyɛeɛ ho?

San hwɛ “Ɔno Nti” (sini), Asɛmpa Nwomakorabea.

2:44

Ɛtɔ da a wɔfa saa twerɛsɛm mu nkyekyɛmu yi nkyerɛaseɛ sɛ okunu wɔ hokwan sɛ ɔyɛ ne yere deɛ ɛnyɛ. Yɛn mmerɛ yi mu no, Awurade nkɔnhyɛfoɔ akyerɛkyerɛ sɛ ɛsɛ sɛ okunu ne ɔyere hunu wɔn ho wɔn ho sɛ ahokafoɔ a wɔyɛ pɛ wɔ wɔn ɔsoro asɛdeɛ dwumadie mu wɔ abusua no mu (hwɛ “Abusua: Dawurubɔ ma Wiase” [Asɛmpa Nwomakorabea]). Elder Dale G. Renlund ne Onuabaa Ruth Lybbert Renlund kyerɛkyerɛɛ mu sɛ okunu a ɔtene “bɛhwehwɛ sɛ ɔbɛsom; ɔbɛgye mfomsoɔ atom na wahwehwɛ bɔnefakyɛ; ɔbɛyɛ ntɛm de ayɛyie ama; ɔbɛdwene deɛ abusuafoɔ no pɛ ho; ɔbɛte asɛdeɛ a ɛmu yɛ duru kɛse nka a ɛne sɛ ɔde ‘asetena mu ahiadeɛ ne ahobammɔ’ bɛma n’abusua; ɔde obuo ne nnidie kɛseɛ pa ara bɛma ne yere. Ɔbɛhyira n’abusua” (Melkisedek Asɔfodie: Worete Nkyerɛkyerɛ no ase, Woredi Nyinasosɛm no so [2018], 23).

Elder Dale G. Renlund kyerɛkyerɛɛ sɛ, “Ɛnyɛ yɛn Soro Agya botaeɛ wɔ awofoɔyɛ mu ne sɛ ɔbɛma Ne mma ayɛ deɛ ɛtene; ɛyɛ sɛ ɔbɛma Ne mma ayi sɛ wɔbɛyɛ deɛ ɛtene na awieeɛ no wɔabɛyɛ te sɛ Ɔno” (“Choose You This Day,” Liahona, Obubuo 2018, 104). Adɛn nti na ɛho hia yie wɔ Ɔsoro Agya nhyehyɛeɛ mu sɛ yɛyi sɛ yɛbɛyɛ deɛ ɛtene?

Berɛ a wokenkan Moses 4:1–4, hwehwɛ deɛ Ɔsoro Agya ne Yesu Kristo yɛeɛ de bɔɔ wo hokwan a wowɔ sɛ woyi ho ban—wo pɛ. Wobɛyɛ dɛn anya wɔn bammɔ tumi no ho kwan? Sɛ wopɛ nsusuiɛ a, dwene ho sɛ wobɛsua ɔfa a ɛyɛ “Make inspired choices” wɔ De ma Mmabunu Ahoɔden: Woreyi Ɔpɛ ho Akwankyerɛ (4–5).

Dwene ho nso sɛ wobɛkenkan deɛ Lehi kyerɛkyerɛ faa ɔpɛ ho wɔ 2 Nephi 2:11–20, 25–30. Adɛn nti na sɔretia ho hia ma ɔpɛ? Sɛn na wobɛkyerɛ w’anisɔ ama Yesu Kristo sɛ wama “wode wo ho sɛ wobɛyi”? (2 Nephi 2:27).

San hwɛ Dallin H. Oaks, “Sɔretia wɔ Nneɛma Nyinaa mu,” Liahona, Kɔtɔnima 2016, 114–17; Tinsɛm ne Nsɛmmisa, “Ɔpɛ,” Asɛmpa Akoraeɛ; “Yi deɛ Ɛyɛ,” Nnwom, no 239.

Berɛ a wokenkan Moses 4:4–12; 5:13–33, dwene ho sɛ wobɛtwerɛ akwan ahoroɔ a Satan faa so bɔɔ mmɔden sɛ ɔbɛsɔ Adam ne Hawa ne wɔn nkwadaa ahwɛ no. Sɛn na ɔbɔ mmɔden sɛ ɔbɛyɛ saa nneɛma korɔ yi nnɛ? Sɛn na Ɔsoro Agya boa wo ma wosi Satan nnaadaa kwan?

Berɛ a Adam ne Hawa dii aduaba a wɔabara no akyi no, wɔbɔɔ mmɔden sɛ wɔbɛkata wɔn ankasa adagya so. Akyire yi, Awurade hyɛɛ wɔn ntaadeɛ. Berɛ a wokenkan Moses 4:13–16, 27, dwene deɛ ɛdidi soɔ yi ho:

• Dwene deɛ adagya ne ntaadeɛ bɛtumi agyina hɔ ama ho wɔ twerɛnsɛm no mu (hwɛ, sɛ nhwɛsoɔ, Adiyisɛm 7:9, 13–15; 2 Nephi 9:14; Nkyerɛkyerɛ ne Apam 109:22–26, 76). Deɛn na wosua firi Adam ne Hawa adagya ne ntaadehyɛ ho suahunu no mu?

• Sɛ woagye akyɛdeɛ kronkron wɔ tɛmpol mu a, dwene deɛ Adam ne Hawa betumi aka akyerɛ wo fa deɛ w’ataadeɛ kronkron no kyerɛ ne deɛ ɛgyina hɔ ma ho.

San hwɛ “Tɛmpol Aduradeɛ Kronkron” (sini), Asɛmpa Akoraeɛ.

4:12

Berɛ a wosua Moses 5:4–9, 16–26, dwene Adam ne Hawa ne wɔn mma Kain ne Habel suban wɔ afɔrebɔ ho no ho. Adɛn nti na Awurade gyee Habel afɔrebɔ no toom na wannye Kain deɛ no?

Deɛn na Awurade ka sɛ fa bɔ afɔreɛ? So biribi wɔ nkyekyɛmu ahoroɔ yi mu a ɛkyerɛ sɛdeɛ wodwene fa saa afɔrebɔ ahoroɔ no ho?

• Sɛdeɛ ɛbɛboa ma wo nkwadaa ate Adam ne Hawa Ahweaseɛ ase yie no, mobɛtumi ayɛ mfonin ahoroɔ nhwɛsoɔ afiri “Adam ne Hawa” (wɔ Apam Dada Abasɛm, 13–16) na moatwitwa. Afei mobɛtumi abom ahyehyyɛ mfonin ahoroɔ no nnidisoɔ nnidisoɔ berɛ a mobɔ Adam ne Hawa suahunu ahoroɔ ho nkɔmmɔ. Berɛ a moreyɛ no, monka deɛ enti a na ɛho hia, wɔ Ɔsoro Agya nhyehyɛeɛ mu, sɛ Adam ne Hawa bɛfiri Eden Turo no mu.

• Wo nkwadaa bɛtumi ate aseda nka wɔ Yesu Kristo Mpata no ho berɛ a wɔte sɛdeɛ Ɔdi Ahweaseɛ no nsunsuansoɔ so nkonim ase. Berɛ a mobom kenkan Moses 4:25; 6:48; Romanfoɔ 5:12; 2 Nephi 2:22–23, boa wo nkwadaa ma wɔnhwehwɛ akwan a wɔbɛfa so awie kasamu yi: “Esiane Ahweaseɛ no nti, me ” Afei, berɛ a mobom kenkan Moses 5:8–11, 14–15; 6:59; Alma 11:42, wɔbɛtumi awie kasamu yi: “Yesu Kristo nti, me ” Mo ne mo ho nkyɛ mo aseda ma Yesu Kristo.

• Dwene adesua a ɛnyɛ den bi a wode bɛkyerɛ nnyinasosɛm a ɛfa ɔpɛ ho: ma wo nkwadaa nkɔla nnawɔtwe yi dwumadie kratafa no, nanso ma wɔn kɔla baako pɛ na wɔmfa nyɛ. Adɛn nti na ɛbɛyɛ papa sɛ wobɛnya nneɛma a wobɛtumi ayi? Afei mobɛtumi abom akenkan Moses 4:1–4 na moaka deɛ enti a Onyankopɔn pɛ sɛ yɛtumi yi papa ne bɔne. Sɛn na Ɔsoro Agya ne Yesu Kristo boa yɛn ma yɛyi nneɛma pa?

• Boa wo nkwadaa ma wɔnnwene nneɛma pa a wɔbɛtumi ayi de adi Yesu Kristo akyi ho na wɔnyɛ ho mfonin. Anaasɛ mobɛtumi abom ato dwom bi a ɛfa nneɛma pa a yɛyi ho, te sɛ “Choose the Right Way” (Nkwadaa Nnwomnwoma, 160–61). Mobɛtumi aka berɛ bi a moyii deɛ ɛyɛ akyerɛ mo ho mo ho na moaka sɛdeɛ motee nka wɔ ɛno akyi no ho asɛm.

• Berɛ a na ɛsɛ sɛ Adam ne Hawa firi Eden Turo no mu no, wɔantumi anka Ɔsoro Agya ho bio. Wo ne wo nkwadaa nkenkan Moses 5:4, 8 na boa wɔn ma wɔnhunu deɛ Adam ne Hawa yɛeɛ ma wɔtee nka sɛ wɔbɛn No na wɔtie No. Nneɛma bɛn na yɛbɛtumi aka akyerɛ Ɔsoro Agya wɔ yɛn mpaebɔ mu?