“Janueri 19–25. Pundaun bilong Adam na Iv: Stat 3–4; Moses 4–5,” Kam, Bihainim Mi—Bilong Haus na Sios: Olpela Testamen 2026 (2026)

“Janueri 19–25. Pundaun bilong Adam na Iv,” Kam, Bihainim Mi: 2026

Adam and Eve, Douglas M. Fryer i mekim

Janueri 19–25: Pundaun bilong Adam na Iv

Stat 3–4; Moses 4–5

Pastaim tru, stori bilong Adam na Iv i luk olsem wanpela bikpela hevi. Bikpela i rausim tupela go aut long Gaden Iden. Tupela i go long graun bilong pilim pen, sore, na dai (lukim Stat 3:16–19). Na ol stap longwe long Papa long Heven. Tasol ol tok tru Bikpela i soim Profet Josep Smit insait long buk bilong Moses i givim yumi narakain tingting long pundaun bilong Adam na Iv.

Yes, em i tru olsem Gaden Iden i nais tru. Tasol Adam na Iv i nidim moa long wanpela naispela ples bilong stap. Ol nid—wankain long yumi olgeta—long gro. Taim ol lusim Gaden Iden, em namba wan samting bilong go bek long God na kamap olsem Em. Dispela em i olsem bai ol tingting pait, ol bai mekim asua, ol bai lainim long tanim bel, na ol bai bilip long Jisas Krais, husat Ofa bilong em i mekim yumi ken wokabaut go het long dispela rot na kisim “amamas bilong Bikpela i kisim bek yumi” (Moses 5:11). Olsem na taim yu ritim Pundaun bilong Adam na Iv, noken lukluk tasol long hevi i kamap, tasol long ol samting i bai kamap—i no dispela gutpela ples tupela i lusim tasol dispela glori yumi bai kisim, long wanem, tupela i mekim olsem.

Ol Sampela Tingting bilong Lainim long Haus na long Sios

Stat 3; Moses 4

Pundaun bilong Adam na Iv em wanpela bikpela samting insait long plen bilong God.

Em i tru olsem kaikai bilong pasin Adam na Iv i mekim em ol hatpela samting i kamap long yumi long dispela laip. Tasol yumi i no inap long noken wanbel long samting tupela i mekim. Taim yu ritim Stat 3 na Moses 4, ating yu bai askim yu yet, bilong wanem na Pundaun bilong Adam na Iv i bikpela samting long plen bilong God?

Long Moses 5:9–12, Adam na Iv i pilim wanem samting long Pundaun bilong tupela? Yu ken putim toktok bilong tupela long ol samting i kamap long yu long dispela graun bilong sin na dai olsem wanem? Yu lainim wanem moa long 2 Nifai 2:19–25?

Lukim tu Mosiah 3:19; Alma 12:21–37; na Doktrin na ol Kavanen 29:39–43.

Iv i holim kaikai bilong diwai — Leaving Eden, Annie Henrie Nader i mekim

Stat 3:1–7; Moses 4:22–31; 5:4–15

Jisas Krais i save givim gutpela tingting bilong samting i kamap bihain na kisim bek yumi.

Stori bilong Adam na Iv i toktok long gutpela tingting bilong samting kamap bihain na pasin bilong baim bek Jisas Krais yet i ken givim. Long lukim wanem as bilong dispela, ritim wanem i kamap taim Adam na Iv i pundaun long Stat 3:1–7; Moses 4:22–31 na putim mak o mekim lista bilong ol samting yu painim. Ol dispela samting i senisim yu olsem wanem? Bihain, yu ken ritim Moses 5:4–15, long painim plen bilong God long kisim bek yumi long ol dispela samting. Bilong wanem na Adam na Iv i “amamas tru” taim ensel kamap long tupela? Yu lainim wanem long tupela, long plen bilong Papa long Heven?

Lukim tu “Because of Him” (vidio), Gospel Library.

Stat 3:16; Moses 4:22

Wanem as bilong Iv mas stap “aninit” long Adam?

Sampela taim ol i save tanim as bilong dispela ves i go olsem ol man i ken mekim nambaut long ol meri bilong ol. Long taim bilong yumi nau, ol profet bilong Bikpela i skulim yumi olsem man na meri husat i marit i mas stap wanpela tasol long mekim wok God i makim ol long mekim insait long famili (lukim “The Family: A Proclamation to the World” [Gospel Library]). Elda Dale G. Renlund na Sista Ruth Lybbert Renlund i tok klia olsem wanpela stretpela papa “bai mekim wok bilong helpim famili; em bai luksave long asua em mekim na askim long lusim asua bilong em; em bai mekim gutpela toktok kwiktaim; em bai tingting long wanem ol famili i laikim; em bai pilim olsem em gat bikpela wok bilong givim ‘ol samting bilong oraitim na lukautim laip’ long famili bilong em; em bai rispektim tru meri bilong em. … Em bai blesim famili bilong em (The Melchizedek Priesthood: Understanding the Doctrine, Living the Principles [2018], 23).

Moses 4:1–4

Long gro, mi mas gat laik bilong mekim samting mi laikim, na i mas gat ol tingting bilong pait long dispela.

Elda Dale G. Renlund i skulim yumi olsem, “Namba wan tingting bilong Papa bilong yumi, em i no bilong mekim ol pikinini bilong Em mekim stretpela samting; tasol Em laik bai ol pikinini bilong Em skelim na mekim stretpela samting, bilong kamap olsem Em bihain taim” (“Choose You This Day,” Liahona, Nov. 2018, 104). Bilong wanem na em bikpela samting long plen bilong Papa long Heven, long yumi skelim na mekim stretpela samting?

Taim yu ritim Moses 4:1–4, lukim wanem Papa long Heven na Jisas Krais i mekim long lukautim laik bilong yu. Yu ken kisim dispela pawa bilong banisim yu olsem wanem? Long kisim sampela moa tingting, yu ken ritim “Make inspired choices” insait long For the Strength of Youth: A Guide for Making Choices (4–5).

Yu ken ritim wanem Lihai i skulim yumi, long dispela laik yumi wan wan gat, long 2 Nifai 2:11–20, 25–30. Bilong wanem na ol tingting pait i stap bilong helpim laik bilong yu? Bai yu soim bel amamas bilong yu long Jisas Krais long mekim yu “fri long laikim na mekim ol samting” olsem wanem? (2 Nifai 2:27).

Lukim tu Dallin H. Oaks, “Opposition in All Things,” Liahona, Mei 2016, 114–17; Topics and Questions, “Agency,” Gospel Library; “Choose the Right,” Hymns, no. 239.

Mekim planti i laik lainim samting tu. Ol i ken mekim planti ektiviti bilong lainim wan wan, olsem famili, o klas; insait long ol liklik grup; o tupela tupela. Yusim ol rot bilong larim olgeta long tek pat. Long dispela ektiviti, yu ken askim wanpela long ritim Moses 4 na For the Strength of Youth buk taim ol narapela i ritim ol ves bilong 2 Nifai 2. Bihain ol i ken skulim ol yet long wanem ol i lainim insait long ves na buk ol i ritim.

Moses 4:4–12; 5:13–33

Setan i laik long “trikim mi na mekim mi aipas.”

Taim yu ritim Moses 4:4–12; 5:13–33, yu ken mekim lista bilong wanem rot Setan i laik trikim Adam na Iv na ol pikinini bilong tupela. Em laik mekim ol dispela wankain samting long nau olsem wanem? Papa long Heven bai helpim yu winim ol giaman bilong Setan olsem wanem?

Moses 4:13–15, 27

“Mi Bikpela God … pasim klos long tupela.”

Bihain long tupela i kisim kaikai bilong diwai God i tambuim, Adam na Iv traim long haitim skin bilong tupela. Bihain, Bikpela i givim klos long tupela. Taim yu ritim Moses 4:13–16, 27, skelim ol dispela samting:

Skelim, skin nating i makim wanem, na klos i makim wanem insait long tok bilong God (lukim, kain olsem long Kamapim Tok Hait 7:9, 13–15; 2 Nifai 9:14; Doktrin na ol Kavanen 109:22–26, 76). Yu lainim wanem long samting kamap long Adam na Iv, long stap skin nating na long pasim klos?
Sapos yu kisim pinis endaumen long tempel, tingim wanem Adam na Iv bai tokim yu long ol klos bilong tempel yu werim, na em makim wanem samting.

Lukim tu “Sacred Temple Clothing” (video), Gospel Library.

Moses 5:4–9, 16–26

God bai wanbel long ol ofa bilong mi sapos mi ofaim wantaim gutpela bel na pasin bilong harim tok.

Taim yu ritim Moses 5:4–9, 16–26, skelim pasin bilong Adam na Iv na tupela pikinini man bilong tupela Kein na Abel long pasin bilong mekim ofa. Bilong wanem na God i wanbel long ofa bilong Abel na i no bilong Kein?

Bikpela i askim yu long ofaim wanem samting? I gat sampela samting insait long ol dispela ves i senisim rot yu save tingting long ol dispela ofa, o nogat?

Long kisim sampela moa tingting, lukim Liahona na For the Strength of Youth megesin bilong dispela mun.

Ol Sampela Tingting bilong Lainim ol Pikinini

Stat 3; Moses 4; 5:8–15

Jisas Krais i kisim bek yumi long dispela Pundaun.

Long helpim ol pikinini bilong yu save gut long Pundaun bilong Adam na Iv, yu ken mekim kopi bilong ol piksa long “Adam and Eve” (insait Old Testament Stories, 13–16) na katim ol. Bihain yupela ken putim ol dispela piksa long oda taim yupela toktok long samting kamap long Adam na Iv. Taim yupela i mekim olsem, toktok long wanem as dispela i bikpela samting, long Adam na Iv i lusim Gaden Iden.
Ol pikinini bilong yu ken pilim bel gut long ofa Jisas Krais mekim bilong kisim bek ol taim ol save gut long wanem rot em i save winim sin na dai, em ol samting Pundaun bilong Adam na Iv i kamapim. Taim yupela ritim wantaim Moses 4:25; 6:48; Rom 5:12; 2 Nifai 2:22–23, helpim ol pikinini bilong yu painim ol rot bilong pinisim dispela toktok: “Adam na Iv i pundaun, olsem na mi …” Bihain, taim yupela ritim wantaim Moses 5:8–11, 14–15; 6:59; Alma 11:42, ol i ken pinisim dispela toktok: “Long Jisas Krais tasol na mi …” Toktok namel long yupela long belgut bilong yupela long Jisas Krais.

Moses 4:1–4

Mi ken laikim long mekim ol stretpela samting.

Tingim wanpela isipela samting yu ken mekim bilong soim dispela laik yumi gat: askim ol pikinini bilong yu long kalarim pes bilong ol Praimeri bilong dispela wik, tasol givim ol wanpela kala tasol long yusim. Bilong wanem na em i gutpela long gat planti samting long makim? Bihain yupela i ken ritim wantaim Moses 4:1–4 na toktok long wanem as God i laik bai yumi ken skelim na makim namel long ol stretpela pasin na pasin nogut. Papa long Heven na Jisas Krais i ken helpim yumi laikim na mekim ol gutpela samting olsem wanem?
Helpim ol pikinini bilong yu tingting na droim ol piksa bilong sampela gutpela samting ol laikim bilong bihainim Jisas Krais. O yupela ken singim wanpela song i toktok laikim na mekim ol gutpela samting, olsem “Choose the Right Way” (Children’s Songbook, 160–61). Yupela ken tokim wanpela narapela long wanpela taim yupela i laikim na mekim gutpela samting, na toktok long yu pilim olsem wanem bihain long yu mekim olsem.

Adam na Iv — The Fall, Robert T. Barrett i mekim

Moses 5:4, 8

Mi ken beten go long Papa long Heven.

Taim Adam na Iv lusim Gaden Iden, tupela i no inap stap moa wantaim Papa long Heven. Ritim Moses 5:4, 8 wantaim ol pikinini bilong yu, na helpim ol painim wanem Adam na Iv i mekim long go klostu long Em na harim Em. Wanem sampela samting yumi save tok long Papa long Heven taim yumi beten?

Long kisim sampela moa tingting, lukim Friend piksa buk bilong dispela mun.

Adam na Iv wantaim wanpela sipsip bilong ofa antap long alta — In Similitude of the Sacrifice of the Only Begotten of the Father, Mike Malm i mekim (lukim Moses 5:5–9)

Pes bilong ol Praimeri: Pundaun bilong Adam na Iv — In Similitude of the Sacrifice of the Only Begotten of the Father, Mike Malm i mekim (lukim Moses 5:5–9)